Heri esi Jesus nanga a groepoe foe en, e doro na ini a foto èn e go na a oso pe den o hori a Paska. Den e kren a trapoe go na a bigi kamra na tapoe sodro, pe ala sani sreka foe den hori a Paska den wawan. Jesus wakti na okasi disi, soleki fa a e taki: „Mi ben angri srefisrefi foe njan a Paska disi nanga oenoe bifo mi e pina.”

A de a gwenti, taki den sma di e teki prati na a Paska e dringi fo beker win. Baka te den teki, soleki fa a sori, a di foe dri beker, Jesus e taki Gado tangi èn a e taki: „Teki disi èn meki a waka lontoe foe a wan go na a trawan; bika mi e taigi oenoe: Bigin foe now mi no sa dringi moro foe san e kon foe a droifibon te leki a kownoekondre foe Gado e kon.”

Te den e njan, dan Jesus e opo, a e poeroe den tapoesei krosi foe en, e teki wan doekoe èn e foeroe wan bigi komki nanga watra. Soleki fa a gwenti de, dan wan sma di ben kari fisitiman kon na en oso, ben moesoe sorgoe taki wan sma e wasi den foetoe foe wan fisitiman. Ma foe di na a okasi disi no wan sma de di ben kari den na en oso, meki Jesus e sorgoe gi a wroko disi di e doe gi sma. Ibriwan foe den apostel ben kan teki na okasi foe doe a sani disi, ma foe di, soleki fa a sori, pikinso strei ben de ete na den mindri, meki no wan foe den e doe disi. Now den e sjen te Jesus e bigin wasi den foetoe foe den.

Te Jesus doro na Petrus, dan Petrus di no e agri nanga a tori, e taki: „Noiti joe sa wasi mi foetoe kwetikweti.”

„Efoe mi no e wasi joe, dan joe no abi prati nanga mi”, Jesus e taki.

„Masra,” Petrus e piki, „no mi foetoe wawan, ma mi anoe nanga mi ede toe.”

„A sma di wasi en skin,” Jesus e piki, „no abi foe meki den wasi moro leki en foetoe, ma a krin dorodoro. Èn oenoe krin, ma a no oenoe alamala.” A e taki disi, foe di a sabi taki Judas Iskariòt abi na prakseri foe tori en.

Te Jesus wasi den foetoe foe ala den twarfoe apostel, so srefi den foetoe foe Judas toe, a sma di o tori en, dan a e weri den tapoesei krosi foe en èn e go didon baka na a tafra. Dan a e aksi: „Oenoe sabi san mi doe gi oenoe? Oenoe e kari mi ’Leriman’ nanga ’Masra’, èn oenoe taki leti, bika na dati mi de. Foe dati ede, efoe mi, ala di mi de Masra nanga Leriman, ben wasi oen foetoe, dan oenoe abi foe wasi den foetoe foe makandra toe. Bika mi ben gi oenoe na eksempre, so taki oenoe ben sa doe toe neleki fa mi ben doe gi oenoe. Foe troe, foe troe, mi e taigi oenoe: Wan srafoe no bigi moro en meester, èn a sma di den e seni go, no bigi moro a sma di seni en. Efoe oenoe sabi den sani disi, kolokoe foe oenoe te oenoe e doe den.”

Disi na troetroe wan toemoesi moi sani di e leri sma foe dini trawan nanga sakafasi! Den apostel no moesoe soekoe foe teki a fosi presi, èn denki taki den de so prenspari taki ala den trawan moesoe dini den. Den moesoe waka baka na eksempre di Jesus gi. A sani disi no abi foe doe nanga a gwenti foe wasi foetoe. Nôno, ma a abi foe doe nanga a de di wan sma de klariklari foe dini sma sondro foe desko trawan, awansi fa a wroko lagi noso froeferi kande. Mateus 26:20, 21; Markus 14:17, 18; Lukas 22:14-18; 7:44; Johanes 13:1-17.

Kapitel 114

A Memrefesa njanjan

BAKA DI Jesus wasi den foetoe foe den apostel foe en, a e teki a tekst taki di skrifi na Psalm 41:​9, èn a e taki: „A sma di ben gwenti foe njan mi brede, opo en bakafoetoe teige mi.” A jeje foe en e kon broeja, èn a e tjari kon na krin: „Wan foe oenoe o tori mi.”

Den apostel e bigin sari èn wan froe wan den e taigi Jesus: „A no mi, a no so?” Srefi Judas Iskariòt e aksi disi. Johanes, di e didon leti sei Jesus na a tafra, e anga go na baka na Jesus borsoe èn a e aksi: „Masra, soema na en?”

„Na wan foe den twarfoe, di e soetoe en anoe makandra nanga mi go na ini a srefi skarki”, Jesus e piki. „A troe, taki a Manpikin foe libisma e gowe, soleki fa den skrifi foe en, ma heloe foe a sma dati di, nanga jepi foe en, den e tori a Manpikin foe libisma! A ben sa moro boen gi a sma dati, efoe a no ben gebore.” Baka dati, Satan e kon ete wan tron na ini Judas, èn a e meki gebroiki foe a pasi di kon opo foe doro en ati, di kon ogri. Moro lati a neti dati, Jesus e kari Judas nanga reti „a manpikin foe pori”.

Now Jesus e taigi Judas: „A sani di joe e doe, doe en moro esi.” No wan foe den tra apostel e froestan san Jesus abi na prakseri. Foe di a monikisi de na Judas, meki sonwan foe den e prakseri taki Jesus e taigi en: „Bai san wi abi fanowdoe gi a fesa”, noso taki a ben moesoe go èn gi den pôtiwan wan sani.

Baka di Judas gowe, dan Jesus e seti wan heri njoen fesa, noso memrefesa, nanga den getrow apostel foe en. A e teki wan brede, a e taki Gado tangi, a e broko en èn a e gi den a brede, ala di a e taki: „Teki, njan.” A e tjari kon na krin: „Disi wani taki mi skin di sa gi foe a boen foe oenoe. Tan doe disi foe memre mi.”

Baka te den alamala njan foe a brede, Jesus e teki wan beker nanga win. Soleki fa a sori, dan disi na a di foe fo beker di ben gebroiki na a Paskafesa. So srefi gi disi a e taki Gado tangi, a e langa en gi den, a e aksi den foe dringi foe en, èn e taki: „A beker disi wani taki a njoen froebontoe akroederi mi broedoe di sa trowe foe a boen foe oenoe.”

Te joe loekoe en boen, dan disi na wan memrefesa foe memre a dede foe Jesus. Soleki fa Jesus e taki, dan a fesa disi moesoe hori ibri jari tapoe 14 Nisan, foe memre en. A sa memre den sma di e hori a fesa, na san Jesus nanga en hemel Tata doe foe froeloesoe a libisma famiri foe a kroetoe foe dede. Gi den djoe di tron bakaman foe Krestes, a hori di den o hori a fesa disi, sa kon na ini a presi foe a Paska.

A njoen froebontoe di e bigin wroko nanga a broedoe foe Jesus di ben trowe, e kon na ini a presi foe na owroe Wetfroebontoe. Jesus Krestes na a mindriman foe a njoen froebontoe na mindri toe groepoe — na a wan sei joe abi Jehovah Gado, èn na a tra sei joe abi den 144.000 kresten di salfoe nanga santa jeje. Boiti taki a froebontoe e sorgoe taki sma e kisi pardon foe sondoe, a e opo a pasi toe foe meki wan nâsi foe kownoe nanga priester na hemel. Mateus 26:21-29; Markus 14:18-25; Lukas 22:19-23; Johanes 13:18-30; 17:12; 1 Korentesma 5:7.

▪ Sortoe bijbel profeititori Jesus e teki foe taki foe wan kompe, èn fa a e gebroiki a profeititori disi?

▪ Foe san ede den apostel e sari srefisrefi, èn san ibriwan foe den e aksi?

▪ San Jesus e taigi Judas foe doe, ma san den tra apostel e denki taki a taigi Judas?

▪ Sortoe fesa Jesus e seti baka di Judas gowe, èn san Jesus abi na prakseri nanga a fesa disi?

▪ Soema na den groepoe na ini a njoen froebontoe, èn san a froebontoe e doe?

Kapitel 115

Wan haritaki e opo ede kon

NA A bigin foe a neti, di Jesus ben wasi den foetoe foe den apostel foe en, a ben leri den wan kefalek moi sani foe den dini trawan nanga sakafasi. Baka dati, a ben seti a Memrefesa foe memre en dede, di e kon krosibei. Now wan sani e pasa di, spesroetoe te wi loekoe san pasa didjonsro, e gi foe froewondroe. Den apostel foe en e bigin haritaki nanga makandra fajafaja foe a tori soema foe den sori foe de a moro bigiwan! Soleki fa a sori, dan disi na wan kesekese di de wan moi pisi ten kaba.

Memre taki, baka di Jesus kisi wan transfiguratie na tapoe a bergi, den apostel ben hari taki nanga makandra foe soema foe den ben de a moro bigiwan. Boiti dati, Jakobus nanga Johanes ben aksi foe kisi wan hei posisi na ini a Kownoekondre, wan sani di ben tjari moro kesekese kon na mindri den apostel. Now, na a lasti neti di Jesus de nanga den, èn a moesoe sari en foe troe foe si den e meki trobi baka! San a e doe?

Na presi foe a e piri-ai gi den apostel foe a fasi fa den e tjari densrefi, nanga pasensi Jesus e taki-go-taki-kon nanga den ete wan tron: „Den kownoe foe den nâsi e tiri den, èn den di abi makti na den tapoe, den e kari Sma di e doe boen. Ma oenoe no moesoe de so. . . . Bika soema moro bigi, a sma di e didon na tafra noso a sma di e dini? A no a sma di e didon na tafra?” Baka dati, a e memre den na a eksempre foe en. A e taki: „Ma mi de na oen mindri leki a sma di e dini.”

Ala di den apostel abi onvolmaakti fasi, tokoe den tan na Jesus na ini den tesi foe en. Foe dati ede a e taki: „Mi e meki wan froebontoe nanga oenoe, neleki fa mi Tata meki wan froebontoe nanga mi, foe wan kownoekondre.” A persoonlijk froebontoe disi di meki na mindri Jesus nanga den loyaal bakaman foe en, e meki den kon na ini wánfasi nanga en foe teki prati na en Kownoekondre tiri. Soso wan pikin groepoe foe 144.000 sma teki poti na ini a froebontoe disi foe wan Kownoekondre te foe kaba.

Ala di den apostel e kisi a kefalek moi howpoe disi foe teki prati nanga Krestes na a Kownoekondre tiri, tokoe den swaki na jejefasi na a momenti disi. Jesus e taki: „A neti disi oenoe alamala sa naki foetoe foe mi ede.” Ma baka di Jesus taigi Petrus taki A begi foe a boen foe Petrus, dan A e gi en tranga: „Te joe drai kon baka kaba, gi tranga na den brada foe joe.”

„Oen pikin,” na so Jesus e tjari kon na krin, „wan sjatoe pisi ten mi de ete nanga oenoe. Oenoe sa soekoe mi; èn soleki fa mi taigi den djoe: ’Pe mi e go, oenoe no kan kon’, na so mi e taigi oenoe na a momenti disi toe. Mi e gi oenoe wan njoen komando, dati oenoe lobi makandra; neleki fa mi lobi oenoe, oenoe toe moesoe lobi makandra. Nanga disi ala sma sa sabi taki oenoe na mi disipel, efoe oenoe abi lobi na oen mindri.”

„Masra, pe joe e go?”, Petrus e aksi.

„Pe mi e go, joe no kan kon na mi baka now,” Jesus e piki „ma bakaten joe sa kon.”

„Masra, foe san ede mi no kan kon na joe baka now?”, Petrus wani sabi. „Mi sa gi mi sili foe joe ede.”

„Joe sa gi joe sili foe mi ede?”, Jesus e aksi. „Foe troe, mi e taigi joe: Tide ete, ija, a neti disi, bifo wan kakafowroe bari toe tron, srefi joe sa taki dri tron dati joe no sabi mi.”

„Awansi mi moesoe dede nanga joe,” Petrus e taki, foe di a no e agri nanga san Jesus taki, „tokoe mi no sa taki kwetikweti taki mi no sabi joe.” Èn ala di den tra apostel e taki a srefi sani toe, Petrus e djaf: „Awansi ala den trawan e naki foetoe foe joe ede, noiti sani sa meki mi naki foetoe!”

Jesus e sori go na a ten di a ben seni den apostel go na wan preikiwaka na Galilea sondro taki den ben abi wan monisaka nanga wan njanjansaka, èn a e aksi: „Oenoe ben mankeri wan sani na a ten dati?”

„Nôno!”, den e piki.

„Ma now, meki a sma di abi wan monisaka, teki en, nanga wan njanjansaka toe”, a e taki, „èn meki a sma di no abi feti-owroe, seri en tapoesei krosi èn bai wán. Bika mi e taigi oenoe taki a sani disi di skrifi, moesoe kon troe na ini mi, dati wani taki: ’Èn den ben teri en na mindri den sma di e doe kroektoedoe.’ Bika a sani di abi foe doe nanga mi, e feni presi now.”

Jesus e sori na tapoe a ten te den sa anga en na wan postoe makandra nanga tra ogriman, noso sma di doe kroektoedoe. A e sori toe taki baka dati, den bakaman foe en sa moesoe kakafoetoe gi hebi froefolgoe. „Masra, loekoe! djaso toe feti-owroe de”, den e taki.

„A nofo”, a e piki. Soleki fa wi sa si, dan a no sa teki langa fosi Jesus sa kisi na okasi foe leri den ete wan prenspari sani, foe di den abi den feti-owroe na den. Mateus 26:31-35; Markus 14:27-31; Lukas 22:24-38; Johanes 13:31-38; Openbaring 14:1-3.

▪ Foe san ede a de so wan froewondroe sani taki den apostel e haritaki nanga makandra?

▪ Fa Jesus e loesoe a haritaki?

▪ San e doe kon nanga jepi foe a froebontoe di Jesus meki nanga den disipel foe en?

▪ Sortoe njoen gebod Jesus e gi, èn o prenspari a de?

▪ Fa Petrus e sori taki a e froetrow toemoesi na tapoe ensrefi èn san Jesus e taki?

▪ Foe san ede den sani di Jesus e taki foe a tjari di wan sma moesoe tjari wan monisaka nanga wan njanjansaka, de heri tra fasi foe san a ben taki na fesi kaba?

Kapitel 116

Jesus e sreka den apostel gi a gowe di a o gowe

DEN njan a memrefesa njanjan kaba, ma Jesus nanga den apostel foe en de ete na a kamra na tapoe sodro. Ala di a no de langa moro taki Jesus o gowe, tokoe a abi foeroe sani foe taki ete. „No meki oen ati kon broeja”, na so a e trowstoe den. „Sori bribi na ini Gado.” Ma a e taki moro fara: „Sori bribi toe na ini mi.”

„Na ini na oso foe mi Tata foeroe tanpresi de”, Jesus e go moro fara. „Mi e go drape foe sreka wan presi gi oenoe . . . so taki oenoe kan de toe pe mi de. Èn oenoe sabi a pasi pe mi e go.” Den apostel no e froestan taki Jesus e taki foe a go di a sa go na hemel, èn foe dati ede Tomas e aksi: „Masra, wi no sabi pe joe e go. Fa wi sabi a pasi dan?”

„Mi na a pasi nanga a waarheid nanga a libi”, Jesus e piki. Ija, soso te wan sma e teki en èn e waka na baka en waka nanga libi, dan a kan go na ini a hemel oso foe a Tata, bika, soleki fa Jesus e taki, „no wan sma e kon na a Tata sondro a jepi foe mi”.

„Masra, sori wi a Tata,” Filipus e aksi, „dan a boen kaba gi wi.” Soleki fa a sori, dan Filipus wani foe Jesus doe wan sani, so taki Filipus kan si Gado nanga en ai, neleki fa Moses, Elia nanga Jesaja na ini owroeten ben kisi a grani disi na ini fisjoen. Ma te joe loekoe en boen, dan den apostel abi wan moro betre sani leki den sortoe fisjoen dati, soleki fa Jesus e taki: „So langa kaba mi de nanga oenoe, èn tokoe joe no kon sabi mi ete, Filipus? A sma di si mi, si a Tata toe.”

Na so wan volmaaktifasi Jesus e sori a sma di en Tata de, taki, te joe de nanga en èn e loekoe finifini san a e doe, dan a de leki joe e si a Tata troetroe. Tokoe a Tata bigi moro a Manpikin, soleki fa Jesus e erken: „Den sani di mi e taigi oenoe, a no foe misrefi mi e taki den.” A fiti taki Jesus e gi en hemel Tata ala grani foe den leri foe en.

Disi moesoe de troetroe wan deki-ati gi den apostel foe jere Jesus e taigi den now: „A sma di e sori bribi na ini mi, a sma dati sa doe den wroko toe di mi e doe; èn a sa doe wroko di bigi moro den disi”! Jesus no wani taki, dati den bakaman foe en sa sori foe abi moro bigi krakti foe doe wondroe, leki a krakti di en ben abi. Nôno, ma a wani taki, dati den sa doe a diniwroko na ini wan moro langa pisi ten, na ini wan moro bigi kontren èn na moro foeroe sma.

Jesus no sa drai en baka gi den disipel foe en, baka te a gowe. „Awansi san oenoe e aksi na ini mi nen,” a e pramisi, „mi sa doe dati.” A e taki moro fara: „Mi sa aksi a Tata èn a sa gi oenoe wan tra jepiman, a jeje foe waarheid, foe de nanga oenoe foe têgo.” Baka ten, baka di Jesus opo go na hemel, a e kanti a santa jeje, a tra jepiman disi, kon na tapoe den disipel foe en.

A no sa de langa moro fosi Jesus o gowe, soleki fa a e taki: „Ete wan sjatoe pisi ten, dan grontapoe no sa si mi moro.” Jesus sa de wan jeje mekisani di no wan sma kan si. Ma agen Jesus e pramisi den getrow apostel foe en: „Oenoe sa si mi, bika mi e libi èn oenoe sa libi.” Ija, no wawan Jesus sa sori ensrefi na den na ini libisma skin baka te a opo baka, ma na wan tra ten a sa gi den wan opobaka foe den kisi libi nanga en na hemel leki jeje mekisani.

Now Jesus e taki na eenvoudig lin: „A sma di abi den komando foe mi èn e hori den, a sma dati na a sma di lobi mi. Ma a sma di lobi mi, mi Tata sa lobi en, èn mi sa lobi en èn sa sori misrefi na en krinkrin.”

Now na apostel Judas, a wan di den e kari Tadeus toe, e koti Jesus mofo: „Masra, san pasa taki joe wani sori joesrefi krinkrin na wi èn no na grontapoe?”

„Efoe wan sma lobi mi,”Jesus e piki, „dan a sa doe san mi taki, èn mi Tata sa lobi en . . . A sma di no lobi mi, no e doe san mi taki.” Grontapoe no wani sabi den leri foe Krestes, leki fa den bakaman foe en di e gi jesi na en, e doe dati. Foe dati ede a no e sori ensrefi na den.

Di Jesus ben doe en diniwroko na grontapoe, a ben leri den apostel foe en foeroe sani. Fa den sa memre ala den sani, spesroetoe foe di, te nanga a momenti disi srefi, den no man foe froestan someni? Kolokoe taki Jesus e pramisi: „A jepiman, a santa jeje, di a Tata sa seni kon na ini mi nen, a wan dati sa leri oenoe ala sani èn tjari ala den sani di mi ben froeteri oenoe kon baka na ini oen prakseri.”

Agen Jesus e trowstoe den, te a e taki: „Vrede mi e libi gi oenoe, mi e gi oenoe a vrede foe mi. . . . No meki oen ati kon broeja.” A troe, taki Jesus e gowe, ma a e tjari kon na krin: „Efoe oenoe ben lobi mi, dan oenoe ben sa prisiri taki mi e teki mi pasi go na a Tata, bika a Tata bigi moro mi.”

Jesus no sa de langa moro nanga den. „Mi no sa taki foeroe moro nanga oenoe,” a e taki, „foe di a tiriman foe grontapoe e kon. Èn a no abi makti na mi tapoe.” Satan Didibri, a sma di ben man foe go na ini Judas ati èn abi makti na en tapoe, na a tiriman foe grontapoe. Ma no wan swakifasi foe sondoe ede de na ini Jesus, di Satan kan gebroiki na wan fowtoe fasi foe drai Jesus poeroe foe a dini di a e dini Gado.

Njan boen foe wan krosibei matifasi

Baka di Jesus nanga den apostel foe en njan a memrefesa njanjan, dan a e gi den deki-ati, foe di a taki leki wan krosibei mati nanga den. Kande mindrineti pasa kaba. Foe dati ede Jesus e gi den tranga: „Oen opo, meki wi gowe foe djaso.” Ma bifo den e gowe, dan a lobi di Jesus abi gi den, e meki taki a e go doro foe taki nanga den, èn foe gi den wan agersitori di e gi den deki-ati.

„Mi na a troe droifibon, èn mi Tata na a sma di e kweki den droifi”, na so a e bigin. Jehovah Gado, a Bigi Sma di e kweki droifi, ben prani na agersi droifibon disi di a ben salfoe Jesus nanga santa jeje di Jesus ben teki dopoe na ini a herfst foe 29 G. T. Ma Jesus e go doro foe sori taki a droifibon e agersi moro leki en wawan, foe di a e taki: „Ibri taki na ini mi di no e meki froktoe, a e teki poeroe, èn ibriwan di e meki froktoe, a e krin, so taki a kan meki moro froktoe. . . . Neleki fa a taki no kan meki froktoe foe ensrefi efoe a no e tan na a droifibon, na a srefi fasi oenoe no kan meki froktoe toe, efoe oenoe no e tan na ini wánfasi nanga mi. Mi na a droifibon, oenoe na den taki.”

Feifitenti na wan dei baka dati, na a ten foe a Pinksterfesa, den apostel nanga trawan e tron taki foe a droifibon. Disi e pasa te santa jeje e kanti go na den tapoe. Te foe kaba, dan 144.000 sma e tron taki foe na agersi droifibon. Makandra nanga a bonskin foe a droifibon, Jesus Krestes, den wan disi e tron wan agersi droifibon di e meki den froktoe foe Gado Kownoekondre.

Jesus e tjari kon na krin fa den kan meki froktoe: „A sma di e tan na ini wánfasi nanga mi, èn mi na ini wánfasi nanga en, a sma disi e meki foeroe froktoe; bika sondro mi oenoe no man doe noti kwetikweti.” Ma efoe wan sma no e meki froktoe, na so Jesus e taki, dan „den e iti en go na dorosei leki wan taki èn a e drei gowe; èn den e piki den taki dati kon na wán èn e trowe den go na ini a faja èn den e bron den”. Na a tra sei Jesus e pramisi: „Efoe oenoe e tan na ini wánfasi nanga mi èn den wortoe foe mi e tan na ini oenoe, dan aksi awinsi san oenoe wani toe èn oenoe sa kisi en.”

Jesus e taigi den apostel foe en moro fara: „Mi Tata e kisi glori na ini disi, taki oenoe tan meki foeroe froktoe èn sori taki oenoe na mi disipel.” Den froktoe di Gado wani si foe den, na den kresten eigifasi di den moesoe sori, spesroetoe lobi. Boiti dati, foe di Krestes ben de wan preikiman foe Gado Kownoekondre, meki a froktoe di Gado wani si, abi na ini toe a wroko foe den foe meki disipel neleki fa en ben doe.

„Tan na ini mi lobi”, na so Jesus e gi deki-ati now. Ma fa den apostel foe en kan doe disi? „Efoe oenoe e hori den komando foe mi,” a e taki, „dan oenoe sa tan na ini mi lobi.” Moro fara Jesus e tjari kon na krin: „Disi na mi komando, taki oenoe lobi makandra neleki fa mi ben lobi oenoe. No wan sma abi moro bigi lobi leki disi, taki wan sma e gi en sili abra foe a boen foe den mati foe en.”

Baka wan toe joeroe, Jesus sa sori a lobi disi di e pasa ala tra sani, foe di a o gi en libi foe a boen foe den apostel foe en, èn foe ala trawan toe di sa sori bribi na ini en. Na eksempre foe en moesoe boeweigi den bakaman foe en foe abi a srefi lobi foe òfer densrefi gi makandra. Soleki fa Jesus ben taki na fesi kaba, dan a lobi disi sa meki sma kon sabi den: „Nanga disi ala sma sa sabi taki oenoe na mi disipel, efoe oenoe abi lobi gi makandra.”

Foe meki sma kon sabi den mati foe en, Jesus e taki: „Oenoe na mi mati efoe oenoe e doe san mi e komanderi oenoe. Mi no e kari oenoe srafoe moro, bika wan srafoe no sabi san en masra e doe. Ma mi kari oenoe mati, bika ala den sani di mi jere foe mi Tata, mi meki oenoe kon sabi dati.”

Dati na troetroe wan diri matifasi — foe de krosibei mati foe Jesus! Ma efoe den bakaman foe en wani tan abi a matifasi disi, dan den moesoe „tan meki froktoe”. Efoe den doe dati, na so Jesus e taki, dan „awansi san oenoe e aksi a Tata na ini mi nen, a [sa] gi oenoe dati”. Foe troe, dati na wan bigi pai di den e kisi foe di den meki Kownoekondre froktoe! Baka di Jesus e gi den apostel tranga ete wan tron foe „lobi makandra”, dan a e tjari kon na krin taki grontapoe no sa wani si den na ai. Tokoe a e trowstoe den: „Efoe grontapoe no wani si oenoe na ai, dan oenoe sabi taki a no ben wani si mi na ai, bifo a no ben wani si oenoe na ai.” Dan Jesus e tjari kon na krin foe san ede grontapoe no wani si den bakaman foe en na ai, te a e taki: „Bika oenoe no de wan pisi foe grontapoe, ma mi teki oenoe poeroe foe grontapoe, na foe dati ede meki grontapoe no wani si oenoe na ai.”

Jesus e tjari moro fara kon na krin foe san ede grontapoe no wani si den na ai, foe di a e go doro foe taki: „Ala den sani disi den sa doe na oenoe foe mi nen ede, foe di den no sabi en [Jehovah Gado] di ben seni mi kon.” Te joe loekoe en boen, dan den wondroe wroko foe Jesus, e kroetoe den wan di no wani si en na ai, soleki fa a e taki: „Efoe mi no ben doe den wroko na den mindri di no wan tra sma ben doe, dan den no ben sa abi sondoe; ma now den si mi nanga a Tata èn den no wani si mi nanga En na ai.” Foe dati ede, soleki fa Jesus e taki, den Boekoe kon troe: „Den no ben wani si mi na ai, sondro foe den abi wan reide.”

Neleki fa Jesus ben doe na fesi kaba, na so a e trowstoe den baka, foe di a e pramisi foe seni a jepiman, a santa jeje, di de a tranga wroko krakti foe Gado. „A wan dati sa gi kotoigi foe mi; èn oenoe, foe oen sei, moesoe gi kotoigi.”

Jesus e gi moro froemane bifo a e gowe

Jesus nanga den apostel de so fara foe gowe libi a kamra na a tapoe sodro. „Mi taki den sani disi nanga oenoe, so taki oenoe no sa naki foetoe”, a e go doro. Dan a e gi den a serjoesoe warskow: „Sma sa trowe oenoe komoto na a snoga. Ija, a joeroe e kon taki ibriwan sma di kiri oenoe, sa bribi taki a doe wan santa diniwroko gi Gado.”

A de krin, taki a warskow disi e broeja den apostel srefisrefi. Ala di Jesus ben taki kaba, dati grontapoe no ben sa wani si den na ai, tokoe noiti a no ben taki so krin dati sma ben o kiri den. „Ini a bigin mi no ben taigi oenoe den sani [disi],” Jesus e tjari kon na krin, „bika mi ben de nanga oenoe.” Ija, a de troetroe wan moi sani, taki a e sreka den na fesi nanga den tori disi bifo a e gowe!

„Ma now”, Jesus e go moro fara, „mi e go na en di ben seni mi kon, èn tokoe no wan foe oenoe e aksi mi: ‘Pe joe e go?’” A neti dati den ben aksi wan leisi kaba pe a ben o go, ma now a sani di a froeteri den, seki den so kefalek, taki den no e aksi moro foe a tori disi. Soleki fa Jesus e taki: „Foe di mi froeteri oenoe den sani disi, meki oen ati kon foeroe nanga sari.” Den apostel e sari, no wawan foe di den kon sabi taki den sa kisi hebi froefolgoe èn taki sma sa kiri den, ma foe di a Masra foe den e gowe libi den.

Foe dati ede Jesus e tjari kon na krin: „Na foe a boen foe oenoe meki mi e gowe. Bika efoe mi no e gowe, dan a jepiman no sa kon kwetikweti na oenoe; ma efoe mi go mi pasi, dan mi sa seni en gi oenoe.” Leki wan libisma, Jesus kan de soso na wán presi nomo na a srefi ten, ma te a de na hemel, dan a kan seni a jepiman, Gado santa jeje, kon gi den bakaman foe en, awansi pe foe grontapoe den sa de toe. Foe dati ede a gowe di Jesus o gowe sa tjari wini kon.

A santa jeje, na so Jesus e taki, „sa gi grontapoe na overtoigi boeweisi di abi foe doe nanga sondoe èn di abi foe doe nanga regtfardikifasi èn di abi foe doe nanga kroetoe”. A sondoe foe grontapoe, a sori di a no e sori bribi na ini a Manpikin foe Gado, sa tjari kon na krin. Boiti dati, wan overtoigi boeweisi foe a regtfardikifasi foe Jesus sa gi te a opo go na hemel na en Tata. Èn taki Satan nanga en ogri grontapoe no ben man foe broko a soifri retifasi foe Jesus, na wan overtoigi boeweisi taki a tiriman foe grontapoe kisi wan takroe kroetoe.

„Mi abi foeroe sani ete foe taigi oenoe,” Jesus e go moro fara, „ma oenoe no man tjari den now.” Foe dati ede Jesus e pramisi taki te a e kanti a santa jeje kon, san na a wroko krakti foe Gado, dan a jeje disi sa jepi den foe froestan den sani disi soleki fa den man froestan den.

San den apostel no e froestan na taki Jesus o dede èn taki baka dati a sa sori ensrefi na den, baka te a kisi wan opobaka. So boen, den e aksi makandra: „San a sani disi di a e taigi wi, wani taki: ’Ete wan sjatoe pisi ten, dan oenoe no sa si mi moro, èn agen, ete wan sjatoe pisi ten èn oenoe sa si mi’, èn: ’bika mi e go na a Tata’?”

Jesus e froestan taki den wani poti aksi gi en, foe dati ede a e tjari kon na krin: „Foe troe, foe troe mi e taigi oenoe: Oenoe sa krei èn bari krei, ma grontapoe sa prisiri; oenoe sa sari, ma a sari foe oenoe sa kon tron prisiri.” Moro lati na a dei dati, na bakadina, te den kiri Jesus, dan den grontapoe relisi fesiman e prisiri, ma den disipel e sari. Ma a sari foe den e tron prisiri, te Jesus e kisi wan opobaka! Èn a prisiri foe den e tan te a e gi den krakti na a Pinksterfesa foe de en kotoigi, foe di a e kanti a santa jeje foe Gado go na den tapoe!

Te Jesus e teki a situwâsi foe den apostel gersi di foe wan oema di abi skin-ati foe di a moesoe kisi wan pikin, dan a e taki: „Wan oema e sari, te a de foe meki, foe di a joeroe foe en doro.” Ma Jesus e taki dati na oema no e prakseri a banawtoe foe en moro, te a pikin foe en gebore kaba, èn a e gi den apostel foe en a deki-ati: „Foe dati ede, so srefi oenoe e sari now foe troe; ma mi sa si oenoe baka [te mi kisi wan opobaka na dede] èn oen ati sa prisiri, èn no wan sma sa poeroe a prisiri foe oenoe.”

Te na a momenti disi, den apostel noiti no ben aksi wan sani na ini a nen foe Jesus. Ma now a e taki: „Efoe oenoe aksi a Tata wan sani, dan a sa gi oenoe en na ini mi nen. . . . Foe di a Tata srefi abi safoe firi foe lobi gi oenoe, bika oenoe ben abi safoe firi foe lobi gi mi èn oenoe bribi taki mi komoto kon leki a sma di e teki presi gi a Tata. Mi komoto na a Tata èn kon na grontapoe. Now mi e gowe libi grontapoe èn e go na a Tata.”

Den wortoe foe Jesus de wan bigi deki-ati gi den apostel. „Foe den sani disi ede wi e bribi taki joe komoto na Gado”, den e taki. „Oenoe e bribi na a momenti disi?”, Jesus e aksi. „Loekoe! A joeroe e kon, ija, a doro, taki den sa panja oenoe, ibriwan sma go na en eigi oso èn oenoe sa gowe libi mi.” Ala di a gersi wan sani di no de foe bribi, tokoe disi e pasa bifo neti kaba!

„Mi taigi oenoe den sani disi, so taki oenoe kan abi vrede nanga jepi foe mi.” Jesus e tapoe: „Na ini grontapoe oenoe abi banawtoe, ma abi deki-ati! Mi wini grontapoe.” Jesus ben wini grontapoe, foe di a ben doe a wani foe Gado na wan getrowfasi ala di Satan nanga en grontapoe ben proeberi ala sani foe broko a soifri retifasi foe Jesus.

Wan lasti begi na ini a kamra na a tapoe sodro

Foe di Jesus firi dipi lobi gi den apostel foe en, meki a sreka den gi a gowe di a sa gowe djonsrode. Now, baka di a froemane den èn trowstoe den boen langa, a e opo en ai go na hemel èn a e begi en Tata: „Gi joe manpikin glori, so taki joe manpikin kan gi joe glori, soleki fa joe gi en makti na tapoe ala skin, taki, te joe loekoe a heri nomroe foe den wan di joe ben gi en, dan a kan gi den têgo libi.”

Dja Jesus e taki foe wan troetroe span tori — têgo libi! Foe di Jesus kisi „makti na tapoe ala skin”, meki a kan gebroiki den winimarki foe en loesoe-paiman gi a heri libisma famiri di e dede gowe. Tokoe a e gi „têgo libi” soso na den wan di en Tata feni boen. Te Jesus e taki moro fara foe a tori disi foe têgo libi, a e go doro nanga a begi foe en:

„Disi wani taki têgo libi, foe den teki sabi doronomo na ini den foe joe, a wan-enkri troe Gado, èn foe en di joe ben seni kon, Jesus Krestes.” Ija, efoe wi wani foe kisi froeloesoe, dan dati e anga foe a teki di wi e teki sabi na ini wi foe Gado èn foe en Manpikin. Ma moro de fanowdoe leki soso foe abi sabi na ini joe froestan.

Wan sma moesoe kon sabi den dorodoro, ala di a e meki wan krosibei matifasi gro kon na mindri en nanga den. Wan sma moesoe prakseri foe afersi neleki fa den e prakseri foe dati èn si sani leki fa den e si sani. Boiti dati, wan sma moesoe feti foe waka baka den eigifasi foe den di de sondro speri, te a e handri nanga tra sma.

Baka dati Jesus e begi: „Mi ben gi joe glori na grontapoe, foe di mi kaba a wroko di joe ben gi mi foe doe.” Foe di Jesus doe a wroko di a ben kisi foe doe te so fara èn foe di a de seiker taki sani sa waka boen gi en na ini a ten di e kon, meki a e begi: „Tata, gi mi a glori na joe sei di mi ben abi na joe sei bifo grontapoe ben de.” Ija, now a e aksi efoe nanga jepi foe wan opobaka a kan kisi a hemel glori baka di a ben abi fosi.

Te Jesus e loekoe sjatoe a moro prenspari wroko di a ben doe na grontapoe, dan a e taki: „Mi tjari joe nen kon na krin gi den sma di joe ben gi mi na grontapoe. Den ben de foe joe, èn joe ben gi den na mi, èn den ben doe san joe taki.” Jesus ben gebroiki a nen foe Gado, Jehovah, na ini en diniwroko èn a ben sori wan joisti fasi fa foe taki a nen, ma a ben doe moro leki dati foe tjari Gado nen kon na krin gi den apostel foe en. A ben meki a sabi di den ben abi foe Jehovah, foe a sma di A de, foe den prakseri foe en èn a warderi di den ben abi gi en, gro toe.

Jesus e gi Jehovah a grani leki a Sma di hei moro en, leki a Sma di a e wroko na en ondro, èn foe dati ede a e erken nanga sakafasi: „Den wortoe di joe ben gi mi foe taki, mi ben gi na den, èn den ben teki den èn den ben kon sabi troetroe taki mi ben kon leki a sma di e teki presi gi joe, èn den bribi taki joe ben seni mi kon.”

Foe di Jesus e meki wan difrenti na mindri den bakaman foe en nanga a tra pisi foe a libisma famiri, meki a e begi baka dati: „Mi no e begi gi grontapoe, ma gi den wan di joe gi mi . . . Di mi ben de nanga den, mi ben gwenti foe loekoe den . . . , èn mi kibri den, èn no wan foe den ben kisi pori, boiti a manpikin foe pori”, dati wani taki, Judas Iskariòt. Na a srefi momenti disi, Judas e doe a lagi wroko foe en foe tori Jesus. Na so fasi Judas e meki den Boekoe foe bijbel kon troe sondro foe a sabi.

„Grontapoe no ben wani si den na ai”, na so Jesus e go doro foe begi. „Mi e begi joe, no foe teki den poeroe foe grontapoe, ma foe loekoe den foe na ogriwan ede. Den no de wan pisi foe grontapoe, neleki fa mi no de wan pisi foe grontapoe.” Den bakaman foe Jesus de na ini grontapoe, a libisma libimakandra disi di orga èn di Satan e tiri, ma den de aparti foe a grontapoe disi nanga en ogridoe èn alaten den moesoe tan aparti foe en.

„Meki den kon santa nanga jepi foe a waarheid”, Jesus e go doro, „joe wortoe na waarheid.” Djaso Jesus e kari den Hebrew Boekoe foe bijbel di skrifi nanga jepi foe a santa jeje, „a waarheid”. Doronomo a ben teki wortoe taki foe den Boekoe disi. Ma san a ben leri den disipel foe en èn san den ben skrifi baka ten nanga jepi foe a santa jeje leki den Griki Boekoe foe bijbel, na „a waarheid” toe. A waarheid disi kan meki wan sma kon santa, kenki en libi krinkrin, èn meki en kon tron wan sma di de aparti foe grontapoe.

Now Jesus e begi „no wawan gi den wan disi, ma so srefi gi den wan di e poti bribi na ini [en] nanga a wortoe foe den”. Na so Jesus e begi gi den wan di sa tron den salfoe bakaman foe en èn gi tra disipel di a ben o kisi na ini a ten di ben o kon èn di den sa tjari kon ete na ini „wán ipi”. San a e aksi gi ala den wan disi?

„Taki den alamala kan de wán, neleki fa joe, Tata, de na ini wánfasi nanga mi èn mi de na ini wánfasi nanga joe, . . . taki den kan de wán neleki fa wi de wán.” Jesus nanga en Tata no de troetroe wán sma, ma den e agri nanga makandra na ini ala sani. Jesus e begi efoe den bakaman foe en kan abi a srefi sortoe wánfasi disi, so taki „grontapoe kan kon sabi taki joe ben seni mi kon èn taki joe ben lobi den neleki fa joe ben lobi mi”.

Now Jesus e aksi en hemel Tata wan sani gi a boen foe den wan di ben o tron en salfoe bakaman. San a e aksi? „Taki, pe mi de, den kan de nanga mi toe, so taki den si a glori foe mi di joe gi mi, bika joe ben lobi mi bifo grontapoe seti”, dati wani taki, bifo Adam nanga Eva ben kisi pikin. Langa ten bifo dati, Gado ben lobi en wan-enkri gebore Manpikin, di ben tron Jesus Krestes.

Jesus e tapoe nanga en begi, èn agen a e poti krakti na tapoe disi: „Mi meki joe nen bekènti na den èn mi sa meki en bekènti, so taki a lobi di joe ben lobi mi, kan de na ini den èn mi na ini wánfasi nanga den.” Foe di den apostel kon sabi a nen foe Gado, meki densrefi kon sabi a lobi foe Gado. Johanes 14:1–17:26; 13:27, 35, 36; 10:16; Lukas 22:3, 4; Exodus 24:10; 1 Kownoe 19:9-13; Jesaja 6:1-5; Galasiasma 6:16; Psalm 35:19; 69:4; Odo 8:22, 30.

▪ Pe Jesus e go, èn sortoe piki Tomas e kisi na ini a tori foe a pasi di e go drape?

▪ San Filipus e aksi foe Jesus, soleki fa a sori?

▪ Foe san ede a sma di si Jesus, si a Tata toe?

▪ Fa den bakaman foe Jesus sa doe moro bigi wroko leki san en ben doe?

▪ Na sortoe fasi Satan no abi makti na tapoe Jesus?

▪ O ten Jehovah ben prani na agersi droifibon, èn o ten èn fa trawan e tron wan pisi foe a droifibon?

▪ Omeni taki na agersi droifibon abi te foe kaba?

▪ Sortoe froktoe Gado wani si foe den taki?

▪ Fa wi kan de mati foe Jesus?

▪ Foe san ede grontapoe no wani si den bakaman foe Jesus na ai?

▪ Sortoe warskow foe Jesus e broeja den apostel foe en?

▪ Foe san ede den apostel no e aksi Jesus pe a e go?

▪ Sortoe sani spesroetoe den apostel no man foe froestan?

▪ Sortoe eksempre Jesus e gebroiki foe sori taki a sari di den apostel e sari, sa kenki kon tron prisiri?

▪ San Jesus e taki dati den apostel o doe heri esi?

▪ Fa Jesus e wini grontapoe?

▪ Na sortoe fasi Jesus e kisi „makti na tapoe ala skin”?

▪ San a wani taki dati wan sma e teki sabi na ini en foe Gado èn foe en Manpikin?

▪ Na sortoe fasi Jesus e tjari a nen foe Gado kon na krin?

▪ San na „a waarheid”, èn fa wan kresten e „kon santa” nanga jepi foe dati?

▪ Fa Gado nanga en Manpikin nanga ala troe bakaman de wán?

▪ O ten „grontapoe [ben] seti”?