Yu kan bribi den wondru di skrifi na ini Bijbel?

EFU wan sma ben o fruteri yu wan kefalek moi tori, dan yu ben o bribi en? Kande yu ben o bribi a tori efu yu ben o frutrow a sma. A no soso a fasi fa a sma e fruteri yu a tori ben o meki taki yu bribi en, ma yu ben o bribi en tu fu di a abi a gwenti fu taki san tru. Iya, na ini ala den yari noiti a lei gi yu fu espresi. Sobun, yu kan bribi san a e fruteri yu now.

Na so a de tu nanga den wondru di skrifi na ini Bijbel. Nowan fu wi ben de na libi di den sani dati pasa. Ma toku wi kan kon sabi efu den sani na ini Bijbel tru. Fa so? Luku wan tu sani di e sori taki den Bijbel tori di e taki fu wondru, tru.

Furu wondru pasa na presi pe furu sma ben de. Son leisi dusundusun sma, noso milyunmilyun sma srefi ben si den (Eksodes 14:21-31; 19:16-19). Den wondru no ben du kibrikibri, so taki sma no ben man si den.

Den wondru no ben du nanga wan lo opo-opo. Den sma di ben du wondru, no ben abi spesrutu wrokosani èn den no ben kon nanga wan lo pranpran. Den no ben leti spesrutu sortu lampu tu fu kori sma. Furu fu den wondru di sma du na ini Bijbel, den du na a momenti di sma aksi den yepi. Disi ben pasa sondro taki den ben sabi na fesi taki den ben o miti (Markus 5:25-29; Lukas 7:1-16). Na ini den situwâsi dati, a sma no ben man seti sani na fesi fu du a wondru.

Den sma di ben du wondru, no ben du dati fu kisi biginen, grani, noso gudu. Na presi fu dati den ben wani meki Gado kisi glori (Yohanes 11:1-4, 15, 40). Efu wan sma ben suku fu gebroiki a makti fu du wondru fu kon gudu, dan Gado ben krutu a sma dati.​—2 Kownu 5:15, 16, 20, 25-27; Tori fu den apostel 8:18-23.

Den difrenti sortu wondru di skrifi na ini Bijbel e sori taki den no ben man du nanga a krakti fu libisma. Fu eksempre, a se nanga a winti ben kon tiri, watra ben kon tron win, sma meki taki alen no fadon moro èn baka wan pisi ten den meki taki a bigin fadon baka, sikisma ben kon betre èn brenisma ben man si baka. Ala den wondru dati nanga someni trawan e sori taki wan moro hei makti di abi krakti na tapu ala sani, ben musu fu de na ini a tori.​—1 Kownu 17:1-7; 18:41-45; Mateyus 8:24-27; Lukas 17:11-19; Yohanes 2:1-11; 9:1-7.

Gensman di ben si den wondru no ben tweifri taki den pasa trutru. Di Yesus gi en mati Lasarus wan opobaka, dan den feanti fu Yesus no ben taki dati Lasarus no ben dede trutru. Den no ben o man du dati tu fu di Lasarus ben beri fo dei kaba (Yohanes 11:45-48; 12:9-11). Srefi hondrohondro yari baka Yesus en dede, den skrifiman fu a Talmud, wan Dyu kerkibuku, ben agri taki Yesus ben abi makti fu du wondru. Ma den no ben bribi taki a ben kisi a makti dati fu Gado. Na dati pasa tu nanga den disipel fu Yesus di sma tyari den na fesi wan Dyu krutubangi. Den gensman no aksi den: „Unu du wan wondru?” Ma den aksi: „Nanga sortu makti èn na ini a nen fu suma unu du disi?”​—Tori fu den apostel 4:1-13.

Sobun, yu kan bribi san Bijbel e taki fu wondru? Den sani di wi kaba luku e tyari kon na krin taki wi kan bribi den wondru di skrifi na ini Bijbel. Ma tra sani de di e meki taki wi kan frutrow san Bijbel e taki. Fu eksempre, te yu e leisi wan tori na ini Bijbel, dan nofo tron yu o man si krin o ten a tori pasa, pe a pasa èn fa den sma nen di ben de na ini a tori. Srefi sabiman di e krutu Bijbel, e fruwondru taki Bijbel e taki finifini fu sani di pasa na ini owruten. Hondrohondro Bijbel profeititori kon tru soifri leki fa a skrifi. Boiti dati, Bijbel abi furu rai di e leri sma fa fu libi bun nanga trawan èn den rai disi yepi ala sortu sma, awinsi den yongu noso owru èn awinsi pe den komoto. Te a abi fu du nanga a fasi fa sma musu libi nanga trawan, dan Bijbel e gi a moro bun rai.

Efu yu no e bribi ala sani di skrifi na ini Bijbel, dan fu san ede yu no e teki ten fu ondrosuku en moro fini? O moro yu o kon sabi Bijbel, o moro yu o bribi den sani di skrifi na ini (Yohanes 17:17). Yu o kon si taki yu kan bribi san a e fruteri yu fu den wondru di pasa na ini owruten. Te yu poti bribi na ini den tori dati, dan a o moro makriki fu bribi san Bijbel e taki fu den sani di o pasa na ini a ten di e kon.

[Prenki na tapu bladzijde 7]

Den gensman fu Yesus no ben tweifri taki Lasarus ben dede

Wondru di musu pasa ete na ini a ten di e kon

EFU wan datra musu du wan muilek oparâsi gi yu, dan fa yu o firi te yu kon sabi taki noiti a no du so wan oparâsi ete? A no de fu taki dati yu o frede. Ma fa a o de te yu yere taki a datra disi na a moro bun datra fu du na oparâsi disi? A du en hondrohondro leisi kaba èn ala leisi sani waka bun. Yu no denki taki a o man yepi yu tu?

Na agersi fasi a siki grontapu disi abi wan bigi oparâsi fanowdu. Yehovah Gado pramisi wi na ini Bijbel taki a o meki a grontapu disi tron wan Paradijs baka (2 Petrus 3:13). Ma fosi dati pasa, ogridu no musu de moro, iya, a musu komoto krinkrin (Psalm 37:9-11; Odo 2:21, 22). Ala den bigi problema di wi e si na wi lontu musu komoto, fosi grontapu kan tron wan Paradijs baka. Na wan trutru wondru nomo kan meki dati pasa.​—Openbaring 21:4, 5.

Yehovah Kotoigi e bribi taki den bigi kenki dati o kon heri esi. Fu san ede? Fu di den wondru di Yehovah Gado du kaba e sori taki a abi a makti fu meki den pramisi fu en kon tru. Luku siksi fu den wondru di skrifi na ini Bijbel di e fruteri wi san o pasa na ini a ten di e kon.

Wi howpu taki yu o go doro fu leri san Bijbel e pramisi gi a ten di e kon. A bribi fu yu o kon moro tranga èn dati o meki taki a howpu fu yu o kon moro tranga tu. A howpu dati na taki yu o libi na wan ten te yu o kisi wini fu den wondru di Yehovah e du.

[Faki/​Prenki na tapu bladzijde 9, 10]

WONDRU:

YESUS GI DUSUNDUSUN SMA NYANYAN NANGA WAN TU BREDE NANGA FISI NOMO.​—MATEYUS 14:13-21; MARKUS 8:1-9; YOHANES 6:1-14.

PRAMISI:

„Grontapu srefi o meki nyanyan. Gado, iya, wi Gado, o blesi wi.”​—PSALM 67:6.

SAN DISI WANI TAKI GI WI:

NOITI MORO ANGRI O KIRI WAN SMA.

WONDRU:

YESUS BEN MEKI BRENISMA SI BAKA.​—MATEYUS 9:27-31; MARKUS 8:22-26.

PRAMISI:

„Den ai fu den breniwan o si.”​—YESAYA 35:5.

SAN DISI WANI TAKI GI WI:

ALA BRENISMA O MAN SI BAKA.

WONDRU:

YESUS BEN DRESI DEN MALENGRIWAN.​—MATEYUS 11:5, 6; YOHANES 5:3-9.

PRAMISI:

„Lan sma o kren leki dia na tapu den bergi.”​—YESAYA 35:6.

SAN DISI WANI TAKI GI WI:

ALA MALENGRISMA O KON BETRE.

WONDRU:

YESUS BEN DRESI ALA SORTU SIKI.​—MARKUS 1:32-34; LUKAS 4:40.

PRAMISI:

„Nowan sma di e tan na ini a kondre o taki: ’Mi siki.’”​—YESAYA 33:24.

SAN DISI WANI TAKI GI WI:

NOWAN SMA O SIKI MORO. WI ALAMALA O DE GOSONTU.

WONDRU:

YESUS BEN BASI SANI SOLEKI A WINTI NANGA A SE.​—MATEYUS 8:23-27; LUKAS 8:22-25.

PRAMISI:

„Den o bow oso èn den srefi o tan na ini. Den o prani droifidyari èn den srefi o nyan fu en. Den no o wroko tranga fu soso.”​—YESAYA 65:21, 23.

„Sma no o pina yu kwetikweti. Yu no o frede nowan sma èn nowan sani o skreki yu, bika noti no o de fu frede yu.”​—YESAYA 54:14.

SAN DISI WANI TAKI GI WI:

RAMPU NO O DE MORO.

WONDRU:

YESUS BEN GI DEDESMA WAN OPOBAKA.​—MATEYUS 9:18-26; LUKAS 7:11-17.

PRAMISI:

„Ala den sma di de na ini den grebi . . . o komopo drape.”​—YOHANES 5:28, 29.

„A se lusu den dede sma di ben de na ini en èn dede nanga Grebi lusu den dede sma di ben de na ini den.”​—OPENBARING 20:13.

SAN DISI WANI TAKI GI WI:

DEN LOBIWAN FU WI DI DEDE O KISI WAN OPOBAKA.