Froekoefroekoe sonde mamanten, Maria Magdalena nanga Maria, a mama foe Jakobus, makandra nanga Salome, Johana, nanga tra oemasma, e tjari den spesrei go na a grebi foe sreka a skin foe Jesus. Te den de na pasi, dan den e taigi makandra: „Soema sa lolo a ston poeroe gi wi foe a doro foe a memre-grebi?” Ma te den e doro drape, dan den e si taki wan gronseki feni presi èn taki na engel foe Jehovah lolo a ston poeroe. Den waktiman gowe, èn a grebi leigi! Mateus 27:57–28:2; Markus 15:42–16:4; Lukas 23:50–24:3, 10; Johanes 19:14, 31–20:1; 12:42; Lefitikus 23:5-7; Deuteronomium 21:22, 23; Psalm 34:20; Sakaria 12:10.

Kapitel 128

Jesus de na libi!

TE DEN oema e si taki a grebi foe Jesus leigi, dan Maria Magdalena e lon gowe foe froeteri Petrus nanga Johanes. Ma kande den tra oema e tan na a grebi. No langa baka dati, wan engel e sori ensrefi èn a e kari den oema foe kon na inisei.

Djaso den oema e si wan tra engel, èn wan foe den engel e taigi den: „No frede, bika mi sabi taki oenoe e soekoe Jesus di den ben spikri na wan postoe. A no de djaso, bika a kisi wan opobaka, soleki fa a ben taki. Kon, loekoe a presi pe a ben e didon. Go esi-esi èn taigi den disipel foe en taki a ben kisi wan opobaka na dede.” So boen, nanga frede èn nanga bigi prisiri, den oema disi e lon gowe toe.

Na a joeroe ten disi, Maria feni Petrus nanga Johanes, èn a e froeteri den: „Den poeroe Masra foe a memre-grebi, èn wi no sabi pe den poti en.” Wantewante den toe apostel e lon go drape. Johanes e waka moro esi — kande foe di a moro jongoe — èn a e doro a grebi leki a fosiwan. Na a joeroe ten disi den oema gowe kaba, so taki no wan sma de na ini a birti drape. Johanes e boekoendoe go na fesi, e pingi en ai loekoe go na ini a grebi èn a e si den doekoe, ma a e tan na dorosei.

Te Petrus e doro drape, a no e draidrai, ma a e waka langalanga go na ini a grebi. A e si den doekoe e didon drape èn a krosi toe di den ben gebroiki foe domroe Jesus ede. Den doekoe domroe poti na wan presi. Now Johanes e kon toe na ini a grebi, èn a e bribi san Maria froeteri den. Ma no wan foe den toe, Petrus nanga Johanes, e froestan taki Jesus ben kisi wan opobaka, ala di A ben taigi den foeroe leisi taki disi ben o pasa. Den toe man disi di broeja, e drai go baka na oso, ma Maria, di drai kon baka na a grebi, e tan.

Disiten, den tra oema e go esi-esi na den disipel foe froeteri den taki Jesus ben kisi wan opobaka, soleki fa den engel ben taigi den foe doe. Te den de na pasi e lon so esi leki den kan, dan Jesus e miti den èn a e taki: „Odi!” Den e fadon na Jesus foetoesei èn den e gi en grani. Dan Jesus e taki: „No frede! Go, froeteri den brada foe mi, taki den moesoe go na Galilea, èn drape den sa si mi.”

Na fesi kaba, di a gronseki ben feni presi èn den engel ben sori densrefi, den sroedati di ben e hori wakti drape ben kon steifi foe skreki ede èn den ben kon de leki dede sma. Di den ben kon kisi densrefi baka, den ben go wantewante na foto èn ben froeteri den granpriester san ben pasa. Baka di den go taki nanga den „owroeman” foe den djoe, dan a bosroiti ben teki foe proeberi foe kibri a tori gi sma, foe di den e gi den sroedati wan tjoekoe. Den ben taigi den: „Taki: ’Den disipel foe en ben kon na neti èn den ben foefoeroe en ala di wi ben sribi.’”

Foe di sroedati foe Rome kan kisi dedestrafoe efoe den e fadon na sribi na a presi pe den moesoe hori wakti, meki den priester e pramisi den: „Efoe a granman kisi foe jere disi [a tori taki oenoe ben fadon na sribi], dan wi sa overtoigi en taki disi no de so, èn wi sa sorgoe taki oenoe no abi foe broko oen ede.” Foe di a moni di gi leki tjoekoe bigi nofo, meki den sroedati e doe soleki fa den ben taigi den foe doe. A bakapisi foe disi de, taki a falsi tori taki sma ben foefoeroe a skin foe Jesus, e panja na ala sei na mindri den djoe.

Maria Magdalena, di e tan na baka na a grebi, e sari srefisrefi. Pe Jesus ben sa kan de? Te a e boekoendoe go na fesi foe loekoe go na ini a grebi, dan a e si den toe engel ini weti krosi, di sori densrefi baka! Wan foe den e sidon na a edesei èn a trawan na a foetoesei foe a presi pe a skin foe Jesus ben didon. „Oema, foe san ede joe e krei?”, den e aksi.

„Den poeroe mi Masra,” Maria e piki, „èn mi no sabi pe den poti en.” Dan a e drai èn a e si wan sma di e poti na aksi ete wan tron: „Oema, foe san ede joe e krei?” Èn a sma disi e aksi toe: „Soema joe e soekoe?”

Foe di Maria e prakseri taki a sma disi na a sma di e sorgoe foe a djari pe a grebi de, meki a e taigi en: „Masra, efoe joe tjari en gowe, dan froeteri mi pe joe poti en, èn mi sa poeroe en.”

„Maria!”, a sma e taki. Èn wantewante Maria sabi foe a gwenti fasi fa a sma e taki nanga en, dati en na Jesus. „Rab·boʹni!” (san wani taki „Leriman!”), a e bari taki. Èn nanga bigi prisiri a e graboe en hori. Ma Jesus e taki: „No hori mi moro. Bika mi no opo go ete na a Tata. Ma go na den brada foe mi èn taigi den: ’Mi e opo go na mi Tata èn oen Tata èn na mi Gado èn oen Gado.’”

Now Maria e lon go na a presi pe den apostel nanga den tra disipel kon makandra. Boiti a njoensoe di den tra oema froeteri kaba, en toe e froeteri a tori taki a si Jesus di kisi wan opobaka na dede. Tokoe den man disi, di no ben bribi den fosi oema, no e bribi Maria toe, soleki fa a sori. Mateus 28:3-15; Markus 16:5-8; Lukas 24:4-12; Johanes 20:2-18.

▪ San Maria Magdalena e doe, te a e si taki a grebi leigi, èn sortoe ondrofeni den tra oema abi?

▪ San Petrus nanga Johanes e doe, te den e si taki a grebi leigi?

▪ San den tra oema e miti, te den de na pasi foe go froeteri den disipel taki Jesus opo baka?

▪ San ben pasa nanga den sroedati di ben e hori wakti, èn san den priester ben doe di den sroedati ben froeteri den foe disi?

▪ San e pasa te Maria Magdalena de en wawan na a grebi, èn san den disipel e doe tapoe den sani di den oema e froeteri den?

DEN disipel e firi brokosaka ete. Den no e froestan foe san ede a grebi leigi, èn den no e bribi toe san den oema e froeteri. Foe dati ede, baka ten Kleopas nanga ete wan tra disipel e gowe libi Jerusalem sonde foe go na Ema-us, di de so wan erfoe kilometer foe drape.

Na pasi, te den e taki foe den sani di ben pasa a dei dati, wan freimdesma e kon waka nanga den. „San na den tori di oenoe e taki nanga makandra, ala di oenoe e waka?”, a e aksi.

Nanga wan sari fesi den disipel e tapoe foe waka, èn Kleopas e piki: „Joe e libi leki wan freimdesma na Jerusalem èn foe dati ede joe no sabi den sani di ben pasa drape den dei disi?” A sma e aksi: „Sortoe sani?”

„Den sani di abi foe doe nanga Jesus foe Nasaret”, den e piki. „Den granpriester foe wi nanga den tiriman ben gi en abra foe a kisi dedestrafoe èn den ben spikri en na wan postoe. Ma wi ben e howpoe taki a man disi ben sa de a sma di ben o froeloesoe Israèl.”

Kleopas nanga a kompe foe en e tjari kon na krin sortoe froewondroe sani ben pasa a dei dati — a tori foe a froewondroe sani di sma ben si engel èn foe a leigi grebi — ma dan den e taki dati den ben aksi densrefi san den sani disi wani taki. A freimdesma e piri-ai gi den: „O oen sma sondro froestan, di ati no de esi foe bribi ala sani di den profeiti ben taki! A Krestes no ben moesoe pina foe den sani disi ede foe go na ini en glori?” Dan a e froeklari gi den den pisi foe bijbel di abi foe doe nanga a Krestes.

Te foe kaba den doro krosibei foe Ema-us, èn a freimdesma e doe neleki a wani waka go doro. Foe di den disipel wani foe jere moro, meki den e aksi en nanga tranga: „Tan nanga wi, bika neti doro.” So boen, a e tan foe njan nanga den. Te a e taki wan begi, e broko a brede èn e gi den disi, dan den e si taki a de troetroe Jesus di materialiseer ensrefi na ini wan skin foe libisma. Ma dan a no de foe si moro.

Now den e kon froestan fa a doe kon taki a freimdesma ben sabi so foeroe! „Na ati foe wi no ben kon faja foe inisei di a ben taki nanga wi na pasi, di a ben opo den Boekoe foe bijbel so krin gi wi?”, den e taigi makandra. Sondro draidrai den e opo èn esi-esi den e go baka na Jerusalem, pe den e feni den apostel nanga den sma di ben kon makandra nanga den. Bifo Kleopas nanga a kompe foe en kan taki wan sani, den trawan e taki nanga prisiri: „Masra troetroe ben kisi wan opobaka èn a ben sori ensrefi na Simon!” Dan den toe man e froeteri fa Jesus ben sori ensrefi toe na den. So boen, a dei dati Jesus sori ensrefi fo leisi na difrenti foe den disipel foe en.

Wantronso Jesus e sori ensrefi foe a di foe feifi leisi. A e kon na inisei, ala di den doro sroto, foe di den disipel frede den djoe. A e tanapoe leti na den mindri èn a e taki: „Vrede de nanga oenoe.” Den frede te foe dede, foe di den e prakseri taki den e si wan jeje. Foe dati ede Jesus e tjari kon na krin taki a no de wan takroe sani èn a e taki: „Foe san ede oenoe e kon broeja, èn foe san ede tweifri e kon na ini oen ati? Loekoe mi anoe nanga mi foetoe, taki na misrefi; firi mi èn loekoe, bika wan jeje no abi meti nanga bonjo, soleki fa oenoe e si taki mi abi.” Tokoe ete den e draidrai foe bribi.

Foe jepi den foe froestan boen, taki en na Jesus troetroe, a e aksi: „Oenoe abi wan sani dja foe njan?” Baka di a teki wan pisi losi fisi èn e njan en, a e taki: „Disi na den wortoe di mi ben taigi oenoe di mi ben de ete nanga oenoe [bifo a dede foe mi], taki ala den sani di skrifi foe mi na ini a wet foe Moses èn na ini den Profeiti èn na ini den Psalm ben moesoe kon troe.”

Te Jesus e go doro nanga, te joe loekoe en boen, san gersi wan bijbelstudie nanga den, dan a e leri den: „Na so Boekoe taki, dati a Krestes ben sa pina èn a ben sa opo baka na dede na a di foe dri dei, èn tapoe a gron foe en nen, den ben sa preiki berow na ini ala nâsi foe sma kisi pardon foe sondoe — foe bigin na Jerusalem, oenoe moesoe de kotoigi foe den sani disi.”