1. San na wan toe sani di kan meki prati kon na ini den osofamiri?

KOLOKOE foe den wan di de na ini osofamiri pe lobi de, pe den e froestan makandra, èn pe vrede de. Wi howpoe taki a di foe joe de so wan osofamiri. A de wan sari sani, taki boen foeroe osofamiri no de na mindri den osofamiri dati èn taki den osofamiri prati foe wan sani ede. San e prati osofamiri? Na ini a kapitel disi wi sa taki foe dri sani. Na ini son osofamiri, den memre no abi a srefi relisi. Na ini tra osofamiri, kande den pikin no abi den srefi papa nanga mama di ben meki den. Na ini tra osofamiri ete, a gersi taki a feti di den e feti foe wroko wan deibrede, noso na angri di den abi foe abi moro materia sani, e prati den memre foe den osofamiri. Tokoe den omstandigheid di e prati a wan osofamiri, kande no abi krakti na tapoe wan tra osofamiri. San meki taki a difrenti de?

2. Pe wan toe sma e soekoe tiri gi na osofamiri libi, ma san na a moro boen fonten gi a sortoe tiri disi?

² A fasi foe si sani, na wán penti. Efoe joe e proeberi opregti foe froestan a fasi fa a tra sma e prakseri foe sani, dan a kan moro taki joe sa man si fa foe tan hori wan osofamiri na ini wánfasi. Wan di foe toe penti, na a fonten foe pe joe kisi tiri. Foeroe sma e waka na baka a rai foe kompe wrokoman, foe birtisma, foe skrifiman foe koranti, noso foe tra sma di e gi tiri. Ma wan toe sma kon sabi san a Wortoe foe Gado e taki foe a situwâsi foe den, èn baka dati den e gebroiki san den ben leri. Fa a kan jepi wan osofamiri foe tan hori a vrede na ini wan osofamiri, te den e doe disi? — 2 Timoteus 3:16, 17.

EFOE JOE MASRA ABI WAN TRA BRIBI

3. (a) San na a rai foe bijbel di abi foe doe nanga a trow di sma e trow nanga wan sma di no abi a srefi bribi? (b) San na wan toe fondamenti gronprakseri di kan gebroiki te wan patna de na bribi èn a trawan no de na bribi?

³ Bijbel e gi wi krakti rai foe no trow nanga wan sma di de ini wan tra relisi (Deuteronomium 7:3, 4; 1 Korentesma 7:39). Ma a kan taki joe ben kon leri sabi a waarheid foe bijbel baka di joe trow, ma joe masra no ben leri sabi a waarheid. San joe moesoe doe dan? A no de foe taki, dati den pramisi di doe gi a trowlibi, e wroko ete (1 Korentesma 7:10). Bijbel e poti krakti na tapoe taki a banti foe a trowlibi moesoe tan èn a e gi den sma di trow a deki-ati foe loesoe den kesekese foe den, na presi foe lon gowe gi den (Efeisesma 5:28-31; Titus 2:4, 5). Ma fa a de te joe masra e gens fajafaja taki joe de ini a relisi foe bijbel? A kan proeberi foe tapoe joe foe go na den gemeente konmakandra, noso a kan taki dati a no wani meki en wefi go oso foe oso, foe taki foe relisi. San joe o doe?

4. Na sortoe fasi wan wefi kan firi gi en masra te en masra no abi a srefi bribi leki en?

⁴ Aksi joesrefi: ’Foe san ede mi masra e denki na so wan fasi?’ (Odo 16:20, 23) Efoe a no e froestan troetroe san joe e doe, dan a kan broko en ede nanga joe. Noso kande a de ondro druk foe famiri bika joe no e teki prati moro na ini wan toe gwenti di de prenspari gi den. „Te mi ben de mi wawan na ini na oso, mi ben firi taki a ben gowe libi mi”, na so wán masra ben taki. A man disi ben feni taki a ben e lasi en wefi na wan relisi. Ma bigimemre ben tapoe en foe erken taki a ben firi taki a de en wawan. Kande joe masra moesoe kisi a djaranti taki a lobi di joe abi gi Jehovah, no wani taki dati joe lobi joe masra moro mendri leki bifo. Sorgoe taki joe gebroiki ten nanga en.

5. Sortoe balansifasi a wefi moesoe hori te en masra abi wan tra bribi?

⁵ Ma efoe joe wani handri na wan koni fasi nanga a situwâsi, dan joe moesoe prakseri foe wan sani di de srefi moro prenspari. A Wortoe foe Gado e gi den wefi a tranga: „Saka oensrefi na oen masra ondro, soleki fa a e fiti ini Masra” (Kolosesma 3:18). So boen, a e warskow gi wan jeje foe srefidensi. Moro fara, foe di a tekst disi e taki „soleki fa a e fiti ini Masra”, a e sori taki, te wan sma e saka ensrefi na en masra ondro, dan a moesoe hori na prakseri toe taki a moesoe saka ensrefi na Masra ondro. Wan balansi moesoe de.

6. Sortoe gronprakseri wan kresten wefi moesoe hori na prakseri?

⁶ Gi wan kresten, foe go na den gemeente konmakandra èn foe gi kotoigi na trawan foe a bribi foe en di gron tapoe bijbel, de prenspari afersi foe a troe anbegi di a no moesoe misi foe poti prakseri na tapoe (Romesma 10:9, 10, 14; Hebrewsma 10:24, 25). San joe ben sa doe dan, efoe wan libisma ben komanderi joe krinkrin taki joe no moesoe gi jesi na wan spesroetoe sani di Gado e aksi foe joe? Den apostel foe Jesus Krestes ben froeklari: „Wi moesoe gi jesi na Gado leki tiriman moro leki na libisma” (Tori foe den Apostel 5:29). Na eksempre foe den na wan eksempre di wi kan gebroiki na ini foeroe situwâsi na ini a libi. Lobi gi Jehovah sa poesoe joe foe gi en na anbegi di a abi reti na tapoe? Na a srefi ten, a lobi èn lespeki di joe abi gi joe masra sa meki joe proeberi foe gi Jehovah wawan na anbegi na wan fasi di no e broeja joe masra? — Mateus 4:10; 1 Johanes 5:3.

7. Sortoe fasti bosroiti wan kresten wefi moesoe abi?

⁷ Jesus ben taki dati disi no ben sa man ala ten. A ben warskow taki, bika sma ben sa gens a troe anbegi, meki memre di de na bribi na ini son osofamiri ben sa feni taki den prati, neleki wan feti-owroe ben kon na mindri den nanga den trawan foe na osofamiri (Mateus 10:34-36). Wan oema na Japan ben ondrofeni disi. En masra ben gens en erfoe jari langa. A ben meshandri en èn foeroe tron a ben sroto en na dorosei, so taki a no ben man kon na ini na oso. Ma na oema ben horidoro. Den mati na ini a kresten gemeente ben jepi en. A ben begi doronomo èn ben kisi foeroe deki-ati foe 1 Petrus 2:20. A kresten oema disi ben abi na overtoigi taki efoe a ben tan kankan, dan wan dei en masra ben sa dini Jehovah makandra nanga en. Èn dati ben pasa troetroe.

8, 9. Fa wan wefi moesoe handri foe no doe sani di e hendri a masra sondro taki a de fanowdoe?

⁸ Foeroe praktis sani de di joe kan doe foe abi krakti na tapoe a fasi fa joe patna e denki. Foe eksempre, efoe joe masra e gens a relisi foe joe, dan joe no moesoe gi en troetroe reide foe kragi na ini tra afersi. Hori na oso krin. Sorgoe gi a fasi fa joe e sori na dorosei. Lobi foe taki lobi wortoe nanga wortoe foe warderi. Na presi foe kroetoekroetoe, horibaka gi en. Sori taki joe e loekoe na en foe kisi tiri. No teki refensi efoe joe e firi taki a doe joe ogri (1 Petrus 2:21, 23). Hori na onvolmaaktifasi foe libisma na prakseri, èn efoe kesekese e opo kon, abi sakafasi foe de a fosiwan foe taki dati joe no ben kan jepi. — Efeisesma 4:26.

⁹ No meki a de so, taki foe di joe fisiti den konmakandra, meki joe ben lati nanga den njanjan foe en. Kande joe wani toe foe teki prati na a kresten diniwroko na den ten te joe masra no de na oso. A de wan koni sani efoe wan kresten wefi no e preiki gi en masra te a no wani. Na presi foe dati, a e waka na baka a rai foe na apostel Petrus: „Oen wefi, saka oensrefi na a masra foe oenoe ondro, so taki efoe son wan foe den no e gi jesi na a wortoe, a wefi foe den kan wini den sondro wan wortoe, nanga a fasi fa den e tjari densrefi, foe di den si fa oenoe ben tjari oensrefi na wan boen fasi makandra nanga dipi lespeki” (1 Petrus 3:1, 2). Kresten wefi e doe moeiti foe sori den froktoe foe a jeje foe Gado moro nanga moro. — Galasiasma 5:22, 23.

TE A WEFI ABI WAN TRA BRIBI

10. Fa wan masra di de na bribi moesoe handri nanga en wefi te en wefi abi wan tra bribi?

¹⁰ Fa a de te a masra de na bribi èn a wefi no de na bribi? Bijbel e gi tiri gi den sortoe situwâsi dati. A e taki: „Efoe wan brada abi wan wefi di no de na bribi, èn tokoe a wefi e agri foe tan nanga en, dan a [masra] no moesoe libi en” (1 Korentesma 7:12). A e gi den masra a froemane toe: „Tan lobi oen wefi.” — Kolosesma 3:19.

11. Fa wan masra kan sori a koni foe man si sani krin èn kan doe en edeman wroko na wan takt fasi na tapoe en wefi, efoe en wefi abi wan tra bribi?

¹¹ Efoe joe na a masra foe wan wefi di no abi a srefi bribi leki di foe joe, dan joe moesoe sorgoe spesroetoe taki joe e sori lespeki gi joe wefi èn e hori den firi foe en na prakseri. Foe di a de wan bigisma, a abi reti foe de fri ini na anbegi foe en, srefi efoe joe no e agri nanga den. Te joe e taki a fosi leisi nanga en foe a bribi di joe abi, no froewakti taki a sa trowe a bribi foe en di a abi langa ten kaba, foe teki wan njoen sani. Na presi foe taki wantewante taki den relisi gwenti di en nanga en famiri ben hori wan langa ten kaba, falsi, proeberi nanga pasensi foe taki-go-taki-kon nanga en nanga jepi foe den Boekoe foe bijbel. A kan de taki a e feni taki joe no e hori en na prakseri, efoe joe e gi moro foeroe ten na den gemeente aktiviteit. A kan taki a e gens den moeiti di joe e doe foe dini Jehovah, ma a moro prenspari boskopoe kan de nomo: „Mi abi moro ten foe joe fanowdoe!” Abi pasensi. Te joe e hori en na prakseri na wan lobi fasi, dan dati kan jepi en baka ten foe teki a troe anbegi. — Kolosesma 3:12-14; 1 Petrus 3:8, 9.

LERI DEN PIKIN

12. Srefi te wan masra nanga en wefi abi difrenti bribi, fa den moesoe gebroiki bijbel gronprakseri foe gi den pikin foe den leri?

¹² Na ini wan osofamiri di no de wán ini anbegi, a leri di den pikin moesoe kisi na relisi sei e tron wan penti foe kesekese son tron. Fa den bijbel gronprakseri moesoe gebroiki? Bijbel e gi a papa a moro prenspari frantiwortoe foe gi leri na den pikin, ma a mama abi wan prenspari ròl toe. (Odo 1:8; teki gersi Genesis 18:19; Deuteronomium 11:18, 19.) Srefi efoe a papa no e teki na edeman posisi foe Krestes, tokoe a de na edeman ete foe na osofamiri.

13, 14. Efoe a masra e tapoe en wefi foe tjari den pikin go na den kresten konmakandra noso foe studeri nanga den, san a wefi kan doe dan?

¹³ Wan toe papa di no de na bribi, no e gens te a mama e leri den pikin foe relisi afersi. Ma trawan e gens. Fa a de te joe masra e weigri foe gi pasi taki joe e tjari den pikin go na den gemeente konmakandra noso e tapoe joe srefi foe studeri bijbel nanga den na oso? Now joe moesoe poti wan toe plekti na ini balansi — a plekti di joe abi na Jehovah Gado, na joe masra di de joe edeman, èn na den lobi pikin foe joe. Fa joe kan tjari den sani disi akroederi makandra?

¹⁴ Seiker joe sa begi foe na afersi (Filipisma 4:6, 7; 1 Johanes 5:14). Ma te foe kaba, joe na a sma di moesoe bosroiti sortoe pasi joe moesoe teki. Efoe joe e bigin nanga takt, foe meki a de krin gi joe masra taki joe no e tjalensi a posisi foe en leki edeman, dan kande a gens foe en kan kon moro mendri te foe kaba. Srefi te joe masra e tapoe joe foe tjari den pikin foe joe go na den konmakandra, noso foe abi wan troetroe bijbelstudie nanga den, tokoe joe kan leri den ete. Nanga a takimakandra di joe abi ala dei èn nanga a boen eksempre foe joe, proeberi foe stampoe lobi gi Jehovah na ini den, bribi na ini en Wortoe, lespeki gi papa nanga mama — so srefi gi a papa foe den — foe broko den ede na wan lobi fasi gi tra sma, èn foe abi warderi foe doe wroko na wan opregti fasi. Te foe kaba a papa kan si den boen bakapisi èn kan warderi a waarde foe den moeiti di joe e doe. — Odo 23:24.

15. San na a frantiwortoe foe wan papa di de na bribi, foe gi den pikin leri?

¹⁵ Efoe joe na wan masra di de na bribi èn joe wefi no de na bribi, dan joe moesoe tjari a frantiwortoe foe kweki den pikin foe joe „na ini a tranga leri èn a serjoesoe froemane foe Jehovah” (Efeisesma 6:4). Te joe e doe disi, dan a no de foe taki, dati joe moesoe abi switifasi, lobifasi, èn joe moesoe de reidelek na ini a fasi fa joe e handri nanga joe wefi.

EFOE A RELISI FOE JOE NO DE A SREFI LEKI DI FOE JOE PAPA NANGA MAMA

16, 17. Sortoe bijbel gronprakseri den pikin moesoe hori na prakseri te den e teki wan bribi di e difrenti foe di foe den papa nanga mama foe den?

¹⁶ A de wan gewoon sani now taki srefi jongoe pikin e teki relisi di e difrenti foe di foe a papa nanga mama foe den. Joe doe dati? Efoe dati de so, dan bijbel abi rai gi joe.

¹⁷ A Wortoe foe Gado e taki: „Gi jesi na oen papa nanga mama ini wánfasi nanga Masra, bika disi de regtfardiki: ’Gi grani na oen papa nanga oen mama’” (Efeisesma 6:1, 2). Disi abi foe doe toe nanga wan gosontoe lespeki gi den papa nanga mama. Ma ala di a de prenspari foe gi jesi na papa nanga mama, den no moesoe gi dati sondro foe abi lespeki gi a troe Gado. Te wan pikin owroe nofo foe bigin teki bosroiti, a e tjari moro frantiwortoe gi den sani di a e doe. Disi no de troe wawan nanga den wet foe grontapoe, ma spesroetoe ini a tori foe a wet foe Gado. „Ibriwan foe wi sa gi frantiwortoe na Gado gi ensrefi”, na so bijbel e taki. — Romesma 14:12.

18, 19. Efoe pikin abi wan relisi di e difrenti foe di foe den papa nanga mama foe den, fa den kan jepi den papa nanga mama foe den foe froestan a bribi foe den moro boen?

¹⁸ Efoe den bribi foe joe e meki taki joe moesoe tjari kenki kon na ini joe libi, dan joe moesoe proeberi foe froestan a fasi fa joe papa nanga mama e si sani. Den sa breiti kande, te joe abi moro lespeki gi den, e gi jesi moro na den, èn te joe de nanga moro faja gi den sani di den e aksi foe joe, di de leki wan bakapisi foe den sani di joe e leri foe bijbel èn foe di joe e gebroiki den. Ma efoe a njoen bribi foe joe e meki joe weigri foe teki den sani di den e bribi èn den gwenti foe den di den lobi, dan den kan feni taki joe e trowe wan erfenis di den ben proeberi foe gi joe. Kande den e frede toe fa a sa waka nanga joe efoe a sani di joe e doe no de wan sani di den sma na ini a birti lobi, noso efoe a e poeroe joe prakseri foe sani di den wani taki joe moesoe feti na baka èn di ben kan jepi joe foe go na fesi na materia sei. Bigimemre ben kan de wan skotoe toe. Kande den e feni taki, te joe loekoe en boen, joe e taki dati joe abi leti èn taki den fowtoe.

¹⁹ Foe dati ede, so esi leki a kan, proeberi foe seti sani, so taki a papa nanga mama foe joe kan miti wan toe foe den owroeman noso tra lepi Kotoigi foe a gemeente na ini joe kontren. Gi a papa nanga mama foe joe deki-ati foe kon na wan Kownoekondre zaal foe jere foe densrefi foe san wi e taki èn foe si langalanga sortoe sma Jehovah Kotoigi de. Baka ten, a papa nanga mama foe joe kan kon moro safoe na ini a fasi fa den e denki. Srefi te den papa nanga mama e hori steifi na ini a gens di den e gens, e pori bijbel poeblikâsi, èn e tapoe den pikin foe go na den kresten konmakandra, tokoe a de moro foeroe so, taki okasi de foe leisi na wan tra presi, foe taki nanga kompe kresten, èn foe gi kotoigi na tra sma èn foe jepi den na tra fasi. Joe kan begi Jehovah toe. Wan toe jongoewan abi foe wakti te leki den kon owroe nofo foe libi dorosei foe na osofamiri, bifo den kan doe moro. Ma awansi fa a situwâsi de na oso, no frigiti foe „gi grani na oen papa nanga oen mama”. Doe san joe moesoe doe foe tjari vrede kon na ini na oso (Romesma 12:17, 18). Na tapoe foe dati, feti na baka vrede nanga Gado.

A TJALENSI FOE DE WAN STIEFPAPA NOSO WAN STIEFMAMA

20. Sortoe firi pikin kan abi te den abi wan stiefpapa noso wan stiefmama?

²⁰ Na ini foeroe oso a situwâsi di e gi a moro bigi tjalensi, no e kon foe kesekese foe relisi afersi, ma foe problema na ini stief-osofamiri. Foeroe osofamiri na ini a ten disi abi pikin toe foe wan fosi trowlibi foe a papa noso a mama noso foe ala toe. Na ini den sortoe osofamiri disi, kande den pikin e ondrofeni djaroesoe nanga atibron noso kande wan kesekese foe loyaalfasi. Leki wan bakapisi foe dati, den kan kakafoetoe gi den opregti moeiti foe a stiefpapa noso stiefmama foe de wan boen papa noso mama. San kan jepi foe meki wan stief-osofamiri waka boen?

21. Foe san ede den stiefpapa nanga stiefmama moesoe soekoe jepi na den gronprakseri di de foe feni na ini bijbel ala di den de na ini spesroetoe situwâsi?

²¹ Froestan taki, ala di spesroetoe situwâsi de, den bijbel gronprakseri di e tjari boen bakapisi kon na ini tra osofamiri, e fiti djaso toe. Te wi no e poti prakseri na tapoe den gronprakseri dati, dan a kan gersi taki a loesoe wan problema gi wan pisi ten, ma soleki fa a sori, a sa tjari sari kon baka ten (Psalm 127:1; Odo 29:15). Kweki koni èn a koni foe man si sani krin — koni foe gebroiki den gronprakseri foe Gado nanga winimarki na prakseri di e tan langa ten, èn a koni foe man si krin foe san ede memre foe osofamiri e taki èn e doe bepaalde sani. A de fanowdoe toe foe firi gi trawan. — Odo 16:21; 24:3; 1 Petrus 3:8.

22. Foe san ede a kan de moeilek gi den pikin foe erken wan stiefpapa noso stiefmama?

²² Efoe joe na wan stiefpapa noso stiefmama, joe e memre kande taki, di joe ben de wan mati foe na osofamiri, den pikin ben teki joe. Ma di joe ben kon tron a stiefpapa noso stiefmama foe den, kande a fasi fa den e handri, kon kenki. Foe di den pikin e prakseri a papa noso mama di ben meki den èn di no e libi moro nanga den, a kan taki den abi wan strei nanga loyaalfasi, foe di den e denki kande taki joe wani poeroe a lobi di den abi gi a papa noso mama di no de moro nanga den. Son tron, den ben sa kan memre joe langalanga taki joe a no a papa foe den noso a mama foe den. Den sortoe sani disi di den e taki, e hati. Tokoe, „no hasti joesrefi foe kisi atibron na ini joe jeje” (Preikiman 7:9). A koni foe man si sani krin èn firi gi trawan, de fanowdoe foe man doe wan sani nanga den firi foe den pikin.

23. Fa tranga leri kan gi na ini wan osofamiri di abi stiefpikin?

²³ Den eigifasi dati de toemoesi prenspari te wan sma e gi tranga leri. A de toemoesi prenspari foe gi tranga leri doronomo (Odo 6:20; 13:1). Èn foe di ala pikin no de a srefi, meki a kan taki a tranga leri e difrenti foe a trawan. Wan toe stiefpapa noso stiefmama feni taki, a moro boen, awansi na ini a bigin, te a papa noso mama di ben meki den, e gi den pikin tranga leri. Ma a de toemoesi prenspari, taki a papa nanga a mama e agri nanga a tranga leri di gi èn e horibaka gi en, èn den no moesoe feni wan troetroe pikin foe den moro boen leki wan stiefpikin (Odo 24:23). A de prenspari foe gi jesi, ma a de fanowdoe foe loekoe pasa onvolmaaktifasi. No handri pasa marki. Gi tranga leri na wan lobi fasi. — Kolosesma 3:21.

24. San kan jepi foe no meki problema ini a tori foe boen gwenti nanga wet kon na mindri wan mansma nanga wan oemasma na ini wan stief-osofamiri?

²⁴ Takimakandra na ini na osofamiri kan doe foeroe foe no meki trobi kon. Den takimakandra kan jepi na osofamiri foe hori den moro prenspari afersi foe a libi na prakseri. (Teki gersi Filipisma 1:9-11.) Den kan jepi ibriwan foe den toe foe si fa ensrefi kan jepi foe doro den marki foe na osofamiri. Moro fara, te na osofamiri e taki fri nanga makandra, dan dati kan meki taki problema no kon ini a tori foe boen gwenti nanga wet. Den oemapikin moesoe froestan taki den moesoe weri bescheiden krosi èn taki den moesoe tjari densrefi na wan fasi di fiti te den de ini a birti foe a stiefpapa foe den èn wan stiefbrada, èn den manpikin moesoe kisi rai fa foe tjari densrefi na wan joisti fasi nanga a stiefmama foe den èn wan stiefsisa. — 1 Tesalonikasma 4:3-8.

25. Sortoe eigifasi kan jepi foe hori a vrede na ini wan stief-osofamiri?

²⁵ Te wi e miti a spesroetoe tjalensi foe de wan stiefpapa noso wan stiefmama, dan wi moesoe abi pasensi. A e teki ten foe kweki njoen matifasi. A kan de wan kefalek bigi wroko foe froedini a lobi nanga lespeki foe pikin nanga soema joe no abi wan famiri banti. Ma a de wan sani di kan. A sroto gi vrede na ini wan stief-osofamiri, na wan ati di koni èn di abi a koni foe man si sani krin, makandra nanga wan tranga angri foe plisi Jehovah (Odo 16:20). Den sortoe eigifasi disi kan jepi joe toe foe man kakafoetoe gi tra situwâsi.

A FETI NA BAKA MATERIA GOEDOE E PRATI JOE OSOFAMIRI?

26. Na sortoe fasi problema di abi foe doe nanga materia sani èn a fasi fa sma e si materia sani, kan prati wan osofamiri?

²⁶ Problema di abi foe doe nanga materia sani èn a fasi fa sma e si materia sani, kan prati osofamiri na foeroe fasi. A de wan sari sani, taki wan toe osofamiri prati foe kesekese di abi foe doe nanga moni èn foe na angri foe kon goedoe — noso pikinso moro goedoe. Prati kan kon te ala toe patna abi grontapoe wroko èn den abi a prakseri taki a moni di ibriwan foe den e wroko, na foe ensrefi. Srefi te kesekese no de, te ala toe patna e wroko, a kan de taki den abi wan schema di no e libi ten abra foe de nanga makandra. Wan gwenti di de moro nanga moro foe si na grontapoe, na taki den papa e tan farawe foe na osofamiri foe den foe wan langa pisi ten — moen noso srefi jari — foe wroko moro moni leki oiti den ben kan wroko na oso. Disi kan tjari toemoesi serjoesoe problema kon.

27. San na wan toe gronprakseri di kan jepi wan osofamiri di de na ondro kwinsi na moni sei?

²⁷ No wan wet kan poti foe man handri nanga den situwâsi disi, bika difrenti osofamiri abi foe doe nanga difrenti sani di e kwinsi den èn difrenti sani de di den abi fanowdoe. Ma tokoe a rai foe bijbel kan jepi. Foe eksempre, Odo 13:10 e sori taki son tron sma kan wai pasi gi feti di no abi foe de, efoe den e „poti mofo makandra”. Disi no wani taki nomo taki wan sma moesoe taki fa en e si a tori, ma foe soekoe rai èn foe kon sabi fa a tra sma e si a tori. Moro fara, foe seti wan plan fa foe gebroiki moni, di joe kan doro, kan jepi foe meki na osofamiri doe moeiti makandra. Son tron a de fanowdoe — kande gi wan pisi ten — taki ala toe patna moesoe wroko dorosei foe na oso foe sorgoe gi tra kostoe, spesroetoe te pikin de noso tra sma di den moesoe sorgoe na moni sei. Te disi de so, a masra kan gi en wefi a djaranti taki a abi ten gi en ete. En nanga den pikin kan jepi na wan lobi fasi nanga pikinso foe a wroko di a wefi gwenti foe doe en wawan. — Filipisma 2:1-4.

28. Sortoe froemane sa jepi wan osofamiri foe abi wánfasi, efoe den hori den?

²⁸ Ma hori na prakseri taki, ala di moni na wan sani di de fanowdoe na ini a seti foe sani disi, a no e tjari kolokoe kon. A no e gi libi srefisrefi (Preikiman 7:12). Foe troe, toemoesi foeroe krakti na tapoe materia sani kan tjari pori kon na jejefasi èn na a sei foe boen gwenti nanga wet (1 Timoteus 6:9-12). A moro boen foe soekoe Gado Kownoekondre nanga en regtfardikifasi fosi, nanga a djaranti foe abi en blesi na tapoe den moeiti di wi e meki foe kisi den sani di wi abi fanowdoe na ini a libi! (Mateus 6:25-33; Hebrewsma 13:5). Te joe e tan poti jeje afersi na tapoe a fosi presi èn te joe e feti na baka vrede nanga Gado fosi, dan joe kan feni taki joe osofamiri, ala di a prati kande foe bepaalde situwâsi ede, sa tron wan osofamiri di de troetroe ini wánfasi na ini den moro prenspari sani.

1. Sortoe problema di no de foe si, de na ini son osofamiri?

DJONSRODE na owroe wagi wasi èn den brenki en. Gi den sma di e waka pasa a loekoe brenki, pikinmoro njoen. Ma na inisei foe a skin foe a wagi, froestoe e njan a skin foe a wagi safrisafri poeroe. Na so a de toe nanga wan toe osofamiri. Ala di ala sani gersi heri moi na dorosei, tokoe den lafoe fesi e kibri frede nanga pen. Na ini na oso, sani di de leki froestoe e njan a vrede foe na osofamiri safrisafri poeroe. Toe problema di kan abi a bakapisi disi, na a de di wan sma de wan sopiman èn na ogri di e doe nanga tranga.

A PORI DI WAN SOPIMAN KAN TJARI KON

2. (a) Fa bijbel e si a gebroiki di sma e gebroiki sopi? (b) San a wani taki foe de wan sopiman?

² Bijbel no e kroetoe a gebroiki di sma e gebroiki sopi na wan bescheiden fasi, ma a e kroetoe a droengoe di sma e droengoe (Odo 23:20, 21; 1 Korentesma 6:9, 10; 1 Timoteus 5:23; Titus 2:2, 3). Ma foe de wan sopiman, na moro leki a droengoe di sma e droengoe; na a prakseri di sma e prakseri sopi ala ten nomo èn taki den no man basi a gebroiki di den e gebroiki sopi. Sopiman kan de bigisma. Ma a de wan sari sani, taki den kan de jongoesma toe.

3, 4. Froeteri san na den bakapisi gi a trowpatna foe a sopiman èn gi den pikin.

³ Langa ten pasa kaba, bijbel ben sori taki te sma no e gebroiki sopi na wan joisti fasi, dan dati kan pori a vrede foe wan osofamiri (Deuteronomium 21:18-21). Te wan sma de wan sopiman, dan a heri osofamiri e firi den bakapisi di de leki froestoe di e kon safrisafri. Kande a trowpatna e doe kefalek foeroe moeiti foe stòp a sopiman foe dringi, noso foe kakafoetoe gi na onfroewakti fasi fa a e tjari ensrefi.a A e proeberi foe kibri a sopi, foe trowe a sopi, foe kibri en moni, èn foe aksi en foe sori lobi gi na osofamiri, gi a libi, srefi gi Gado — ma a sopiman e dringi ete. Foe di den moeiti di na oema doe foe basi a dringi di a man e dringi ben de foe soso ala ten baka, a e firi broeja èn a e firi taki a no man kakafoetoe gi a problema. Kande a e bigin frede, e atibron, e firi taki na en fowtoe, e senwe, e broko en ede, èn no abi lespeki gi ensrefi.

⁴ Den pikin no man lowe gi den bakapisi foe wan papa noso mama di de wan sopiman. Wan toe foe den pikin den meshandri na skin sei. Trawan den e moeilek na seks sei. Kande den e gi densrefi a fowtoe taki a papa noso mama na wan sopiman. Nofo tron a fasi fa a sopiman e tjari ensrefi na wan onfroewakti fasi, e broko a froetrow di a pikin kan abi na ini tra sma. Bika den no e firi switi foe taki foe den sani di e pasa na oso, kande den pikin e leri foe dwengi den firi foe den, èn nofo tron a abi takroe bakapisi na skin sei (Odo 17:22). A kan taki den sortoe pikin disi e tjari a froetrow èn a lespeki di den no abi gi densrefi, go te na ini a ten te den de bigisma.

SAN NA OSOFAMIRI KAN DOE?

5. Fa wi kan handri nanga a de di wan sma de wan sopiman, èn foe san ede disi moeilek?

⁵ Ala di foeroe foe den sabiman e taki dati joe no man dresi wan sma di de wan sopiman, tokoe moro foeroe foe den e agri taki den kan kon betre pikinso nanga wan programa pe den no moesoe gebroiki sopi kwetikweti. (Teki gersi Mateus 5:29.) Ma foe meki wan sopiman teki jepi, de moro moeilek leki foe taki, foe di moro foeroe a no e agri taki a abi wan problema. Ma tokoe te den memre foe na osofamiri e doe sani foe handri nanga a fasi fa a sopiman abi krakti tapoe den, a sopiman kan bigin froestan taki a abi wan problema. Wan datra di abi ondrofeni fa foe jepi sopiman nanga na osofamiri foe den, ben taki: „Mi e denki taki a moro prenspari sani na, taki na osofamiri moesoe go doro nanga den sani di den gwenti foe doe ala dei, na a fasi di e tjari moro boen winimarki gi den. Moro nanga moro a sopiman e si o bigi a difrenti de na mindri en nanga den trawan foe na osofamiri.”

6. San na a moro boen fonten foe kisi rai gi osofamiri di abi wan memre di de wan sopiman?

⁶ Efoe wan sopiman de na ini joe osofamiri, den rai foe bijbel di Gado ben meki sma skrifi, kan jepi joe foe libi na a fasi di e tjari den moro boen bakapisi leki joe man (Jesaja 48:17; 2 Timoteus 3:16, 17). Loekoe wan toe gronprakseri di jepi osofamiri foe man handri boen nanga a de di wan sma de wan sopiman.

7. Soema frantiwortoe a de, te wan memre foe na osofamiri de wan sopiman?

⁷ No poti ala fowtoe na tapoe joesrefi moro. Bijbel e taki: „Ibriwan sma sa tjari en eigi lai”, èn, „ibriwan foe wi sa gi frantiwortoe na Gado gi ensrefi” (Galasiasma 6:5; Romesma 14:12). Kande a sopiman e proeberi foe meki den memre foe na osofamiri denki taki den de frantiwortoe taki a de wan sopiman. Foe eksempre, a kan taki: „Efoe oenoe ben libi moro boen nanga mi, dan mi no ben sa dringi.” Efoe a gersi leki tra sma e agri nanga en, dan den e gi en deki-ati foe dringi go doro. Ma srefi efoe wi e pina foe den omstandigheid noso foe tra sma, tokoe wi alamala — so srefi den sopiman — de frantiwortoe gi den sani di wi e doe. — Teki gersi Filipisma 2:12.

8. San na wan toe fasi di e jepi a sopiman kande foe si den bakapisi di a problema foe en e tjari?

⁸ No denki taki ala ten joe moesoe kibri a sopiman gi den bakapisi foe a dringi di a e dringi sopi. Wan odo foe bijbel di e taki foe wan sma di abi atibron, ben kan fiti toe gi a sopiman: „Efoe joe ben sa froeloesoe en, joe sa tan doe en so srefi ibri tron baka” (Odo 19:19). Meki a sopiman firi den bakapisi foe a dringi di a e dringi sopi. Meki a krin a morsoe di a ben meki noso bèl en wrokobasi a mamanten baka di a ben dringi, foe froeteri san ben pasa.

9, 10. Foe san ede den osofamiri foe sopiman moesoe teki jepi, èn a jepi foe soema spesroetoe den moesoe soekoe?

⁹ Teki a jepi foe tra sma. Odo 17:17 e taki: „Wan troetroe mati abi lobi ala ten, èn a de wan brada di en mama meki foe te banawtoe de.” Te wan sopiman de na ini joe osofamiri, dan banawtoe de. Joe abi jepi fanowdoe. No draidrai foe froetrow na tapoe ’troe kompe’ foe kisi jepi (Odo 18:24). Foe taki nanga tra sma di e froestan a problema noso di ondrofeni so wan srefi sortoe situwâsi, kan gi joe praktis rai foe san joe moesoe doe èn san joe no moesoe doe. Ma abi balansifasi. Taki nanga den sma di joe e froetrow, den wan di sa kibri a taki di joe e „taki na wan froetrow fasi”. — Odo 11:13.

¹⁰ Leri foe froetrow den kresten owroeman. Den owroeman na ini a kresten gemeente kan de wan bigi fonten foe kisi jepi. Den lepi man disi kisi leri na ini a Wortoe foe Gado èn den abi ondrofeni foe gebroiki den gronprakseri foe en. Den kan de „leki wan kibripresi gi a winti èn wan presi foe kibri gi a hebi alen, neleki kriki ini wan presi sondro watra, neleki a kowroe foe wan bigi stonbergi di tanapoe leti-opo ini wan kondre di drei” (Jesaja 32:2). Den kresten owroeman no e kibri a heri gemeente leki wan groepoe gi den takroe krakti wawan, ma den e gi so srefi trowstoe, kowroe-ati, èn den abi persoonlijk belangstelling gi ibri sma aparti di abi problema. Meki boen gebroiki foe a jepi foe den.

11, 12. Soema e gi a moro boen jepi na den osofamiri foe sopiman, èn fa den e kisi a jepi dati?

¹¹ Na tapoe foe dati, teki krakti foe Jehovah. Bijbel e gi wi a waran djaranti: „Jehovah de krosibei foe den wan di brokosaka; èn a e froeloesoe den wan di masi na ini jeje” (Psalm 34:18). Efoe joe e firi brokosaka noso joe e firi masi na ini jeje bika foe den kwinsi foe libi nanga wan memre foe na osofamiri di de wan sopiman, sabi dan taki „Jehovah de krosibei”. A e froestan o moeilek a situwâsi de na ini joe osofamiri. — 1 Petrus 5:6, 7.

¹² Te joe e bribi san Jehovah e taki na ini en Wortoe, dan dati kan jepi joe foe man tjari a broko di joe e broko joe ede (Psalm 130:3, 4; Mateus 6:25-34; 1 Johanes 3:19, 20). Te joe e studeri a Wortoe foe Gado èn joe e libi akroederi den gronprakseri foe en, dan dati e meki taki joe man kisi a jepi foe Gado en santa jeje, di kan gi joe a „krakti di pasa san de normaal” foe man tjari a wan dei go na a trawan. — 2 Korentesma 4:7.b

13. San na wan di foe toe problema di e pori foeroe osofamiri?

¹³ A gebroiki di wan sma no e gebroiki sopi na wan boen fasi, kan tjari wan tra problema kon di e pori foeroe osofamiri — ogri di doe nanga tranga na ini osofamiri.

PORI DI KON FOE OGRI DI DOE NANGA TRANGA NA INI OSOFAMIRI

14. O ten ogri di doe nanga tranga na ini osofamiri, ben bigin, èn fa a situwâsi de na ini a ten disi?

¹⁴ A fosi ogri di doe nanga tranga na ini a libisma historia, ben de wan ogri di doe nanga tranga na ini wan osofamiri, pe toe brada ben de ini a tori, Kain nanga Abel (Genesis 4:8). Foe sensi a ten dati, a libisma famiri ben pina na ondro ala fasi foe ogri di doe nanga tranga na ini osofamiri. Masra de di e fon a wefi foe den, wefi e opo go feti nanga a masra foe den, papa nanga mama di e fon den jongoe pikin foe den na wan ogri-ati fasi, èn bigi pikin di e meshandri den owroe papa nanga mama foe den.

15. Fa na ogri di doe nanga tranga na ini osofamiri, abi krakti na emotioneel sei na tapoe den memre foe na osofamiri?

¹⁵ A pori di e kon foe ogri di doe nanga tranga na ini osofamiri, de moro leki na a skin nomo. Wán wefi di ben kisi fonfon, ben taki: „Joe moesoe abi foe doe nanga firi di joe abi taki joe fowtoe èn nanga foeroe sjen. Moro foeroe foe den mamanten, joe wani tan na ini joe bedi nomo, èn joe e howpoe taki a ben de soso wan takroe dren.” Den pikin di e si noso e ondrofeni ogri di doe nanga tranga na ini osofamiri, kan doe ogri nanga tranga te den kon bigi èn te den abi den eigi osofamiri.

16, 17. San na a meshandri di sma e meshandri trawan na emotioneel sei, èn fa a abi krakti na tapoe den memre foe na osofamiri?

¹⁶ Ogri di doe nanga tranga na ini osofamiri, a no soso a meshandri di wan sma e meshandri wan tra sma na skin sei wawan. Nofo tron, a meshandri doe nanga den sani di wan sma e taki. Odo 12:18 e taki: „Wan sma di no e denki te a e taki, de leki den djoekoe foe wan feti-owroe.” Den „djoekoe” disi di de wan marki foe ogri di doe nanga tranga na ini osofamiri, abi na ini toe a kosi di wan sma e kosi wan trawan èn a bari di wan sma e bari wan trawan, èn so srefi a kroetoe di wan sma e kroetoe wan trawan doronomo, na afrontoe di wan sma e afrontoe wan trawan foe gi en sjen, èn a pramisi di wan sma e pramisi wan trawan foe doe en ogri nanga tranga na skin sei. Den mankeri di e kon foe ogri di doe nanga tranga na emotioneel sei, no de foe si nanga ai èn nofo tron tra sma no man si den.

¹⁷ Wan spesroetoe sari sani, na a fonfon di wan pikin e kisi na emotioneel sei — a kroetoe di wan sma e kroetoe wan pikin doronomo èn a wisiwasi di den e wisiwasi den bekwaamfasi foe wan pikin, a koni foe en, noso a waarde di a abi leki wan sma. So wan meshandri di wan sma e meshandri wan pikin nanga den sani di a sma taki, kan pori a jeje foe a pikin. A troe, ala pikin abi tranga leri fanowdoe. Ma bijbel e gi papa a komando: „No tanteri oen pikin, so taki den no lasi-ati.” — Kolosesma 3:21.

FA FOE TAN FARAWE FOE OGRI DI DOE NANGA TRANGA NA INI OSOFAMIRI

18. Pe na ogri di doe nanga tranga na ini osofamiri e bigin, èn san na a fasi foe tapoe nanga dati soleki fa bijbel e sori?

¹⁸ Na ogri di doe nanga tranga na ini osofamiri, e bigin na ini na ati èn na ini a froestan; a fasi fa wi e handri e bigin nanga a fasi fa wi e denki (Jakobus 1:14, 15). Foe a sma di e meshandri trawan no doe ogri nanga tranga moro, dan a moesoe kenki a fasi fa a e denki (Romesma 12:2). Dati na wan sani di kan? Ija. A Wortoe foe Gado abi a krakti foe kenki sma. A kan roetoe srefi den pori prakseri di de leki „fortresi” (2 Korentesma 10:4; Hebrewsma 4:12). A soifri sabi foe bijbel kan tjari so wan krinkrin kenki kon na ini sma, dati wi kan taki dati den e weri wan njoen persoonlijkheid. — Efeisesma 4:22-24; Kolosesma 3:8-10.

19. Fa wan kresten moesoe si wan trowpatna èn handri nanga en?

¹⁹ A fasi fa joe e si joe trowpatna. A Wortoe foe Gado e taki: „Den masra moesoe lobi den wefi foe den leki den eigi skin. A sma di lobi en wefi, lobi ensrefi” (Efeisesma 5:28). Bijbel e taki toe taki wan masra moesoe gi en wefi „grani leki na wan moro swaki prapi” (1 Petrus 3:7). Wefi e kisi a froemane „foe lobi den masra foe den” èn foe abi „dipi lespeki” gi den (Titus 2:4; Efeisesma 5:33). Seiker, no wan masra di abi frede gi Gado, kan taki troetroe dati a e gi en wefi grani te a e meshandri en na skin sei noso nanga den sani di a e taki. Èn no wan wefi di e bari en masra, èn e taki na wan spotoe fasi nanga en, noso e kosi en doronomo, kan taki dati a lobi èn e lespeki en troetroe.

20. Na soema papa nanga mama abi frantiwortoe foe gi foe den pikin foe den, èn foe san ede papa nanga mama no moesoe froewakti sani foe den pikin foe den di den pikin no man doe?

²⁰ A joisti fasi fa foe si den pikin. Pikin abi leti na tapoe a lobi èn a prakseri foe den papa nanga mama foe den, ija, den abi den sani dati fanowdoe. A Wortoe foe Gado e kari den pikin „wan erfenis foe Jehovah” èn „wan pai” (Psalm 127:3). Papa nanga mama abi a frantiwortoe na fesi Jehovah foe sorgoe gi na erfenis dati. Bijbel e taki foe „den eigifasi foe wan njofi pikin” èn a „donfasi” foe a pikinboi ten (1 Korentesma 13:11; Odo 22:15). Papa nanga mama no moesoe froewondroe efoe den e kisi foe doe nanga a donfasi na ini den pikin foe den. Den jongoewan a no bigisma. Papa nanga mama no moesoe aksi moro foe wan pikin leki san e fiti gi a jari foe en, en osofamiri background, nanga den bekwaamfasi foe en. — Loekoe Genesis 33:12-14.

21. Fa wi moesoe si den owroe papa nanga mama èn handri nanga den na a fasi fa Gado wani?

²¹ A fasi fa joe e si den owroe papa nanga mama. Lefitikus 19:32 e taki: „Joe moesoe opo tanapoe gi a weti wiwiri, èn joe moesoe sori taki joe e hori na owroesma na prakseri.” Na so a Wet foe Gado ben gi deki-ati foe abi dipi lespeki gi den owroewan. Disi kan de wan tjalensi te a gersi taki wan owroe papa noso mama e aksi toemoesi foeroe noso te a siki èn kande a no man boeweigi noso denki esi. Tokoe pikin e kisi a froemane foe „tan pai wan paiman di fiti den papa nanga den mama foe den” (1 Timoteus 5:4). Disi ben sa wani taki foe handri nanga den na wan warti fasi èn nanga lespeki, kande srefi foe sorgoe gi den na moni sei. Te wi no e handri nanga owroe papa nanga mama na wan joisti fasi na skin sei noso na wan tra fasi, dan dati de krinkrin kontrari a fasi fa bijbel e taigi wi foe handri.

22. San na wan prenspari eigifasi foe no doe ogri di doe nanga tranga na ini osofamiri, èn fa wi kan leri dati?

²² Kweki a dwengi di joe moesoe man dwengi joesrefi. Odo 29:11 e taki: „Wan donsma e gi en heri jeje pasi, ma wan sma di koni, e hori dati bedari te na a kaba.” Fa joe kan dwengi joe jeje? Na presi foe meki a broeja firi kon moro nanga moro na inisei foe joe, joe moesoe handri esi-esi foe loesoe den problema di opo kon (Efeisesma 4:26, 27). Gowe foe a presi efoe joe e firi taki joe o lasi joesrefi. Begi gi a santa jeje foe Gado, foe meki a dwengi di joe moesoe dwengi joesrefi, na ini joe (Galasiasma 5:22, 23). Te joe e go waka pikinso noso te joe e doe wan sani nanga joe skin, dan dati kan jepi joe foe basi den firi foe joe (Odo 17:14, 27). Doe moeiti foe „no kisi atibron esi-esi”. — Odo 14:29.

PRATI NOSO TAN NA MAKANDRA?

23. San kan pasa te wan memre foe a kresten gemeente e broko kindi ala ten baka foe doe ogri nanga tranga na ini atibron, sondro foe abi berow, èn kande e meshandri en osofamiri srefi na skin sei?

²³ Na mindri den wroko di bijbel e taki dati Gado e kroetoe, a e taki foe „feantifasi, strei, . . . atibron” èn a e taki dati „den sma di e doe den sani disi, no sa kisi a kownoekondre foe Gado” (Galasiasma 5:19-21). Foe dati ede, ibri sma di e taki dati en na wan kresten èn di e broko kindi foeroe tron foe doe ogri nanga tranga na ini atibron, èn kande srefi e meshandri a trowpatna noso den pikin na skin sei, kan sluit uit foe a kresten gemeente. (Teki gersi 2 Johanes 9, 10.) Na a fasi disi a gemeente e tan krin foe sma di e meshandri trawan. — 1 Korentesma 5:6, 7; Galasiasma 5:9.

24. (a) Fa den trowpatna di e kisi meshandri kan froekisi foe handri? (b) Fa mati nanga owroeman di e broko den ede gi wan patna di e kisi meshandri, kan jepi en, ma san den no moesoe doe?

²⁴ Fa a de nanga kresten di e kisi fonfon nownowde foe wan trowpatna di e meshandri den èn di no wani kenki srefisrefi? Wan toe foe den kresten disi ben froekisi foe tan libi nanga a trowpatna disi di e meshandri den, foe a wan noso tra reide. Trawan froekisi foe gowe libi en, foe di den e firi taki a gosontoe foe den na skin sei, na froestan sei, èn na jeje sei — kande srefi a libi foe den — de ini kefar. San wan sma di e ondrofeni ogri di doe nanga tranga na ini na osofamiri, e froekisi foe doe na ini den situwâsi disi, na wan persoonlijk bosroiti na fesi foe Jehovah (1 Korentesma 7:10, 11). Den mati foe den di abi a boen foe den na prakseri, famiri, noso kresten owroeman kande wani foe gi jepi nanga rai, ma den no moesoe dwengi so wan sma foe doe wan bepaalde sani. Dati na wan bosroiti di ensrefi moesoe teki. — Romesma 14:4; Galasiasma 6:5.

WAN KABA NA PROBLEMA DI E TJARI PORI KON

25. San na a prakseri di Jehovah abi nanga na osofamiri?

²⁵ Di Jehovah ben tjari Adam nanga Eva kon na makandra na ini wan trowlibi, noiti a ben abi na prakseri taki den osofamiri ben moesoe froestoe safrisafri gowe nanga jepi foe problema di e tjari pori kon, soleki a de di wan sma de wan sopiman noso a doe di sma e doe ogri nanga tranga (Efeisesma 3:14, 15). Na osofamiri ben moesoe de wan presi pe lobi nanga vrede ben moesoe de foeroe èn pe ibri memre ben sa abi sani di a abi fanowdoe na froestan sei, na emotioneel sei, èn na jeje sei. Ma di sondoe bigin, na osofamiri libi ben e go na baka esi-esi. — Teki gersi Preikiman 8:9.

26. Sortoe tamara e wakti den wan di e proeberi foe libi akroederi den sani di Jehovah e aksi foe den?

²⁶ Kolokoe taki Jehovah no gowe libi a prakseri di a abi nanga na osofamiri. A e pramisi foe tjari wan njoen grontapoe kon pe vrede de, na ini san sma „sa tan troetroe ini seikerfasi, nanga no wan sma di e meki den e beifi” (Esekièl 34:28). Na a ten dati, a de di sma de sopiman, ogri di doe nanga tranga na ini osofamiri, èn ala den tra problema di e pori osofamiri na ini a ten disi, sa de sani di ben feni presi fositen. Sma no sa lafoe foe di den wani kibri a frede nanga a pen foe den, ma foe di den e feni „switi prisiri na ini vrede pasa marki”. — Psalm 37:11.

1, 2. Te wan trowlibi de na ondro hebi druk, sortoe aksi moesoe poti?

NA ini 1988, wan Italia oema di nen Lucia, ben brokosaka srefisrefi.a Baka tin jari, a trowlibi foe en ben broko. Foeroe tron a ben proeberi foe meki en kon boen baka nanga en masra, ma a no ben waka boen. So boen, a ben prati foe di den no ben man fiti densrefi na makandra èn now en wawan moesoe kweki den toe oemapikin foe en. Te Lucia e prakseri baka foe a ten dati, a e memre: „Mi ben de seiker taki noti ben kan kibri a trowlibi foe wi.”

² Efoe joe abi problema na ini joe trowlibi, dan kande joe e froestan fa Lucia e firi. Kande joe trowlibi de ini problema èn joe e aksi joesrefi kande efoe joe kan kibri a trowlibi ete. Efoe na so a de, dan joe sa si taki a sa jepi efoe joe e prakseri foe na aksi disi: Mi waka baka ala den boen rai di Gado gi na ini bijbel foe meki a trowlibi waka boen? — Psalm 119:105.

3. Ala di brokotrow tron wan pôpi sani, sortoe sani de foe jere na mindri foeroe sma di brokotrow èn na mindri den osofamiri foe den?

³ Te sani span srefisrefi na mindri a masra nanga a wefi, dan a gersi taki a moro makriki sani foe doe, na foe broko a trowlibi. Ma ala di foeroe kondre ondrofeni nanga froewondroe taki moro nanga moro osofamiri e broko, tokoe ondrosoekoe foe no so langa pasa e sori taki wan bigi pisi foe den man nanga oema di brokotrow, e sari taki a trow broko. Wan nomroe foe den man nanga oema disi e pina foe moro gosontoe problema, na skin sei èn na froestan sei, leki den wan di no ben brokotrow. A broeja di den pikin di de ini wan brokotrow e broeja èn a kolokoe di den no de kolokoe, e tan nofo tron foeroe jari langa. Den papa nanga mama nanga den mati foe na osofamiri di broko, e pina toe. Èn fa a de nanga a fasi fa Gado, a Sma di poti a seti foe a trowlibi, e si a situwâsi?

4. Fa den problema na ini wan trowlibi moesoe loesoe?

⁴ Soleki fa wi ben si na ini den kapitel na fesi, Gado ben abi na prakseri taki a trowlibi ben moesoe de wan banti gi den heri libi langa (Genesis 2:24). Dan foe san ede so foeroe trowlibi e broko? A no kan de wan sani di e pasa wantronso. Moro foeroe a de so, taki marki de di de leki warskow. Den pikinpikin problema na ini wan trowlibi kan gro kon bigi moro nanga moro, te leki a gersi leki den no man wini den. Ma efoe den e loesoe den problema disi wantewante nanga a jepi foe bijbel, dan foeroe trowlibi no ben abi foe broko.

SI A SANI LEKI FA A DE TROETROE

5. Na fesi sortoe troetroe situwâsi sma moesoe tanapoe na ini ibri trowlibi?

⁵ Wan penti di e tjari problema kon son tron, na taki kande wán trowpatna noso ala toe foe den trowpatna e froewakti sani di no man kon troe srefisrefi. Lobi tori, pôpi tijdschrift, telefisi programa, nanga kino, kan gi howpoe nanga dren di e difrenti krinkrin foe a fasi fa a libi de troetroe. Te den dren disi no e kon troe, dan wan sma kan firi taki den bedrigi en, taki a no de tevrede, èn a kan kisi bita-ati srefi. Ma fa toe onvolmaakti sma kan feni kolokoe na ini a trowlibi? Moeiti de fanowdoe foe kisi wan boen matifasi.

6. (a) Sortoe balansi fasi foe si a trowlibi, bijbel e gi? (b) San na wan toe reide foe san ede kesekese de na ini a trowlibi?

⁶ Bijbel de praktis. A e erken den prisiri di de na ini a trowlibi, ma a e warskow toe taki den wan di e trow „sa feni banawtoe ini den skin” (1 Korentesma 7:28). Soleki fa wi ben si kaba, ala toe patna de onvolmaakti èn den abi a firi foe doe sondoe. A fasi fa ibri patna meki na froestan sei èn na emotioneel sei èn a fasi fa den kweki, e difrenti. Son tron den paar no e agri nanga makandra foe moni afersi, foe pikin èn foe den famiri. A pikinso ten di den abi foe doe sani makandra èn seks problema, kan de wan fonten foe trobi toe.b A e teki ten foe handri den sortoe afersi disi, ma abi deki-ati! Moro foeroe trowpaar man handri nanga den sortoe problema disi èn den man feni loesoe di den ala toe e feni boen.

TAKI FOE DEN KESEKESE

7, 8. Efoe den trowpatna hati den firi foe makandra noso te kesekese de na den mindri, san na a fasi fa den moesoe loesoe den akroederi bijbel?

⁷ Foeroe sma e feni taki a moeilek foe no atibron te den e taki foe a hati di a patna foe den e hati den firi foe den, foe kesekese, noso foe a misi di den ben misi foe doe wan sani. Na presi foe taki langalanga: „Mi feni taki joe no e froestan mi”, kande den firi foe wan trowpatna e opo èn a e bigi a problema toemoesi. Foeroe sma sa taki: „Joe e broko joe ede nanga joesrefi nomo”, noso: „Joe no lobi mi.” Foe di a tra patna no wani go na ini wan kesekese, meki a e weigri foe gi piki.

⁸ Wan moro boen fasi foe waka na baka, na foe gi jesi na a bijbel rai: „Kisi atibron èn tokoe no sondoe; no meki son dongo ala di joe de na ini wan atibron fasi” (Efeisesma 4:26). Den ben aksi wan trowpaar di abi wan kolokoe trowlibi san na a sroto gi a boen trowlibi foe den, now di den sa trow 60 jari kaba. A masra ben taki: „Wi ben leri foe no go sribi sondro foe loesoe den kesekese foe wi, awansi o pikin den kan de toe.”

9. (a) San na wan toemoesi prenspari pisi foe komunikâsi, soleki fa den Boekoe foe bijbel e tjari kon na krin? (b) San den trowpatna moesoe doe nofo tron, srefi efoe deki-ati nanga sakafasi de fanowdoe foe doe dati?

⁹ Te wan masra nanga wan wefi abi wan kesekese, dan ibriwan foe den moesoe „de esi foe jere, no esi foe taki, no esi foe kisi atibron” (Jakobus 1:19). Baka te den arki heri boen, ala toe patna ben sa kan si taki den moesoe aksi pardon (Jakobus 5:16). A e teki sakafasi nanga deki-ati foe taki na wan opregti fasi: „Pardon foe di mi hati joe.” Ma te wan trowpaar e loesoe kesekese na a fasi disi, dan a sa jepi den foe abi boen bakapisi foe loesoe no wawan den problema foe den, ma so srefi foe kweki wan waran firi èn wan krosibei matifasi di sa meki den feni moro prisiri te den de nanga makandra.

DOE A PLEKTI NA INI A TROWLIBI

10. Sortoe kibri di Paulus ben rikomanderi den kresten foe Korente, wi ben sa kan fiti na tapoe wan kresten na ini a ten disi?

¹⁰ Di na apostel Paulus ben skrifi den Korentesma, a ben rikomanderi a trowlibi ’bika hoeroedoe de na ala sei’ (1 Korentesma 7:2). A grontapoe foe a ten disi ogri a srefi, noso moro ogri srefi leki a Korente foe owroeten. Den morsoe tori di grontapoe sma e taki sondro foe kibri wan sani, a weri di den e weri krosi na wan fasi di no de bescheiden, nanga den tori di e wiki seks firi di sma e sori na ini tijdschrift nanga boekoe, na tapoe telefisi, èn na ini den kino, den alamala makandra e wiki seks lostoe di no mag. Na apostel Paulus ben taigi den Korentesma di ben libi na ini wan srefi sortoe libimakandra: „A moro betre foe trow leki foe bron foe tranga lostoe.” — 1 Korentesma 7:9.

11, 12. (a) Sortoe plekti a masra nanga a wefi abi foe gi makandra, èn na ini sortoe jeje den moesoe gi dati? (b) Fa a situwâsi moesoe loesoe efoe a plekti na ini a trowlibi moesoe tapoe gi wan pisi ten?

¹¹ Foe dati ede bijbel e gi kresten di trow a komando: „Meki a masra gi en wefi san a moesoe kisi, ma meki a wefi doe a srefi toe na en masra” (1 Korentesma 7:3). Loekoe taki a krakti poti na tapoe a gi di moesoe gi — no na tapoe na aksi di wan sma moesoe aksi nanga tranga. Krosibei demakandra foe a skin na ini a trowlibi e gi troetroe satisfaksi soso efoe ibriwan foe den patna e broko en ede gi a boen foe a trawan. Foe eksempre, bijbel e komanderi den masra foe handri nanga a wefi foe den „akroederi sabi” (1 Petrus 3:7). Disi de spesroetoe so te den e doe èn e kisi a plekti di den abi na ini a trowlibi. Efoe wan masra no e handri nanga en wefi na wan safoe fasi, dan a kan de moeilek gi a wefi foe njan boen foe na afersi disi na ini a trowlibi.

¹² Wan toe okasi de pe den trowpatna kande abi foe hori a plekti na ini a trowlibi na baka gi makandra. Disi ben sa kan de so gi a wefi na ini bepaalde ten foe a moen noso te a weri srefisrefi. (Teki gersi Lefitikus 18:19.) A kan de so gi a masra te a abi foe doe nanga wan serjoesoe problema na wrokope èn a weri toemoesi na emotioneel sei. Den sortoe kefal disi foe tapoe a plekti na ini a trowlibi gi wan pisi ten, e loesoe moro boen efoe ala toe patna e taki na wan fri fasi foe a situwâsi èn te „ala toe e feni en boen” (1 Korentesma 7:5). Disi no sa meki no wan foe den patna e denki esi-esi fowtoe sani. Ma efoe foe espresi wan wefi e hori a plekti na ini a trowlibi na baka gi a masra noso efoe foe espresi wan masra no e doe a plekti foe en na ini a trowlibi na wan lobi fasi, dan a patna kan opo gi tesi. Na ini so wan situwâsi, problema kan opo kon na ini wan trowlibi.

13. Fa kresten kan doe moeiti foe hori a denki foe den krin?

¹³ Leki ala kresten, den foetoeboi foe Gado di trow, moesoe wai pasi gi seks boekoe, di kan wiki lostoe di no krin èn di no fiti (Kolosesma 3:5). Den moesoe kibri so srefi den prakseri foe den èn den sani di den e doe, te den abi foe doe nanga mansma noso oemasma. Jesus ben warskow: „Ibriwan sma di e tan loekoe wan oema foe kan abi seks lostoe gi en, na ini en ati a doe soetadoe kaba nanga en” (Mateus 5:28). Te trowpaar e gebroiki a bijbel rai di abi foe doe nanga seks, dan den moesoe man wai pasi foe no fadon go na ini tesi èn doe soetadoe. Den kan go doro foe njan boen foe prisiri krosibei demakandra na ini a trowlibi, na ini san seks de warti leki wan gosontoe presenti foe a Sma di poti a seti foe a trowlibi, Jehovah. — Odo 5:15-19.

DEN GRON FOE BIJBEL GI BROKOTROW

14. Sortoe sari situwâsi de son tron? Foe san ede?

¹⁴ Kolokoe taki na ini moro foeroe kresten trowlibi, iniwan problema di e opo kon kan loesoe. Ma son tron a no de so. Bika libisma de onvolmaakti èn e libi na ini wan sondoe grontapoe di de na ondro a tiri foe Satan, meki wan toe trowlibi de foe broko (1 Johanes 5:19). Fa kresten moesoe handri na ini so wan situwâsi di de wan tesi?

15. (a) San na a wan-enkri bijbel gron foe brokotrow èn di e gi na okasi foe trow baka? (b) Foe san ede son sma ben teki a bosroiti foe no brokotrow nanga wan trowpatna di no de getrow?

¹⁵ Soleki fa ben taki na ini kapitel toe foe a boekoe disi, hoeroedoe na a wan-enkri bijbel gron foe brokotrow èn di e gi na okasi foe trow bakac (Mateus 19:9). Efoe joe abi troetroe boeweisi taki joe trowpatna no ben de getrow, dan joe e tanapoe na fesi wan moeilek bosroiti. Joe sa meki a trowlibi go doro noso joe sa broko a trow? No wan wet no de. Wan toe kresten gi wan patna di abi troetroe berow, pardon dorodoro, èn a trowlibi di no broko ben kon boen. Tra sma bosroiti foe no broko a trow foe a boen foe den pikin.

16. (a) San na wan toe sani di boeweigi wan toe sma foe brokotrow nanga a trowpatna foe den di fowtoe? (b) Te wan patna di no fowtoe e teki a bosroiti foe brokotrow noso foe no brokotrow, dan foe san ede no wan sma moesoe kroetoe a bosroiti di a patna dati teki?

¹⁶ Na a tra sei, a sondoe dati kan abi leki bakapisi taki wan sma kon de nanga bere noso taki a kisi wan siki di a kisi nanga jepi foe seks. Noso kande den pikin moesoe kisi kibri foe wan papa noso mama di e gebroiki den na seks sei. A de krin taki foeroe sani de di wi moesoe prakseri bifo wi e teki wan bosroiti. Ma efoe joe kon sabi taki joe trowpatna no ben de getrow èn baka dati joe e bigin foe abi seks demakandra nanga joe patna baka, dan joe e sori na so wan fasi taki joe gi joe patna pardon èn taki joe wani tan hori a trowlibi. No wan gron de moro foe brokotrow èn di e gi na okasi foe trow baka tapoe a gron foe bijbel. No wan sma moesoe boemoei èn proeberi foe abi krakti na tapoe a bosroiti foe joe, èn no wan sma moesoe kroetoe a bosroiti di joe teki. Joe sa abi foe libi nanga den bakapisi foe a bosroiti di joe teki. „Ibriwan sma sa tjari en eigi lai.” — Galasiasma 6:5.

REIDE FOE PRATI

17. Efoe hoeroedoe no doe, san den Boekoe foe bijbel e tapoe wan sma foe doe, te a prati noso brokotrow?

¹⁷ Situwâsi de di kan gi a reti foe prati noso kande foe brokotrow nanga wan trowpatna srefi efoe a trowpatna dati no doe hoeroedoe? Ija, ma ini a kefal disi wan kresten no fri foe soekoe wan tra patna foe trow baka (Mateus 5:32). Ala di bijbel e gi pasi foe prati ini den sortoe kefal disi, tokoe a e taki toe taki a sma di gowe moesoe „tan sondro foe trow, noso a moesoe meki kon boen baka” (1 Korentesma 7:11). San na wan toe toemoesi aparti situwâsi di kan meki a gersi taki a boen foe prati?

18, 19. San na wan toe foe den toemoesi aparti situwâsi di kan meki wan patna go prakseri foe prati na lanti noso foe brokotrow, ala di a no abi na okasi foe trow baka?

¹⁸ We, na osofamiri kan kon ini nowtoe bika foe a lesi di a masra lesi srefisrefi èn foe den takroe gwenti foe en.d Kande a e lasi a moni foe na osofamiri nanga a dòbel di a e dòbel noso a e gebroiki a moni foe di a de wan srafoe foe drug noso sopi. Bijbel e taki: „Efoe wan sma no e sorgoe gi . . . den wan di de memre foe en osofamiri, dan a drai en baka gi a bribi èn a moro takroe leki wan sma sondro bribi” (1 Timoteus 5:8). Efoe so wan man e weigri foe kenki den fasi foe en, èn kande a e pai gi den takroe gwenti foe en foe di a e teki a moni di en wefi e wroko, dan a wefi kan froekisi foe kibri a boen foe en nanga foe den pikin foe en, foe di a e prati na lanti.

¹⁹ Efoe wan trowpatna e doe ogri nanga tranga na wan toemoesi aparti fasi na a patna, kande a e fon en ala ten baka na so wan fasi taki a gosontoe èn srefi a libi de ini kefar, dan a patna kan prakseri toe foe prati na lanti. Boiti dati, efoe wan trowpatna e proeberi doronomo foe dwengi wan patna foe pasa den komando foe Gado na wan sortoe fasi, dan a patna di a e pramisi foe doe ogri, kan prakseri toe foe prati, spesroetoe te na afersi doro so wan marki taki a libi na jejefasi foe a patna de ini kefar. A patna di de ini kefar kan bosroiti taki a wan-enkri fasi foe „gi jesi na Gado leki tiriman moro leki na libisma” na foe prati na lanti. — Tori foe den Apostel 5:29.

20. (a) Ini a kefal foe wan osofamiri di broko, san lepi mati nanga owroeman kan pristeri, èn san den no moesoe pristeri? (b) Foe doe sortoe sani, den sma di trow no moesoe gebroiki den sani di bijbel e taki foe a prati di trowpatna e prati èn foe brokotrow?

²⁰ Ini ala den kefal pe wan patna e meshandri a trawan na wan toemoesi aparti fasi, no wan sma moesoe poti druk na tapoe a patna di no fowtoe, foe prati noso foe tan nanga a tra patna. Ala di lepi mati nanga owroeman kan pristeri jepi nanga rai di gron tapoe bijbel, tokoe den no kan sabi ala den finifini tori di e feni presi na mindri wan masra nanga en wefi. Jehovah wawan kan si dati. A no de foe taki, dati wan kresten wefi no ben sa sori grani gi a trowlibi di Gado seti, efoe a ben gebroiki pikinpikin sani foe komoto gowe foe wan trowlibi. Ma efoe a de so, taki wan toemoesi kefalek situwâsi e go doro, dan no wan sma moesoe kroetoe en te a teki a bosroiti foe prati. A srefi sani wi ben kan taki ini a tori foe wan kresten masra di wani prati. „Wi alamala sa tanapoe na fesi a kroetoe stoeroe foe Gado.” — Romesma 14:10.

FA WAN TROWLIBI DI BEN BROKO, BEN KON BOEN BAKA

21. Sortoe ondrofenitori e sori taki a bijbel rai gi a trowlibi e wroko?

²¹ Dri moen baka di Lucia, di wi ben taki foe en na fesi, ben prati foe en masra, a ben miti Jehovah Kotoigi èn a ben bigin studeri bijbel nanga den. „A ben froewondroe mi srefisrefi”, na so a e froeklari, „taki bijbel ben gi praktis loesoe gi a problema foe mi. Baka di mi ben studeri wán wiki nomo, wantewante mi ben wani meki en kon boen baka nanga mi masra. Tide mi kan taki dati Jehovah sabi fa foe kibri den trowlibi na ini toemoesi moeilek situwâsi, bika den leri foe en e jepi den patna fa foe abi lespeki gi makandra. A no troe, soleki fa son sma e froeklari, taki Jehovah Kotoigi e prati osofamiri. Ini a kefal foe mi, a no ben de so srefisrefi.” Lucia ben leri foe gebroiki den bijbel gronprakseri na ini en libi.

22. Na tapoe san ala den trowpaar moesoe froetrow?

²² A no de so nanga Lucia wawan. A trowlibi moesoe de wan blesi, a no moesoe de wan hebi. Foe meki a de wan blesi, Jehovah gi a moro boen fonten foe kisi rai gi a trowlibi, di oiti ben skrifi — en toemoesi warti Wortoe. Bijbel kan meki „a sma di no abi ondrofeni, kon koni” (Psalm 19:7-11). A kibri foeroe trowlibi di ben de foe broko èn meki foeroe trawan di ben abi serjoesoe problema, kon moro boen. Meki a de so, taki ala den trowpaar abi dorodoro froetrow na tapoe a rai di Jehovah Gado e gi na ini a trowlibi! A e wroko troetroe!

1, 2. (a) Sortoe kenki e feni presi te den owroe dei e doro? (b) Fa den man na ini bijbel ten, di ben gi densrefi na ini a dini foe Gado, ben feni satisfaksi na ini den owroe dei?

FOEROE kenki e feni presi te wi e kon owroe. A swaki di wi e kon swaki na skinfasi e drei a krakti foe wi. Te wi e loekoe na ini a spikri, dan wi e si njoen ploiploi na wi skin èn taki safrisafri a kloroe foe wi wiwiri e lasi gowe — èn srefi wi wiwiri. Kande wi no man hori sani boen na ede moro. Njoen matifasi e bigin opo te den pikin e trow, èn agen te den granpikin doro. Gi son wan, a de di den de nanga pensjoen foe grontapoe wroko, abi leki bakapisi taki a fasi fa den ben gwenti foe libi fosi, kenki.

² Foe taki en leti, den owroe dei kan de wan tesi (Preikiman 12:1-8). Tokoe, prakseri den foetoeboi foe Gado na ini bijbel ten. Ala di den ben dede te foe kaba, den ben kisi koni nanga froestan di ben gi den foeroe satisfaksi na ini den owroe dei (Genesis 25:8; 35:29; Job 12:12; 42:17). Fa den ben man foe kon owroe na ini kolokoe? Sondro tweifri, a ben de foe di den ben libi akroederi den gronprakseri, di wi na ini a ten disi, e feni den skrifi na ini bijbel. — Psalm 119:105; 2 Timoteus 3:16, 17.

3. Sortoe rai Paulus ben gi den owroe man nanga den owroe oema?

³ Na ini a brifi di na apostel Paulus ben skrifi gi Titus, a ben gi gosontoe tiri na den wan di e kon owroe. A ben skrifi: „Meki den owroe man dwengi densrefi ini den gwenti foe den, de serjoesoe, de gosontoe foe froestan, de gosontoe ini bribi, ini lobi, ini horidoro. Meki den owroe oema tjari densrefi so srefi na wan lespeki fasi, den no moesoe taki ogri-ati lei foe pori sma nen, èn den no moesoe gi densrefi pasa marki na a dringi foe win, den moesoe de sma di e leri tra sma san boen” (Titus 2:2, 3). Te joe e gi jesi na den wortoe disi, a kan jepi joe foe tanapoe na fesi den tjalensi foe kon owroe.

FITI JOESREFI NA A TANAPOE DI DEN PIKIN FOE JOE E TANAPOE TAPOE DEN EIGI FOETOE

4, 5. Fa foeroe papa nanga mama e handri te den pikin foe den e gowe foe oso, èn fa wan toe foe den e fiti densrefi na a njoen situwâsi?

⁴ Te den ròl e kenki, dan a de fanowdoe foe fiti wisrefi. Disi troe srefisrefi te den bigi pikin e gowe foe oso èn e go trow! Gi foeroe papa nanga mama disi na a fosi sani di e memre den taki den e kon owroe. Ala di den prisiri taki den pikin foe den tron bigisma, tokoe nofo tron den papa nanga mama e broko den ede efoe den ben doe ala san den ben kan foe sreka den pikin foe tanapoe tapoe den eigi foetoe. Èn kande den e misi den foe di den no abi den na oso.

⁵ Wi kan froestan, taki den papa nanga mama e tan broko den ede gi a boen foe den pikin foe den, srefi baka te den pikin gowe foe oso. „Efoe nofo tron mi ben kan jere wan sani nomo foe den, foe de seiker taki den e meki en boen — dati ben sa prisiri mi”, na so wán mama ben taki. Wan papa e froeteri: „Di na oemapikin foe wi ben gowe foe oso, a ben de wan toemoesi moeilek ten. A ben libi wan bigi olo na ini wi osofamiri, bika ala ten wi ben doe sani makandra.” Fa den papa nanga mama disi kakafoetoe gi a de di den pikin foe den no de na oso? Na ini foeroe kefal, foe di den e sori broko-ede gi tra sma èn e jepi den.

6. San e jepi foe si matifasi na ini osofamiri na a joisti fasi?

⁶ Te den pikin e go trow, dan a ròl foe a papa nanga a mama e kenki. Genesis 2:24 e taki: „Wan man sa gowe libi en papa nanga en mama èn a moesoe tai hori na en wefi èn den moesoe tron wán skin.” Te den papa nanga mama e erken den gronprakseri di Gado poti gi na edeman-wroko èn gi boen ordefasi, dan dati sa jepi den foe si sani na a joisti fasi. — 1 Korentesma 11:3; 14:33, 40.

7. Sortoe moi fasi foe denki wan papa ben kweki di den oemapikin foe en ben gowe foe oso foe go trow?

⁷ Baka di den toe oemapikin foe wan trowpaar trow èn froisi, dan a trowpaar firi wan leigi firi na ini a libi foe den. Na ini a bigin, a masra ben atibron na tapoe den masra foe den oemapikin foe en. Ma di a ben prakseri foe a gronprakseri foe na edeman-wroko, a ben froestan taki den masra foe den oemapikin foe en ben abi a frantiwortoe now na ini na osofamiri foe den. Dati meki, te den oemapikin foe en ben aksi rai na en, dan a ben aksi den san den masra foe den ben prakseri foe a tori, èn baka dati, a ben sorgoe taki a e horibaka gi den someni leki a man. Den masra foe den oemapikin foe en si en leki wan mati now èn den e teki a rai foe en nanga prisiri.

8, 9. Fa wan toe papa nanga mama fiti densrefi na a tanapoe di den bigi pikin foe den e tanapoe na tapoe den eigi foetoe?

⁸ Ma fa a de te den pikin di trow no so langa ete, no e doe sani di den papa nanga mama e prakseri taki de moro boen, ala di den no e doe sani di no de akroederi bijbel? „Ala ten wi e jepi den foe si fa Jehovah e si a tori”, na so wan trowpaar di abi pikin di trow kaba, e froeklari, „ma efoe wi no e agri nanga wan bosroiti di den teki, wi e teki en èn wi e gi den jepi nanga deki-ati.”

⁹ Na son Asia kondre, wan toe mama e feni en spesroetoe moeilek foe froestan taki den manpikin foe den e tanapoe tapoe den eigi foetoe. Ma efoe den e lespeki kresten ordefasi nanga edeman-wroko, dan den e feni taki moro mendri trobi de na mindri den nanga den wefi foe den manpikin foe den. Wán kresten oema feni taki, di den manpikin foe en ben gowe foe oso, dati ben de wan „fonten foe moro nanga moro tangi”. A e naki en ati foe si taki den man tiri den njoen osofamiri foe den. Na a tra sei, disi wani taki dati a lai na skin sei èn na froestan sei di en nanga en masra abi foe tjari, e kon moro lekti ala di den e kon owroe.

TRANGA A BANTI NA INI JOE TROWLIBI BAKA

10, 11. Sortoe bijbel rai sa jepi sma foe wai pasi gi wan toe foe den trapoe di de te den doro a libimarki foe 40 te go miti 60 jari?

¹⁰ Sma e handri na difrenti fasi te den e doro den libimarki foe 40 te go miti 60 jari. Wan toe mansma e weri tra krosi so taki den kan loekoe moro jongoe. Foeroe oemasma e broko den ede nanga den kenki di a menopause e tjari kon. A de wan sari sani, taki wan toe sma di doro a libimarki foe 40 te go miti 60 jari, e wiki atibron nanga djaroesoe na den patna foe den foe di den e skèin moro jongoe sma. Ma den mansma di owroe èn di e gi densrefi na ini a dini foe Gado, de „gosontoe foe froestan”, foe di den e basi den lostoe di no fiti (1 Petrus 4:7). So srefi den lepi oemasma e doe moeiti foe meki a trowlibi foe den tan tanapoe steifi, foe di den lobi a masra foe den èn foe di den abi na angri foe plisi Jehovah.

¹¹ Na ondro a krakti foe a santa jeje foe Gado, Kownoe Lemuèl ben skrifi a prèise gi a „bekwaam wefi” di e pai en masra „nanga boen, èn no nanga ogri, ala den dei foe en libi”. Wan kresten masra no sa misi foe froestan fa en wefi e doe moeiti foe kakafoetoe gi iniwan broeja na emotioneel sei di a e ondrofeni na ini a libimarki foe 40 te go miti 60 jari. A lobi foe en sa poesoe en foe ’prèise en’ wefi. — Odo 31:10, 12, 28.

12. Fa den trowpaar kan kon moro krosibei foe makandra ala di den e kon moro owroe?

¹² Na ini den jari di oenoe ben abi foeroe foe doe foe kweki den pikin, kande nanga prisiri oenoe ala toe ben poti den sani di oenoe ben wani gi oensrefi na wan sei, foe man sorgoe gi den sani di den pikin foe oenoe ben abi fanowdoe. Now di den gowe, a de a ten foe poti prakseri baka na tapoe oen trowlibi. „Di den oemapikin foe mi ben gowe foe oso”, na so wán masra ben taki, „mi ben bigin baka nanga a ten di mi ben hori nanga mi wefi.” Wan tra masra e taki: „Wi e broko wi ede gi a gosontoe foe makandra èn wi e memre makandra taki a de fanowdoe foe oefen a skin.” So boen, so taki en nanga en wefi no e firi taki den de den wawan, meki den e teki tra memre foe a gemeente na oso. Ija, te wi e sori belangstelling gi trawan, dan dati e tjari blesi kon. Moro prenspari, a e plisi Jehovah. — Filipisma 2:4; Hebrewsma 13:2, 16.

13. Sortoe ròl frifasi nanga eerlijkfasi e plèi te wan trowpaar e kon owroe makandra?

¹³ No gi pasi foe no meki komunikâsi no de na mindri joe nanga joe patna. Taki fri nanga makandra (Odo 17:27). „Wi e froestan makandra moro boen, foe di wi e broko wi ede gi makandra èn wi e hori makandra na prakseri”, na so wán masra e taki. En wefi e agri, foe di a e taki: „Now di wi kon owroe, wi e prisiri foe dringi wan kopi te nanga makandra, foe taki nanga makandra, èn foe wroko nanga makandra.” Te oenoe e taki fri èn eerlijk, dan dati kan jepi foe meki a banti na ini oen trowlibi kon tranga, di sa meki a trowlibi kon tranga baka so taki a sa gens a feti di Satan e kon feti, a sma di e broko trowlibi.

PRISIRI FOE JOE GRANPIKIN

14. Soleki fa a sori, sortoe ròl a granmama foe Timoteus ben plèi ala di Timoteus e gro kon bigi leki wan kresten?

¹⁴ Granpikin na „a kownoe-ati” foe den owroesma (Odo 17:6). A demakandra nanga granpikin kan gi foeroe prisiri troetroe — a kan gi krakti nanga kowroe-ati. Bijbel e taki na wan boen fasi foe Lois, wan granmama di makandra nanga en oemapikin Eunice, ben prati a bribi foe en nanga en njofi granpikin, Timoteus. A jongoe pikin disi ben gro kon bigi ala di a ben sabi taki en mama èn so srefi en granmama ben si a waarheid foe bijbel leki warti sani. — 2 Timoteus 1:5; 3:14, 15.

15. Sortoe warti jepi granpapa nanga granmama kan gi di abi foe doe nanga den granpikin, ma san den no moesoe doe?

¹⁵ So boen, disi na wan spesroetoe kontren pe granpapa nanga granmama kan gi wan moro warti jepi. Granpapa nanga granmama, oenoe prati a sabi di oenoe abi foe den prakseri foe Jehovah kaba nanga oen pikin. Now oenoe kan doe a srefi nanga ete wan tra geslakti! Foeroe jongoe pikin e feni en wan span sani te den e jere den granpapa nanga granmama e froeteri bijbel tori. A no de foe taki, dati oenoe no e teki a frantiwortoe foe a papa abra foe stampoe den waarheid foe bijbel go na ini den pikin foe en (Deuteronomium 6:7). Na presi foe dati, oenoe e horibaka gi a frantiwortoe foe a papa. Meki a begi foe oenoe de leki di foe a psalm singiman: „Srefi na ini den owroe dei foe mi èn den weti wiwiri, o Gado, no libi mi, te leki mi kan froeteri a geslakti foe na anoe foe joe, foe froeteri ala den wan di moesoe kon ete, foe a makti foe joe.” — Psalm 71:18; 78:5, 6.

16. Fa granpapa nanga granmama kan loekoe boen foe no meki feantifasi kon na ini a famiri foe en?

¹⁶ A de wan sari sani, taki wan toe granpapa nanga granmama e pori den pikinwan na so wan fasi, taki feantifasi e kon na mindri a granpapa nanga granmama nanga den bigi pikin foe den. Ma, kande na opregti boenfasi foe oenoe kan meki en makriki gi den granpikin foe oenoe foe froetrow oenoe te den no e firi foe tjari afersi kon na krin gi a papa nanga mama foe den. Son tron den jongoewan e howpoe taki den granpapa nanga granmama foe den di no de strak, sa teki sei nanga den teige a papa nanga mama foe den. San oenoe moesoe doe dan? Gebroiki koni èn gi den granpikin foe oenoe deki-ati foe de fri nanga a papa nanga mama foe den. Joe kan froeklari gi den taki disi e plisi Jehovah (Efeisesma 6:1-3). Efoe a de fanowdoe, oenoe kan gi oensrefi foe opo a pasi gi den jongoewan foe go na a papa nanga mama foe den, foe di oenoe e taki nanga a papa nanga mama foe den. De fri nanga den granpikin foe oenoe foe froeteri den san oenoe leri na ini ala den jari. Na eerlijkfasi foe oenoe èn a fasi fa oenoe e taki fri nanga den, kan abi winimarki gi den.

FITI OENSREFI ALA DI OENOE E KON OWROE

17. Na baka sortoe fasti bosroiti di a psalm singiman ben abi, kresten di kon owroe moesoe waka?

¹⁷ Ala di oenoe e kon owroe, oenoe sa si taki oenoe no man doe ala sani di oenoe ben gwenti foe doe noso ala sani di oenoe wani doe. Fa wan sma kan erken èn handri nanga na owroe di a e kon owroe? Na ini joe froestan joe e firi kande taki joe abi 30 jari, ma te joe loekoe na ini a spikri, dan dati e sori wan tra sani di de troetroe. No lasi-ati. A psalm singiman ben begi Jehovah: „No trowe mi na mi owroe dei; no gowe libi mi joisti te mi krakti e gowe libi mi.” Meki a de a bosroiti foe oenoe foe waka na baka a tranga overtoigi foe a psalm singiman. A ben taki: „Mi sa wakti doronomo, èn mi sa meki a prèise foe joe kon moro foeroe.” — Psalm 71:9, 14.

18. Fa wan lepi kresten kan meki boen gebroiki foe a de di a de nanga pensjoen?

¹⁸ Foeroe sma sreka na fesi foe prèise Jehovah moro foeroe baka te den de nanga pensjoen foe grontapoe wroko. „Mi ben meki plan na fesi foe san mi ben sa doe te na oemapikin foe wi kaba nanga skoro”, na so wán papa di de nanga pensjoen nownow e froeklari. „Mi ben abi a fasti bosroiti taki mi ben sa bigin na ini a foeroeten preikiwroko, èn mi ben seri a bisnis foe mi so taki mi ben kan de fri foe dini Jehovah moro foeroe. Mi ben begi foe Gado tiri mi.” Efoe joe e doro a jari foe de nanga pensjoen, teki trowstoe foe a froeklari foe wi Gran Mekiman: „Srefi te na a owroe dei foe wan sma, mi de a srefi Sma; èn te na a greisi wiwiri foe wan sma misrefi sa tan tjari den.” — Jesaja 46:4.

19. Sortoe rai e gi na den wan di e kon owroe?

¹⁹ A no de wan makriki sani kande foe fiti joesrefi na a de di joe de nanga pensjoen foe joe grontapoe wroko. Na apostel Paulus ben gi den owroe man a rai foe „dwengi densrefi ini den gwenti foe den”. Disi wani taki dati joe moesoe basi foeroe sani, foe no gi abra na a firi foe soekoe wan makriki libi. Kande a de moro fanowdoe foe doe sani na wan fasti ten èn foe dwengi joesrefi foe hori na dati, moro leki bifo joe ben go nanga pensjoen. Ma abi foeroe foe doe, „abi ala ten foeroe foe doe ini a wroko foe Masra, foe di oenoe sabi taki a tranga wroko foe oenoe no de foe soso na ini Masra” (1 Korentesma 15:58). Doe moro foe jepi trawan (2 Korentesma 6:13). Foeroe kresten e doe disi foe di den e preiki a boen njoensoe fajafaja akroederi san a jari foe den e gi den pasi foe doe. Ala di oenoe e kon owroe, de „gosontoe ini bribi, ini lobi, ini horidoro”. — Titus 2:2.

HANDRI NANGA A LASI DI JOE LASI JOE PATNA

20, 21. (a) San moesoe prati wan trowpaar te foe kaba, na ini a disiten seti foe sani? (b) Fa Anna e gi wan moi eksempre gi masra nanga wefi di lasi den trowpatna na ini dede?

²⁰ A de wan sari sani, ma a de troe, taki na ini a disiten seti foe sani, te foe kaba, dede e prati trowpaar foe makandra. Kresten masra nanga wefi di lasi den trowpatna na ini dede, sabi taki a lobiwan foe den e sribi now èn den abi a froetrow taki den sa si den agen (Johanes 11:11, 25). Ma a lasi di den lasi a sma, de wan sani di e gi sari ete. Fa a patna di de na libi ete, kan handri nanga dati?a

²¹ A sa jepi joe te joe e memre san wan sma na ini bijbel ben doe. Anna ben tron wan weduwe na baka di a trow seibi jari nomo, èn te wi e leisi foe en, a ben abi 84 jari. Wi kan de seiker taki a ben sari di a ben lasi en masra. Fa a ben man tjari dati? Dei nanga neti a ben doe santa diniwroko gi Jehovah Gado na ini a tempel (Lukas 2:36-38). Sondro tweifri, a libi foe Anna, pe a ben doe diniwroko na ondro foeroe begi, ben de wan froelekti gi a sari di a ben firi leki wan weduwe èn gi a firi di a ben abi taki a de en wawan.

22. Fa wan toe weduwe nanga weduwnaar ben tjari a firi taki den de den wawan?

²² „A moro bigi tjalensi gi mi ben de foe no abi wan patna nanga soema mi kan taki”, na so wan oema foe 72 jari di ben tron wan weduwe tin jari pasa kaba, e froeklari. „Mi masra ben de wan sma di ben arki heri boen. Wi ben sa taki foe a gemeente èn foe a prati di wi abi na ini a kresten diniwroko.” Wan tra weduwe e taki: „Ala di ten e dresi sani, mi feni taki a moro boen foe taki dati a de a sani di wan sma e doe nanga en ten, di e jepi a sma foe kon betre. Joe abi moro okasi foe jepi tra sma.” Wan weduwe foe 67 jari e agri, èn a e taki: „Wan toemoesi boen fasi foe tjari a sari foe lasi wan lobiwan na ini dede, na te joe e gi joesrefi foe trowstoe tra sma.”

GADO E WARDERI DEN NA INI DEN OWROE DEI

23, 24. Sortoe toemoesi moi trowstoe bijbel e gi den owroesma, spesroetoe den wan di lasi den patna na ini dede?

²³ Ala di dede e poeroe wan lobi patna, tokoe Jehovah e tan getrow foe têgo, a de ala ten troe. „Wan sani mi aksi foe Jehovah”, na so Kownoe David foe owroeten ben singi, „na dati mi sa soekoe, taki mi kan tan na ini na oso foe Jehovah ala den dei foe mi libi, foe si a prisiri foe Jehovah èn foe si en tempel nanga warderi.” — Psalm 27:4.

²⁴ „Gi grani na den weduwe di de troetroe weduwe”, na apostel Paulus e gi tranga (1 Timoteus 5:3). A rai di a e gi baka te a gi a bodoi disi, e sori taki den weduwe di abi reti na tapoe èn di no abi krosibei famiri, kan abi jepi na skinfasi fanowdoe foe a gemeente. Ma tokoe na idea foe a bodoi foe „gi grani” wani taki toe dati wi moesoe warderi den. Den weduwe nanga den weduwnaar di e gi densrefi na ini a dini foe Gado, kan kisi foeroe trowstoe foe a sabi di den sabi taki Jehovah e warderi den èn taki a sa horibaka gi den! — Jakobus 1:27.

25. Sortoe marki den owroesma abi ete?

²⁵ „A glori foe den owroe man, na den weti wiwiri”, na so a Wortoe foe Gado, di a ben meki sma skrifi, e froeklari. A de „wan kownoe-ati foe moi fasi te a de foe feni na tapoe a pasi foe regtfardikifasi” (Odo 16:31; 20:29). So boen, awansi joe trow noso joe de sondro patna baka, go doro foe poti a diniwroko foe Jehovah na tapoe a fosi presi na ini joe libi. Na so wan fasi joe sa abi wan boen nen na Gado nownow èn joe sa abi a froewakti foe kisi têgo libi na ini wan grontapoe pe den pen foe owroe dei no sa de moro. — Psalm 37:3-5; Jesaja 65:20.

1. Sortoe paiman wi abi na wi papa nanga mama, èn foe dati ede, fa wi moesoe firi gi den èn handri nanga den?

„ARKI joe papa di meki joe gebore, èn no wisiwasi joe mama soso foe di a kon owroe”, na so a koni man foe langa ten di pasa kaba, ben gi a rai (Odo 23:22). ’Noiti mi ben sa doe dati!’ joe e taki kande. Na presi foe wisiwasi wi mama — noso wi papa — moro foeroe foe wi e firi wan dipi lobi gi den. Wi e erken taki wi abi wan bigi paiman na den. Na a fosi presi, wi papa nanga mama ben gi wi libi. Ala di Jehovah na a Fonten foe libi, sondro wi papa nanga mama wi no ben sa de. Wi no kan gi wi papa nanga mama noti di warti leki a libi srefi. Èn prakseri foe na òfer di den ben òfer densrefi, a broko di den ben broko den ede, den kostoe di den ben meki, nanga a prakseri di den ben poti na wan lobi fasi ini a jepi di den e jepi wan pikin na tapoe a pasi foe pikin-nengreten go na bigisma. Foe dati ede, a de reidelek taki a Wortoe foe Gado e gi a rai: „Gi grani na joe papa nanga joe mama . . . dati sani sa waka boen nanga joe èn joe kan tan foe wan langa ten na grontapoe!” — Efeisesma 6:2, 3.

ERKEN DEN SANI DI DEN ABI FANOWDOE NA EMOTIONEEL SEI

2. Fa bigi pikin kan pai wan „paiman di fiti” den papa nanga mama foe den?

² Na apostel Paulus ben skrifi den kresten: „Meki [den pikin noso den granpikin] leri fosi foe sori taki den gi densrefi na ini a dini foe Gado ini den eigi oso èn foe den tan pai wan paiman di fiti den papa nanga mama èn granpapa nanga granmama, bika disi boen na Gado ai” (1 Timoteus 5:4). Bigi pikin e gi a „paiman [disi] di fiti”, te den e sori warderi gi den foeroe jari foe lobi, wroko nanga sorgoe di a papa nanga mama foe den èn a granpapa nanga granmama foe den ben gebroiki gi den. Wán fasi fa den pikin kan doe disi, na te den e erken taki, leki ibri sma, den moro owroewan abi lobi fanowdoe èn froetrow — nofo tron den abi den sani disi tranga fanowdoe toe. Leki wi alamala, den moesoe firi taki sma e warderi den. Den moesoe firi taki a libi foe den de warti.

3. Fa wi kan gi grani na wi papa nanga mama èn wi granpapa nanga granmama?

³ So boen, wi kan gi grani na wi papa nanga mama èn na wi granpapa nanga granmama te wi e meki den kon sabi taki wi lobi den (1 Korentesma 16:14). Efoe wi papa nanga mama no e libi nanga wi, dan wi moesoe hori na prakseri taki a kan doe foeroe gi den efoe wi abi komunikâsi nanga den. A kan gi den moro prisiri te wi e skrifi den wan moi brifi, te wi e bèl den, noso te wi e go loekoe den. Miyo, di e libi na Japan, ben skrifi di a ben abi 82 jari: „Mi oemapikin [di abi wan masra di de wan bedinari di e rèis] e taigi mi: ’Mama, grantangi, „rèis” nanga wi.’ Gi ibri wiki a e seni a schema gi mi foe a pasi di den sa waka, nanga den telefon nomroe. Mi kan opo mi karta èn mi e taki: ’Ai. Nownow den de djaso!’ Ala ten mi e taigi Jehovah tangi gi a blesi foe abi so wan pikin.”

JEPI DEN NANGA SANI DI DEN ABI FANOWDOE NA MATERIA SEI

4. Fa a gwenti foe a djoe relisi ben gi deki-ati foe no abi firi gi den owroe papa nanga mama?

⁴ A kan, taki te wan sma e gi grani na en papa nanga mama, a moesoe sorgoe toe gi den sani di den abi fanowdoe na materia sei? Ija. Foeroe tron a de so. Na ini den dei foe Jesus, den djoe relisi fesiman ben horibaka gi a gwenti, taki efoe wan sma ben froeklari taki en moni noso den goedoe foe en ben de „wan presenti di gi abra na Gado”, dan a ben fri foe a frantiwortoe foe gebroiki dati foe sorgoe gi en papa nanga mama (Mateus 15:3-6). Den no ben abi no wan firi srefisrefi! Foe taki en leti, den relisi fesiman dati ben gi sma a deki-ati foe no gi grani na den papa nanga mama, ma foe handri nanga den sondro lespeki, foe di den e prakseri den eigi boen nomo èn no e poti prakseri na tapoe den sani di den papa nanga mama foe den abi fanowdoe. Noiti wi wani doe dati! — Deuteronomium 27:16.

5. Awansi lanti foe wan toe kondre e gi jepi, foe san ede a wani taki toe foe gi jepi na moni sei son tron, efoe wan sma wani gi grani na en papa nanga mama?

⁵ Na foeroe kondre na ini a ten disi, lanti abi programa di e gi sociaal jepi, èn den e sorgoe gi wan toe foe den sani di den owroesma abi fanowdoe na materia sei, soleki njanjan, krosi, nanga tanpresi. Boiti dati, kande den owroesma srefi ben man foe poti sani na wan sei foe sorgoe gi den owroe dei. Ma efoe den sani disi e kaba noso efoe a sori taki den no nofo, dan den pikin kan gi grani na den papa nanga mama foe den te den e doe san den man foe sorgoe gi den sani di den papa nanga mama abi fanowdoe. Foe taki en leti, te wan sma e sorgoe gi en owroe papa nanga mama, dan dati na wan boeweisi foe a gi di a e gi ensrefi na ini a dini foe Gado, dati wani taki, a gi di wan sma e gi ensrefi na ini a dini foe Jehovah Gado, a Sma di poti a seti foe na osofamiri.

LOBI ÈN NA ÒFER DI WAN SMA E ÒFER ENSREFI

6. Sortoe sani wan toe sma ben seti, di abi foe doe nanga a presi pe den sa libi, foe man sorgoe gi den sani di a papa nanga mama foe den abi fanowdoe?

⁶ Foeroe bigi pikin doe wan sani nanga lobi èn nanga na òfer di den e òfer densrefi, gi den sani di den swaki papa nanga mama foe den abi fanowdoe. Wan toe foe den teki a papa nanga mama foe den na ini den eigi oso noso den froisi foe de krosibei foe den. Trawan go libi nanga den papa nanga mama foe den. Foeroe tron, den sortoe seti disi de wan blesi gi den papa nanga mama èn so srefi gi den pikin.

7. Foe san ede a boen foe no teki bosroiti toemoesi esi, di abi foe doe nanga den owroe papa nanga mama?

⁷ Ma son tron, a froisi di den froisi no abi boen bakapisi. Foe san ede? Kande foe di den bosroiti ben teki toemoesi esi noso den ben gron soso na tapoe den firi foe den. „A koniwan e poti prakseri na tapoe den foetoestap foe en”, bijbel e warskow nanga koni (Odo 14:15). Foe eksempre, kon meki wi taki dati joe owroe mama abi problema foe libi en wawan èn joe e denki taki a ben sa kan abi winimarki te a e kon tan nanga joe. Ala di joe e poti prakseri na wan koni fasi na tapoe den foetoestap foe joe, joe ben sa kan prakseri foe den sani di e kon now: San na den sani di a abi troetroe fanowdoe? A abi sani foe ensrefi noso sani di lanti e sorgoe gi, di e gi wan tra loesoe di boen? A wani froisi? Efoe a wani, na sortoe fasi disi sa abi krakti na tapoe a libi foe en? A sa abi foe libi mati na baka? Fa disi ben sa kan abi krakti na tapoe en na emotioneel sei? Joe taki foe den sani disi nanga en? Fa a ben sa abi krakti na tapoe joe, joe patna, noso joe eigi pikin, te a ben sa froisi? Efoe joe mama abi sorgoe fanowdoe, soema sa sorgoe gi en? Oenoe kan prati a frantiwortoe? Joe taki foe na afersi nanga ala den wan di abi langalanga foe doe nanga a tori?

8. Na soema joe kan go kande foe soekoe rai te joe moesoe bosroiti fa foe jepi den owroe papa nanga mama foe joe?

⁸ Foe di a frantiwortoe foe gi sorgoe de na tapoe ala den pikin na ini wan osofamiri, a kan de wan koni sani foe abi wan konmakandra nanga na osofamiri, so taki ala sma kan teki prati na ini den bosroiti di sa teki. A kan de wan jepi toe foe taki nanga den owroeman na ini a kresten gemeente noso nanga mati di ondrofeni wan srefi sortoe situwâsi. „Te sma no e taki na wan froetrow fasi nanga makandra, dan a no sa waka boen nanga den plan”, bijbel e warskow, „ma pe foeroe raiman de, wan sani e kon klari.” — Odo 15:22.

FIRI GI DEN ÈN FROESTAN DEN

9, 10. (a) Ala di den kon owroe, sortoe sani wi moesoe hori na prakseri foe den owroesma? (b) Awansi sortoe sani wan bigi pikin e doe gi a boen foe en papa nanga mama, san a moesoe gi den ala ten?

⁹ Efoe wi wani gi grani na wi owroe papa nanga mama, dan a e aksi foe wi taki wi e firi gi den èn e froestan den. Ala di den owroe jari e tjari serjoesoe bakapisi kon, den owroesma kan feni taki a e moeilek moro nanga moro foe waka, foe njan, èn foe hori sani na ede. A kan taki den abi jepi fanowdoe. Nofo tron den pikin e broko den ede pasa marki gi a boen foe den papa nanga mama foe den èn den e proeberi foe tiri den. Ma den owroesma na bigisma di abi wan heri libi pe den ben kisi koni nanga ondrofeni, pe den ben sorgoe gi densrefi den heri libi langa èn pe den ben teki den eigi bosroiti. A persoonlijkheid foe den èn a lespeki di den abi gi densrefi, e drai kande lontoe a ròl di den abi leki papa nanga mama èn leki bigisma. Den papa nanga mama di feni taki den moesoe saka densrefi na ondro a tiri di den pikin foe den moesoe tiri den libi, kan kon firi brokosaka noso atibron. Son wan foe den e atibron èn e kakafoetoe kande gi san den e si leki moeiti di den pikin e meki foe poeroe a srefidensi foe den.

¹⁰ No wan makriki loesoe de gi den sortoe problema disi, ma a de boen-atifasi te joe e gi den owroe papa nanga mama pasi foe sorgoe gi densrefi èn foe teki den eigi bosroiti te a kan. A de wan koni sani foe no bosroiti san moro boen gi joe papa nanga mama sondro foe joe taki nanga den fosi. Kande den lasi foeroe foe di den kon owroe. Gi den pasi foe meki den hori san den abi ete. Kande joe e si taki o moro mendri joe e proeberi foe basi a libi foe joe papa nanga mama, o moro betre joe matifasi nanga den sa de. Den sa de moro kolokoe, èn so a sa de nanga joe toe. Srefi efoe a de fanowdoe foe hori fasti na bepaalde sani gi a boen foe den, a de fanowdoe foe gi den a wartifasi nanga a lespeki di den e froedini, efoe joe wani gi grani na joe papa nanga mama. A Wortoe foe Gado e gi leki rai: „Joe moesoe opo tanapoe gi a weti wiwiri, èn joe moesoe sori taki joe e hori na owroesma na prakseri.” — Lefitikus 19:32.

TAN HORI A JOISTI FASI FOE DENKI

11-13. Efoe a matifasi di wan pikin di de wan bigisma now, abi nanga en papa nanga mama, no ben boen bifo, fa tokoe a kan handri nanga a tjalensi foe sorgoe gi den te den kon owroe?

¹¹ Son tron wan problema di bigi pikin e miti foe gi grani na den owroe papa nanga mama, abi foe doe nanga a matifasi di den pikin ben abi nanga a papa nanga mama foe den di den ben de moro jongoe. Kande joe papa no ben abi firi srefisrefi èn a no ben sori lobi, èn kande joe mama ben wani plèi basi èn a ben grofoe. Kande joe e firi lasi-ati ete, atibron, noso sari foe di den no ben de a papa nanga mama di joe ben wani den foe de. Joe kan wini den sortoe firi disi?a

¹² Basse, di ben gro na Finland, e froeteri: „Mi stiefpapa ben de wan SS ofsiri na Nazi Doisrikondre. A ben atibron esi-esi, èn na den momenti dati a ben ogri kefalek. A ben fon mi mama foeroe tron na mi fesi. Wán leisi di a ben atibron na mi tapoe, a ben naki mi nanga en leriboeba èn a bokroe naki mi na ini mi fesi. A ben naki mi nanga so wan krakti taki mi ben fadon abra a bedi.”

¹³ Tokoe a ben abi tra eigifasi. Basse e taki moro fara: „Na a tra sei, a ben wroko tranga srefisrefi èn a no ben fri ensrefi foe no sorgoe na materia sei gi na osofamiri. Noiti a ben sori mi a lobi foe wan papa, ma mi sabi taki a ben kisi wan mankeri na emotioneel sei. En mama ben poti en na doro di a ben de wan jongoe boi. A ben gro kon bigi leki wan boi di e feti nomo èn a ben go na feti di a ben de wan jonkoeman. Mi ben man froestan en na wan fasi, èn mi no ben gi en a fowtoe. Di mi ben gro kon moro bigi èn mi papa ben kon siki, mi ben wani foe jepi en so foeroe leki mi ben kan te leki na a dede foe en. A no ben makriki, ma mi ben doe san mi ben man. Mi ben proeberi foe de wan boen manpikin te na a dede foe mi papa, èn mi e denki taki a ben teki mi leki wan boen manpikin.”

14. Sortoe tekst e fiti na ini ala situwâsi, so srefi den situwâsi di e opo kon te wi moesoe sorgoe gi den owroe papa nanga mama?

¹⁴ Neleki na ini tra afersi, a bijbel rai e fiti toe na ini osofamiri situwâsi: „Teki weri den safoe firi foe lobi foe sari-ati, boen-atifasi, sakafasi foe denki, safri-atifasi nanga langa pasensi. Tan froedrage makandra èn gi makandra pardon na wan fri fasi efoe a wan abi wan sani foe kragi foe a trawan. Soleki fa Jehovah gi oenoe pardon na wan fri fasi, na so oenoe moesoe doe toe.” — Kolosesma 3:12, 13.

A SMA DI E GI SORGOE, ABI SORGOE FANOWDOE TOE

15. Foe san ede a e gi sari son tron foe sorgoe gi den papa nanga mama?

¹⁵ A de wan tranga wroko foe sorgoe gi wan swaki papa noso mama, foe di a abi foe doe nanga foeroe wroko, foeroe frantiwortoe, èn langa joeroe. Ma a moro moeilek pisi de nofo tron na emotioneel sei. A e gi sari foe si taki joe papa nanga mama e lasi a gosontoe foe den, a hori di den man hori sani na ede, èn a srefidensi foe den. Sandy di kon foe Puerto Rico, e froeteri: „Mi mama ben de a moro prenspari sma na ini wi osofamiri. A ben hati srefisrefi foe si taki a e pina èn foe sorgoe gi en. Fosi a ben bigin tingatinga; baka dati, a ben kon abi wan wakatiki fanowdoe, èn moro fara wan wakawagi, èn dan wan ròlstoeroe. Baka dati, a ben go takroe moro nanga moro te leki a dede. A ben kisi bonjo-kanker èn a ben abi sorgoe doronomo fanowdoe — dei nanga neti. Wi ben wasi en èn ben gi en njanjan èn ben leisi gi en. A ben moeilek srefisrefi — spesroetoe na emotioneel sei. Di mi ben kon froestan taki mi mama ben e dede, mi ben krei, bika mi ben lobi en srefisrefi.”

16, 17. Sortoe rai kan jepi wan sma di e sorgoe gi trawan, foe tan abi wan balansi fasi foe si sani?

¹⁶ Efoe joe de na ini so wan srefi sortoe situwâsi, san joe kan doe foe tjari a situwâsi? A sa jepi joe foeroe te joe e arki Jehovah nanga jepi foe a leisi di joe e leisi bijbel èn te joe e taki nanga en na ini begi (Filipisma 4:6, 7). Foe doe en na wan praktis fasi, sorgoe taki joe e njan gosontoe njanjan èn proeberi foe kisi nofo sribi. Te joe e doe disi, dan joe sa de ini wan moro boen kondisi, na emotioneel sei èn na skin sei, foe sorgoe gi a lobiwan foe joe. Kande joe kan seti sani foe rostoe wanwan leisi foe den wroko di joe e doe ibri dei. Srefi efoe joe no man teki fakansi, a de wan koni sani foe meki ten foe rostoe. Foe man gowe wan pisi ten foe a siki papa noso mama, kande joe kan sreka sani foe meki wan tra sma tan nanga a siki papa noso mama foe joe.

¹⁷ A no de wan ongewoon sani gi bigisma di moesoe sorgoe gi tra sma, taki den e froewakti sani foe densrefi di no de reidelek. Ma no kroetoe joesrefi foe den sani di joe no man doe. Na ini wan toe kefal a kan de taki joe moesoe poti a lobiwan foe joe na ondro a sorgoe foe wan oso pe den e sorgoe grani sma. Efoe joe na wan sma di moesoe sorgoe gi trawan, no froewakti toemoesi foeroe sani foe joesrefi di joe no man doe. A no soso den sani di joe papa nanga mama abi fanowdoe joe moesoe abi ini balansi, ma so srefi den sani di den pikin foe joe, joe trowpatna èn joesrefi abi fanowdoe.

KRAKTI DI PASA SAN DE NORMAAL

18, 19. Sortoe pramisi foe gi jepi Jehovah doe, èn sortoe ondrofenitori e sori taki a e hori ensrefi na a pramisi disi?

¹⁸ Nanga jepi foe en Wortoe, bijbel, Jehovah e gi tiri na wan lobi fasi, di kan gi wan sma foeroe jepi foe sorgoe gi en papa nanga mama di kon owroe. Ma dati a no a wan-enkri jepi di a e gi. „Jehovah de krosibei foe ala den wan di e kari en”, na so a psalm singiman ben skrifi na ondro a krakti foe a santa jeje. „A sa jere a krei di den e krei gi jepi, èn a sa froeloesoe den.” Jehovah sa froeloesoe den getrow sma foe en, noso a sa hori den na libi foe pasa srefi den moro moeilek situwâsi. — Psalm 145:18, 19.

¹⁹ Myrna, foe den Filippijnen ben leri disi di a ben e sorgoe gi en mama di no ben man jepi ensrefi foe di a ben kisi wan boeroertoe. „No wan sani de di e gi moro brokosaka leki te joe e si joe lobiwan e pina, èn taki a no man taigi joe pe a abi pen”, na so Myrna e skrifi. „A ben de neleki mi e si en e soengoe safrisafri, èn noti no de di mi ben kan doe. Foeroe tron mi ben sa kindi èn taki nanga Jehovah foe taigi en taki mi weri srefisrefi. Mi ben krei leki David, di ben begi Jehovah foe poti den watra-ai foe en na ini wan batra èn foe memre en. Èn soleki fa Jehovah ben pramisi, a ben gi mi a krakti di mi ben abi fanowdoe. ’Jehovah ben kon de leki wan jepi gi mi.’” — Psalm 18:18.

20. Sortoe pramisi na ini bijbel e jepi sma di e sorgoe gi trawan, foe abi howpoe, srefi efoe a sma di den e sorgoe, e dede?

²⁰ Sma ben taki dati a sorgoe di sma e sorgoe gi papa nanga mama di kon owroe, de leki wan „tori di no abi wan switi kaba”. Ala di wan sma kan doe ala moeiti foe sorgoe gi den owroesma, tokoe den owroesma kan dede, soleki fa a ben de nanga a mama foe Myrna. Ma den sma di e froetrow tapoe Jehovah, sabi taki dede a no a kaba foe a tori. Na apostel Paulus ben taki: „Mi e howpoe tapoe Gado . . . taki wan opobaka sa de foe den regtfardikiwan nanga den onregtfardikiwan” (Tori foe den Apostel 24:15). Den sma di lasi den owroe papa nanga mama na ini dede, e kisi trowstoe foe na opobaka howpoe makandra nanga a pramisi foe wan prisiri njoen grontapoe di Gado meki, pe „dede no sa de moro”. — Openbaring 21:4.

21. Sortoe boen bakapisi e kon te wan sma e gi grani na en owroe papa nanga mama?

²¹ Den foetoeboi foe Gado abi dipi lespeki gi den papa nanga mama foe den, ala di den papa nanga mama foe den kon owroe kande (Odo 23:22-24). Den e gi den grani. Te den e doe disi, dan den e ondrofeni san na odo di skrifi na ondro a krakti foe a santa jeje, e taki: „Joe papa nanga joe mama sa prisiri èn a sma di ben meki joe sa breiti” (Odo 23:25). Èn na tapoe foe dati, den sma di e gi grani na den owroe papa nanga mama foe den, e plisi Jehovah Gado toe èn e gi en grani.

1. San ben de a prakseri di Jehovah ben abi nanga na osofamiri seti?

DI JEHOVAH ben tjari Adam nanga Eva kon na wán na ini a trowlibi, Adam ben sori a prisiri foe en di a ben taki a fosi poewema di skrifi na ini Hebrewtongo (Genesis 2:22, 23). Ma a Mekiman ben abi moro sani na prakseri leki foe gi prisiri nomo na den libisma pikin foe en. A ben wani meki den trowpaar nanga den osofamiri doe a wani foe en. A ben taigi a fosi paar: „Oen meki pikin èn kon foeroe èn foeroe grontapoe èn poti en na oen ondro, èn abi den fisi foe se nanga den mekisani foe hemel di e frei nanga ibri libi mekisani di e boeweigi ensrefi na grontapoe, na oen ondro” (Genesis 1:28). Dati ben de wan kefalek moi wroko di ben gi foeroe prisiri! Den nanga den pikin foe den di ben moesoe kon ete, ben sa kolokoe srefisrefi efoe Adam nanga Eva ben doe a wani foe Jehovah foe di den ben gi jesi krinkrin na en!

2, 3. Fa osofamiri kan feni a moro bigi kolokoe na ini a ten disi?

² Na ini a ten disi toe, den osofamiri de moro kolokoe te den e wroko makandra foe doe a wani foe Gado. Na apostel Paulus ben skrifi: „A gi di wan sma e gi ensrefi na ini a dini foe Gado, boen gi ala sani, foe di a abi wan pramisi gi a disiten libi èn a libi di moesoe kon ete” (1 Timoteus 4:8). Wan osofamiri di e gi ensrefi na ini a dini foe Gado èn di e waka na baka a tiri foe Jehovah, soleki fa dati de na ini bijbel, sa feni kolokoe na ini „a disiten libi” (Psalm 1:1-3; 119:105; 2 Timoteus 3:16). Srefi efoe wán memre nomo foe na osofamiri e gebroiki den bijbel gronprakseri, a situwâsi moro boen leki te no wan sma e doe dati.

³ A boekoe disi taki foe foeroe bijbel gronprakseri di e meki wan kolokoe osofamiri kon. Kande joe si taki wan toe foe den gronprakseri e kon ibri tron baka na ini a heri boekoe. Foe san ede? Bika den abi krakti waarheid di abi boen bakapisi gi ala sma na ini difrenti afersi foe na osofamiri libi. Wan osofamiri di e meki moeiti foe gebroiki den bijbel gronprakseri disi, e feni taki a gi di den e gi densrefi na ini a dini foe Gado, ’abi wan pramisi gi a disiten libi’ troetroe. Meki wi go loekoe ete wan tron na fo foe den prenspari gronprakseri dati.

A WAARDE FOE A DWENGI DI WAN SMA E DWENGI ENSREFI

4. Foe san ede a dwengi di wan sma moesoe man dwengi ensrefi, de toemoesi prenspari na ini wan trowlibi?

⁴ Kownoe Salomo ben taki: „Neleki wan foto di den broko go na ini, sondro skotoe, na so a man de di no man dwengi en jeje” (Odo 25:28; 29:11). Gi den sma di wani wan kolokoe trowlibi, a de toemoesi prenspari foe ’dwengi a jeje foe den’, noso foe dwengi densrefi. Te wan sma e gi ensrefi abra na firi di e tjari pori kon, soleki atibron noso lostoe di de teige boen gwenti nanga wet, dan dati sa tjari pori kon di abi foeroe jari fanowdoe foe kon boen baka — efoe a kan kon boen baka srefi.

5. Fa wan onvolmaakti libisma kan kweki a dwengi di wan sma moesoe dwengi ensrefi, èn nanga sortoe winimarki?

⁵ A no de foe taki, dati no wan bakapikin foe Adam kan basi en onvolmaakti skin dorodoro (Romesma 7:21, 22). Tokoe, a dwengi di wan sma e dwengi ensrefi, na wan froktoe foe a jeje (Galasiasma 5:22, 23). Foe dati ede, a jeje foe Gado sa meki na eigifasi na ini wi foe man dwengi wisrefi, efoe wi e begi foe na eigifasi disi, efoe wi e gebroiki a joisti rai di de foe feni na ini den Boekoe foe bijbel, èn efoe wi abi demakandra nanga tra sma di e sori na eigifasi disi èn te wi e wai pasi gi den sma di no e sori en (Psalm 119:100, 101, 130; Odo 13:20; 1 Petrus 4:7). So wan fasi foe handri sa jepi wi foe „lon komoto gi hoeroedoe”, srefi efoe wi e kisi tesi (1 Korentesma 6:18). Wi sa weigri foe doe ogri nanga tranga èn wi no sa dringi sopi pasa marki, noso wi sa wini a problema foe dringi sopi pasa marki. Èn wi sa handri na wan moro bedari fasi nanga a tanteri di sma e tanteri wi èn nanga moeilek situwâsi. Meki a de so, taki ala sma — so srefi den pikin — e leri foe kweki a toemoesi prenspari froktoe disi foe a jeje. — Psalm 119:1, 2.

WAN JOISTI FASI FOE SI A POSISI LEKI EDEMAN

6. (a) San na a posisi leki edeman, di Gado seti? (b) San wan man moesoe hori na prakseri te a posisi foe en leki edeman moesoe tjari kolokoe kon gi en osofamiri?

⁶ A di foe toe prenspari gronprakseri, na a erken di wi moesoe erken a posisi leki edeman. Paulus ben sori a joisti fasi fa sani seti, di a ben taki: „Mi wani meki oenoe moesoe sabi, taki na edeman foe ibri man na Krestes; a man foe en sei na a edeman foe na oema; Gado foe en sei na a edeman foe Krestes” (1 Korentesma 11:3). Disi wani taki dati wan man e teki fesi na ini na osofamiri, en wefi e horibaka gi en na wan loyaal fasi, èn den pikin e gi jesi na a papa nanga mama foe den (Efeisesma 5:22-25, 28-33; 6:1-4). Ma loekoe taki a posisi leki edeman e tjari kolokoe kon soso te a e gebroiki dati na wan joisti fasi. Den masra di e gi densrefi na ini a dini foe Gado, sabi taki a posisi leki edeman no wani taki dati den moesoe tiri leki wan diktator. Den e waka na baka Jesus, na Edeman foe den. Ala di Jesus ben moesoe de „edeman foe ala sani”, tokoe a „no ben kon foe sma dini en, ma foe dini sma” (Efeisesma 1:22; Mateus 20:28). Na wan srefi fasi, wan man di de wan kresten no e gebroiki en posisi leki edeman foe soekoe wini gi ensrefi, ma foe sorgoe gi den afersi foe en wefi nanga den pikin. — 1 Korentesma 13:4, 5.

7. Sortoe bijbel gronprakseri sa jepi wan wefi foe doe a ròl di a kisi foe Gado na ini na osofamiri?

⁷ Foe en sei, a wefi di e gi ensrefi na ini a dini foe Gado, no e strei nanga en masra noso e soekoe foe basi en. A e feni en wan prisiri sani foe horibaka gi en èn foe wroko makandra nanga en. Son tron bijbel e taki foe a wefi leki „a de foe” en masra, èn dati e meki a de krin taki a masra na en edeman (Genesis 20:3). Nanga jepi foe a trow a e kon na ondro „a wet foe en masra” (Romesma 7:2). Na a srefi ten, bijbel e kari en wan „jepi” èn wan „fitipisi” (Genesis 2:20). A abi den eigifasi nanga den bekwaamfasi di en masra no abi, èn a e gi en a jepi di a abi fanowdoe (Odo 31:10-31). Bijbel e taki toe taki wan wefi na wan „patna”, wan di e wroko skinskin nanga en patna (Maleaki 2:14). Den bijbel gronprakseri disi e jepi wan masra nanga wan wefi foe froestan a posisi foe makandra èn foe handri nanga makandra na wan lespeki fasi èn wan warti fasi di fiti.

„DE ESI FOE JERE”

8, 9. Froeklari wan toe gronprakseri di sa jepi ala sma na ini na osofamiri foe meki a fasi fa den abi komunikâsi kon moro boen.

⁸ Foeroe tron na ini a boekoe disi, krakti ben poti taki a de fanowdoe foe abi komunikâsi. Foe san ede? Bika a moro makriki foe loesoe problema te sma e taki nanga makandra èn e arki troetroe na makandra. Den ben poti krakti ala ten baka na tapoe taki komunikâsi e kon foe toe sei. A disipel Jakobus ben taki dati na a fasi disi: „Ibri sma moesoe de esi foe jere, no esi foe taki.” — Jakobus 1:19.

⁹ A de prenspari toe foe loekoe boen fa wi e taki. Den wortoe di taki sondro foe denki fosi, di e meki trobi, noso di e soekoe soso fowtoe, no e meki wan boen komunikâsi de (Odo 15:1; 21:9; 29:11, 20). Srefi efoe wi e taki joisti sani, efoe wi taki den na wan ogri fasi, noso na wan fasi di e sori bigifasi, noso wi taki den sondro firi, dan kande a sa doe ogri moro leki a sa doe boen. Den wortoe foe wi moesoe tesi boen, den „moesoe abi sowtoe na ini” (Kolosesma 4:6). Den wortoe foe wi moesoe de leki „gowtoe apra na ini solfroe sani di kerfoe nanga anoe” (Odo 25:11). Den osofamiri di leri foe abi wan boen komunikâsi, meki wan bigi stap foe kisi kolokoe.

A TOEMOESI PRENSPARI RÒL FOE LOBI

10. Sortoe lobi de toemoesi prenspari na ini a trowlibi?

¹⁰ A wortoe „lobi” e kon ibri tron baka na ini a heri boekoe disi. Joe e memre a sortoe lobi na tapoe san den sori go moro foeroe? A de troe taki a lobi di de na mindri wan man nanga wan oema (Grikitongo, eʹros) e plèi wan prenspari ròl na ini a trowlibi, èn dipi firi foe lobi nanga matifasi (Grikitongo, fi·liʹa) e gro na mindri wan masra nanga wan wefi na ini wan trowlibi di e waka boen. Ma moro prenspari srefi na a lobi di de ini a Griki wortoe a·gaʹpe. Disi na a lobi di wi e kweki gi Jehovah, gi Jesus, èn gi den sma na wi sei (Mateus 22:37-39). A de a lobi di Jehovah e sori gi a libisma famiri (Johanes 3:16). A moi srefisrefi taki wi kan sori a srefi sortoe lobi gi wi trowpatna èn gi den pikin foe wi! — 1 Johanes 4:19.

11. Fa lobi abi boen bakapisi gi wan trowlibi?

¹¹ Na ini a trowlibi, a hei sortoe lobi disi de troetroe „wan volmaakti banti foe wánfasi” (Kolosesma 3:14). A e tai wan paar na makandra èn a e meki taki den wani doe san de moro boen gi makandra èn gi den pikin foe den. Te den osofamiri e tanapoe na fesi moeilek situwâsi, dan lobi e jepi den foe doe sani na ini wánfasi. Te wan paar e kon owroe, dan lobi e jepi den foe horibaka gi makandra èn foe tan warderi makandra. „Lobi . . . no e soekoe en eigi boen. . . . A e froedrage ala sani, e bribi ala sani, e howpoe ala sani, e teki ala sani. Lobi no e misi noiti.” — 1 Korentesma 13:4-8.

12. Foe san ede a lobi di wan trowpaar abi gi Gado, e tranga a trowlibi foe den?

¹² A banti foe a trowlibi de spesroetoe tranga no soso te a kon tranga nanga a lobi na mindri den trowpatna wawan, ma moro prenspari nanga a lobi di den abi gi Jehovah (Preikiman 4:9-12). Foe san ede? We, na apostel Johanes ben skrifi: „Disi wani taki a lobi foe Gado, taki wi e hori den komando foe en” (1 Johanes 5:3). Foe dati ede, wan paar moesoe leri den pikin foe den na ini a gi di den e gi densrefi na ini a dini foe Gado, no soso bika den abi wan dipi lobi gi den pikin foe den, ma bika disi na wan komando foe Jehovah (Deuteronomium 6:6, 7). Den moesoe tan fara foe sani di de teige boen gwenti nanga wet, no soso bika den lobi makandra, ma moro foeroe bika den lobi Jehovah, di „sa kroetoe hoeroeman nanga soetaman” (Hebrewsma 13:4). Srefi efoe wán patna e tjari serjoesoe problema kon na ini wan trowlibi, tokoe lobi gi Jehovah sa boeweigi a tra patna foe tan waka na baka den bijbel gronprakseri. Ija, kolokoe foe den osofamiri dati, pe lobi gi makandra kon tranga nanga jepi foe a lobi gi Jehovah!

NA OSOFAMIRI DI E DOE A WANI FOE GADO

13. Fa wan fasti overtoigi foe doe a wani foe Gado, kan jepi sma foe hori ai na tapoe den sani di de troetroe prenspari?

¹³ A heri libi foe wan kresten e drai lontoe a doe di a e doe a wani foe Gado (Psalm 143:10). Disi na san a wani taki troetroe foe gi joesrefi na ini a dini foe Gado. Te den osofamiri e doe a wani foe Gado, dan dati e jepi den foe hori ai na tapoe den sani di de troetroe prenspari (Filipisma 1:9, 10). Foe eksempre, Jesus ben warskow: „Mi ben kon foe tjari prati kon, foe wan man nanga en papa, èn foe wan oemapikin nanga en mama, en foe wan jongoe wefi nanga a mama foe en masra. Ija, den feanti foe wan sma sa de sma foe en eigi osofamiri” (Mateus 10:35, 36). Akroederi a warskow di Jesus ben gi, foeroe foe den bakaman foe en kisi froefolgoe foe den memre foe den osofamiri. Disi na wan sari situwâsi di e hati srefisrefi! Ma tokoe den famiri banti no moesoe de moro tranga leki a lobi di wi abi gi Jehovah Gado èn gi Jesus Krestes (Mateus 10:37-39). Efoe wan sma e horidoro ala di a e kisi gens foe en osofamiri, dan kande den gensman kan kenki te den e si den boen bakapisi foe a gi di a sma dati e gi ensrefi na ini a dini foe Gado (1 Korentesma 7:12-16; 1 Petrus 3:1, 2). Srefi efoe dati no e feni presi, no wan boen di e tan foe langa ten, e kon te wan sma e tapoe foe dini Gado bika a e kisi gens.

14. Fa wan angri foe doe a wani foe Gado sa jepi papa nanga mama foe handri na wan fasi di e tjari den moro boen winimarki kon gi den pikin foe den?

¹⁴ Te den papa nanga mama e doe a wani foe Gado, dan dati sa jepi den foe teki boen bosroiti. Foe eksempre, na ini wan toe libimakandra, den papa nanga mama gwenti foe si den pikin a srefi leki te den e poti moni na bangi foe kisi rente, èn den e froetrow na tapoe den pikin taki den sa sorgoe gi den na ini den owroe dei foe den. Ala di a joisti taki den bigi pikin e sorgoe gi den papa nanga mama foe den di kon owroe, so wan prakseri no moesoe meki den papa nanga mama abi krakti na tapoe den pikin foe den foe meki den pikin libi na wan fasi pe den e feti na baka materia sani. Papa nanga mama no e doe boen gi den pikin foe den efoe den e kweki den foe meki den si materia goedoe moro warti leki jeje afersi. — 1 Timoteus 6:9.

15. Fa Eunice, a mama foe Timoteus, ben de wan toemoesi boen eksempre foe wan mama di ben doe a wani foe Gado?

¹⁵ Wan heri moi eksempre ini a tori disi, na Eunice, a mama foe Timoteus, a jongoe mati foe Paulus (2 Timoteus 1:5). Ala di a ben trow nanga wan sma di no de na bribi, tokoe Eunice, makandra nanga Lois, a granmama foe Timoteus, ben man kweki Timoteus na wan boen fasi foe feti na baka a gi di a e gi ensrefi na ini a dini foe Gado (2 Timoteus 3:14, 15). Di Timoteus ben owroe nofo, Eunice ben gi en pasi foe gowe foe oso èn foe bigin nanga a Kownoekondre preikiwroko, leki a zendeling kompe foe Paulus (Tori foe den Apostel 16:1-5). A ben moesoe naki en ati srefisrefi di en manpikin ben kon tron wan toemoesi aparti zendeling! A gi di a ben gi ensrefi leki wan bigi sma na ini a dini foe Gado, ben sori boen foe a leri di a ben kisi froekoe kaba. Foe troe, Eunice ben feni satisfaksi nanga prisiri te a ben e jere tori foe a diniwroko di Timoteus ben doe na wan getrow fasi, ala di kande a ben misi en foe di a no ben de nanga en na oso. — Filipisma 2:19, 20.

NA OSOFAMIRI ÈN A TAMARA FOE JOE

16. Fa Jesus ben sori taki a ben broko en ede na wan joisti fasi leki wan manpikin, ma san ben de a moro prenspari marki foe en?

¹⁶ Jesus ben kweki na ini wan osofamiri di ben dini Gado, èn leki wan bigisma a ben sori taki leki manpikin, a ben broko en ede na wan joisti fasi gi en mama (Lukas 2:51, 52; Johanes 19:26). Ma a moro prenspari marki foe Jesus ben de foe doe a wani foe Gado, èn gi en, disi ben wani taki toe foe opo a pasi gi libisma foe njan boen foe têgo libi. Disi a ben doe di a ben òfer en volmaakti libisma skin leki wan loesoe-paiman gi a sondoe libisma famiri. — Markus 10:45; Johanes 5:28, 29.

17. Sortoe toemoesi moi froewakti a getrow pasi foe Jesus ben opo gi den sma di e doe a wani foe Gado?

¹⁷ Baka di Jesus dede, Jehovah ben gi en wan opobaka foe libi na hemel èn a ben gi en bigi tirimakti, èn te foe kaba, a ben poti en leki Kownoe foe a hemel Kownoekondre (Mateus 28:18; Romesma 14:9; Openbaring 11:15). A srakti-ofrandi foe Jesus ben opo na okasi gi wan toe libisma foe teki poeroe èn foe tiri nanga en na ini a Kownoekondre dati. Dati ben opo a pasi toe gi den trawan foe a libisma famiri di de opregti, foe njan boen foe volmaakti libi na tapoe wan grontapoe di meki kon boen baka leki a situwâsi foe a paradijs (Openbaring 5:9, 10; 14:1, 4; 21:3-5; 22:1-4). Wan foe den moro bigi grani di wi abi na ini a ten disi, na foe froeteri a toemoesi moi boen njoensoe disi na den sma na wi sei. — Mateus 24:14.

18. Sortoe froemane èn sortoe deki-ati den osofamiri èn ibri sma aparti e kisi?

¹⁸ Soleki fa na apostel Paulus ben sori, te sma e libi akroederi a gi di den e gi densrefi na ini a dini foe Gado, dan dati e gi a pramisi taki den kan kisi den blesi dati na ini a libi „di moesoe kon ete”. Foe troe, disi na a moro boen fasi foe feni kolokoe! Hori na prakseri, taki „grontapoe e pasa gowe, èn so srefi a lostoe foe en, ma a sma di e doe a wani foe Gado, e tan foe têgo” (1 Johanes 2:17). Foe dati ede, awansi joe na wan pikin noso wan papa noso mama, wan masra noso wan wefi, wan bigisma di no abi patna èn di abi pikin noso di no abi pikin, doe moeiti foe doe a wani foe Gado. Srefi te joe de na ondro kwinsi noso joe e miti toemoesi aparti problema, noiti no frigiti taki joe na wan foetoeboi foe a Gado di e libi. So boen, meki den sani di joe e doe, tjari prisiri gi Jehovah (Odo 27:11). Èn meki a fasi fa joe e tjari joesrefi, abi kolokoe leki bakapisi gi joe nownowde èn têgo libi na ini a njoen grontapoe di moesoe kon ete!