LES 28
Sori warderi gi san Yehovah nanga Yesus du gi yu
Fa yu e firi te wan mati gi yu wan moi kado? Seiker yu o breiti èn yu o wani sori yu mati taki yu e warderi a kado. Yehovah nanga Yesus gi wi a moro bun kado di wi kan kisi. Dati na a lusu-paiman. Fa wi kan sori taki wi de nanga tangi gi a kado disi?
1. San na wan fasi fa wi kan sori warderi gi san Gado nanga Krestes du gi wi?
Bijbel e pramisi taki „ala sma di e bribi na ini [Yesus]” kan kisi têgo libi (Yohanes 3:16). Fa wi kan sori taki wi e bribi na ini Yesus? Wi no musu taki nomo taki wi e bribi na ini Yesus. Ma den bosroiti di wi e teki èn den sani di wi e du musu sori dati tu (Yakobus 2:17). Disi o yepi wi fu de bun mati fu Yesus nanga en Papa, Yehovah.—Leisi Yohanes 14:21.
2. Sortu prenspari konmakandra e gi wi na okasi fu sori warderi gi san Yehovah nanga Yesus du gi wi?
A neti fosi Yesus dede a taigi den bakaman fu en sortu tra sani den kan du fu sori warderi gi a lusu-paiman fu en. A taigi den fu hori wan spesrutu konmakandra di Bijbel e kari „a neti-nyanyan fu Masra” (1 Korentesma 11:20). Wi e kari a konmakandra disi a Memrefesa fu Krestes en dede. Yesus seti a fesa disi so taki den apostel fu en nanga ala tru Kresten ben o memre taki a dede gi den. A taigi den: „Tan du disi fu memre mi” (Lukas 22:19). Te yu e go na a Memrefesa, dan yu e sori taki yu de nanga tangi gi a bigi lobi di Yehovah nanga Yesus sori gi wi.
SORTU TRA SANI YU KAN LERI?
Wi o si sortu tra sani wi kan du fu sori warderi gi a bigi lobi di Yehovah nanga Yesus sori gi wi. Wi o si tu o prenspari a de fu hori a Memrefesa.
3. Tra fasi fa wi kan sori warderi
Kon meki wi taki dati yu de fu dede na watra, dan wan sma kon puru yu. Yu ben o frigiti san a sma dati du gi yu? Noso yu ben o suku fasi fu sori en taki yu e warderi san a du gi yu?
Yehovah seti sani fu gi wi têgo libi baka. Leisi 1 Yohanes 4:8-10 èn taki fu den aksi disi:
Fu san ede a lusu-paiman fu Yesus na a moro moi kado di wi kisi?
Fa yu feni a sani di Yehovah nanga Yesus du gi yu?
Fa wi kan sori warderi gi san Yehovah nanga Yesus du gi wi? Leisi 2 Korentesma 5:15 nanga 1 Yohanes 4:11; 5:3. Baka te yu leisi ibri tekst, taki fu na aksi disi:
Te yu luku san a tekst e taki, dan fa wi kan sori taki wi de nanga tangi?
4. Teki na eksempre fu Yesus
Wan tra fasi fa wi kan sori taki wi de nanga tangi na te wi e teki na eksempre fu Yesus. Leisi 1 Petrus 2:21 èn taki fu na aksi disi:
Fa yu kan waka baka Yesus?
Yesus ben lobi Gado Wortu, a ben preiki a bun nyunsu èn a ben yepi tra sma
5. Go na a Memrefesa
Efu yu wani sabi san pasa a fosi leisi di den hori na Avondmaal fu Masra, dan leisi Lukas 22:14, 19, 20. Baka dati taki fu den aksi disi:
Fa Yesus nanga den apostel fu en hori na Avondmaal?
San a brede nanga a win e prenki?—Luku vers 19 nanga 20.
Yesus ben wani taki den disipel fu en hori a Memrefesa ibri yari na a dei di a dede. Dati meki ibri yari Yehovah Kotoigi e kon makandra fu memre a dede fu Yesus na a fasi fa en ben du en. Efu yu wani sabi moro fu a prenspari konmakandra disi, dan prei a FELEM. Baka dati taki fu na aksi disi:
San e pasa na a Memrefesa?
A brede nanga a win e prenki wan sani. A brede e prenki a skin fu Yesus di no ben abi sondu èn di a gi leki wan ofrandi. A win e prenki a brudu fu en
SON SMA E TAKI: „A wan-enkri sani di wi musu du fu kisi frulusu na fu bribi na ini Yesus.”
Fa yu kan gebroiki Yohanes 3:16 nanga Yakobus 2:17 fu sori a sma taki wi musu du moro?
SAN YU LERI?
Wi e sori taki wi e warderi san Yesus du gi wi te wi e du sani fu sori taki wi e bribi na ini en èn te wi e go na a Memrefesa.
Fa yu ben o piki den aksi disi?
Fa wi kan sori taki wi e bribi na ini Yesus?
Fa yu wani sori taki yu e warderi san Yehovah nanga Yesus du gi yu?
Fu san ede a prenspari fu go na a Memrefesa?
TRA SANI DI YU KAN LUKU
Na ini a felem disi yu o si fa wi kan sori warderi gi a dede fu Yesus.
Na ini na artikel disi yu o si san na bribi èn fa yu kan sori en.
„Sori bribi na ini den pramisi fu Yehovah” (A Waktitoren, oktober 2016)
Na ini na artikel di nen „Mi konsensi no e fon mi moro” yu o si fa a libi fu wan uma kon moro bun di a kon frustan fa a dede fu Yesus man yepi en.
Na ini na artikel disi yu o si fu san ede wan tu sma nomo e nyan a brede èn e dringi a win na a Memrefesa.
„Fu san ede Yehovah Kotoigi e hori na Avondmaal fu Masra tra fasi leki den tra kerki?” (Web-artikel)