Kapitel 117

Na ini a djari en jeje de na ini bigi banawtoe

TE JESUS kaba begi, dan en nanga den erfoe getrow apostel foe en e singi prèisesingi gi Jehovah. Baka dati den e saka foe a kamra na tapoe a sodro, e go na ini a kowroe doengroe foe a neti, èn e koti a Lagipresi foe Kidron abra foe go na Betania. Ma te den de na pasi, dan den e tapoe na wan presi di den lobi foe go, a djari foe Getsemane. A presi disi de na tapoe na Olijfbergi noso na ini a birti drape. Foeroe tron Jesus miti makandra nanga den apostel foe en dja na mindri den olijfbon.

A e libi aiti foe den apostel na baka — kande krosibei foe a mofo foe a djari — èn a e taigi den: „Go sidon dja, ala di mi e go jana foe begi.” Dan a e teki den dri trawan nanga en — Petrus, Jakobus nanga Johanes — èn a e waka go moro fara na ini a djari. Jesus e sari èn a de na ini broeja srefisrefi. „Mi sili e sari srefisrefi, ija, te foe dede”, a e taigi den. „Tan djaso èn tan na ai nanga mi.”

Te Jesus e waka pikinso moro fara, dan a e trowe ensrefi nanga en fesi go na gron èn a e bigin begi fajafaja: „Mi Tata, efoe a kan, meki a beker disi pasa mi. Ma no soleki fa mi wani, ma soleki fa joe wani.” San Jesus abi na prakseri? Foe san ede a e „sari srefisrefi, ija, te foe dede”? A e hari ensrefi poeroe foe a bosroiti foe en foe dede èn foe sorgoe gi a loesoe-paiman?

Kwetikweti! Jesus no e aksi foe den no kiri en. Srefi a prakseri foe wai pasi gi wan dede leki wan ofrandi, soleki fa Petrus ben aksi en wan leisi foe doe, na wan tegoe sani gi en. Na presi foe dati, en jeje de na ini bigi banawtoe, foe di a frede taki a fasi fa a o dede heri esi — leki wan lagi ogriman — sa tjari sjen kon na tapoe a nen foe en Tata. Now a sabi taki baka wan toe joeroe den sa spikri en na wan postoe leki a moro ogri sma di de — wan sma di e afrontoe Gado! Disi e broeja en srefisrefi.

Baka di a begi boen langa, dan Jesus e drai go baka, èn a e si taki den dri apostel e sribi. A e loekoe Petrus èn a e taki: „Oenoe no ben kan tan na ai nanga mi wán joeroe srefi? Tan na ai èn begi doronomo, foe oenoe no kon na ini tesi.” Ma foe di a sabi taki den ben de ondro hebi druk èn taki a lati kaba, meki a e taki: „A no de foe taki dati a jeje wani, ma a skin swaki.”

Baka dati Jesus e gowe foe wan di foe toe leisi èn a e aksi efoe Gado wani teki „a beker disi” poeroe foe en, dati wani taki, a pisi di Jehovah gi en noso san A wani en foe doe. Te a e drai go baka, dan agen a e si taki den dri e sribi, ala di den ben moesoe begi foe no kon na ini tesi. Te Jesus e taki nanga den, den no sabi san foe piki.

Te foe kaba, Jesus e gowe foe wan di foe dri leisi so fara leki te joe iti wan ston gowe, èn nanga kindi na gron èn nanga tranga babari nanga watra-ai, a e begi: „Tata, efoe joe wani, teki a beker disi poeroe foe mi.” Jesus e firi boen foeroe pen krinkrin, foe di a dede foe en leki wan ogriman sa tjari sjen kon na tapoe a nen foe en Tata. Ija, taki sma kragi en leki wan sma di e afrontoe Gado — wan sma di e floekoe Gado — na wan sani di pikinmoro a no man foe tjari!

Ma tokoe Jesus e go doro foe begi: „No san mi wani, ma san joe wani.” Jesus e saka en wani na ondro a wani foe Gado, foe di a e gi jesi na En. Dan wan engel foe hemel e sori ensrefi èn a e gi en tranga nanga wan toe wortoe foe gi deki-ati. Kande na engel e taigi Jesus taki en Tata ben feni en boen srefisrefi.

Ma tokoe ete, disi na troetroe wan bigi hebi di de na tapoe Jesus skowroe! En eigi têgo libi nanga di foe a heri libisma famiri de na ini kefar. A druk na emotioneel sei hebi srefisrefi. Foe dati ede Jesus e go doro foe begi nanga moro faja, èn en sweti e tron leki dropoe broedoe di e fadon na gron. „Ala di disi na wan toemoesi aparti sani di e sori ensrefi,” The Journal of the American Medical Association e taki, „tokoe sweti di abi broedoe na ini . . . kan sori ensrefi te sma de na ini situwâsi di hebi troetroe na emotioneel sei.”

Baka dati, Jesus e drai go baka na den apostel foe en wan di foe dri leisi, èn agen a e si taki den e sribi. Den skin weri sote foe dipi sari ede. „Na wan ten leki disi oenoe e sribi èn e rostoe!” a e taki. „A nofo! A joeroe doro! Loekoe! Den e tori a Manpikin foe libisma èn gi en abra na ini na anoe foe sondari. Oen opo, meki wi gowe. Loekoe! A sma di o tori mi, kon krosibei.”

Ala di a e taki ete, Judas Iskariòt e doro, nanga wan bigi ipi sma di e tjari flambo nanga lampoe nanga fetisani. Mateus 26:30, 36-47; 16:21-23; Markus 14:26, 32-43; Lukas 22:39-47; Johanes 18:1-3; Hebrewsma 5:7.

▪ Pe Jesus e tjari den apostel go, baka te den gowe libi a kamra na a tapoesodro, èn san a e doe drape?

▪ San den apostel e doe, ala di Jesus e begi?

▪ Foe san ede a jeje foe Jesus de na ini bigi banawtoe, èn sortoe sani a e aksi Gado?

▪ Na san a e sori, taki a sweti foe Jesus e tron leki dropoe broedoe?

Kapitel 118

Den e tori Jesus èn teki en foe go sroto

MINDRINETI pasa moi fara kaba te Judas e tjari wan bigi ipi sroedati, granpriester, Fariseiman, nanga tra sma kon na ini a djari foe Getsemane. Den priester agri foe pai Judas 30 solfroe moni efoe a e tori Jesus.

Na fesi kaba, di Jesus ben seni Judas gowe foe a Paska njanjan, dan soleki fa a sori, a ben go langalanga na den granpriester. Wantewante den sma disi ben tjari den eigi skowtoe nanga wan groepoe sroedati toe, kon na wan. Kande Judas ben tjari den go fosi na a presi pe Jesus nanga den apostel foe en ben hori a Paska. Di a bigi ipi sma, di e tjari fetisani nanga lampoe nanga flambo nanga den, ben kon si taki den ben gowe, dan den ben waka na Judas baka komoto na ini Jerusalem èn ben koti a Lagipresi foe Kidron abra.

Te Judas e tjari a groepoe sma go na tapoe na Olijfbergi, dan a denki taki a sabi seiker pe a kan feni Jesus. Na ini a wiki di pasa, di Jesus nanga den apostel ben teki waka go-kon na mindri Betania nanga Jerusalem, dan nofo tron den ben tapoe na ini a djari foe Getsemane foe teki bro drape èn foe taki nanga makandra. Ma fa den sroedati sa kon sabi now soema na Jesus, foe di Jesus no de foe si kande na ini a doengroe na ondro den olijfbon? Kande noiti den no ben si en ete. Foe dati ede Judas e gi den wan marki. A e taki: „A sma di mi e bosi, dati na en; kisi en èn tjari en gowe na wan boen fasi.”

Judas e tjari a bigi ipi sma go na ini a djari, a e si Jesus nanga den apostel foe en, èn a e waka langalanga go na en. „Odi, Rabi!”, a e taki èn a e bosi en na wan toemoesi switifasi.

„Mati, san meki joe kon dja?”, Jesus e piki. Dan a e gi piki na tapoe en eigi aksi èn a e taki: „Judas, joe e tori a Manpikin foe libisma nanga wan bosi?” Ma a nofo now foe taki foe a sma di tori En! Jesus e kon na fesi na ini a faja foe den flambo èn den lampoe di e bron, èn a e aksi: „Soema oenoe e soekoe?”

„Jesus foe Nasaret”, den e piki.

„Dati na mi”, Jesus e piki, ala di a e tanapoe nanga deki-ati na fesi den alamala. Foe di den man e froewondroe foe a fasi fa Jesus de fri èn sondro frede, èn foe di den no sabi san foe froewakti, meki den e wai go na baka èn e fadon na gron.

„Mi taigi oenoe taki dati na mi”, Jesus e taki moro fara na wan tiri fasi. „Foe dati ede, efoe na mi oenoe e soekoe, dan libi den wan disi meki den gowe.” Sjatoe na fesi, na a kamra na a tapoe sodro, Jesus ben taigi en Tata na ini begi taki a ben kibri den getrow apostel foe en èn taki no wan foe den ben lasi gowe „boiti a manpikin foe pori”. So boen, foe meki a wortoe foe en ben sa kon troe, meki a e aksi den man foe meki den bakaman foe en gowe.

Te den sroedati e kisi densrefi, e opo èn e bigin tai Jesus, dan den apostel e froestan san o pasa. „Masra, wi sa feti nanga a feti-owroe?”, den e aksi. Fosi Jesus piki, Petrus e gebroiki wan foe den toe feti-owroe di den apostel tjari nanga den, èn a e opo go feti nanga Malkus, wan srafoe foe a heipriester. A slag foe Petrus e misi na ede foe a srafoe, ma a e koti a retisei jesi foe en poeroe.

„A nofo now”, Jesus e taki te a e kon na mindri. A e fasi a jesi foe Malkus èn a e dresi a presi di kisi mankeri. Dan a e leri den wan prenspari sani, foe di a e komanderi Petrus: „Poti joe feti-owroe go baka na en presi, foe di ala sma di e teki a feti-owroe, sa kisi pori nanga a feti-owroe. Noso joe e prakseri taki mi no kan aksi mi Tata now foe seni moro leki twarfoe legioen engel kon gi mi na a momenti disi?”

Jesus de klariklari foe den teki en go sroto, bika a e tjari kon na krin: „Fa den Boekoe foe bijbel ben sa kon troe, taki sani ben sa pasa na a fasi disi?” Èn a e taki moro fara: „Mi no moesoe dringi a beker dan di a Tata gi mi?” A e agri srefisrefi nanga san Gado wani en foe doe!

Dan Jesus e taki nanga na ipi sma. „Oenoe kon nanga feti-owroe èn nanga kodja foe kisi mi foe go sroto leki mi na wan rofer?”, a e aksi. Dei na dei mi ben sidon na ini a tempel foe gi sma leri, èn tokoe oenoe no ben sroto mi. Ma ala den sani disi pasa, so taki den boekoe foe den profeiti ben sa kon troe.”

Now a groepoe sroedati nanga a sroedati-edeman nanga den skowtoe foe den djoe, e graboe Jesus èn e tai en. Te den apostel e si disi, dan den e gowe libi Jesus èn e lon gowe. Ma wan jongoe man — kande na a disipel Markus — e tan na mindri na ipi sma. Kande a ben de na ini na oso pe Jesus ben hori a Paska èn baka dati a ben waka foe drape go na a ipi sma baka. Ma now den e kon sabi soema na en, èn den e proeberi foe graboe en. Ma a e libi en linnen krosi na baka èn e lowe. Mateus 26:47-56; Markus 14:43-52; Lukas 22:47-53; Johanes 17:12; 18:3-12.

▪ Foe san ede Judas de seiker taki a sa feni Jesus na ini a djari foe Getsemane?

▪ Fa Jesus e sori taki a e broko en ede nanga den apostel foe en?

▪ San Petrus e doe foe feti gi Jesus, ma san Jesus e taigi en foe a sani disi?

▪ Fa Jesus e sori taki a e agri srefisrefi nanga san Gado wani foe en doe?

▪ Soema e tan na baka te den apostel e gowe libi Jesus, èn san e pasa nanga en?

Kapitel 119

Den tjari en go na Anas, èn baka dati na Kajafas

DEN e tjari Jesus, di den tai leki wan troetroe ogriman, go na Anas, a man di ben abi foeroe makti èn di ben de heipriester fosi a wan di de now. Anas ben de heipriester di Jesus, leki wan boi foe 12 jari, ben meki den rabbijn leriman froewondroe na ini a tempel. Difrenti foe den manpikin foe Anas ben dini baka ten leki heipriester, èn now Kajafas, a masra foe Anas oemapikin, abi a posisi dati.

Kande den tjari Jesus go fosi na a oso foe Anas, foe di a granpriester disi langaten ben de wan prenspari sma na ini a djoe relisi libimakandra. A draidrai disi di den e draidrai foe di den go na Anas, e gi Heipriester Kajafas ten foe tjari a Sanhedrin, a djoe heikroetoe di abi 71 memre, kon makandra, èn foe tjari falsi kotoigi kon toe.

Granpriester Anas e aksi Jesus foe den disipel foe en èn foe a leri foe en now. Ma Jesus e gi leki piki: „Mi taki nanga grontapoe na poebliki. Alaten mi ben gi leri na ini wan snoga èn na ini a tempel, pe ala den djoe e kon makandra; èn noti mi ben taki na kibrifasi. Foe san ede joe e aksi mi sani? Aksi den sma di jere san mi ben taigi den. Loekoe! Den sabi san mi ben taki.”

Te Jesus taki disi, dan wan foe den skowtoe di e tanapoe krosibei foe Jesus, e naki en na en fesi, èn a e taki: „Na so joe e piki a granpriester?”

„Efoe mi ben taki fowtoe,” Jesus e piki, „dan gi kotoigi foe den fowtoe sani; ma efoe a ben boen, foe san ede joe e naki mi?” Baka a takitaki disi, Anas e meki den tai Jesus èn a e seni en go na Kajafas.

Na a ten disi, ala den granpriester nanga den owroe man nanga den leriman foe Wet, ija, a heri Sanhedrin, e bigin kon makandra. Soleki fa a sori, dan a presi pe den e kon makandra, na a oso foe Kajafas. A de krinkrin teige a djoe wet foe hori so wan kroetoe na wan Paskaneti. Ma disi no e tapoe den relisi fesiman foe doe na ogri di den abi na prakseri.

Wiki na fesi, di Jesus ben opo Lasarus baka na dede, a Sanhedrin ben teki a bosroiti kaba taki a moesoe dede. Èn soso toe dei na fesi, tapoe dridewroko, den relisi fesiman ben taki nanga makandra foe kisi Jesus nanga jepi foe triki, so taki den ben kan kiri en. Prakseri foe disi pikinso, taki, te joe loekoe en boen, den ben kroetoe en bifo a ben kon na fesi kroetoe!

Now den e doe moeiti foe feni kotoigi di sa kon nanga falsi boeweisi, so taki den kan bigin wan kroetoe afersi teige Jesus. Ma den no man feni kotoigi di e taki foe a srefi sani. Te foe kaba, toe kotoigi e kon na fesi èn den e taki: „Wi ben jere en taki: ’Mi sa broko a tempel disi di ben meki nanga anoe èn na ini dri dei mi sa bow wan trawan di no meki nanga anoe.’”

„Joe no e piki noti?”, Kajafas e aksi. „Sortoe kotoigi den sma disi e gi teige joe?” Ma Jesus e tan tiri. Srefi nanga a falsi kragi disi, di de wan sjen sani gi a Sanhedrin, den kotoigi no man meki den sani di den e froeteri, de a srefi. Foe dati ede, a heipriester e proeberi wan tra taktik.

Kajafas sabi fa den djoe e firi te wan sma e taki foe ensrefi dati en na a Manpikin foe Gado. Na toe tra okasi den ben kari Jesus sondro foe denki, wan sma di e afrontoe Gado èn di e froedini en foe dede, èn wán foe den leisi den ben abi a fowtoe prakseri dati a ben taki dati a de a srefi leki Gado. Na wan trikifasi Kajafas e aksi Jesus now: „Mi e poti joe na ondro sweri na a libilibi Gado, foe froeteri wi efoe joe na a Krestes, a Manpikin foe Gado!”

Awinsi san den djoe wani prakseri, tokoe Jesus na troetroe a Manpikin foe Gado. Èn efoe a e tan tiri, dan den ben sa kan froeklari dati leki a e taki dati en a no a Krestes. Foe dati ede, Jesus e piki na wan deki-atifasi: „Na mi; èn oenoe sa si a Manpikin foe libisma e sidon na a reti-anoe foe krakti èn e kon nanga den wolkoe foe hemel.”

Te Jesus taki disi, dan Kajafas e priti en krosi èn nanga boen foeroe opo-opo a e bari: „A afrontoe Gado! Foe san ede wi abi kotoigi fanowdoe ete? Loekoe! Now oenoe jere taki a afrontoe Gado. San oenoe e prakseri?”

„A fiti foe a dede”, a Sanhedrin e froeklari. Dan den e bigin meki spotoe nanga en, èn den e taki foeroe sani foe afrontoe en. Den e naki en fesi èn e spiti na ini. Trawan e tapoe en heri fesi èn den e naki en nanga kofoe èn na wan spotoefasi den e taki: „Taki profeititori gi wi, Krestes. Soema na a sma di naki joe?” A fasi disi foe handri di no de akroederi a wet èn di de wan sjen sani, e pasa na a kroetoe di hori na neti. Mateus 26:57-68; 26:3, 4; Markus 14:53-65; Lukas 22:54, 63-65; Johanes 18:13-24; 11:45-53; 10:31-39; 5:16-18.

▪ Pe den e tjari Jesus go fosi, èn san e pasa drape nanga en?

▪ Pe den e tjari Jesus go baka dati, èn nanga sortoe sani na prakseri?

▪ Fa Kajafas man kisi a Sanhedrin so fara foe froeklari taki a fiti foe Jesus dede?

▪ Sortoe fasi foe handri di no de akroederi a wet èn di de wan sjen sani, e pasa na a kroetoe?

Kapitel 120

Na ini a fesisei-djari a e taki a no sabi Jesus

BAKA DI Petrus nanga Johanes gowe libi Jesus na ini a djari foe Getsemane èn ben lowe nanga den tra apostel foe di den frede, den e tapoe foe lowe èn e waka go na Jesus baka. Kande den e doro na Jesus, te den sma e tjari en go na a oso foe Anas. Te Anas e seni Jesus go na Heipriester Kajafas, dan Petrus nanga Johanes e waka boen fara na den baka, soleki fa a sori nanga toe ati, foe di den frede gi den eigi libi èn foe di den e broko den ede srefisrefi nanga san o pasa nanga a Masra foe den.

Te den doro na a bigi oso foe Kajafas, dan Johanes man pasa go na ini a fesisei-djari, foe di a heipriester sabi en. Ma Petrus moesoe tan tanapoe na dorosei na a doro. Ma no langa baka dati, Johanes e drai kon baka èn a e taki nanga a sma di e hori wakti na a doro, wan oema-foetoeboi, èn Petrus e kisi primisi foe go na inisei.

A kon kowroe now, èn den dinari nanga den skowtoe foe a heipriester meki wan faja foe krofaja. Petrus e go na den foe tan waran, ala di a e wakti a bakapisi foe a kroetoe di e hori foe Jesus ede. Drape, na ini a leti foe a krin faja, a sma di e hori wakti na a doro èn di ben meki Petrus kon na inisei, kan si en moro boen. „Joe ben de toe nanga Jesus, a Galileasma!” na oemapikin e taki.

Foe di Petrus skreki taki sma kon sabi en, meki a e taki na fesi ala den sma, dati noiti a no ben sabi Jesus. „Mi no sabi en èn mi no e froestan toe san joe e taki”, a e taki.

Baka dati Petrus e go na dorosei krosibei foe a prasidoro. Drape, wan tra oemapikin e si en èn a e taigi den sma toe di e tanapoe krosibei: „A man disi ben de nanga Jesus foe Nasaret.” Ete wan leisi Petrus e taki dati disi no troe, èn a e sweri taki: „Mi no sabi a man!”

Petrus e tan na ini a fesisei-djari, ala di a e proeberi someni leki a kan foe den no si en. Kande na a momenti disi a e skreki foe a bari di wan kakafowroe e bari na ini a doengroe foe a froekoe mamanten. A pisi ten dati, a kroetoe di den e hori foe Jesus ede, e go nanga langa. Soleki fa a sori, dan den e hori a kroetoe na ini wan pisi foe na oso na tapoesei foe a fesisei-djari. A no abi misi taki Petrus nanga den trawan di e wakti na gron, e si fa den difrenti kotoigi di den e tjari go na inisei foe gi kotoigi, e go-kon.

Wan sani foe wán joeroe pasa sensi a lasti leisi di sma ben kon sabi Petrus leki wan kompe foe Jesus. Now wan toe foe den sma di e tanapoe lontoe, e kon na en èn den e taki: „Joe moesoe foe de wan foe den toe, foe di, te joe loekoe en boen, a tongo di joe e taki, e tori joe.” Wan sma ini a groepoe na wan famiri foe Malkus, di Petrus ben koti a jesi foe en poeroe. „A no joe mi ben si nanga en na ini a djari?”, a e taki.

„Mi no sabi a man!”, Petrus e froeklari fajafaja. Foe taki en leti, dan a e proeberi foe overtoigi den alamala taki den no abi leti, foe di a e floekoe èn e sweri foe na afersi ede, san wani taki dati a e kari ogri kon na ensrefi tapoe, efoe san a e taki no troe.

Leti fa Petrus e taki foe a di foe dri leisi dati a no sabi Jesus, wan kakafowroe e bari. Èn na a momenti dati, Jesus, di soleki fa a sori, kon na dorosei na tapoe wan balkon na tapoesei foe a fesisei-djari, e drai loekoe en. Wantewante Petrus e memre san Jesus ben taki soso wan toe joeroe na fesi na ini a kamra na a tapoe sodro: „Bifo wan kakafowroe bari toe leisi, srefi joe sa taki dri tron dati joe no sabi mi.” Te Petrus e si o hebi a sondoe foe en de, dan dati e masi en èn a e go na dorosei èn e krei nanga bigi sari.

Fa disi ben kan pasa? Fa Petrus ben kan taki dri leisi so sjatoe baka makandra taki a no sabi en Masra, baka di a ben de so seiker taki a tranga na jejefasi? A no abi misi taki den situwâsi kon onfroewakti na Petrus tapoe. Den sma e drai a waarheid èn den e prenki Jesus leki wan lagi ogriman. San de reti den e meki a sori leki a no boen, èn a wan di no abi fowtoe, den e meki a sori leki a abi fowtoe. So boen, kande foe a hebi druk foe na okasi disi ede, meki Petrus lasi en balansi. Wantronso a joisti firi di a abi foe de loyaal, kon broeja; a e hati en taki a frede di a e frede libisma, lan en. Meki a sani dati noiti no pasa nanga wi! Mateus 26:57, 58, 69-75; Markus 14:30, 53, 54, 66-72; Lukas 22:54-62; Johanes 18:15-18, 25-27.

▪ Fa Petrus nanga Johanes pasa go na ini a fesisei-djari foe a heipriester?

▪ San e pasa na ini na oso, ala di Petrus nanga Johanes de na ini a fesisei-djari?

▪ Omeni leisi wan kakafowroe e bari, èn omeni leisi Petrus e taki dati a no sabi Krestes?

▪ San a wani taki dati Petrus e floekoe èn e sweri?

▪ San e meki Petrus e taki dati a no sabi Jesus?