Tin aksi di abi fu du nanga seks e kisi piki

1 A de so taki seks ben de a sondu di Adam nanga Eva du na ini a dyari fu Eden?

▪ Piki: Furu sma e bribi taki a froktu di sma no ben mag nyan na ini a dyari fu Eden, ben abi fu du nanga seks. Ma a no dati Bijbel e leri.

Luku a sani disi: Srefi fosi Gado meki Eva, a ben gi Adam a komando fu no nyan fu a froktu fu „a bon di nen ’Sabi san bun èn san ogri’” (Genesis 2:15-18). Fu di Adam ben de en wawan, meki a komando disi no ben kan abi fu du nanga seks. Boiti dati, Gado ben gi Adam nanga Eva a krin komando fu ’meki pikin èn kon furu, teleki den kon lai na grontapu’ (Genesis 1:28). Efu Gado ben taigi a fosi trowpaar fu kon furu teleki den kon lai na grontapu, dan dati ben o wani taki dati den musu abi seks. Yu denki dati wan lobi-ati Gado ben o gi a trowpaar disi dedestrafu bakaten fu di den gi yesi na a komando disi fu en?​—1 Yohanes 4:8.

Boiti dati, na di Eva en masra no ben de nanga en, „a piki wan froktu fu a bon, dan a nyan fu en. Bakaten di en masra ben de nanga en, a gi en masra meki a nyan tu. Ne en masra srefi bigin nyan.”​—Genesis 3:6.

Te fu kaba, Gado no piri-ai gi Adam nanga Eva di den ben abi seks èn di den kisi pikin (Genesis 4:1, 2). A de krin taki a froktu di Adam nanga Eva ben nyan fu en, no ben abi fu du nanga seks, ma a ben de wan trutru froktu di ben e gro na wan bon.

2 Bijbel e taki dati sma no mag prisiri fu seks?

▪ Piki: A fosi buku fu Bijbel e tyari kon na krin taki na Gado ben meki libisma, iya, a ben meki „wan man nanga wan uma”. Gado ben taki dati ala den sani di a ben meki, ben de „heri bun” (Genesis 1:27, 31). Bakaten, Gado ben meki wan Bijbel skrifiman skrifi den rai disi gi masra: „Prisiri nanga a wefi di yu teki sensi yu yongu yari. . . . Meki den bobi fu en drungu yu ala ten baka” (Odo 5:18, 19). Den sani disi e sori taki Bijbel e taki dati sma no mag prisiri fu seks?

Soleki fa a sori, dan Gado meki libisma na so wan fasi taki den kan meki pikin. Boiti dati, a meki den syenpresi fu den na so wan fasi taki trowpaar kan sori lobi gi makandra èn den kan gi makandra prisiri te den abi seks. Disi kan meki taki wan man nanga wan uma di lobi makandra kisi san den abi fanowdu.

3 Bijbel e feni en bun taki wan man nanga wan uma libi nanga makandra sondro fu trow na lanti?

▪ Piki: Bijbel e taki krin dati „Gado o krutu huruman” (Hebrewsma 13:4). A Griki wortu di vertaal leki hurudu, na por neiʹa. A wortu disi abi fu du nanga seks di sma abi aladi den no trow nanga makandra, awansi na sortu fasi den e du dati.a Dati meki Gado no feni en bun te tu sma e libi nanga makandra, srefi te den abi na prakseri fu trow bakaten.

Srefi efu wan man nanga wan uma lobi makandra trutru, toku Gado wani taki den trow fosi den kan abi seks. Na Gado meki wi na so wan fasi taki wi man sori lobi. A moro prenspari fasi fu Gado na lobi. Fu dati ede, a sabi heri bun fu san ede a wani taki soso sma di trow nanga makandra kan abi seks, soleki fa a tra artikel o sori.

4 Gado feni en bun te wan sma abi moro leki wán trowpatna?

▪ Piki: Fu wan pisi ten Gado ben e gi pasi taki wan sma abi moro leki wán trowpatna (Genesis 4:19; 16:1-4; 29:18–30:24). Ma a no Gado ben seti a sani disi. A ben gi Adam wán wefi nomo.

Gado meki Yesus Krestes leri sma baka taki wan sma musu abi wán trowpatna nomo, soleki fa A ben wani dati na a bigin (Yohanes 8:28). Di sma ben aksi Yesus wan sani di abi fu du nanga a trowlibi, dan a ben taki: „A sma di meki den na a bigin, meki wan man nanga wan uma, èn . . . a ben taki: ’Dati meki wan man o gowe libi en papa nanga en mama. A o tai hori na en wefi èn den tu sma dati o de wán skin.’”​—Mateyus 19:4, 5.

Bakaten, Gado meki wan fu den disipel fu Yesus skrifi disi: „Ibri man musu abi en eigi wefi èn ibri uma musu abi en eigi masra” (1 Korentesma 7:2). Bijbel e taki tu dati iniwan mansma na ini a Kresten gemeente di e kisi spesrutu frantwortu, musu de „a masra fu wán wefi nomo”.​—1 Timoteyus 3:2, 12.

5 A fowtu te wan trowpaar e gebroiki dresi noso tra sani so taki a wefi no kon de nanga bere?

▪ Piki: Yesus no ben gi den bakaman fu en a komando fu kisi pikin. Nowan fu den disipel fu Yesus no ben leri sma so wan sani tu. Nowan presi na ini Bijbel skrifi taki sma no musu du sani fu no kon de nanga bere.

Fu dati ede, trowpaar srefi kan bosroiti efu den o kisi pikin, noso efu den no wani dati. Den kan bosroiti tu omeni pikin den wani kisi èn o ten den wani kisi den pikin. Wan masra nanga wan wefi kan bosroiti gi densrefi efu den o gebroiki sani so taki a wefi no kon de nanga bere, ma a sani dati no musu puru a bere. Sobun, a bosroiti di den o teki ini a tori disi na den eigi frantwortu.b Nowan sma musu krutu den efu den teki so wan bosroiti.​—Romesma 14:4, 10-13.

6 A fowtu fu puru bere?

▪ Piki: A libi santa gi Gado èn a e si srefi a pikin na ini en mama bere leki wan sma di de na libi (Psalm 139:16). Gado ben taki dati a o aksi frantwortu na wan sma di meki taki wan pikin di de na ini en mama bere kisi mankeri. Sobun, te wan sma kiri wan pikin di no gebore ete, dan gi Gado a sma dati na wan kiriman.​—Eksodes 20:13; 21:22, 23.

Ma kon meki wi taki dati te wan mama de fu kisi en pikin, dan wan problema opo kon di e meki taki a trowpaar disi musu bosroiti efu den o meki a mama tan na libi, noso efu den o meki a pikin tan na libi. Fa a de nanga a sani dati? Na ini a situwâsi dati, a trowpaar srefi musu bosroiti san den o du.c

7 Bijbel e gi sma pasi fu broko trow?

▪ Piki: Bijbel e taki dati sma mag broko trow, ma Yesus ben taki dati wán sani nomo de di kan meki taki sma broko trow. A ben taki: „Efu wan man broko trow nanga en wefi, ma a wefi no du hurudu [noso abi seks nanga wan trawan di no de en trowpatna] èn a man trow nanga wan tra uma, dan a du sutadu.”​—Mateyus 19:9.

Gado no lobi sma di e du ala sortu sani fu bedrigi a trowpatna fu den soso fu di den wani broko trow. A o aksi frantwortu na sma di no e si en leki wan seryusu sani fu gowe libi den trowpatna, spesrutu te den e du dati fu di den wani trow nanga wan tra sma.​—Maleaki 2:13-16; Markus 10:9.

8 Gado feni en bun te wan sma e libi wan homo-sekslibi?

▪ Piki: A de krin taki Bijbel e krutu hurudu, èn homo-sekslibi abi fu du nanga dati tu (Romesma 1:26, 27; Galasiasma 5:19-21). A tru taki Bijbel e sori krin taki Gado no lobi en te sma e libi na a fasi dati. Ma wi sabi tu taki „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi”.​—Yohanes 3:16.

Aladi tru Kresten no e feni homo-sekslibi bun, toku den e sori switifasi gi ala sma (Mateyus 7:12). Gado wani taki wi musu „gi grani na ala sortu sma”. Fu dati ede, tru Kresten no e teige sma di de homo.​—1 Petrus 2:17.

9 A fowtu te sma e gebroiki telefon noso Internet fu taki fu sekstori?

▪ Piki: Son leisi sma e bel wan nomru fu taki noso fu arki sekstori. A sani dati no fiti srefisrefi. Wan tra sani na taki sma e gebroiki den cellulair fu seni fowtow di no fiti noso fu seni boskopu fu sekstori di e wiki den sekslostu fu tra sma. Sma e gebroiki Internet tu fu taki fu sekstori nanga trawan noso fu luku sekstori di e wiki den sekslostu fu den.

Bijbel no e taki finifini fu den sortu sani disi di sma na ini a ten disi e du. Ma Bijbel e taki krin: „Un no musu taki srefi fu hurudu, noso fu iniwan sani di no krin, noso fu tori di e sori taki unu abi bigi-ai, bika dati no fiti gi santa sma. Un no musu tyari unsrefi na wan syen fasi tu èn un no musu taki lawlaw sani noso morsu lafutori, bika den sani disi no fiti” (Efeisesma 5:3, 4). Den sortu sani disi di sma e du nanga yepi fu telefon, cellulair nanga Internet, e meki sma kon abi wan fowtu denki fu seks èn a e gi sma deki-ati fu abi seks nanga wan trawan di no de en trowpatna. Na presi fu yepi sma fu basi den seksfiri, den e gi sma deki-ati fu plisi den eigi lostu nomo.

10 San Bijbel e taki fu sma di e prei nanga den syenpresi soso fu plisi den sekslostu?

▪ Piki: Bijbel no e taki krin dati sma no mag prei nanga den syenpresi fu wiki den sekslostu fu den di e meki taki den abi wan switi firi te fu kaba. Ma Gado Wortu e gi Kresten a komando disi: „Kiri den difrenti pisi fu un skin di kan meki taki unu kisi fu du nanga hurudu, wan libi di no krin, sekslostu [di no fiti].”​—Kolosesma 3:5.

Te sma e prei nanga den syenpresi fu plisi den sekslostu, dan dati e meki den abi wan fowtu denki fu seks èn den e prakseri fu plisi den eigi lostu nomo. Bijbel e gi wi a deki-ati taki Gado kan gi „krakti di bigi pasa marki” na den sma di e du tranga muiti fu tapu nanga a gwenti disi.​—2 Korentesma 4:7; Filipisma 4:13.

[Futuwortu]