’A lobi fu un alamala e kon moro tranga’
FURU rampu miti Yapan na ini 2004. Wan tu fu den ben de draiwinti, frudu, nanga gronseki. Den rampu disi ben kenki a libi fu furu sma srefisrefi, sosrefi di fu den Kotoigi fu Yehovah (Preikiman 9:11). Ma den problema disi ben gi den Kotoigi na okasi fu sori lobi gi den brada nanga sisa fu den.—1 Petrus 1:22.
Fu eksempre, hebi alen di fadon na ini a mun yuli, ben meki taki a watra fu wan liba na mindri fu Yapan, pasa a syoro. A frudu ben broko moro leki 20 oso fu Kotoigi fu Yehovah. Na ini wán Kownukondre zaal, a watra ben hei pikinmoro wán meter. Wantewante den Kotoigi fu den gemeente na ini a birti ben kon fu yepi. Sondro taki sma pai den, hondrohondro wrokoman ben kon fu puru a tokotoko na den oso. Na ini tu wiki a Kownukondre zaal ben krin èn ben meki kon bun baka.
Tapu 23 oktober, wan gronseki di ben tranga 6,8 tapu a schaal fu Richter, ben de na ini a srefi kontren dati. Sowan 40 sma lasi den libi, èn moro leki 100.000 sma ben musu froisi gowe fu den oso. Watra nanga faya no ben de. Aladi a presi pe a gronseki bigin ben de soso 50 kilometer moro fara, toku noti no ben pasa nanga a Kownukondre zaal di den ben meki bun baka na a ten fu a frudu. Wantewante den gebroiki a zaal leki wan presi pe sma ben kan feni yepi. Esi-esi den Kresten opziener ben go luku fa a e go nanga den brada nanga sisa fu den, èn den ben breiti fu si taki nowan fu den ben kisi mankeri noso dede. Frukufruku a tra mamanten, siksi Kotoigi di ben ondrofeni takru bakapisi fu a frudu na ini yuli, ben de klariklari fu tyari nyanyan nanga watra go na a kontren pe a gronseki ben de. Wan tu yuru nomo baka a gronseki, yepisani ben doro kaba.
Wan gemeente owruman e fruteri taki „den wan di ben ondrofeni takru bakapisi fu a frudu, ben wani yepi den wan di ben e pina fu a gronseki, bika den ben si disi leki wan okasi fu sori tangi gi a yepi di densrefi ben kisi. Den wroko tranga heri dei teleki lati neti. Èn den fesi ben brenki fu prisiri!”
Nowan frudu nanga nowan gronseki kan pori a lobi di e meki taki Kotoigi fu Yehovah de na ini wánfasi leki Kresten brada nanga sisa. Ma a de so, taki te rampu de, dan den Kresten e ondrofeni san na apostel Paulus ben taigi den Kresten brada nanga sisa na ini Tesalonika: „A lobi di ibriwan fu unu abi gi makandra, e kon moro tranga.”—2 Tesalonikasma 1:3.