1-3. (a) Fu san ede Yosua na wan bun eksempre fu wan sma di teki a yoisti bosroiti na ini en libi? (b) San wi musu hori na prakseri te wi musu teki bosroiti?

DEN bosroiti di wi e teki kan abi krakti na tapu wi heri libi. Dati meki a de prenspari fu sabi sortu bosroiti yu o teki. A de neleki te yu ben o waka na tapu wan pasi. Te yu waka wan pisi, yu e si taki a pasi e prati na ini tu pasi. Now yu musu bosroiti sortuwan fu den pasi dati yu o teki. Wan fu den kan tyari yu go na a presi pe yu musu doro. Ma a trawan kan tyari yu go lasi. We, san yu o du?

² Bijbel abi furu eksempre fu sma di ben de na ini so wan situwâsi. Na so yu ben abi Kain di ben musu bosroiti efu a ben o tan nanga atibron, noso efu a ben o basi den firi fu en (Gen. 4:6, 7). Yosua ben musu bosroiti efu a ben o dini a tru Gado noso efu a ben o dini falsi gado (Yos. 24:15). Yosua ben wani tan krosibei fu Yehovah. Sobun, a teki wan bosroiti di ben o yepi en fu du dati. Kain no ben wani tan krosibei fu Yehovah èn dati meki a teki wan bosroiti di meki taki a pori a matifasi di a ben abi nanga Yehovah.

³ Son leisi wi musu teki prenspari bosroiti tu fu man tan na tapu a reti pasi. Wi no musu frigiti taki den bosroiti di wi e teki kan gi Yehovah glori èn den kan yepi wi fu tan krosibei na en. Ma efu wi teki don bosroiti, dan wi kan pori a matifasi di wi abi nanga en. (Leisi Hebrewsma 3:12.) Na ini na artikel disi èn na ini a trawan wi o poti prakseri na seibi afersi fu a libi pe wi musu luku bun taki nowan sani pori a matifasi di wi abi nanga Yehovah.

SORTU WROKO WI O DU ÈN SAN WI O DU NANGA WI LIBI?

4. Fu san ede a prenspari fu abi wan wroko?

⁴ Kresten abi a frantwortu fu sorgu gi densrefi èn gi na osofamiri fu den. Bijbel e taki dati efu wan sma no wani sorgu gi en osofamiri, a takru moro wan sma di no abi bribi (2 Tes. 3:10; 1 Tim. 5:8). A no de fu taki dati a prenspari fu abi wan wroko. Ma efu yu no luku bun, a wroko fu yu kan pori a matifasi di yu abi nanga Yehovah. Fa so?

5. San wi musu hori na prakseri te wi e suku wan wroko?

⁵ Kon meki wi taki dati yu e suku wan wroko. Efu yu e libi na ini wan kondre pe a no makriki fu feni wan wroko, dan kande yu o wani teki iniwan wroko di yu kan feni. Ma san yu o du te a wroko dati no e kruderi nanga Bijbel? San yu o du te yu musu wroko tumusi langa noso te yu musu go na wan farawe presi fu du a wroko dati? Den sani disi kan meki taki yu no e go so furu moro na ini a preikiwroko noso den kan meki yu misi konmakandra. Den kan meki tu taki yu no de so furu moro nanga yu osofamiri. Yu o teki a wroko dati? Kande yu feni taki na presi fu sidon na oso sondro wroko, a moro bun fu abi wan wroko, awinsi a wroko dati no fiti gi wan Kresten. Memre taki te yu e teki wan don bosroiti, dan dati kan pori a matifasi di yu abi nanga Yehovah (Hebr. 2:1). Fa yu kan teki wan koni bosroiti te yu e suku wan wroko, noso te yu e prakseri fu du wan tra wroko?

6, 7. (a) Fu san ede wan sma ben sa wani wan wroko? (b) Fa a wroko di yu o teki kan meki yu kon moro krosibei na Yehovah?

⁶ Soleki fa wi taki kaba, dan yu musu sabi san yu wani du nanga yu libi. Aksi yusrefi a sani disi: ’Fu san ede mi wani wan wroko?’ Efu yu e suku wan wroko fu di yu wani sorgu gi yusrefi èn gi yu osofamiri so taki unu kan tan dini Yehovah, dan Yehovah o blesi a muiti di yu e meki (Mat. 6:33). Yehovah sabi fa a musu yepi yu te yu lasi yu wroko noso te na ekonomia fu a kondre no e drai bun moro (Yes. 59:1). Te „tesi miti den sma di e dini Gado fayafaya, dan Yehovah sabi fa fu frulusu den”.​—2 Petr. 2:9.

⁷ Ma fa a de efu yu wani wan wroko fu di yu wani kon gudu? Kande yu o kon gudu trutru. Ma a kan tyari takru bakapisi kon gi yu te yu e wroko soso fu di yu wani kon gudu. (Leisi 1 Timoteyus 6:9, 10.) Te yu e poti tumusi furu prakseri na gudu noso te yu wani meki en na ini a grontapu, dan yu kan pori a matifasi di yu abi nanga Yehovah.

8, 9. San papa nanga mama musu hori na prakseri te a abi fu du nanga a wroko fu den èn fu san ede?

⁸ Efu yu na wan papa noso mama, dan prakseri sortu eksempre yu wani de gi yu pikin. San den e si te den e luku yu? Den e si taki yu wroko na a moro prenspari sani gi yu noso den e si taki yu matifasi nanga Yehovah moro prenspari gi yu? Efu yu e tan meki muiti fu kisi biginen noso fu meki furu moni, yu denki taki den pikin fu yu no o meki a srefi fowtu? Kande den no o lespeki yu so furu moro. Wan yongu Kresten sisa ben taki: „Sensi mi sabi mi papa, a wroko fu en na a moro prenspari sani gi en. Fosi, a ben gersi leki a ben e wroko tranga fu di a ben wani taki wi osofamiri abi wan bun libi. A ben wani sorgu bun gi wi. Ma na ini den yari di pasa, wan sani kenki. Na soso wroko a e wroko nomo. Dan a e tyari wan lo diri sani kon na oso di wi no abi fanowdu. Now sma sabi wi leki na osofamiri di abi furu moni. Den no e si wi leki sma di e gi trawan deki-ati fu du moro gi Yehovah.” A sisa taki dati a ben o de moro koloku efu en papa ben o yepi na osofamiri fu tan krosibei fu Yehovah, na presi fu wroko tranga fu meki furu moni.

⁹ Papa nanga mama, no meki a wroko fu unu pori a matifasi di unu abi nanga Yehovah. De wan bun eksempre gi den pikin fu yu. Sori den taki yu e bribi trutru taki moni nanga gudu a no a moro prenspari sani gi yu, ma wan bun matifasi nanga Yehovah.​—Mat. 5:3.

10. San wan yonguwan musu hori na prakseri te a o bosroiti san a o du nanga en libi?

¹⁰ Efu yu na wan yonguwan di e prakseri san yu o du nanga yu libi, dan fa yu kan teki wan koni bosroiti? Soleki fa wi taki kaba, dan yu musu sabi san yu wani du nanga yu libi. Kande yu e prakseri fu go na wan skoro pe yu o leri fu du wan spesrutu wroko. A wroko dati o yepi yu fu poti na anbegi fu Yehovah na a fosi presi? Noso a o pori a matifasi di yu abi nanga Yehovah? (2 Tim. 4:10) Yu wani de leki den sma fu grontapu di de koloku soso te den abi furu moni? Noso yu o frutrow na tapu Yehovah neleki David di ben taki: „Mi ben de wan yongu man, ma now mi kon owru. Toku mi no si noiti taki Gado libi wan reti-ati sma en wawan. Noiti mi no si taki den pikin fu en e waka e suku nyanyan” (Ps. 37:25). A de neleki te yu musu bosroiti sortu pasi yu o teki. Hori na prakseri taki wan fu den pasi kan pori a matifasi di yu abi nanga Yehovah. A trawan kan meki yu abi wan koloku libi. (Leisi Odo 10:22; Maleaki 3:10.) Sortu pasi yu o teki?a

PRISIRITEN

11. San Bijbel e taki fu prisiriten, ma san wi musu hori na prakseri?

¹¹ Bijbel no e tapu sma fu meki prisiri èn a no e taki dati prisiriten na lasiten. Paulus ben taigi Timoteyus na ini wan brifi: „Te wi e oefen a skin, dan dati bun gi wan tu sani nomo” (1 Tim. 4:8). Bijbel e taki srefi dati ’wan ten de fu lafu, fu dansi èn fu dyompodyompo fu prisiri’. A e sori tu taki a bun te wi e teki ten fu rostu (Preik. 3:4; 4:6). Ma efu yu no luku bun, prisiriten kan pori a matifasi di yu abi nanga Yehovah. Fa dati kan pasa? Disi kan pasa te wi abi prisiriten di no fiti noso te wi e gebroiki tumusi furu ten gi dati.

12. San yu musu hori na prakseri te yu e luku na sortu fasi yu o meki prisiri?

¹² Meki wi poti prakseri fosi na sortu fasi wi leki Kresten kan meki prisiri. A no de fu taki dati yu kan abi prisiri na wan fasi di fiti. Ma a tru taki Gado no lobi furu fu den sani di sma e du fu meki prisiri, fu di den abi fu du nanga ogridu, afkodrei èn nanga hurudu. Sobun, efu yu wani abi prisiriten, dan yu musu luku bun taki yu no e du sani di no fiti. Aksi yusrefi den sani disi: Sortu krakti den sani di mi e du fu meki prisiri, abi na mi tapu? Den e gi mi deki-ati fu lobi ogridu, fu wini fu trawan nomonomo, noso fu lobi a kondre fu mi moro iniwan sani? (Odo 3:31) Mi e lasi furu moni na den tapu? Efu trawan kon sabi na sortu fasi mi e meki prisiri, a o trobi a konsensi fu den? (Rom. 14:21) Sortu sma mi e miti te mi abi den sortu prisiriten dati? (Odo 13:20) A e gi mi a firi fu du sani di no bun?​—Yak. 1:14, 15.

13, 14. Fu san ede yu musu luku bun omeni ten yu o gebroiki fu meki prisiri?

¹³ Prakseri tu omeni ten yu e gebroiki fu meki prisiri. Aksi yusrefi: ’A e meki mi lasi someni ten taki mi no abi nofo ten gi a preikiwroko èn gi den konmakandra?’ Efu yu gebroiki tumusi furu ten fu meki prisiri, dan yu o si te fu kaba taki a no switi so, leki fa yu ben sa wani. Fu taki en leti, wi o firi moro switi te wi no e poti prisiriten na a fosi presi. Fu san ede? Fu di wi sabi taki wi du den moro prenspari sani fosi. Sobun, wi kan abi prisiri sondro taki wi kisi konsensi fonfon.​—Leisi Filipisma 1:10, 11.

¹⁴ Aladi a kan sori switi fu abi furu prisiriten, toku disi kan pori a matifasi di yu abi nanga Yehovah. Na dati pasa nanga Kim, wan sisa fu 20 yari. A taki: „Mi ben gwenti go na ala fesa. Ala freida, satra nanga sonde wan sani ben de fu du. Ma now mi kon si taki furu tra prenspari sani de fu du. Fu eksempre, leki pionier mi e opo siksi yuru mamanten fu go preiki. Sobun, mi no man go na presi te wán yuru noso tu yuru mamanten. Mi sabi taki a no fowtu ala ten fu go na fesa, ma den kan puru yu prakseri fu moro prenspari sani. Now mi e si taki prisiriten abi en presi.”

15. Fa papa nanga mama kan yepi den pikin fu abi prisiriten di bun gi den?

¹⁵ Papa nanga mama abi a frantwortu fu sorgu gi den pikin fu den. Den musu yepi den fu tan krosibei na Yehovah èn fu de koloku. Den musu sorgu tu taki ten na ten na osofamiri e meki prisiri. Efu yu na wan papa noso mama, no leri den pikin fu yu taki den no mag meki prisiri. Ma un musu sorgu taki unu no meki prisiri na wan fasi di no fiti kwetikweti gi wan Kresten (1 Kor. 5:6). Efu yu e prakseri bun fu a tori, yu o man feni fasi fu meki prisiri di bun gi na osofamiri fu yu.b Dati o yepi yu nanga yu pikin fu du sani di o meki yu kon moro krosibei na Yehovah.

FAMIRI

16, 17. Sortu sari sani miti furu papa nanga mama èn fa wi du sabi taki Yehovah e frustan fa den e firi?

¹⁶ A lobi di papa, mama nanga pikin abi gi makandra tranga srefisrefi. Yehovah e teki a lobi dati fu agersi a lobi di a abi gi en pipel (Yes. 49:15). Fu dati ede wi kan frustan taki wan sma e sari srefisrefi te wan famiriman gowe libi Yehovah. Wan sisa di abi wan umapikin di den puru fu a gemeente, taki: „Mi ben sari srefisrefi. Mi ben aksi misrefi fu san ede a gowe libi Yehovah. Mi ben feni taki na mi fowtu. Na fu mi ede meki a gowe libi Yehovah.”

¹⁷ Yehovah e frustan san yu e firi. A „ben e sari srefisrefi” di en fosi libisma manpikin nanga umapikin drai baka gi en. Bakaten a ben sari tu di furu sma di ben libi fosi a Frudu opo densrefi teige en (Gen. 6:5, 6). Efu noiti wan sma ben de na ini so wan situwâsi, dan a kan muilek gi en fu frustan fa wan sma e firi te so wan sani miti en. Toku a no ben o de wan koni sani fu horibaka gi wan famiriman di puru fu a gemeente, fu di dati kan pori a matifasi di yu abi nanga Yehovah. Ma san kan yepi yu te yu de nanga bigi sari fu di wan famiriman gowe libi Yehovah?

18. Fu san ede papa nanga mama no musu suku a fowtu na densrefi te wan pikin fu den gowe libi Yehovah?

¹⁸ No suku a fowtu na yusrefi. Yehovah gi ala libisma na okasi fu teki den eigi bosroiti èn ibri dopu famiriman musu „tyari en eigi lai” noso frantwortu (Gal. 6:5). Te yu luku en bun, dan gi Yehovah a no yu abi a fowtu, ma na a sma di sondu (Esek. 18:20). Wan tra sani di yu no musu du, na fu suku a fowtu na trawan. Abi lespeki gi den sani di Yehovah seti fu gi en pipel piri-ai. Kakafutu gi Didibri. No feti nanga den owruman di wani kibri a gemeente.​—1 Petr. 5:8, 9.

19, 20. (a) San papa nanga mama di abi pikin di puru fu a gemeente kan du te den e sari? (b) Sortu howpu den papa nanga mama disi kan abi?

¹⁹ Ma efu yu hori Yehovah na ati, dan dati kan pori a matifasi di yu abi nanga en. A sani di a famiriman fu yu di yu lobi musu kon frustan, na taki yu no o drai baka gi Yehovah fu en ede, awinsi unu na famiri. Sobun, fu man feti nanga a sari di yu e sari, yu musu tan abi wan bun matifasi nanga Yehovah. No drai baka gi yu Kresten brada nanga sisa di e dini Yehovah ete (Odo 18:1). Begi Yehovah èn fruteri en fa yu e firi (Ps. 62:7, 8). No suku ala sortu sani fu abi demakandra nanga a famiriman di puru fu a gemeente. Fu eksempre, no pruberi fu bèl en, sms en, noso seni e-mail gi en (1 Kor. 5:11). Abi furu fu du na ini a diniwroko (1 Kor. 15:58). A sisa di wi kari didyonsro taki: „Mi sabi taki mi musu abi furu fu du na ini a diniwroko gi Yehovah èn taki mi musu meki muiti fu abi wan tranga bribi. Na so mi o man yepi mi umapikin te a drai kon baka na Yehovah.”

²⁰ Bijbel e taki dati lobi „e howpu ala sani” (1 Kor. 13:4, 7). A no fowtu fu howpu taki a lobiwan fu yu o drai kon baka. Ibri yari furu sma di sondu e kon baka na ini na organisâsi fu Yehovah fu di den abi berow. Yehovah no e hori den sma disi na ati te den sori berow. Na presi fu dati, a „de klariklari fu gi sma pardon”.​—Ps. 86:5.

TEKI KONI BOSROITI

21, 22. Sortu bosroiti yu wani teki na ini yu libi?

²¹ Yehovah gi libisma na okasi fu man teki den eigi bosroiti. (Leisi Deuteronomium 30:19, 20.) Ma disi wani taki dati wi abi a frantwortu fu teki bun bosroiti. Ibri Kresten musu aksi ensrefi: ’Sortu pasi mi e waka? Mi meki taki mi wroko, prisiriten, noso famiri pori a matifasi di mi abi nanga Yehovah?’

²² Yehovah lobi en pipel ala ten. A wan-enkri fasi fa wi kan pori a matifasi di wi abi nanga en, na te wi e teki don bosroiti (Rom. 8:38, 39). Ma disi no abi fu pasa nanga yu! Abi a fasti bosroiti fu no meki noti pori a matifasi di yu abi nanga Yehovah. Na ini a tra artikel wi o taki fu ete fo fasi fa wi kan sori taki wi wani tan krosibei fu en.

1, 2. (a) Fa Satan e pruberi fu kori sma? (b) San o yepi wi fu kon krosibei na Gado?

YEHOVAH GADO meki wi nanga a firi fu wani de wan mati fu en. Ma Satan wani taki wi musu denki leki fa en e denki. A wani taki wi musu denki taki wi no abi Yehovah fanowdu. A sani dati no tru kwetikweti, ma sensi a ten di a kori Eva nanga a lei disi na ini a dyari fu Eden, a e tan panya a lei disi (Gen. 3:4-6). Dusundusun yari kaba furu libisma e meki a srefi fowtu.

² Koloku taki wi no abi fu meki a srefi fowtu dati. Bijbel e taki: „Wi sabi san a abi na prakseri” (2 Kor. 2:11). Satan wani pori a matifasi di wi abi nanga Yehovah èn dati meki a e suku fu kori wi fu teki don bosroiti. Ma soleki fa a tra artikel ben sori wi, dan wi kan teki koni bosroiti te a abi fu du nanga wi wroko, prisiriten èn nanga famiri. Na artikel disi o taki fu ete fo sani di Satan e gebroiki fu kori wi. Wan fu den sani disi na computer noso tra nyun sani di sma meki. Den tra sani di a e gebroiki fu kori wi na wi gosontu, moni, nanga heimemre. Efu wi e teki koni bosroiti, wi kan „kon krosibei na Gado”.​—Yak. 4:8.

COMPUTER NANGA TRA SANI DI SMA MEKI

3. Sortu bun sani noso fowtu sani sma kan du nanga sani soleki computer?

³ Na heri grontapu, sma abi computer nanga tra nyun sani soleki cèl, telefisi nanga DVD. Den sani disi kan bun fu gebroiki. Ma efu wi no e gebroiki den na wan bun fasi, dan den kan pori a matifasi di wi abi nanga wi hemel Tata. Fu eksempre, wan computer na wan bun sani. Den brada gebroiki computer fu meki a tijdschrift di yu e leisi nownowde. Wi kan gebroiki wan computer fu ondrosuku sani, noso fu taki nanga sma. Son leisi wi kan gebroiki en tu fu abi pikin prisiri. Ma efu wi lobi computer trutru, dan a kan pasa taki wi e prakseri soso computer èn wi kan lasi furu ten na en tapu. Furu reklame de di e gi wi a denki taki wi musu abi ibri nyun sani di e kon na doro. Wan yonguman ben wani wan fu den pikin plata computer so te, taki sondro fu sma sabi a seri wan niri fu en fu bai a computer. Dati na wan sari tori!

4. San wan Kresten brada du fu tapu nanga a gwenti fu gebroiki en computer tumusi furu?

⁴ Ma san moro ogri, na taki te wi e gebroiki den sani disi tumusi furu noso te wi e gebroiki den na wan fowtu fasi, dan den kan pori a matifasi di wi abi nanga Yehovah. Jon,a wan Kresten brada di abi 28 yari, taki: „Mi sabi taki Bijbel e sori wi taki wi musu ’gebroiki a ten fu wi na wan koni fasi’. Ma te mi e sidon na baka a computer, mi no man tapu.” Jon ben gwenti fu go tapu Internet te latilati neti. A taki: „O moro mi ben weri, o moro muilek a ben de gi mi fu stop taki nanga sma na tapu Internet noso fu luku syatu video. A no ala ten den video disi ben de bunwan.” Fu man tapu nanga a takru gwenti disi, Jon poti wan programa na tapu en computer di e kiri a computer na a yuru di Jon musu go sribi.​—Leisi Efeisesma 5:15, 16.

5, 6. (a) Sortu frantwortu papa nanga mama abi? (b) San papa nanga mama kan du fu yepi den pikin fu feni bun mati?

⁵ Papa nanga mama, a no ala leisi te den pikin fu yu de na tapu a computer yu musu sidon nanga den. Ma toku a bun fu sabi san den e du na tapu a computer. No libi den meki den luku morsu sani tapu Internet, noso prei game pe sma e du soso ogri. No libi den tu fu luku afkodrei sani noso fu taki nanga sma di no de bun mati. Efu yu e libi den meki den du san den wani soso fu di yu no wani meki den weri yu ede, dan den kan denki taki yu no abi problema nanga den sani disi. Na yu abi a frantwortu fu yepi yu pikin, awinsi den na tini kaba. Noso den sani dati o pori a matifasi di den abi nanga Yehovah. Srefi wan meti e kibri den pikin fu en gi ogri. Fu eksempre, Bijbel e sori san wan beer e du te wan sma e suku fu du ogri nanga den pikin fu en.​—Luku Hosea 13:8.

⁶ Yepi yu pikin fu suku bun mati na mindri yongu nanga owru Kresten brada nanga sisa di de wan bun eksempre. Hori na prakseri taki den pikin abi yu fanowdu èn na yu musu meki ten gi den. Sobun, meki ten fu lafu nanga den, fu prei nanga den, fu wroko makandra nanga den èn fu yepi den meki den „kon krosibei na Gado”.b

WI GOSONTU

7. Fu san ede wi alamala wani tan gosontu?

⁷ Furu leisi sma e aksi wi: „Fa yu e firi tide?” Na aksi disi e memre wi na wan problema di wi leki libisma abi dusundusun yari kaba. Sensi wi fosi papa nanga mama meki Satan kori den fu gowe libi Yehovah, wi alamala e siki. Satan lobi te wi e siki, fu di a sabi taki a o moro muilek gi wi fu dini Yehovah. Boiti dati, te wi dede wi no man dini Gado kwetikweti (Ps. 115:17). Sobun, wi e du ala sani wi man fu tan gosontu. Wi musu broko wi ede tu nanga a gosontu fu wi brada nanga sisa.

8, 9. (a) Fu san ede a gosontu fu wi no musu de a wan-enkri sani di wi e prakseri? (b) Fu san ede a bun fu tan abi prisiri?

⁸ Ma a gosontu fu wi no musu de a wan-enkri sani di wi e prakseri. Son sma lobi taki fu ala sortu spesrutu nyanyan di sma musu nyan fu tan gosontu. Den e gi trawan deki-ati tu fu suku ala sortu datrayepi noso fu dringi ala sortu dresi. Den sma disi e taki nanga moro faya fu den sani disi leki te den ben o taki fu a bun nyunsu fu Gado Kownukondre. Kande den e bribi taki den e yepi trawan. Ma te wi de na a Kownukondre zaal noso na den bigi konmakandra, dan a no fiti fu gi sma deki-ati fu bai ala sortu dresi noso ala sortu sani fu moi a skin. Wi no musu seri den sani disi drape tu. Fu san ede?

⁹ Wi e go na den konmakandra fu taki fu Bijbel èn fu kisi moro prisiri di Gado e gi wi nanga yepi fu en santa yeye (Gal. 5:22). Den konmakandra fu wi no seti fu taki fu ala sortu datrayepi noso dresi, awinsi na sma srefi aksi wi fu taki fu a tori disi. Efu wi gebroiki den konmakandra fu taki fu den sani disi, sma kan lasi den prisiri (Rom. 14:17). Ibri sma musu bosroiti gi ensrefi san a wani du fu abi wan moro bun gosontu. Boiti dati, nowan sma man dresi ala siki. Srefi a moro bun datra e kon owru èn e siki, èn te fu kaba a e dede. Awinsi o furu wi e broko wi ede nanga wi gosontu, wi no kan meki wi libi kon moro langa (Luk. 12:25). Ma „wan ati di e prisiri, bun leki dresi”.​—Odo 17:22.

10. (a) O ten wan sma moi gi Yehovah? (b) O ten wi o de gosontu dorodoro?

¹⁰ A no fowtu fu wani abi wan moi skin nanga wan moi fesi. Ma wi no musu pruberi ala sortu fasi fu tan yongu nomonomo. No feti fu puru den sani di e sori taki yu e kon owru. A kan yepi trawan fu si taki yu na wan lepi sma. Boiti dati, den kan abi moro lespeki gi yu. Bijbel e taki: „Weti wiwiri na wan kroon di e moi na ede fu den wan di e waka a reti pasi” (Odo 16:31). Na so Yehovah e prakseri fu sma di kon owru èn wi musu pruberi fu si wisrefi leki fa en e si wi. (Leisi 1 Petrus 3:3, 4.) Sobun, a no ben o de wan koni sani srefisrefi fu du ala sortu oparâsi èn dringi ala sortu dresi di kan pori a gosontu fu wi noso di kan kiri wi srefi, soso fu di wi wani tan moi. Na „a prisiri di Yehovah e gi” e meki wan sma moi, awinsi o owru a de noso awinsi o gosontu a de (Neh. 8:10). Soso na ini a nyun grontapu wi o gosontu dorodoro èn wi o kon yongu baka (Yob 33:25; Yes. 33:24). Ma solanga a ten dati no doro, wi musu teki koni bosroiti èn wi musu abi bribi. Disi o yepi wi fu tan krosibei na Yehovah èn fu no broko wi ede tumusi furu nanga a gosontu fu wi.​—1 Tim. 4:8.

MONI

11. Fa moni kan kori wan sma?

¹¹ A no fowtu fu abi moni èn a no fowtu tu fu abi wan bisnis (Preik. 7:12; Luk. 19:12, 13). Ma te wi ’lobi moni’, dan wi kan de seiker taki disi o pori a matifasi di wi abi nanga Yehovah (1 Tim. 6:9, 10). Den wortu „broko-ede fu a grontapu disi” wani taki dati wan sma e broko en ede tumusi nanga den sani di a abi fanowdu. Den kan pori a matifasi di yu a abi nanga Yehovah. Na so a de tu nanga „a bedrigifasi fu gudu”. Dati na te wan sma denki taki gudu kan meki a de koloku èn taki a no o abi nowan broko-ede (Mat. 13:22). Yesus ben sori krin taki „nowan sma” kan dini Gado nanga gudu na srefi ten.​—Mat. 6:24.

12. Sortu sani sma e du na ini a ten disi soso fu di den wani meki bigi moni? San o yepi wi fu no meki den kori wi?

¹² Te wan sma denki taki moni na a moro prenspari sani, dan dati kan kori en fu du sani di no bun (Odo 28:20). Fu di son sma ben wani kon gudu esi-esi, meki den go bai lòt. Son brada noso sisa bigin nanga wan bisnis fu di den ben denki taki den ben o meki furu moni na ini wan syatu pisi ten. Den pramisi trawan na ini a gemeente srefi taki efu den ben o go na ini a bisnis dati, den ben o meki furu moni tu. Tra brada aksi sma na ini a gemeente fu leni moni fu den fu opo wan bisnis èn den pramisi den taki den ben o pai den a moni dati baka nanga bun furu rente. No meki bigi-ai breni yu, noso sma o kori yu. Teki koni bosroiti. Awinsi wan sma pramisi yu taki yu o meki bigi moni, no de gaw fu bribi en.

13. Fa Yehovah wani taki wi musu si moni?

¹³ Te wi e si „a Kownukondre nanga Gado en retidu” leki a moro prenspari sani na ini wi libi, dan Yehovah o blesi a muiti di wi e du fu feni san wi abi fanowdu (Mat. 6:33; Ef. 4:28). Te wi e wroko tumusi langa, dan wi skin kan kon weri èn wi kan fadon na sribi na den konmakandra. Ma Yehovah no wani dati pasa nanga wi. A no wani tu taki wi e sidon na den konmakandra e broko wi ede nanga moni. Na ini a grontapu yu abi furu sma di e bribi taki te den e meki furu moni, den o abi wan bun owru dei èn a libi fu den o go bun. Nofo tron den wani taki den pikin fu den e feti na baka gudu tu. Yesus ben sori taki a no de wan koni sani fu denki so. (Leisi Lukas 12:15-21.) A tori disi e meki wi prakseri Gehasi di ben denki taki a ben kan feti na baka gudu sondro taki dati ben o pori a matifasi di a ben abi nanga Yehovah.​—2 Kow. 5:20-27.

14, 15. Fu san ede a no de wan koni sani fu denki taki moni o meki wi moro koloku? Gi wan eksempre.

¹⁴ Son leisi sma si fa wan aka fanga wan fisi di ben hebi tumusi gi en. Den si fa na aka sungu fu di a no ben wani lusu a fisi. So wan sani kan pasa tu nanga wan Kresten? Wan owruman di nen Alex e taki: „Mi ben abi a gwenti fu luku bun fa mi e gebroiki mi moni. Fu eksempre, efu mi ben puru tumusi furu sopo na ini a batra, dan mi ben e poti pikinso fu en na ini a batra baka.” Ma toku Alex bigin nanga wan bisnis fu meki moro moni fu di a ben prakseri taki a ben o man tapu nanga wroko èn go pionier. A bigin poti moro prakseri na a bisnis fu en. Te fu kaba a gebroiki ala en moni èn a go leni moni srefi fu meki moro moni. Ma a lasi ala sani. Alex taki: „Mi ben de nomonomo fu feni mi moni baka.” A ben denki taki te a ben o go doro nanga a bisnis fu en, dan a ben o bigin meki furu moni baka.

¹⁵ Omeni mun langa Alex ben e prakseri soso a bisnis fu en. A ben muilek gi en fu poti a diniwroko fu Gado na a fosi presi èn a lasi sribi tu. Ma noiti moro a bisnis fu en drai bun baka. Alex lasi ala en moni èn a ben abi fu seri en oso. A feni taki a tyari wan lo problema kon gi en osofamiri, ma a leri wan prenspari sani tu. A taki: „Now mi sabi taki efu wan sma denki taki a grontapu fu Satan o man yepi en fu abi wan bun libi noso fu meki a de koloku, a o si taki dati no de so kwetikweti” (Odo 11:28). Efu wi e frutrow na tapu moni noso efu wi wani meki bigi moni, dan wi e sori taki wi e frutrow na tapu a grontapu fu Satan, „a gado fu a grontapu disi” (2 Kor. 4:4; 1 Tim. 6:17). Sensi a ten dati Alex kenki a fasi fa a ben gwenti libi èn now a abi moro ten fu preiki „a bun nyunsu”. Alex taki dati en nanga en osofamiri kon moro koloku èn den kisi wan moro bun matifasi nanga Yehovah.​—Leisi Markus 10:29, 30.

HEIMEMRE

16. (a) Fu san ede a no fowtu fu breiti nanga wan sani di yu du? (b) San kan pasa te wi abi heimemre?

¹⁶ Wi musu breiti taki wi de wan Kotoigi fu Yehovah (Yer. 9:24). Sobun, pruberi ala ten fu teki bun bosroiti èn fu du san Gado e aksi fu wi. Ma te wi e poti tumusi furu prakseri na a posisi di wi abi noso na a fasi fa wi e denki fu sani, dan dati kan pori a matifasi di wi abi nanga Yehovah.​—Ps. 138:6; Rom. 12:3.

17, 18. (a) Sortu eksempre wi abi na ini Bijbel fu sma di ben abi sakafasi èn sma di ben abi heimemre? (b) San yepi wan brada fu no meki heimemre pori a matifasi di a ben abi nanga Yehovah?

¹⁷ Bijbel abi furu eksempre fu sma di ben abi heimemre èn fu sma di ben abi sakafasi. Fu di Kownu David ben abi sakafasi, meki a suku yepi na Yehovah èn Yehovah blesi en (Ps. 131:1-3). Ma Yehovah strafu Kownu Nebukadnesar nanga Kownu Belsasar fu di den ben abi heimemre (Dan. 4:30-37; 5:22-30). Son leisi wi srefi kan kon na ini wan situwâsi di e sori wi krin efu wi abi sakafasi noso heimemre. Ryan, wan dinari ini a diniwroko di abi 32 yari, ben froisi go na wan tra gemeente. Ryan taki: „Mi ben denki taki mi no ben o abi fu wakti langa fu tron owruman. Ma baka wán yari mi no ben tron owruman ete.” Yu denki taki Ryan ben o hori den owruman fu a gemeente na ati noso taki en ati ben o bron nanga den taki den no meki a tron owruman? Yu denki taki disi ben o tapu en fu go na den konmakandra noso taki heimemre ben o pori a matifasi di a abi nanga Yehovah èn nanga a pipel fu En? San yu ben o du?

¹⁸ Ryan taki: „Mi leisi ala artikel di e sori san wan sma musu du te sani no e waka leki fa a ben fruwakti” (Odo 13:12). A taki moro fara: „Mi kon si taki mi ben musu leri fu abi pasensi nanga sakafasi. Mi ben musu gi Yehovah na okasi fu gi mi leri.” Ryan leri fu no poti prakseri na ensrefi, ma na sani di a ben kan du fu yepi tra sma na ini a gemeente èn na ini a preikiwroko. Syatu baka dati a ben abi furu Bijbelstudie di ben e go na fesi. A taki: „Mi no ben fruwakti disi, ma baka wán nanga afu yari mi tron owruman. Mi ben prisiri so te nanga a preikiwroko, taki mi no ben broko mi ede moro nanga a tori disi.”​—Leisi Psalm 37:3, 4.

TAN KROSIBEI NA YEHOVAH!

19, 20. (a) San wi musu du fu no meki sani di wi gwenti du ibri dei, pori a matifasi di wi abi nanga Yehovah? (b) Sortu eksempre wi abi fu sma di ben tan krosibei na Yehovah?

¹⁹ Nowan fu den seibi sani di kari na ini na artikel disi èn na ini a trawan na wan fowtu sani. Wi e prisiri taki wi na futuboi fu Yehovah. Wan koloku osofamiri nanga wan bun gosontu na tu fu den moi sani di Yehovah gi wi. Wi kon si tu taki wroko nanga moni kan yepi wi fu feni den sani di wi abi fanowdu. Wi sabi taki prisiriten kan meki wi firi bun èn wi kan gebroiki sani soleki computer heri bun. Ma te wi e feti na baka den sani disi, te wi e gebroiki ala wi ten fu abi den, noso te den e meki taki wi no e poti na anbegi fu wi na a fosi presi moro, dan dati kan pori a matifasi di wi abi nanga Yehovah.

²⁰ Wi sabi taki na dati Satan wani. Ma yu musu meki tranga muiti fu no meki dati pasa nanga yu noso nanga yu osofamiri (Odo 22:3). Kon moro krosibei na Yehovah èn no gowe libi en. Furu eksempre de na ini Bijbel fu sma di ben man du disi. Heinok nanga Noa „ben e waka nanga a tru Gado” (Gen. 5:22; 6:9). Moses tan bribi na ini Gado èn a „horidoro neleki a ben e si a sma di wi no man si nanga wi ai” (Hebr. 11:27). Ala ten Gado horibaka gi Yesus fu di a ben e tan du san en hemel Tata ben wani (Yoh. 8:29). Teki na eksempre fu den sma disi. „Ala ten un musu prisiri. Begi doronomo. Taki Gado tangi gi ala sani” (1 Tes. 5:16-18). No meki nowan sani pori a matifasi di yu abi nanga Yehovah!