Kapitel 10
Ogri jeje abi makti
1. Foe san ede foeroe sma e bribi taki den kan taki nanga den dedewan?
NOFOTRON SMA e froeteri dati den taki nanga den dedewan. James A. Pike, wan barinen anglikans biskopoe, di dede kaba, ben froeteri dati a ben taki nanga en manpikin Jim di dede. Soleki fa Pike ben froeteri, dan en manpikin ben taigi en taki: „Ipi-ipi sma tanapoe lontoe mi, èn anoe e tjari mi go na loktoe, foe taki en so . . . Mi no ben firi misrefi kolokoe srefisrefi, te leki mi ben man meki joe sabi disi.”
2. (a) Foe san ede no wan sma kan taki nanga den dedewan? (b) So boen, sortoe aksi e kon na fesi?
2 Foe di sma e ondrofeni den sortoe sani disi so foeroe, dan a de krin taki foeroe sma taki nanga wan sma foe a jejekondre. Ma a no nanga den dedewan den taki. Bijbel e taki krin: „Foe a sei foe den dedewan, den no sabi notinoti moro” (Preikiman 9:5). So boen, efoe a no den dedewan di e taki komoto na a jejekondre, soema e taki dan? Soema e doe neleki den na dedesma?
3. (a) Soema e doe neleki den na dedesma èn foe san ede? (b) Na soema ogri jeje e gi bodoi foeroetron?
3 Ogri jeje e doe disi. Den jeje disi na den engel di ben kon moksi nanga Satan ini na opo di a ben opo ensrefi teige Gado. Foe san ede den e doe neleki den na sma di dede? Na foe meki den sma denki taki den dedewan de na libi ete. So srefi ogri jeje meki foeroe sma bribi a lei, taki dede na soso wan kenki di wan sma e kenki go na wan tra libi. Foe panja a lei disi, dan den ogri jeje e sorgoe taki sma di de leki asi foe den jeje, loekoeman nanga towfroeman, e kisi spesroetoe sabi di gersi nomo, leki a komoto na sma di dede.
A DOE NELEKI EN NA A DEDE MAN, SAMUÈL
4. (a) Foe san ede kownoe Saul no ben sabi san a ben moesoe doe moro foe kisi jepi? (b) San a wet foe Gado ben taki ini a tori foe sma di de leki asi foe den jeje, nanga loekoeman?
4 Wan eksempre de na ini bijbel, foe wan ogri jeje di ben doe neleki en na wan profeiti foe Gado di dede, Samuèl. Disi ben de na ini a di foe 40 jari foe a tiri foe kownoe Saul. Wan tranga legre foe den Filistijnsma, ben opo kon feti nanga a legre foe Saul foe Israèlsma èn Saul ben kon frede srefisrefi. Saul ben sabi a wet foe Gado, di taki: „No go na den sma di de leki asi foe den jeje, èn no go na sma di abi leki wroko foe taki sani na fesi, so taki den meki oenoe no kon de krin” (Lefitikus 19:31). Ma baka wan pisi ten Saul ben drai baka gi Jehovah. Dati meki Samuèl, di ben libi ete na a ten dati, ben weigri foe si Saul moro langa (1 Samuèl 15:35). Èn now ini a moeilek situwâsi disi, kownoe Saul no ben sabi san a ben moesoe doe moro, bika Jehovah no ben wani arki den begi di a ben begi foe kisi jepi.
5. (a) Na soema Saul ben go foe kisi jepi? (b) San a sma di de leki wan asi foe den jeje, ben man doe?
5 Saul ben wani sabi sote san ben o pasa, taki a ben go na wan oema di ben de leki wan asi foe den jeje na Endor. Na oema ben man meki a skin foe wan sma kon di en ben kan si. Nanga san na oema ben froeteri foe a skin, Saul ben kon sabi en leki „Samuèl”. Tapoe disi a jejesma, di ben doe neleki en na Samuèl, ben taki: „Foe san ede joe trobi mi foe meki mi opo kon?” Saul ben piki: „Mi de ini problema srefisrefi, bika den Filistijnsma e feti nanga mi.” A jejesma ben piki: „Foe san ede joe e kon aksi mi rai dan efoe Jehovah srefi hari komoto na joe èn e sori taki a de joe gensman?” Na ogri jejesma, di ben doe neleki en na Samuèl di dede, ben taigi Saul moro fara taki den ben sa kiri en na ini a feti nanga den Filistijnsma. — 1 Samuèl 28:3-19.
6. Foe san ede a no ben kan de Samuèl di ben taki nanga Saul?
6 A de krin taki a no ben de Samuèl troetroe di na oema di ben de leki wan asi foe den jeje, ben kon ini kontakti nanga en. Samuèl dede èn te wan sma dede, a „e go baka na en gron; na a dei dati den prakseri foe en e lasi gowe” (Psalm 146:4). Efoe wi e go denki a tori moro fara, dan a e kon na krin, taki a sten no ben kan de troetroe di foe Samuèl di dede. Samuèl ben de a profeiti foe Gado èn foe dati ede a ben kakafoetoe gi sma di de leki asi foe den jeje. Èn soleki fa wi si kaba, di a ben de na libi, a ben weigri foe taki moro fara nanga a trangajesi kownoe Saul. So boen, efoe Samuèl ben de na libi ete, a ben sa gi pasi dan, meki wan sma di de leki wan asi foe den jeje, seti sani foe en nanga Saul miti? Prakseri toe, taki Jehovah ben weigri foe gi Saul iniwan sortoe bodoi. Wan sma di de leki wan asi foe den jeje, ben kan dwengi Jehovah foe gi Saul wan boskopoe nanga jepi foe Samuèl di dede? Èn efoe den libiwan troetroe ben kan taki nanga den lobiwan di dede, dan seiker wan Gado foe lobi no ben sa taki dati den „no ben krin”, foe di den ben go na wan sma di de leki wan asi foe den jeje.
7. Sortoe warskow Gado ben gi foe kibri en pipel gi ogri jeje?
7 A troe tori de, taki ogri jeje e soekoe nomo foe doe libisma ogri èn dati meki Jehovah e gi warskow foe kibri den foetoeboi foe en. Leisi a warskow di e kon now èn di ben de gi a nâsi Israèl. A e meki joe froestan wan sani foe den fasi di den ogri jeje e gebroiki foe kori libisma. Bijbel e taki: „Na oen mindri no wan sma moesoe de . . . di e doe loekoeman-wroko, no wan sma di e wroko nanga obia, noso wan sma di e loekoe marki foe san o kon, noso wan towfroeman, noso wan sma di e wisi tra sma, noso wan sma di e soekoe rai na wan sma di de leki wan asi foe den jeje, noso wan sma di abi a wroko foe taki sani na fesi, noso wan sma di e aksi den dedewan foe kon sabi sani. Bika ibriwan sma di e doe den sani disi na wan tegoe sani na Jehovah” (Deuteronomium 18:10-12). Wi moesoe kon sabi san ogri jeje e doe foe doe sma ogri na ini a ten disi, èn fa wi kan kibri wisrefi gi den. Ma bifo wi kon leri sabi den tori disi, meki wi go loekoe pikinso o ten èn fa den ogri jeje ben doe kon.
ENGEL DI BEN TRON OGRI JEJE
8. (a) Soema Satan ben kisi go so fara toe foe opo densrefi teige Gado? (b) Pe den ben go, baka di den ben tapoe nanga a wroko foe den na hemel?
8 Wan seiker engel ben meki ensrefi tron na ogri jeje Satan Didibri, foe di a ben froeteri Eva wan lei na ini a djari foe Eden. Baka dati a ben bigin proeberi foe meki tra engel drai baka gi Gado toe. Baka wan pisi ten, a ben kisi den go so fara. Son engel ben tapoe nanga a wroko di Gado ben gi den foe doe na hemel èn den ben saka kon na grontapoe èn ben meki libisma skin gi densrefi. A kresten disipel Judas ben skrifi foe den, di a ben froeteri foe „den engel di no ben hori a posisi foe den di den ben abi biginbigin, ma di ben gowe libi den eigi reti tanpresi” (Judas 6). Foe san ede den ben kon na grontapoe? Sortoe fowtoe lostoe Satan ben poti na ini na ati foe den foe boeweigi den foe gowe libi a toemoesi moi posisi di den ben abi na hemel?
9. (a) Foe san ede den engel ben kon na grontapoe? (b) Fa bijbel e sori taki san den ben doe ben fowtoe?
9 Bijbel e froeteri wi foe disi te a e taki: „Den manpikin foe a troe Gado ben bigin poti prakseri tapoe den oemapikin foe libisma èn ben si taki den ben moi; èn den ben go teki oema gi densrefi, dati wani taki, ala oema di den ben wani nomo” (Genesis 6:2). Ija, den engel ben teki libisma skin èn ben kon na grontapoe foe abi seks nanga den moi oema. Ma den sortoe lobi afersi disi no ben fiti gi engel. Disi ben de wan doe foe trangajesi. Bijbel e sori taki san den ben doe, ben fowtoe neleki a homo-seks doe foe den sma foe Sodom nanga Gomora (Judas 6, 7). San ben de a bakapisi?
10, 11. (a) Sortoe pikin den engel ben kisi? (b) San ben pasa nanga den langa sma, di a Froedoe ben kon? (c) San ben pasa nanga den engel na a ten foe a Froedoe?
10 We, den engel disi nanga den wefi foe den ben kisi beibi. Ma den beibi ben de tra fasi. Den ben tan gro kon bigi moro nanga moro te leki den ben tron langa sma, ija, ogri langa sma. Bijbel e kari den „den tranga man di ben de na owroeten, den man foe barinen”. Den langa sma disi ben proeberi foe dwengi ala sma foe kon ogri leki den. Leki wan bakapisi foe dati, dan bijbel e taki dati „a takroedoe foe libisma ben de pasa marki na grontapoe èn taki ibri firi foe den prakseri foe en ati ben de ala ten soso ogri” (Genesis 6:4, 5). Dati meki Jehovah ben tjari a Froedoe kon. Den langa sma, noso „Nefilim”, nanga ala ogri sma dede na watra. Ma san ben pasa nanga den engel di ben kon na grontapoe?
11 Den no dede na watra. Den ben poeroe a libisma skin foe den poti na wan sei èn den ben drai go baka na hemel leki jejesma. Ma den no ben kisi pasi foe tron wan pisi baka foe Gado organisâsi foe santa engel. Na presi foe dati, na so bijbel e taki, „Gado no ben meki noti tapoe en foe strafoe den engel di ben sondoe, ma, foe di a trowe den go na ini Tartarus, a ben gi den abra na peti foe deki doengroe foe hori den kibri gi a kroetoe”. — 2 Petrus 2:4.
12. (a) San ben pasa nanga den ogri engel di den ben drai go baka na hemel? (b) Foe san ede den no kan teki libisma skin moro? (c) So boen, san den e doe now?
12 Den ogri engel disi no ben trowe go na ini wan troetroe presi di ben nen Tartarus. Na presi foe dati, Tartarus, di na ini son bijbel no nanga reti den ben vertaal en nanga „hèl”, abi foe doe nanga a lagi noso fadon fasi pe den engel disi de na ini. Den ben koti poeroe foe a leti na jejefasi foe Gado organisâsi èn têgo pori nomo e wakti den (Jakobus 2:19; Judas 6). Foe sensi a ten foe a Froedoe, Gado no gi den ogri jeje engel disi pasi moro foe teki libisma skin, so boen, den no kan kowroe wantewante den seks lostoe foe den, di de kontrari a fasi fa Gado meki den. Tokoe den kan abi wan kefalek takroe krakti tapoe man nanga oema ete. Te joe loekoe en boen, dan nanga jepi foe den ogri jeje disi Satan „e kori heri grontapoe pe sma e libi” (Openbaring 12:9). A bigi gro di wi e si now ini seks takroedoe, ogri di e doe na sma nanga tranga, nanga tra ogridoe, e sori na tapoe a fanowdoe foe wi foe tan na ai, so taki den no kori wi.
FA OGRI JEJE E KORI SMA
13. (a) Fa ogri jeje e kori libisma? (b) San na afkodrei, èn san bijbel e taki foe en?
13 Wi ben kon sabi kaba taki Satan, leki „a gado foe a seti foe sani disi”, e gebroiki grontapoe tiri nanga falsi relisi foe breni sma gi den waarheid foe bijbel (2 Korentesma 4:4). Wan tra prenspari fasi fa ogri jeje e kori man nanga oema, de nanga jepi foe afkodrei. San na afkodrei? A de a kon di wan sma e kon ini kontakti nanga ogri jeje, kande langalanga noso nanga jepi foe wan libisma di de leki wan asi foe den jeje. Afkodrei e tjari wan sma kon na ondro a krakti foe den ogri jeje. Bijbel e warskow wi taki wi moesoe tan fri foe ibri sani di abi foe doe nanga afkodrei. — Galasiasma 5:19-21; Openbaring 21:8.
14. (a) San na loekoeman-wroko? (b) San bijbel e taki foe en?
14 Loekoeman-wroko na wan fasi foe afkodrei di de foeroe. A de a wroko pe sma e proeberi foe kon sabi san o pasa na ini a ten di e kon, noso foe kon sabi wan sani di no de bekènti, nanga jepi foe den jeje di wi no kan si. Disi e kon na krin na ini san a kresten disipel Lukas ben skrifi: „Wan seiker oema-foetoeboi di ben abi wan jeje, wan ogri jeje foe loekoeman-wroko, ben waka kon miti wi. A ben gi den meester foe en foeroe wini nanga a doe di a ben doe a wroko foe taki sani na fesi.” Na apostel Paulus ben man foe meki na oemapikin disi kon fri foe a makti foe na ogri jeje disi, so taki a no ben man foe taki sani na fesi moro foe a ten di ben o kon. — Tori foe den Apostel 16:16-19.
15. (a) San na wan toe sani di abi foe doe nanga afkodrei? (b) Foe san ede a de wan kefalek sani foe teki prati na den sortoe sani disi?
15 Foeroe sma abi belangstelling gi afkodrei, foe di a de wan dangra èn freimde sani. A de wan sani di e teki a heri prakseri foe den. So boen, den e kon abi foe doe nanga bonoe, fodoe, hypnose (a sribi di wan sma kan sribi wan trawan èn meki a doe san a wani), obia, astrologie (taki sani na fesi nanga jepi foe stari nanga planeiti), Ouijapreti noso wan tra sani di abi foe doe nanga afkodrei. Kande den e leisi boekoe foe den sani disi noso e go na kino noso e loekoe telefisi programa foe den sani disi. Kande den e go srefi na wan konmakandra pe wan sma di de leki wan asi foe den jeje e proeberi foe kon ini kontakti nanga a jejekondre. Ma ala disi na wan don sani gi wan sma di wani dini a troe Gado. A de wan kefalek sani toe. A kan tjari wan sma go na ini bigi problema now. Boiti foe dati, Gado sa kroetoe èn trowe ala sma di e doe afkodrei. — Openbaring 22:15.
16. Fa bijbel e sori taki kresten abi wan feti nanga den ogri jeje?
16 Srefi efoe wan sma e doe ala san a man foe tan fri foe afkodrei, dan tokoe ete den ogri jeje kan kon foe doe en ogri. Prakseri taki Jesus Krestes ben jere a sten foe Didibri srefi, di Didibri ben proeberi foe kori en foe pasa a wet foe Gado (Mateus 4:8, 9). Tra foetoeboi foe Gado ben kisi foe doe nanga a kon disi di ogri jeje ben kon foe doe den ogri. Na apostel Paulus ben taki: „Wi abi wan feti . . . nanga den ogri jeje krakti na ini den hemel kontren.” Disi wani taki dati ibri foetoeboi foe Gado moesoe „teki a heri fetisani foe Gado, so taki [a] man kakafoetoe”. — Efeisesma 6:11-13.
KAKAFOETOE GI A KON DI OGRI JEJE E KON FOE DOE WI OGRI
17. San joe moesoe doe efoe wan „sten” foe a jejekondre e taki nanga joe?
17 San joe moesoe doe efoe wan „sten” foe a jejekondre e taki nanga joe? San joe moesoe doe efoe a „sten” e doe leki a de wan famiriman di dede noso wan boen jeje? We, san Jesus ben doe di a „tiriman foe den ogri jeje” ben taki nanga en? (Mateus 9:34) A ben taki: „Komoto gowe, Satan!” (Mateus 4:10) Joe kan doe dati toe. Joe kan kari Jehovah toe foe a jepi joe. Begi nanga tranga sten èn gebroiki a nen foe Gado. Hori na prakseri taki Gado moro makti leki den ogri jeje. Waka baka a koni fasi disi. No arki den sortoe sten disi foe a jejekondre (Odo 18:10; Jakobus 4:7). Disi no wani taki dati ibri sma di e jere „sten”, na ogri jeje e taki nanga en. Sontron a jere di sma e jere sten abi foe doe nanga son siki foe a skin noso na ede.
18. Sortoe eksempre foe den fositen kresten na Efeise na wan boen-wan foe waka na en baka efoe wan sma wani tapoe nanga afkodrei?
18 Kande joe ben teki prati wan dei na son afkodrei gwenti èn joe wani tapoe nanga dati now. San joe kan doe? We, loekoe na eksempre pikinso foe den fositen kresten na Efeise. Baka di den ben teki a „wortoe foe Jehovah”, di Paulus ben preiki gi den, bijbel e taki: „Boen foeroe foe den di ben doe obiawroko, ben tjari den boekoe foe den kon makandra èn ben bron den na fesi foe ala sma.” Èn den boekoe disi ben warti 50.000 solfroe moni! (Tori foe den Apostel 19:19, 20) Efoe joe abi sani di abi foe doe langalanga nanga afkodrei, dan a de wan koni sani foe waka baka den sma di ben tron bakaman foe Krestes na Efeise, èn pori den sani awinsi o diri den de toe.
19. (a) San moro foeroe sma di e teki prati na afkodrei, no sabi? (b) Efoe wi wani libi foe têgo ini kolokoe na grontapoe, san wi moesoe doe dan?
19 Foe di na ini a ten disi someni sma abi belangstelling gi freimde èn dangra sani, dan moro nanga moro sma e kon abi foe doe nanga afkodrei. Ma moro foeroe foe den sma disi no sabi taki den e kon abi foe doe nanga ogri jeje. Disi a no wan preiprei sani di no wani taki noti. Ogri jeje abi a makti foe pina sma èn doe sma ogri. Den abi ogri-ati. Èn bifo Krestes e gi den abra na têgo pori, den e doe ala san den man foe kisi libisma ini na ogri makti foe den (Mateus 8:28, 29). So boen, efoe joe wani libi foe têgo ini kolokoe na grontapoe baka te ala ogridoe komoto na pasi, dan joe moesoe tan fri foe a makti foe den ogri jeje, foe di joe e tan fara foe ibri sortoe foe afkodrei.
[Prenki na tapoe bladzijde 91]
Nanga soema a sma di ben de leki wan asi foe den jeje na Endor, ben kon ini kontakti?
[Prenki na tapoe bladzijde 92, 93]
Den engel-manpikin foe Gado ben poti prakseri tapoe den oemapikin foe libisma
[Prenki na tapoe bladzijde 94]
Den engel di ben materialiseri densrefi, no dede na watra. Den ben poeroe a libisma skin foe den poti na wan sei èn den ben drai go baka na hemel
[Prenki na tapoe bladzijde 97]
Bijbel e warskow: ’Tan fri foe ala fasi foe afkodrei’
[Prenki na tapoe bladzijde 98]
Den wan di ben tron kresten na Efeise, ben bron den boekoe foe den di ben abi foe doe nanga afkodrei — wan toemoesi moi eksempre gi wi na ini a ten disi