Kibri a boen njoensoe nanga jepi foe a wet

FOE SENSI a ten di libisma e bow foto, den e bow skotoe toe. Spesroetoe fositen, den fortresi disi ben gi kibri. Na tapoe a skotoe disi, sma di trawan ben kon feti nanga den, ben kan feti foe no meki sma meki wan olo na ini a skotoe noso foe swaki a skotoe. A no soso den sma di e libi na ini a foto ben feni kibri, ma nofo tron a ben de so, taki den sma di ben libi ini a birti foe den foto ben feni kibri toe inisei den skotoe. — 2 Samuèl 11:20-24; Jesaja 25:12.

So toe, Jehovah Kotoigi bow wan skotoe — wan skotoe nanga jepi foe a wet — foe kisi kibri. A skotoe disi no bow foe poti den Kotoigi aparti foe ala tra sma na ini a libimakandra, bika sma sabi Jehovah Kotoigi leki sma di lobi demakandra nanga tra sma èn leki sma di abi switifasi. Na presi foe dati, a tranga den djaranti di wet e gi foe den prenspari fri di ala sma abi. Na a srefi ten, a skotoe disi e kibri den reti di den kotoigi abi na ini wet, so taki den kan doe den anbegi na wan fri fasi. A skotoe disi e kibri na anbegi foe den èn a reti di den abi foe preiki a boen njoensoe foe Gado Kownoekondre. (Teki gersi Mateus 5:14-16.) Na a srefi ten, San na a skotoe disi, èn fa a skotoe disi bow?

Bow wan skotoe nanga jepi foe wet foe gi kibri

Ala di Jehovah Kotoigi abi fri foe relisi na ini moro foeroe kondre, tokoe na ini wan toe kondre sma doe sani teige den sondro foe abi reti. Te sma taki dati den Kotoigi no abi fri foe anbegi te den e kon makandra, noso te den e preiki oso foe oso, dan den gebroiki a wet gi den afersi disi. Doesoendoesoen wet tori di abi foe doe nanga den Kotoigi ben tjari go na kroetoe na heri grontapoe.a Den no wini ala den tori. Ma te den moro lagi kroetoebangi no gi den leti, dan foeroetron den ben aksi jepi na hei kroetoebangi. Sortoe bakapisi dati ben abi?

Na ini den foeroe tenti jari foe a di foe 20 jarihondro, den wini di Jehovah Kotoigi wini afersi na ini kroetoebangi na ini foeroe kondre, ben de eksempre di wi kan bow na tapoe èn di den Kotoigi gebroiki na ini a wan kefal baka a trawan. Neleki den pisi ston di wan skotoe e meki foe den, na so den boen bosroiti disi de wan skotoe na ini wet di e gi kibri. Na tapoe a skotoe disi di de wan eksempre, den Kotoigi tan feti foe kisi fri foe relisi so taki den kan doe na anbegi foe den.

Loekoe foe eksempre a kefal foe Murdock teige Commonwealth of Pennsylvania, di a Hei Kroetoebangi foe Amerkankondre ben bosroiti na tapoe 3 mei 1943. Na aksi na ini a kefal disi ben de: Jehovah Kotoigi moesoe kisi wan bisnis vergunning foe prati den relisi boekoe foe den? Jehovah Kotoigi ben froeklari taki a no de so taki den moesoe abi wan vergunning. A preikiwroko foe den a no — èn noiti ben de — wan bisnis. A marki foe den a no foe meki moni, ma foe preiki a boen njoensoe (Mateus 10:8; 2 Korentesma 2:17). Na ini a Murdock bosroiti, a Kroetoebangi ben agri nanga den Kotoigi di a ben froeklari taki a no de akroederi a mamawet foe aksi den foe pai wan belasting gi vergunning bifo den prati den relisi boekoe foe den.b A bosroiti disi ben de wan prenspari eksempre, èn nanga boen bakapisi den Kotoigi gebroiki en leki boeweisi na ini foeroe tra kefal foe sensi a ten dati. A Murdock bosroiti ben sori foe de wan tranga pisi ston na ini a skotoe foe wet di e gi kibri.

Den sortoe kefal disi doe foeroe foe kibri a fri foe relisi gi ala sma. A University of Cincinnati Law Review ben taki foe a ròl di den Kotoigi ben plèi foe kibri den reti foe den borgroe na ini Amerkankondre: „Jehovah Kotoigi abi foeroe krakti na tapoe a gro foe a lanti wet, spesroetoe foe bradi den skotoe di e kibri sma foe man taki èn foe man abi wan relisi.”

Tranga a skotoe

Ibri leisi te den wini na ini kroetoebangi, a skotoe e kon moro tranga. Loekoe wan toe foe den bosroiti na ini den jari na baka 1990 di abi wini gi Jehovah Kotoigi èn so srefi gi ala tra sma di lobi fri, na heri grontapoe.

Grikikondre. Na tapoe 25 mei 1993, na Europa Kroetoebangi foe den Reti foe Libisma ben horibaka gi a reti di wan Griki borgroe abi foe leri tra sma den relisi bribi foe en. A kefal ben abi foe doe nanga Minos Kokkinakis, di a ben abi 84 jari. Leki wan foe den Jehovah Kotoigi, den ben aresteri Kokkinakis moro leki 60 tron foe sensi 1938, èn a ben moesoe kon 18 tron na fesi den Griki kroetoebangi, èn ben moesoe tan moro leki siksi jari na ini strafoe-oso. Moro foeroe den ben kroetoe en na ondro wan Griki wet foe 1930 te nanga 1939, di ben tapoe sma foe overtoigi trawan foe teki a bribi foe den — wan wet di ben meki taki den ben aresteri pikinmoro 20.000 Jehovah Kotoigi foe 1938 te leki 1992. A Kroetoebangi foe Europa ben bosroiti taki a Griki tirimakti no ben lespeki a relisi fri foe Kokkinakis èn a Kroetoebangi ben gi en 14.400 Amerkan dala gi na ogri di den ben doe en. Na ini a bosroiti di a Kroetoebangi ben teki, den ben taki dati Jehovah Kotoigi na wan „relisi di sma e erken”. — Loekoe De Wachttoren foe 1 september 1993, bladzijde 27-31.

Meksikow. Na tapoe 16 juli 1992, wan prenspari sani ben doe na ini Meksikow foe kibri a fri foe relisi. Na a dei dati, a Wet foe Relisi Organisâsi nanga Poebliki Anbegi ben tron wan wet. Nanga a wet disi, wan relisi groepoe kan kisi wan posisi pe wet e erken en leki wan relisi organisâsi te a go skrifi en nen soleki fa den e aksi dati foe en. Bifo dati, den Jehovah Kotoigi, neleki tra relisi toe na ini a kondre, ben bèsta troetroe, ma wet no ben erken den. Na tapoe 13 april 1993 den Kotoigi ben go foe skrifi den nen. Kolokoe, na tapoe 7 mei 1993 den ben skrifi den nen akroederi wet leki La Torre del Vigía A. R., (A Waktitoren), èn Los Testigos de Jehová en México A. R., (Kotoigi foe Jehovah na ini Meksikow), èn den ala toe na relisi organisâsi. — Loekoe Ontwaakt! foe 22 juli 1994, bladzijde 12-14.

Brasjonkondre. Na ini november 1990, a National Institute of Social Security (INSS) foe Brasjonkondre, ben taigi a bijkantoro foe a Waktitoren Genootschap taki den no sa si den friwani wrokoman na Bethel (a nen foe den bijkantoro gebow foe Jehovah Kotoigi) leki relisi bedinari moro èn foe dati ede den ben o kon na ondro a wrokoman wet foe Brasjonkondre. Den Kotoigi ben tjari a bosroiti disi go na kroetoe. Na tapoe 7 juni 1996, a Judicial Advisory of the Office of the Attorney General na ini Brasilia ben teki wan bosroiti di ben horibaka gi a posisi foe bedinari na Bethel di de memre foe wan relisi libimakandra di de akroederi wet, no leki grontapoe wrokoman.

Japan. Na tapoe 8 maart 1996 a Moro Hei Kroetoebangi foe Japan ben gi wan froeklari foe wan bosroiti di ben teki foe skoroleri nanga a fri foe relisi — gi a boen foe ibri sma na ini Japan. Leki wán man a kroetoebangi ben taki dati Gemeente-Industria Tèknik Skoro na Kobe ben pasa a wet foe di den ben seni Kunihito Kobayashi gowe di a ben weigri foe teki prati na den oefening foe leri sma feti. A bosroiti disi na a fosi leisi taki a Moro Hei Kroetoebangi ben gi wan froeklari foe wan bosroiti di abi foe doe nanga a fri foe relisi èn di a Mamawet foe Japan e horibaka gi. A jongoe Kotoigi disi di ben gebroiki en konsensi di kisi leri foe bijbel, ben bribi taki den oefening disi no ben de akroederi den bijbel gronprakseri soleki a wan di de foe feni na Jesaja 2:4, di e taki: „Den sa moesoe naki den feti-owroe foe den kon tron proegoe èn den lansri foe den kon tron grasi-nefi. Nâsi no sa opo feti-owroe teige nâsi, so srefi den no sa leri orlokoe moro.” A bosroiti foe a Kroetoebangi ben poti wan eksempre gi tra kefal na ini a ten di e kon. — Loekoe A Waktitoren foe 1 november 1996, bladzijde 18-20.

Na tapoe 9 februari 1998, a Hei Kroetoebangi foe Tokio ben gi wan froeklari foe wan tra prenspari bosroiti di ben horibaka gi a reti foe wan Kotoigi di nen Misae Takeda, di a ben weigri foe gebroiki datra dresi di no de akroederi a bijbel komando foe ’tan farawe foe broedoe’ (Tori foe den apostel 15:28, 29). A tori tjari go na a Moro Hei Kroetoebangi, èn wi moesoe wakti foe si efoe sma sa horibaka gi a bosroiti foe a Hei Kroetoebangi.

Filippijnen. Na ini wan froeklari di den ben gi foe wan bosroiti di ben teki na tapoe 1 maart 1993, a Hei Kroetoebangi foe Filippijnen ben agri leki wán man gi a boen foe Jehovah Kotoigi, na ini wan kefal di abi foe doe nanga jongoe Kotoigi di ben seni gowe foe skoro bika na wan lespeki fasi den Kotoigi ben weigri foe gi a fraga odi.

Ibri leisi te wan kroetoebangi teki wan bosroiti gi a boen foe Jehovah Kotoigi dan dati de leki ete wan ston di e tranga a skotoe foe wet di e kibri den reti foe den, no foe den Kotoigi wawan, ma foe ala sma.

Kibri a skotoe

Jehovah Kotoigi skrifi den nen akroederi wet na ini 153 kondre, èn den e njan boen foe foeroe fri nanga reti, soleki fa a de nanga tra relisi di erken. Baka foeroe tenti jari foe froefolgoe nanga a tapoe di sma ben tapoe a wroko foe den na ini Owstoe-Europa èn san ben de Sovjet Unie fosi, dan Jehovah Kotoigi erken now na ini wet na ini den kondre soleki Albania, Weti-Rosiakondre, a Tjekia Republiek, Georgia, Hongaria, Kasakstan, Kirgistan, Roemeinia, nanga Slowakia. Ma na ini son kondre na ini a ten disi, so srefi kondre na ini West-Europa di abi wet sistema di gebroiki langa ten kaba, sma e tjalensi na wan serjoesoe fasi noso no e erken a reti foe Jehovah Kotoigi. Gensman e proeberi fajafaja foe „seti problema nanga jepi foe wet” teige den Kotoigi (Psalm 94:20). San den Kotoigi disi e doe na tapoe dati?c

Jehovah Kotoigi wani wroko makandra nanga ala tirimakti, ma den wani abi a fri na ini wet toe foe doe na anbegi foe den. Den abi a tranga overtoigi taki ibri wet noso ibri bosroiti foe kroetoebangi di ben sa tapoe den foe gi jesi na den komando foe Gado — so srefi a komando foe preiki a boen njoensoe — no de joisti (Markus 13:10). Efoe den no man feni densrefi na ini vrede, dan Jehovah Kotoigi sa strei nanga jepi foe wet, èn den sa gebroiki ibri fasi foe hei kroetoebangi di de fanowdoe, so taki den kan kisi kibri foe wet gi a reti di den kisi foe Gado foe doe na anbegi foe den. Jehovah Kotoigi abi dorodoro froetrow na ini a pramisi foe Gado: „No wan fetisani di den sa meki teige joe sa abi boen bakapisi.” — Jesaja 54:17.

[Foetoewortoe]

[Faki na tapoe bladzijde 21]

Opo taki gi den reti foe Jehovah Kotoigi

A froefolgoe di sma ben froefolgoe Jehovah Kotoigi ben abi leki bakapisi taki sma ben tjari den go na fesi kroetoeman nanga tiriman foe lanti na heri grontapoe (Lukas 21:12, 13). Jehovah Kotoigi wroko fajafaja foe opo taki gi den reti foe den nanga jepi foe wet. Den wini di den ben wini na ini kroetoebangi na foeroe kondre, jepi foe kibri a fri foe Jehovah Kotoigi na ini wet, so srefi den reti di den abi foe

◻ preiki oso foe oso sondro den skotoe di e poti tapoe den bisnis seriman — Murdock teige Commonwealth of Pennsylvania, Hei Kroetoebangi foe Amerkankondre (1943); Kokkinakis teige Grikikondre, Europese Hof voor de rechten van de mens (ECHR) (1990).

◻ kon makandra na wan fri fasi foe anbegi — Manoussakis nanga tra sma teige Grikikondre, ECHR (1996).

◻ bosroiti fa den kan sori lespeki gi a fraga noso a simbôl foe a kondre, nanga wan boen konsensi — West Virgina State Board of Education teige Barnette, Moro Hei Kroetoebangi foe Amerkankondre (1943); Hei Kroetoebangi foe den Filippijnen (1993); Hei Kroetoebangi foe India (1986).

◻ weigri sroedatiwroko di de teige a kresten konsensi foe den — Georgiadis teige Grikikondre, ECHR (1997).

◻ teki datra jepi nanga dresi di no de teige a konsensi foe den — Malette teige Shulman, Ontario, Kanada, Hei Kroetoebangi (1990); Watch Tower teige E.L.A., Hei Kroetoebangi, San Juan, Porto Riko (1995); Fosmire teige Nicoleau, New York, Amerkankondre, Hei Kroetoebangi.

◻ kweki den pikin foe den akroederi den overtoigi foe den di abi en gron na tapoe bijbel, srefi te sma e tjalensi den overtoigi disi te kesekese de di abi foe doe nanga kroetoetori di e taki soema sa abi a frantiwortoe gi pikin te a papa nanga mama brokotrow — St-Laurent teige Soucy, Hei Kroetoebangi foe Kanada (1997); Hoffmann teige Austria, ECHR (1993).

◻ abi èn foe gebroiki wrokosani di de akroederi wet èn di e kisi den fri foe belasting srefi leki den wrokosani di tra relisi di erken e gebroiki — People teige Haring, New York, Amerkankondre, Hei Kroetoebangi (1960).

◻ kisi gi den sma di poti na wroko foe doe wan spesroetoe foeroeten diniwroko, den srefi fasi foe handri nanga den ini a tori foe belasting, leki den foeroeten relisi wrokoman foe tra relisi — A National Institute of Social Security foe Brasjonkondre, Brasilia, (1996).

[Prenki na tapoe bladzijde 20]

Minos Kokkinakis nanga en wefi

[Prenki na tapoe bladzijde 20]

Kunihito Kobayashi

[Sma di abi a reti foe a prenki na tapoe bladzijde 19]

The Complete Encyclopedia of Illustration/J. G. Heck