Leisiman e aksi . . .

A de so taki sma musu dopu beibi?

▪ Victoria e fruteri: „Mi ben frede taki mi pikin brada, John, ben o go na ini Limbo” (wan presi pe sma e go fu kisi strafu te den no dopu). Fu san ede a ben e frede a sani dati? A e taki: „John dede fosi a dopu, èn wan Lomsu priester ben taki dati na fu a sani disi ede John ben o tan na ini Limbo fu ala ten.” A no de fu taki dati a denki dati e frede sma. Ma a denki dati e komoto fu Bijbel? Bijbel e leri taki nowan howpu no de gi wan pikin di dede sondro taki a dopu?

A tru taki Bijbel e leri dati Kresten musu teki dopu. Yesus ben taigi den bakaman fu en: „Go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du” (Mateyus 28:19, 20). Luku taki a tekst disi e sori taki sma di dopu musu de disipel fu Yesus. Disi wani taki dati den na sma di kon leri sabi Yesus èn di bosroiti fu waka na en baka. A no de fu taki dati wan beibi no kan teki a bosroiti dati.

Toku furu sma de nomonomo taki a komando fu Yesus abi fu du nanga pikin-nengre. „Ala sma musu dopu, èn beibi tu,” na so Richard P. Bucher, wan domri fu a Luther Kerki ben taki. A ben taki tu: „Te sma no e dopu beibi, dan dati e tapu pasi gi den pikin disi fu kisi pardon èn a sani disi kan meki taki den pikin kisi strafu fu ala ten.” Ma te yu luku en bun, dan den sani disi no e kruderi nanga den leri fu Yesus. Wi sa poti prakseri na dri sani di e sori taki dati de so.

A fosi sani, na taki Yesus no ben leri taki beibi musu dopu. Fu san ede a sani disi prenspari? Poti prakseri na disi: Yesus ben sori den disipel fu en krin san na a wani fu Gado. Son leisi a ben e taki baka fu prenspari sani di a ben leri den. Fu san ede? Fu di a ben wani taki den disipel frustan krin san a ben wani leri den (Mateyus 24:42; 25:13; Markus 9:34-37; 10:35-45). Ma nowan enkri leisi a ben leri den taki beibi musu dopu. A de so taki Yesus ben frigiti fu taki fu a sani dati? Nôno, dati no kan! Efu beibi ben musu dopu, dan seiker Yesus ben o taki dati.

A di fu tu sani, na taki Yesus noiti no ben leri taki sma e pina baka te den dede. A ben bribi a sani disi di Bijbel e taki krin: „Den libiwan sabi taki den o dede. Ma den dedewan no sabi notinoti” (Preikiman 9:5). Yesus ben sabi taki den dedewan no e pina na ini vagevuur (wan presi pe sma e kisi strafu fu wan pisi ten), Limbo, hel, noso na iniwan tra presi. Na presi fu dati, a ben e leri taki den dedewan no sabi notinoti, èn taki a de neleki den e sribi.​—Yohanes 11:1-14.

A di fu dri sani, na taki Yesus ben e leri taki „ala den sma di de na ini den grebi” o kon na libi baka (Yohanes 5:28, 29). A no de fu taki dati sosrefi milyunmilyun sma di noiti no dopu o kon na libi baka. Te den kisi wan opobaka, dan den o kisi na okasi fu kon leri sabi den markitiki fu Gado èn den o libi fu têgo na ini Paradijs na grontapu.a​—Psalm 37:29.

A de krin taki Bijbel no e leri taki beibi musu dopu.

[Futuwortu]