• „Hori dek’ati!”
    „Preiki finfini” fu Gado Kownukondre

    • 10. Sortu bigi sondu den taki dati Paulus du?

      10 Na ini Sesareya den ’poti Paulus na ini na oso fu Kownu Herodes èn den hori wakti gi en’. A ben musu wakti drape, teleki den sma fu Yerusalem di ben feni taki a du ogri, ben doro (Tori 23:35). Feifi dei baka dati, Granpriester Ananias doro drape makandra nanga wan grupu owruman èn nanga Tertulus, di ben de wan afkati fu den Dyu èn wan bun takiman. A fosi sani di Tertulus du na fu prèise Feliks gi den sani di a ben e du gi den Dyu. Soleki fa a sori, dan a ben korkori Feliks nanga moi wortu fu kisi wan bun nen na a granman disi.b Di Tertulus bigin taki fu a tori, dan a taki fu Paulus: „A man disi e tyari problema nanga dyugudyugu kon na mindri den Dyu na heri grontapu èn a de wan fesiman fu wan kerkigrupu di den e kari den Nasaretsma. A pruberi tu fu pori a santafasi fu a tempel. Dati meki wi grabu en.” Ne den tra Dyu „teki [Tertulus] sei èn den bigin taki dati na so sani de trutru” (Tori 24:5, 6, 9). Efu den ben taki dati wan sma ben e gi trawan dek’ati fu opo densrefi teige tiriman, taki a ben de fesman fu wan kerkigrupu di ben e kori sma fu du ogri noso taki a ben doti a tempel, dan so wan sma ben kan kisi dedestrafu fu di den sani disi ben de bigi sondu.

  • „Hori dek’ati!”
    „Preiki finfini” fu Gado Kownukondre

    • b Tertulus taki Feliks tangi taki a ben e meki ’sani waka heri bun’ na ini a kondre. Ma fu taki en leti, na a ten di Feliks ben de granman sani no ben waka bun na ini Yudea, aladi sani ben e waka bun di den tra granman ben e tiri èn dati tan so teleki a ten di den Dyu opo densrefi teige a tirimakti fu Rome. Boiti dati, Tertulus ben lei tu di a taki dati den Dyu ben „de nanga bigi tangi” gi den kenki di Feliks tyari kon gi den. Ma fu taki en leti, furu fu den Dyu no ben lobi Feliks kwetkweti, fu di a ben pina den èn a ben strafu den na wan ogr’ati fasi te den ben wani opo densrefi teige en.​—Tori 24:2, 3.