Leisiman e aksi

Fu san ede Gado e gi pasi taki pina de?

A no Gado e meki libisma e pina. „Noiti a tru Gado sa handri na wan kruktu fasi!” na so Bijbel e taki (Yob 34:10). Ma suma na a moro prenspari sma di e meki taki pina de na grontapu?

Yesus ben kari Satan „a tiriman fu grontapu” (Yohanes 14:30). A tru taki Yehovah na a Moro Hei Tiriman. Dati na wan reti di noiti a sa gi wan tra sma. Toku, Gado gi Satan pasi fu tiri a moro bigi pisi fu a libisma famiri fu wan pisi ten.—1 Yohanes 5:19.

Ma fa Satan tiri grontapu? Sensi a fosi leisi di a miti nanga libisma, a ben de wan kiriman nanga wan bedrigiman. Satan e bruya a libi na grontapu srefisrefi. Disi na san Yesus ben taki fu Satan: „Di a bigin waka en eigi pasi, a ben de wan kiriman èn a no ben tanapu kánkan na ini a waarheid, fu di a waarheid no de na ini en. Te a e taki lei, dan a e taki soleki fa ensrefi de, fu di a de wan leiman èn a tata fu ala lei” (Yohanes 8:44). Yesus ben taki tu dati den sma di ben e suku fu kiri en na pikin fu a fosi kiriman. Den tron pikin fu Satan fu di den e handri neleki en. Leki fa a papa de, na so a pikin sa de tu.

Satan e tan gi sma deki-ati fu prakseri soso fa den kan kiri trawan. Fu eksempre, professor R. J. Rummel fu na Universiteit fu Hawai na Amerkankondre, e taki dati sensi a yari 1900 te go miti a yari 1987, difrenti tirimakti kiri 169.198.000 sma. Den sma disi dede di den ben pruberi fu teki a tirimakti abra, noso den dede fu di den tirimakti ben kiri ipi-ipi sma fu wan ras. Ogridu meki taki trawan lasi den libi aladi den no du nowan ogri. Boiti dati, furu milyunmilyun sma dede tu na ini orloku na a srefi pisi ten dati.

Efu a no Gado e meki wi pina, dan fu san ede a e gi pasi taki pina de? Fu di langa ten pasa, wan tu problema ben opo kon di abi fu du nanga ala libisani. Den problema disi musu lusu ete. Meki wi go luku wan fu den problema disi.

Syatu baka di Gado meki libisma, dan Adam nanga Eva teki a sei fu Satan. Den ben drai den baka gi a tiri fu Gado èn den ben bosroiti fu tiri densrefi. Ma fu taki en leti, na Didibri ben e tiri den.—Genesis 3:1-6; Openbaring 12:9.

Fu di Yehovah e du sani na wan reti fasi, meki a ben bosroiti fu no du wan sani wantewante, ma a gi okasi meki nofo buweisi de. San den buweisi e sori krinkrin? Den sori taki te libisma e tiri na ondro a makti fu Satan, dan dati e tyari soso pina kon. Te wi luku en bun, dan a gi di Gado gi pasi meki pina de, ben de gi a bun fu libisma srefi. Fa so? Den sma di e ondrosuku den buweisi èn e poti bribi na den, abi na okasi fu sori taki den wani meki Gado tiri den. Den wan di e kon leri sabi den markitiki fu Gado èn e libi akruderi den, abi a howpu fu libi fu têgo.—Yohanes 17:3; 1 Yohanes 2:17.

A tru taki now a grontapu de na ini a makti fu Satan di e tiri na wan ogri fasi. Ma dati sa de so fu wan syatu pisi ten ete. Heri esi, Yehovah sa gebroiki en Manpikin fu „tyari wan kaba kon na den wroko fu Didibri” (1 Yohanes 3:8). Na ondro a tiri fu Gado, Yesus sa trowstu den wan di brokosaka èn a o meki den libi kon bun baka. A o gi den milyardmilyard sma di nyan pina èn di dede na ini den hondrohondro yari di pasa, wan opobaka.—Yohanes 11:25.

A gi di Gado ben gi Yesus wan opobaka, e sori wi taki Gado makti moro Didibri. A sani dati e sori wi san wi kan fruwakti te wi wani meki Gado tiri wi (Tori fu den Apostel 17:31). Bijbel e yepi wi fu frustan fa a ten dati sa de, nanga den wortu disi di e gi wi trowstu: „Gado srefi o de nanga [libisma]. A o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe.”—Openbaring 21:3, 4.