Fa mi e prakseri fu den pikinpikin sani di sma e puru na ini brudu, èn fu datrayepi pe datra e gebroiki mi eigi brudu fu dresi mi?

Kibri disi

Fa mi e prakseri fu den pikinpikin sani di sma e puru na ini brudu, èn fu datrayepi pe datra e gebroiki mi eigi brudu fu dresi mi?

Bijbel e gi Kresten a komando fu „tan fara fu . . . brudu” (Tori. 15:20). Fu dati ede, Yehovah Kotoigi no e teki brudu, noso wan fu den fo prenspari pisi fu brudu, namku redi brudu-cel, weti brudu-cel, brudu-plaat, nanga plasma. Den no e gi brudu, èn den no e kibri den eigi brudu fu teki en baka na wan tra okasi.—Lef. 17:13, 14; Tori. 15:28, 29.

San na den pikinpikin sani di sma kan puru na ini brudu, èn fu san ede ibri Kresten musu bosroiti gi ensrefi efu a sa teki den sani disi leki dresi?

Fu eksempre: Na ini plasma, di de wan fu den fo prenspari pisi fu brudu, sma kan puru den difrenti pikinpikin sani disi; namku watra (sowan 91%); eiwit, soleki albumine, globuline, nanga fibrinogeen (sowan 7%). Tra sani di sma kan puru fu plasma, na sani di a skin abi fanowdu fu tan gosontu, hormoon, difrenti sortu gas, vitamine, sani di musu komoto na ini a skin, nanga sani di sma e kari elektrolyt (sowan 1,5%).

A de so taki a komando di Bijbel e gi wi fu tan fara fu brudu, abi fu du sosrefi nanga den pikinpikin sani di sma e puru na ini brudu? Wi no man gi wan krin piki tapu na aksi disi, fu di Bijbel no e taki spesrutu fu den pikinpikin sani na ini brudu.a A no de fu taki, dati furu fu den sani disi di datra e gebroiki leki dresi, na sani di den puru na ini brudu fu tra sma. Ibri Kresten musu bosroiti akruderi en eigi konsensi, efu a o teki noso efu a no o teki wan dresi di meki fu wan fu den pikinpikin sani di sma puru na ini brudu.

Te yu musu teki so wan bosroiti, dan poti prakseri na den aksi di e kon now: Mi teki a bosroiti fu no teki nowan enkri wan fu den pikinpikin sani di de na ini brudu. Ma efu mi du dati, dan mi musu hori na prakseri dati mi no sa teki son dresi di e yepi a skin fu feti virus nanga tra siki, noso sonwan fu den dresi di e meki a brudu kon deki, so taki a no e lon moro te mi kisi mankeri. Mi hori a sani disi na prakseri? Mi ben o man fruteri wan datra fu san ede mi no e teki sonwan fu den pikinpikin sani di den e puru na ini brudu, noso fu san ede mi e teki sonwan fu den?

Fu san ede mi musu teki mi eigi bosroiti te datra wani gebroiki mi eigi brudu fu dresi mi?

A tru taki Kresten no e gi brudu, èn taki den no e kibri den eigi brudu fu teki en baka na tra okasi. Toku, a no ala sani di datra e du nanga a brudu fu wi de kontrari Bijbel gronprakseri. Fu dati ede, ibriwan sma musu bosroiti akruderi en eigi konsensi, efu a o teki noso efu a no o teki datrayepi pe den e gebroiki en eigi brudu.

Te yu musu teki so wan bosroiti, dan yu musu aksi yusrefi: Kon meki wi taki dati datra meki pikinso fu mi brudu lon pasa dorosei fu mi skin, èn taki a brudu tapu fu lon wan pisi ten sosrefi. A de so taki a konsensi fu mi o gi mi pasi fu si a brudu disi ete leki wan pisi fu mi skin, so taki a no de fanowdu fu ’trowe en na gron’? (Deut. 12:23, 24) A sa de so taki, den sani di mi leri fu Bijbel o meki mi kisi konsensi fonfon te datra puru pikinso fu mi eigi brudu, èn te a du sani nanga a brudu fu poti en baka na ini mi eigi skin? Efu mi e weigri ala datrayepi di abi fu du nanga mi eigi brudu, dan mi musu hori na prakseri taki dati abi fu du sosrefi nanga datrayepi soleki dialyse noso a gebroiki fu wan hart-long machine. Mi prakseri a sani dati? Mi begi Gado fosi mi teki a bosroiti disi?b

Sortu bosroiti mi o teki?

Luku den aksi di skrifi na tapu den tu bladzijde di e kon. A fosi bladzijde e kari wan tu fu den pikinpikin sani di sma kan puru na ini brudu èn fa sma e gebroiki den sani disi leki dresi. Skrifi efu yu o teki den pikinpikin sani di sma e puru na ini brudu, noso efu yu no o teki den. A di fu tu bladzijde e kari wan tu fasi fa datra kan yepi yu nanga yu eigi brudu. Skrifi efu yu o teki, noso efu yu no o teki a datrayepi disi. Difrenti fu den datrayepi disi no de fu kisi ete na ini Sranan.

Yu musu teki yu eigi bosroiti, nowan sma musu taigi yu san yu musu du. Na a srefi fasi nowan sma musu krutu a bosroiti di wan tra Kresten e teki. Na ini den afersi disi „ibri sma sa tyari en eigi lai” èn a musu tyari en eigi frantwortu.—Gal. 6:4, 5.

[Futuwortu]

a Efu yu wani sabi moro fu a tori disi, dan yu kan leisi A Waktitoren fu 15 yuni 2004, bladzijde 29-31.

b Efu yu wani sabi moro fu a tori disi, dan yu kan leisi A Waktitoren fu 15 oktober 2000, bladzijde 30, 31, èn yu kan luku a video noso a DVD Transfusiealternatieven — Documentaires.

A FOSI PISI FU DEN AKSI

SANI DI NO FITI GI WAN KRESTEN

TEKI YU EIGI BOSROITI

A BRUDU SREFI

PIKINPIKIN SANI DI SMA E PURU NA INI BRUDU

Bosroiti di yu musu teki

PLASMA

ALBUMINE (sowan 4% fu a plasma)

Wan eiwit di teki puru fu plasma. Difrenti sortu albumine de fu feni na ini son wiwiri, na ini nyanyan-sani soleki merki nanga eksi, èn na ini bobimerki. Son leisi datra e gebroiki albumine di puru na ini brudu. Den e gi disi na sma di lasi tumusi furu brudu, èn na sma di bron hebi. Den dresi disi kan abi sowan 25 procent albumine na ini. Furu tra dresi abi pikinso albumine na ini tu, fu eksempre na ini son erytropoëtine (epo).

____ Mi o teki albumine

noso

____ Mi no o teki albumine

IMMUNOGLOBULINEN (sowan 3% fu a plasma)

Pikinpikin pisi eiwit di poti na ini dresi fu feti virus nanga siki, soleki difterie, tetanus (klem), virale hepatitis, nanga rabies (hondsdolheid). Datra kan gebroiki den eiwit disi tu leki dresi gi beibi di de na ini a mamabere ete, èn leki dresi te sneki noso anansi beti sma.

____ Mi o teki immunoglobuline

noso

____ Mi no o teki immunoglobuline

STOLLINGSFACTOR (mendri leki 1% fu a plasma)

Difrenti eiwit de di e meki taki a brudu e tapu fu lon te wan sma e lasi brudu. Te son sikisma e kisi mankeri, dan a brudu fu den no wani tapu fu lon. Te dati de so, dan datra e gi den na eiwit disi. Den eiwit disi de sosrefi na ini lijm di datra e gebroiki fu plak koti tapu èn fu meki taki wan sma no lasi brudu baka wan oparâsi. Wan fu den dresi di abi stollingsfactor na cryoprecipitaat. Hori na prakseri: Yu abi stollingsfactor tu di no meki fu brudu.

____ Mi o teki stollingsfactor di teki puru fu brudu

noso

____ Mi no o teki stollingsfactor di teki puru fu brudu

REDI BRUDU-CEL

HEMOGLOBINE (33% fu den redi brudu-cel)

Wan eiwit di de fanowdu fu wi kan bro. A e tyari zuurstof go na ala sei fu a skin èn a e tyari koolzuurgas go na den fokofoko. Son dresi meki fu a hemoglobine fu libisma noso fu meti, èn datra e gebroiki den fu dresi sikisma di no abi nofo brudu, noso sma di lasi tumusi furu brudu.

____ Mi o teki hemoglobine

noso

____ Mi no o teki hemoglobine

HEMINE (mendri leki 2% fu den redi brudu-cel)

Wan dresi di teki puru fu hemoglobine. Nanga a sani disi datra e dresi porfyrie, wan famiri-siki di furu sma no e kisi so makriki. Den siki disi na brudu-siki èn den e meki taki sma kon siki na den bere, den senwe, nanga den brudu-titei.

____ Mi o teki hemine

noso

____ Mi no o teki hemine

WETI BRUDU-CEL

INTERFERON (wan pikinpikin pisi fu den weti brudu-cel)

Wan eiwit di e feti son virusinfektie nanga son kanker. A moro bigi pisi fu den interferon no e teki puru fu brudu, ma sonwan fu den e meki fu den pikinpikin sani di sma e puru na ini den weti brudu-cel fu libisma.

____ Mi o teki interferon di teki puru fu brudu

noso

____ Mi no o teki interferon di teki puru fu brudu

BRUDUPLAAT

Sma no e meki dresi ete nanga sani di teki puru fu brudu-plaat.

A DI FU TU PISI FU DEN AKSI

TEKI YU EIGI BOSROITI
DATRAYEPI PE DATRA E GEBROIKI YU EIGI BRUDU
A NEN FU A DATRAYEPI	SAN A DATRAYEPI E DU	Den bosroiti di yu musu teki (A de wan koni sani fu taki nanga yu datra bifo yu teki noso weigri iniwan fu den datrayepi disi.)
CELL-SAVER	Disi e meki taki sma no e lasi furu brudu. Na wan oparâsi, datra e gebroiki wan masyin fu fanga a brudu di sma e lasi te a e koti den. A masyin e wasi a brudu, a e krin en, èn kande a e poti en wantewante baka na ini a skin fu a sikisma.	____ Mi o teki a datrayepi disi ____ Kande mi no o teki a datrayepi disic ____ Mi no o teki a datrayepi disi
HEMODILUTIE	Disi e meki taki sma no e lasi furu brudu. Na a bigin fu wan oparâsi, datra e meki brudu fu a sikisma lon go na ini saka èn na presi fu a brudu dati a e gi wan dresi di no meki fu brudu. Na a fasi disi, a brudu di de na ini a skin fu a sikisma e kon watrawatra, fu di a no abi furu redi brudu-cel. Na a ten fu na oparâsi noso na a kaba fu dati, dan datra e meki a brudu di a fanga na ini den saka, lon go baka na ini a skin fu a sikisma.	____ Mi o teki a datrayepi disi ____ Kande mi no o teki a datrayepi disid ____ Mi no o teki a datrayepi disi
HART-LONGMACHINE	Disi e meki taki a brudu e tan lon na ini a skin. A brudu e lon go na ini wan hart-longmachine (wan masyin di e pompu a brudu leki wan ati). Na ini a masyin disi a brudu e kisi zuurstof, èn a e lon go baka na ini a skin fu a sikisma.	____ Mi o teki a datrayepi disi ____ Kande mi no o teki a datrayepi disie ____ Mi no o teki a datrayepi disi
DIALYSE	A e wroko leki wan pisi fu a skin. Na hemodialyse, a brudu e lon go na ini wan masyin di e krin a brudu, èn baka dati a e lon go baka na ini a skin fu a sikisma.	____ Mi o teki a datrayepi disi ____ Kande mi no o teki a datrayepi disif ____ Mi no o teki a datrayepi disi
EPIDURALE BLOEDPATCH	A e tapu olo. Watra e lon pasa na ini wi bakabonyo. Te a watra disi e leki, dan datra e spoiti pikinso brudu fu a sikisma na ini en bakabonyo, dan a brudu disi disi e tapu na olo.	____ Mi o teki a datrayepi disi ____ Kande mi no o teki a datrayepi disig ____ Mi no o teki a datrayepi disi
PLASMAFERESE	Disi na fu feti siki. Datra e teki brudu fu a sikisma èn a e puru a plasma na ini. A e poti wan tra sani na presi fu a plasma, èn a e gi a brudu na a sikisma baka. Son leisi datra wani gebroiki a plasma fu wan tra sma, na presi fu a plasma fu a sikisma. Efu disi de so, dan wan Kresten no sa teki a datrayepi disi kwetikweti.	____ Mi o teki a datrayepi disi ____ Kande mi no o teki a datrayepi disih ____ Mi no o teki a datrayepi disi
MERKEN (labelen)	Disi na fu ondrosuku noso fu dresi wan sikisma. Datra e puru pikinso brudu fu a sikisma, a e moksi a brudu dati nanga dresi, èn a e gi a sikisma a brudu baka. A kan taki datra e gi a sikisma a brudu disi wantewante baka. Ma son leisi a e hori en wan pisi ten dorosei fu a skin, fosi a gi a sikisma en baka.	____ Mi o teki a datrayepi disi ____ Kande mi no o teki a datrayepi disii ____ Mi no o teki a datrayepi disi
BLOEDPLAATJESGEL; AUTOLOOG (A meki fu wan sma en eigi brudu)	A e tapu a brudu fu lon, èn a e tapu soro. Datra e puru wan pikinso brudu fu a sikisma, èn a e meki en kon tron wan sani di abi furu bruduplaat nanga weti brudu-cel. Datra e poti a sani disi na tapu koti di den e meki na oparâsi, noso na tapu soro. Hori na prakseri: Son leisi datra e gebroiki wan stollingsfactor di teki fu a brudu fu kaw.	____ Mi o teki a datrayepi disi ____ Kande mi no o teki a datrayepi disij ____ Mi no o teki a datrayepi disi

c d e f g h i j Hori na prakseri: Ibri datra kan gebroiki wan tra fasi fu dresi sma. Yu musu aksi yu datra fu fruteri yu finifini san e pasa te a e gebroiki wan fu den sani di e kari dyaso, so taki yu kan de seiker taki sani e waka akruderi Bijbel gronprakseri èn akruderi yu eigi konsensi.