Pe joe sa tanapoe te joe de na fesi a kroetoe stoeroe?

„Te a Manpikin foe libisma e kon na ini en glori, èn ala den engel nanga en, dan a sa go sidon na tapoe en glori kownoestoeroe.” — MATEUS 25:31.

1-3. Sortoe reide wi abi foe de nanga prisiri na ini a tori foe retidoe?

’NA EN DOE EN NOSO A NO EN?’ Foeroe sma e aksi densrefi a sani disi, te den e jere fa a waka nanga son kroetoe afersi. Kroetoeman nanga den memre foe a jury e proeberi foe de eerlijk kande, ma a de so taki ala ten retidoe e wini? Joe no jere foe na onregtfardikifasi èn te sani no ben go na wan eerlijk fasi na ini a kroetoe afersi? So wan onregtfardikifasi a no wan njoen sani, soleki fa wi e si na ini na agersitori foe Jesus di wi e feni na Lukas 18:1-8.

² Awansi san joe ondrofeni nanga a fasi fa libisma e sori retidoe, loekoe den kaba wortoe foe Jesus: „Gado no sa meki den wan di a froekisi, èn di e bari kari en dei nanga neti kisi reti dan . . . ? Mi e taigi oenoe: Heri esi A sa meki den kisi reti. Ma tokoe, te a Manpikin foe libisma doro, dan a sa feni bribi na grontapoe troetroe?”

³ Ija, Jehovah sa sorgoe taki den foetoeboi foe en sa kisi retidoe te foe kaba. Jesus de na ini a tori toe, spesroetoe now foe di wi e libi na ini „den lasti dei” foe a disiten ogri seti. Ete wan sjatoe pisi ten de fosi Jehovah sa gebroiki en makti Manpikin foe poeroe ogridoe na grontapoe krinkrin (2 Timoteus 3:1; 2 Tesalonikasma 1:7, 8; Openbaring 19:11-16). Wi kan kon sabi moro krin san Jesus e doe, te wi e loekoe wàn foe den lasti agersitori di a ben froeteri, a wan di den e kari na agersitori foe den skapoe nanga den bokoboko nofo tron.

4. Fa wi froestan a pisi ten na ini san na agersitori foe den skapoe nanga den bokoboko e feni presi, ma foe san ede wi sa poti prakseri na tapoe na agersitori now? (Odo 4:18)

⁴ Langa ten wi froestan taki na agersitori ben prenki Jesus di go sidon leki Kownoe na ini 1914 èn taki a e koti kroetoe foe sensi a ten dati — têgo libi gi sma di e sori foe de leki skapoe, dede foe ala ten gi den bokoboko. Ma te wi e loekoe na agersitori baka, dan wi e kon froestan na wan tra fasi o ten na agersitori sa feni presi èn san a e prenki. A meki kon moro soifri foe sani disi, e poti moro krakti na tapoe o prenspari a preikiwroko foe wi de èn san a fasi fa sma e doe wan sani na tapoe a preikiwroko, wani taki. Foe kon si sortoe gron wi abi foe a froestan disi di wi kon froestan na agersitori moro fini, dan meki wi go loekoe san bijbel e sori foe Jehovah nanga Jesus, di ala toe na Kownoe nanga Kroetoeman.

Jehovah leki a Moro Hei Kroetoeman

5, 6. Foe san ede a fiti foe prakseri foe Jehovah leki Kownoe èn leki Kroetoeman?

⁵ Jehovah e tiri na universum nanga makti di a abi na tapoe ala den sani di a meki. A no abi wan bigin èn a no abi wan kaba, en na „Kownoe foe ten di no abi kaba” (1 Timoteus 1:17; Psalm 90:2, 4; Openbaring 15:3). A abi a makti foe meki reglementi noso wet, èn foe meki den disi wroko. Ma a makti foe en wani taki so srefi dati a de wan Kroetoeman. Jesaja 33:22 e taki: „Jehovah na wi Kroetoeman, Jehovah na a Sma di e gi wi Wet, Jehovah na wi Kownoe; ensrefi sa froeloesoe wi.”

⁶ Langa ten kaba den foetoeboi foe Gado si Jehovah leki a Kroetoeman na ini kroetoe afersi nanga strei. Foe eksempre, baka di „a Kroetoeman foe heri grontapoe” ben wegi a boeweisi na ini a tori foe na ogridoe foe Sodom nanga Gomora go-kon, a ben kroetoe den sma foe ala toe foto taki den ben froedini pori èn a ben sorgoe taki a regtfardiki kroetoe dati ben doe (Genesis 18:20-33; Job 34:10-12). A moesoe de wan troetroe djaranti gi wi foe sabi taki Jehovah na wan regtfardiki Kroetoeman di kan tjari den kroetoe foe en kon ala ten!

7. Fa Jehovah ben handri leki Kroetoeman te a ben handri nanga Israèl?

⁷ Na Israèl foe owroeten, na Jehovah ensrefi ben leisi kroetoestrafoe son tron. Na ini a ten dati joe no ben sa de korostoe foe sabi taki wan volmaakti Kroetoeman ben teki bosroiti na ini afersi? (Lefitikus 24:10-16; Numeri 15:32-36; 27:1-11) Gado ben sorgoe toe gi „kroetoe bosroiti” di ben de boen markitiki foe hori kroetoe (Lefitikus 25:18, 19; Nehemia 9:13; Psalm 19:9, 10; 119:7, 75, 164; 147:19, 20). En na „Kroetoeman foe heri grontapoe”, so boen a abi krakti na tapoe wi alamala. — Hebrewsma 12:23.

8. Sortoe prenspari fisjoen Danièl ben kisi?

⁸ Foe a tori disi wi abi a boeweisi foe wan „sma di si nanga en eigi ai”. A profeiti Danièl ben kisi wan fisjoen pe a ben si takroe sortoe meti di ben prenki tiri noso grontapoemakti (Danièl 7:1-8, 17). A ben taki moro fara: „Den ben poti kownoestoeroe èn a Graniwan ben go sidon na tapoe. En krosi ben weti leki snew” (Danièl 7:9). Loekoe taki Danièl ben si kownoestoeroe „èn a Graniwan [Jehovah] ben go sidon” na tapoe. Aksi joesrefi: ’Danièl ben si Gado e kon tron Kownoe?’

9. San na wán sani di ’a go di [wan sma] go sidon’ na tapoe wan kownoestoeroe wani taki? Gi eksempre.

⁹ We, te wi e leisi taki wan sma „ben go sidon” na tapoe wan kownoestoeroe, dan wi ben sa kan denki foe a tron di a sma disi e tron wan kownoe, bika son tron bijbel e taki na ini den sortoe wortoe dati. Foe eksempre: „Di [Simri] ben bigin tiri, a momenti di a ben go sidon na tapoe en kownoestoeroe, a . . .” (1 Kownoe 16:11; 2 Kownoe 10:30; 15:12; Jeremia 33:17). Wan profeititori di abi foe doe nanga a Mesias ben taki: „A moesoe go sidon èn tiri na tapoe en kownoestoeroe.” Foe dati ede, foe ’go sidon na tapoe wan kownoestoeroe’ kan wani taki foe tron kownoe (Sakaria 6:12, 13). Den e taki foe Jehovah leki wan Kownoe di e sidon na tapoe wan kownoestoeroe (1 Kownoe 22:19; Jesaja 6:1; Openbaring 4:1-3). En na „Kownoe foe ten di no abi kaba”. Ma tokoe di a ben froeklari wan njoen fasi foe soevereiniteit, sma ben kan taki dati a ben tron Kownoe, neleki a ben go sidon ete wan leisi baka na tapoe en eigi kownoestoeroe. — 1 Kroniki 16:1, 31; Jesaja 52:7; Openbaring 11:15-17; 15:3; 19:1, 2, 6.

10. San ben de wan prenspari wroko di kownoe foe Israèl ben moesoe doe? Gi wan eksempre.

¹⁰ Ma djaso wan prenspari sani de: Wan prenspari sani di kownoe foe fositen ben moesoe doe, ben de taki den ben moesoe hori kroetoe afersi èn leisi kroetoestrafoe (Odo 20:8; 29:14). Memre a koni kroetoe foe Salomo di toe oema ben taki dati a srefi beibi ben de foe den ala toe (1 Kownoe 3:16-28; 2 Kroniki 9:8). Wan foe den presi pe a ben tiri ben de „a Gadri foe a Kownoestoeroe pe a ben doe kroetoewroko”, di den ben kari toe „a gadri foe hori kroetoe” (1 Kownoe 7:7). Den ben kari Jerusalem a presi pe „den kownoestoeroe foe hori kroetoe ben de” (Psalm 122:5). A de krin, taki ’foe go sidon na tapoe wan kownoestoeroe’, kan wani taki toe a gebroiki di wan sma e gebroiki en makti leki kroetoeman. — Exodus 18:13; Odo 20:8.

11, 12. (a) San a sidon di Jehovah ben go sidon ben wani taki, soleki fa den e taki foe dati na Danièl kapitel 7? (b) Fa tra tekst e sori taki a troe taki Jehovah e go sidon foe koti kroetoe?

¹¹ Now meki wi drai go baka na a presi pe Danièl ben si ’a Graniwan e go sidon’. Danièl 7:10 e taki moro fara: „A Kroetoe ben go sidon, èn den ben opo boekoe”. Ija, a Graniwan ben sidon foe leisi kroetoestrafoe na ini a tori foe a tiri foe grontapoe èn foe kroetoe a Manpikin foe libisma taki a ben warti foe go tiri (Danièl 7:13, 14). Baka dati wi e leisi taki „a Graniwan ben kon èn a ben leisi kroetoestrafoe srefi gi a boen foe den santawan”, den wan di ben kisi kroetoe taki den boen foe tiri makandra nanga a Manpikin foe libisma (Danièl 7:22). Te foe kaba, „a Kroetoe srefi ben go sidon” èn a ben leisi kroetoestrafoe di no ben boen gi a lasti grontapoemakti. — Danièl 7:26.a

¹² Foe dati ede, a si di Danièl ben si Gado ’e go sidon na tapoe wan kownoestoeroe’ ben wani taki dati A ben kon foe leisi kroetoestrafoe. Bifo disi, David ben singi: „Joe [Jehovah] tjari kroetoestrafoe kon foe mi ede èn foe na afersi foe mi; joe sidon na tapoe a kownoestoeroe, e hori kroetoe nanga regtfardikifasi” (Psalm 9:4, 7). Èn Joèl ben skrifi: „Meki den nâsi opo èn kon na a lagi presi foe Josafat; bika na drape mi [Jehovah] sa go sidon foe kroetoe ala den nâsi.” (Joèl 3:12; teki gersi Jesaja 16:5.) Jesus so srefi Paulus ben kon na ini situwâsi pe den sma kroetoe den, èn pe wan libisma ben sidon arki wan kroetoe afersi èn leisi kroetoestrafoe.b — Johanes 19:12-16; Tori foe den Apostel 23:3; 25:6.

A posisi foe Jesus

13, 14. (a) Sortoe djaranti a pipel foe Gado ben abi taki Jesus ben sa tron Kownoe? (b) O ten Jesus ben go sidon na tapoe en kownoestoeroe, èn na sortoe fasi a ben tiri foe sensi 33 G.T. te leki now?

¹³ Jehovah na Kownoe nanga Kroetoeman toe. Ma fa a de nanga Jesus? Na engel di ben meki bekènti taki a ben o gebore, ben taki: „Jehovah Gado sa gi en a kownoestoeroe foe en papa David, . . . èn no wan kaba sa kon na en kownoekondre” (Lukas 1:32, 33). Jesus ben sa de erfgenaam foe a kownoekondre foe David foe têgo (2 Samuèl 7:12-16). A ben o tiri na hemel, bika David ben taki: „Den wortoe foe Jehovah na mi Masra [Jesus] na: ’Sidon na mi reti anoe te leki mi poti joe feanti leki wan foetoebangi gi joe foetoe.’ A tiritiki foe joe krakti Jehovah sa seni go foe Sion, e taki: ’Go poti na joe ondro na mindri foe joe feanti.’” — Psalm 110:1-4.

¹⁴ O ten dati ben o de? Jesus no ben tiri leki Kownoe di a ben de wan libisma (Johanes 18:33-37). Na ini 33 G.T. a dede, a ben kisi wan opobaka, èn a ben opo go na hemel. Hebrewsma 10:12 e taki: „A man disi ben tjari wan ofrandi gi sondoe foe ala ten èn a ben go sidon na a reti anoe foe Gado.” Sortoe makti Jesus ben abi? „[Gado]” ben poti en sidon na en reti anoe na den hemel kondre, hei srefisrefi moro ibri tiri nanga tirimakti nanga makti nanga edeman . . . èn a ben meki en edeman na tapoe ala sani di abi foe doe nanga a gemeente” (Efeisesma 1:20-22). Foe di Jesus ben abi makti leki kownoe na tapoe den kresten na a ten dati, meki Paulus ben kan skrifi taki Jehovah „ben froeloesoe wi foe a makti foe doengroe èn ben tjari wi kon na ini a kownoekondre foe a Manpikin foe en lobi”. — Kolosesma 1:13; 3:1.

15, 16. (a) Foe san ede wi e taki dati Jesus no ben tron Kownoe foe Gado Kownoekondre na ini 33 G.T.? (b) O ten Jesus ben bigin tiri na ini Gado Kownoekondre?

¹⁵ Ma na a ten dati, Jesus no ben wroko leki Kownoe nanga Kroetoeman foe den nâsi. A ben go sidon sei Gado, e wakti a ten te a ben o wroko leki Kownoe foe Gado Kownoekondre. Paulus ben skrifi foe en: „Foe sortoewan foe den engel a taki wan ten: ’Go sidon na mi reti anoe te leki mi poti joe feanti leki wan foetoebangi gi joe foetoe’?” — Hebrewsma 1:13.

¹⁶ Jehovah Kotoigi tjari foeroe boeweisi kon na doro kaba taki a pisi ten di Jesus ben e wakti, ben kaba na ini 1914 di a ben tron tiriman foe Gado Kownoekondre na den hemel di wi no kan si. Openbaring 11:15, 18 e taki: „A kownoekondre foe grontapoe ben tron a kownoekondre foe wi Masra nanga en Krestes, èn a sa tiri leki kownoe foe têgo èn foe ala ten.” „Ma den nâsi ben kon foeroe nanga atibron, èn joe eigi atibron ben kon”. Ija, den nâsi ben sori atibron gi makandra na ini a Fosi Grontapoefeti (Lukas 21:24). Den feti, den gronseki, den pestsiki, den angriten, nanga den srefi sortoe sani disi di wi si foe sensi 1914 e sori wi taki a troe taki Jesus e tiri now na ini Gado Kownoekondre, èn taki a lasti kaba foe grontapoe de krosibei. — Mateus 24:3-14.

17. Sortoe prenspari sani wi kon si te so fara?

¹⁷ Foe taki en sjatoe baka: Wi kan taki, dati Gado e sidon na tapoe wan kownoestoeroe leki Kownoe, ma ini wan tra situwâsi a kan go sidon na tapoe en kownoestoeroe foe koti kroetoe. Na ini 33 G.T. Jesus ben sidon na a reti anoe foe Gado, èn now a de Kownoe foe a Kownoekondre. Ma Jesus, di e tiri now leki Kownoe, na wan Kroetoeman toe? Èn foe san ede wi moesoe poti prakseri na tapoe disi, spesroetoe na ini a ten disi?

18. Sortoe boeweisi de taki Jesus ben sa de Kroetoeman toe?

¹⁸ Jehovah, di abi a reti foe poti kroetoeman na wroko, ben teki Jesus leki wan Kroetoeman di ben wroko akroederi den markitiki foe En. Jesus ben sori disi di a ben taki foe sma di e kon na libi na jejefasi: „A Tata e kroetoe no wan sma kwetikweti, ma a gi ala kroetoewroko na a Manpikin” (Johanes 5:22). Tokoe a koti di Jesus abi foe koti kroetoe de moro leki a sortoe kroetoewroko dati, bika a de wan kroetoeman foe den libiwan èn foe den dedewan (Tori foe den Apostel 10:42; 2 Timoteus 4:1). Wan leisi Paulus ben froeklari: „[Gado] poti wan dei pe a abi na prakseri foe kroetoe a grontapoe pe sma e libi, na ini regtfardikifasi nanga jepi foe wan man [Jesus] di a poti, èn a gi wan djaranti na ala sma foe di a opo en baka.” — Tori foe den Apostel 17:31; Psalm 72:2-7.

19. Foe san ede a de wan joisti sani foe taki dati Jesus go sidon leki wan Kroetoeman?

¹⁹ So boen, wi abi a reti foe kon na a bosroiti taki Jesus e sidon na tapoe wan glori kownoestoeroe nanga a spesroetoe wroko di a abi foe doe leki Kroetoeman? Ija. Jesus ben taigi den apostel: „Na ini a meki baka foe sani, te a Manpikin foe libisma go sidon na tapoe en glori kownoestoeroe, dan oenoe di waka na mi baka sa sidon toe na tapoe twarfoe kownoestoeroe, e kroetoe den twarfoe lo foe Israèl” (Mateus 19:28). Ala di Jesus de Kownoe now foe a Kownoekondre, tokoe san a sa doe moro fara soleki dati skrifi na Mateus 19:28, sa wani taki toe taki a sa sidon na tapoe wan kownoestoeroe foe kroetoe sma na ini a Doesoen Jari Tiri. Na a ten dati a sa kroetoe a heri libisma famiri, den regtfardikiwan nanga den onregtfardikiwan (Tori foe den Apostel 24:15). A de wan jepi foe hori disi na prakseri te wi e poti wi prakseri na tapoe wan foe den den agersitori foe Jesus di abi foe doe nanga wi ten èn nanga wi libi.

San na agersitori e taki?

20, 21. San den apostel foe Jesus ben aksi en di abi foe doe nanga a ten foe wi, èn sortoe aksi ben kon foe dati?

²⁰ Sjatoe bifo Jesus dede, den apostel foe en ben aksi en: „O ten den sani disi sa de, èn san sa de a marki foe joe denoja èn foe a bosroiti foe a seti foe sani?” (Mateus 24:3) Jesus ben froeteri na fesi foe prenspari sani di ben sa pasa na grontapoe bifo ’a kaba ben o kon’. Sjatoe bifo a kaba dati, den nâsi sa „si a Manpikin foe libisma e kon na tapoe den wolkoe foe hemel nanga makti èn nanga bigi glori”. — Mateus 24:14, 29, 30.

²¹ Ma fa a sa go nanga den sma na ini den nâsi dati, te a Manpikin foe libisma e kon na ini en glori? Meki wi go ondrosoekoe disi nanga jepi foe na agersitori foe den skapoe nanga den bokoboko, di e bigin nanga den wortoe: „Te a Manpikin foe libisma e kon na ini en glori, èn ala den engel nanga en, dan a sa go sidon na tapoe en glori kownoestoeroe. Èn ala den nâsi sa kon na makandra na fesi en.” — Mateus 25:31, 32.

22, 23. Sortoe sani e sori taki na agersitori foe den skapoe nanga den bokoboko no ben bigin kon troe na ini 1914?

²² Na agersitori disi abi foe doe nanga a ten di Jesus ben go sidon na ini kownoe makti na ini 1914, soleki fa wi froestan wan langa ten? We, Mateus 25:34 e taki foe en leki Kownoe, so boen a de wan logis sani taki na ageristori abi foe doe nanga a ten sensi di Jesus ben tron Kownoe na ini 1914. Ma sortoe kroetoewroko a ben doe no langa baka dati? A no ben de a kroetoe di a ben kroetoe „ala den nâsi”. Na presi foe dati, a ben poti en prakseri na tapoe den sma di e taki dati den na „a oso foe Gado” (1 Petrus 4:17). Soleki fa Maleaki 3:1-3 e sori, dan Jesus, leki a boskopoeman foe Jehovah, ben ondrosoekoe den salfoe kresten di ben de ete na grontapoe foe kroetoe den. A ben de a ten toe foe leisi kroetoestrafoe gi krestenhèit, di ben taki dati den ben de „na oso foe Gado”, ala di dati no ben de so (Openbaring 17:1, 2; 18:4-8).c Tokoe no wan sani e sori taki na a ten dati, noso foe sensi a ten dati, Jesus ben sidon foe kroetoe sma foe ala den nâsi te foe kaba leki skapoe noso bokoboko.

²³ Efoe wi e ondrosoekoe finifini san Jesus e doe soleki fa na agersitori e sori, dan wi e si en e kroetoe ala den nâsi te foe kaba. Na agersitori no e sori taki a kroetoewroko dati ben sa go doro wan boen langa ten, foeroe jari langa neleki ibri sma di dede na ini den someni tenti jari di pasa, ben kisi kroetoe foe den feni den warti foe kisi têgo dede noso têgo libi. A gersi taki moro foeroe foe den sma di dede na ini den someni tenti jari di pasa no so langa ete, go na a grebi pe ala libisma e go (Openbaring 6:8; 20:13). Ma na agersitori, e prenki a ten te Jesus e kroetoe a pipel foe „ala den nâsi” di e libi na a ten dati èn di e tanapoe na fesi a tjari di a sa tjari en kroetoestrafoe kon.

24. O ten na agersitori foe den skapoe nanga den bokoboko sa kon troe?

²⁴ Nanga tra wortoe, na agersitori e sori go na a ten di e kon te a Manpikin foe libisma sa kon na ini en glori. A sa sidon foe kroetoe sma di e libi na a ten dati. A sa kroetoe den foe san densrefi ben sori foe de. Na a ten dati „a difrenti na mindri wan regtfardikiwan nanga wan ogriwan” sa sori krin kaba (Maleaki 3:18). A troetroe leisi foe a kroetoestrafoe èn a tjari di a sa tjari dati kon na libisma tapoe sa feni presi na ini wan sjatoe pisi ten. Jesus sa teki regtfardiki bosroiti tapoe a gron foe san ibri wan sma ben sori foe de. — Loekoe toe 2 Korentesma 5:10.

25. San Mateus 25:31 e prenki te a e taki dati a Manpikin foe libisma e go sidon na tapoe wan glori kownoestoeroe?

²⁵ Foe dati ede, disi wani taki dati a sidon di Jesus ’e sidon na tapoe en glori kownoestoeroe’ foe koti kroetoe soleki den ben taki foe dati na Mateus 25:31, e fiti a ten di e kon te a makti Kownoe disi sa sidon foe leisi kroetoestrafoe èn tjari dati kon na tapoe den nâsi. Ija, a presi pe a kroetoe e hori èn di abi foe doe nanga Jesus na Mateus 25:31-33, 46, wi kan teki dati gersi a presi di ben de foe si na Danièl kapitel 7, pe a Kownoe di e tiri, a Graniwan, ben go sidon foe doe san a ben moesoe doe leki Kroetoeman.

26. Sortoe njoen fasi foe tjari na agersitori kon na krin wi kon si now?

²⁶ Te wi e kon froestan na agersitori foe den skapoe nanga den bokoboko na a fasi disi, dan a wani taki dati a leisi di a kroetoestrafoe e leisi gi den skapoe nanga den bokoboko, na wan sani gi a tamara. A sa feni presi baka te „a banawtoe” di den e taki foe dati na Mateus 24:29, 30, e bigin èn a Manpikin foe libisma ’e kon na ini en glori’. (Teki gersi Markus 13:24-26.) Baka dati, ala di a heri ogri seti e kon na en kaba, Jesus sa hori wan kroetoe èn leisi kroetoestrafoe èn tjari a kroetoestrafoe dati kon na sma tapoe. — Johanes 5:30; 2 Tesalonikasma 1:7-10.

27. San wi ben moesoe wani foe sabi foe a lasti agersitori foe Jesus?

²⁷ Disi e meki wi kon froestan moro krin na ini sortoe ten Jesus en agersitori, di e sori o ten den skapoe nanga den bokoboko sa kisi kroetoe, e kon troe. Ma fa disi abi krakti na tapoe wi di e preiki a Kownoekondre boen njoensoe fajafaja? (Mateus 24:14) Disi e meki a wroko foe wi kon tron wan sani di no de so prenspari, noso a e tjari wan moro bigi frantiwortoe kon na wi tapoe? Meki wi go loekoe na ini a tra artikel fa a abi krakti na wi tapoe.

Sortoe tamara de gi den skapoe nanga den bokoboko?

„A sa prati den sma foe makandra, neleki fa wan herder e prati den skapoe foe den bokoboko.” — MATEUS 25:32.

1, 2. Foe san ede na agersitori foe den skapoe nanga den bokoboko moesoe abi wi belangstelling?

JESUS KRESTES ben de troetroe a moro bigi Leriman na grontapoe (Johanes 7:46). Wan foe den fasi fa a ben gi leri ben de taki a ben gebroiki den agersitori (Mateus 13:34, 35). Den agersitori disi ben de eenvoudig èn tokoe den ben abi krakti foe di den ben sori koni waarheid na jejefasi èn na profeitis fasi.

² Na ini na agersitori foe den skapoe nanga den bokoboko, Jesus ben sori go na wan ten te a ben sa doe wan sani na wan spesroetoe fasi: „Te a Manpikin foe libisma e kon na ini en glori, èn . . .” (Mateus 25:31). Disi moesoe abi wi belangstelling, foe di a de na agersitori di Jesus e froeteri te a kaba nanga a piki di a ben piki na aksi: „San sa de a marki foe joe denoja èn foe a bosroiti foe a seti foe sani?” (Mateus 24:3) Ma san disi wani taki gi wi?

3. Sortoe sani, soleki fa Jesus ben taki bifo na ini a takimakandra foe en, ben o pasa leti baka a bigi banawtoe e bigin?

³ Jesus ben froeteri na fesi foe den span sani di ben o pasa „leti baka te” a bigi banawtoe ben bigin, sani di e wi e wakti na tapoe. A ben taki dati na a ten dati „a marki foe a Manpikin foe libisma” ben o de foe si. Disi sa abi foeroe krakti na tapoe „ala den lo foe grontapoe”, di sa „si a Manpikin foe libisma e kon na tapoe den wolkoe foe hemel nanga krakti èn nanga bigi glori”. A Manpikin foe libisma sa kon makandra nanga „den engel foe en” (Mateus 24:21, 29-31).a San de foe taki foe na agersitori foe den skapoe nanga den bokoboko? Disiten bijbel e poti en na ini kapitel 25, ma a de wan pisi foe a piki di Jesus gi, èn di e froeteri moro fini foe a kon di a sa kon na ini glori èn a poti di a e poti prakseri na tapoe a kroetoe di a sa kroetoe „ala den nâsi”. — Mateus 25:32.

Den sma na ini na agersitori

4. Sortoe sani e taki foe Jesus na a bigin foe na agersitori foe den skapoe nanga den bokoboko, èn foe soema moro den e taki?

⁴ Jesus e bigin na agersitori foe di a e taki: „Te a Manpikin foe libisma e kon.” Kande joe sabi soema na „a Manpikin foe libisma”. Nofo tron den Evangelie skrifiman ben gebroiki den wortoe dati gi Jesus. Jesus srefi ben doe dati, èn sondro tweifri a ben abi a fisjoen foe Danièl na prakseri foe „wan sma leki wan manpikin foe libisma” di e kon na fesi a Graniwan foe kisi „tirimakti nanga wartifasi nanga kownoekondre” (Danièl 7:13, 14; Mateus 26:63, 64; Markus 14:61, 62). Ala di Jesus na a moro prenspari sma na ini na agersitori disi, tokoe a no de a wan-enkri sma. A ben taki kaba na ini a takimakandra disi, soleki fa a skrifi na Mateus 24:30, 31, dati te a Manpikin foe libisma ’e kon nanga makti èn nanga bigi glori’, dan den engel sa doe wan prenspari sani. Na so a de toe taki na agersitori foe den skapoe nanga den bokoboko e sori engel makandra nanga Jesus te a ’e go sidon na tapoe en glori kownoestoeroe’ foe kroetoe sma. (Teki gersi Mateus 16:27.) Ma a Kroetoeman nanga den engel foe en de na hemel, so boen, a e taki foe libisma toe na ini na agersitori?

5. Fa wi kan kon sabi soema na „den brada” foe Jesus?

⁵ Te wi e loekoe na agersitori, dan a e tjari dri groepoe kon na krin di wi moesoe kon sabi soema na den. Boiti den skapoe nanga den bokoboko, a Manpikin foe libisma e taki toe foe a di foe dri groepoe, di foe kon sabi soema na den, de prenspari foe kon sabi soema na den skapoe nanga den bokoboko. Jesus e kari a di foe dri groepoe disi den brada foe en na jejefasi (Mateus 25:40, 45). Den moesoe de troe anbegiman, bika Jesus ben taki: „Iniwan sma di e doe a wani foe mi Tata . . . , a srefi sma dati na mi brada, mi sisa, mi mama” (Mateus 12:50; Johanes 20:17). Foe taki en moro krin, dan Paulus ben skrifi foe kresten di de wan pisi foe „a siri foe Abraham” èn di na manpikin foe Gado. A ben kari den „den brada” foe Jesus nanga „den sma di abi prati na a hemel kari”. — Hebrewsma 2:9–3:1; Galasiasma 3:26, 29.

6. Soema na „den moro mendriwan” foe Jesus brada?

⁶ Foe san ede Jesus ben taki foe „a moro mendriwan” foe den brada foe en? Den wortoe dati na a srefi sani di den apostel ben jere en taki kaba. Di Jesus ben sori a difrenti na mindri Johanes a Dopoeman, di dede fosi Jesus èn di foe dati ede ben abi wan howpoe foe libi na grontapoe, nanga den wan di abi a howpoe foe go libi na hemel, a ben taki: „No wan sma wiki di bigi moro Johanes a Dopoeman; ma a sma di de wan moro mendriwan na ini a kownoekondre foe hemel bigi moro en” (Mateus 11:11). Wan toe sma di e go na hemel de prenspari kande na ini a gemeente, neleki den apostel, èn trawan no ben de so prenspari, ma den alamala na brada na jejefasi foe Jesus (Lukas 16:10; 1 Korentesma 15:9; Efeisesma 3:8; Hebrewsma 8:11). So boen, srefi efoe wan toe sma ben sori foe no de so prenspari di den ben de na grontapoe, tokoe den ben de brada foe en èn sma ben moesoe handri nanga den na a fasi dati.

Soema na den skapoe nanga den bokoboko?

7, 8. San Jesus ben taki foe den skapoe, so boen san wi kan taki foe den?

⁷ Wi e leisi foe a kroetoe di den skapoe e kisi kroetoe: „[Jesus] sa taigi den sma di de na en reti-anoe: ’Oen kon, oenoe di mi Tata blesi, teki a kownoekondre di sreka gi oenoe sensi di grontapoe seti. Bika angri ben kiri mi, èn oenoe ben gi mi wan sani foe njan; watra ben kiri mi èn oenoe ben gi mi wan sani foe dringi. Mi ben de wan freimdesma èn oenoe ben teki mi na ini oen oso na wan switifasi; nanga soso skin, èn oenoe ben weri krosi gi mi. Mi ben kon siki èn oenoe ben sorgoe mi. Mi ben de na doengroe-oso èn oenoe ben kon loekoe mi.’ Dan den regtfardikiwan sa piki en nanga den wortoe: ’Masra, o ten wi ben si joe nanga angri èn gi joe njanjan, noso taki watra ben kiri joe, èn wi gi joe wan sani foe dringi? O ten wi ben si joe leki wan freimdesma èn teki joe na ini oso na wan switifasi, noso nanga soso skin èn wi weri krosi gi joe? O ten wi ben si taki joe ben siki noso na doengroe-oso èn ben go loekoe joe?’ Èn leki piki a kownoe sa taigi den: ’Foe troe, mi e taigi oenoe: Foe so fara oenoe ben doe disi gi wán foe den moro mendriwan foe den brada disi foe mi, oenoe ben doe disi gi mi.’” — Mateus 25:34-40.

⁸ A de krin, taki den skapoe, di den ben kroetoe foe de warti foe de na a reti-anoe foe Jesus pe den ben kisi grani nanga boen-ati, e prenki wan groepoe libisma (Efeisesma 1:20; Hebrewsma 1:3). San den ben doe èn o ten den ben doe dati? Jesus e taki dati na wan switifasi, èn na wan lespekifasi, èn foe di den lobi foe gi, den ben gi en njanjan, dringi, nanga krosi, èn den ben jepi en di a ben siki noso di a ben de na doengroe-oso. Te den skapoe e taki dati den no ben doe disi gi Jesus srefi, dan a e tjari kon na fesi taki den ben horibaka gi den brada foe en na jejefasi, a fikapisi foe salfoe kresten, so boen na a fasi dati den ben doe dati gi en.

9. Foe san ede na agersitori no e kon troe na ini a Doesoen Jari Tiri?

⁹ Na agersitori no e kon troe na ini a Doesoen Jari Tiri, bika na a ten dati den salfoewan no sa de libisma di e pina foe angri ede, e dreiwatra, siki noso de na doengroe-oso. Foeroe foe den ondrofeni den sani disi na ini a bosroiti foe a seti foe sani disi. Sensi di Satan ben trowe kon na grontapoe, a meki a fikapisi kon tron sma di a wani doe ogri spesroetoe, foe a bigi atibron foe en ede, èn e meki sma spotoe den, e pina den, èn e kiri den. — Openbaring 12:17.

10, 11. (a) Foe san ede a no de wan reidelek sani foe denki taki den skapoe wani taki ala sma di e doe wan boen sani gi den brada foe Jesus? (b) Soema den skapoe e prenki troetroe?

¹⁰ A de so taki, Jesus e taki dati ala sma di e doe wan switi sani gi wan foe den brada foe en, soleki te den e gi den wan pisi brede noso wan grasi watra, na sma di warti foe de wan foe den skapoe disi? A troe, taki te wan sma e doe so wan switi sani dan dati e sori a switifasi di wan libisma abi kande, ma foe taki en leti, a gersi leki moro foeroe de foe taki foe den skapoe foe na agersitori disi. Wi no kan taki dati Jesus ben taki foe, kon meki wi taki, den atheïstsma noso den tiriman foe krestenhèit di wán leisi ben doe wan boen sani kande gi wan foe den brada foe en. Na a tra sei, Jesus ben kari den skapoe „regtfardikiwan” toe tron (Mateus 25:37, 46). Foe dati ede den skapoe moesoe de den sma di na ini wan langa pisi ten ben gi jepi na — horibaka na wan fajafaja fasi gi — den brada foe Krestes èn sori bribi na so wan fasi taki den kisi wan regtfardiki posisi na fesi Gado.

¹¹ Na ini den jarihondro di pasa, foeroe sma soleki Abraham, njan boen foe wan regtfardiki posisi (Jakobus 2:21-23). Noa, Abraham, nanga tra getrow sma de na mindri den „tra skapoe” di sa kisi libi na ini wan Paradijs na ondro a Kownoekondre foe Gado. Na ini a ten di pasa no so langa ete, miljoenmiljoen sma moro teki a troe anbegi leki tra skapoe èn den tron „wan ipi” nanga den salfoewan (Johanes 10:16; Openbaring 7:9). Den sma disi di abi howpoe foe libi na grontapoe e si den brada foe Jesus leki sma di e teki presi gi a Kownoekondre èn foe dati ede den ben gi den jepi — troetroe èn na wan jejefasi. Jesus e si san den tra skapoe e doe gi en leki san den e doe gi den brada foe en na grontapoe. Den sortoe sma dati di e libi te a e kon foe kroetoe den nâsi a sa kroetoe leki skapoe.

12. Foe san ede den skapoe ben sa kan aksi fa den ben doe boen sani gi Jesus?

¹² Efoe den tra skapoe e preiki a boen njoensoe now makandra nanga den salfoewan èn e gi den jepi, dan foe san ede den ben sa aksi: „Masra, o ten wi ben si joe nanga angri èn gi joe njanjan, noso taki watra ben kiri joe, èn wi gi joe wan sani foe dringi?” (Mateus 25:37) Foeroe reide kan de foe dati. Disi na wan agersitori. Nanga jepi foe na agersitori disi, Jesus e sori taki a e broko en ede troetroe gi den brada foe en na jejefasi; a firi san den e firi, a e pina te den e pina. Jesus ben taki kaba: „A sma di e teki oenoe, e teki mi toe, èn a sma di teki mi, e teki en toe di seni mi kon” (Mateus 10:40). Na ini na agersitori disi Jesus e poti moro na a gronprakseri foe di a e sori taki san e doe (efoe a boen noso efoe a takroe) gi den brada foe en e doro srefi te na hemel; a de neleki den e doe en gi en di de na hemel. So srefi, djaso Jesus e poti krakti na tapoe a markitiki di Jehovah abi foe kroetoe sani, èn a e tjari kon na krin taki a kroetoe foe Gado, efoe a de wan boen kroetoe noso wan takroe kroetoe, a de akroederi wet èn a de wan reti kroetoe. Den bokoboko no kan kon nanga a sani disi: ’We, efoe soso wi ben si joe nomo.’

13. Foe san ede den sma di gersi bokoboko ben sa kari Jesus „Masra”?

¹³ Te wi kon froestan o ten a kroetoe na ini na agersitori disi e gi, dan wi e kon si moro krin soema na den bokoboko. A kontroe na te „a marki foe a Manpikin foe libisma sa de foe si na hemel, èn dan ala den lo foe grontapoe sa naki densrefi foe di den e sari, èn den sa si a Manpikin foe libisma e kon . . . nanga makti èn nanga bigi glori” (Mateus 24:29, 30). Sma di pasa a banawtoe di e kon na tapoe Babilon a Bigiwan, èn di no handri den brada foe a Kownoe na wan boen fasi, kande now e kari a Kroetoeman „Masra”, foe di den e howpoe foe kibri den libi. — Mateus 7:22, 23; teki gersi Openbaring 6:15-17.

14. Tapoe a gron foe sortoe sani Jesus sa kroetoe den skapoe nanga den bokoboko?

¹⁴ Ma a kroetoe foe Jesus no sa de foe di sma di fosi ben de kerkisma, atheïstsma noso tra sma e feti foe taki dati den e bribi (2 Tesalonikasma 1:8). Na presi foe dati, a kroetoeman sa loekoe a fasi fa na ati de èn san sma ben doe gi srefi „wán foe den moro mendriwan disi [foe den brada foe en]”. A troe taki a nomroe foe salfoe kresten di de na grontapoe e kon pikin. Ma so langa den salfoewan, di de „a getrow nanga koni srafoe”, e go doro ete foe gi njanjan èn tiri na jejefasi, dan den sma di sa tron skapoe ete abi wan okasi foe doe wan boen sani gi a srafoe-groepoe, neleki san a ’bigi ipi foe ala den nâsi nanga lo nanga pipel’ doe. — Openbaring 7:9, 14.

15. (a) Fa foeroe sma ben sori foe de leki bokoboko? (b) Foe san ede wi no moesoe taki dati wan sma na wan skapoe noso wan bokoboko?

¹⁵ Fa sma handri nanga den brada foe Krestes nanga den miljoenmiljoen tra skapoe di ben kon de wán nanga den leki wán ipi? Kande foeroe sma no doe den sma ogri di e teki presi gi Krestes, ma den no handri a pipel foe en na wan lobi fasi toe. Foe di den sma di gersi bokoboko, lobi na ogri grontapoe disi moro, meki den no wani arki a Kownoekondre boskopoe, efoe den e jere en nanga jepi foe a preikiwroko noso na wan tra fasi (1 Johanes 2:15-17). A no de foe taki dati te foe kaba, Jesus na a sma di poti foe leisi kroetoestrafoe. A no wi moesoe go loekoe soema na den skapoe èn soema na den bokoboko. — Markus 2:8; Lukas 5:22; Johanes 2:24, 25; Romesma 14:10-12; 1 Korentesma 4:5.

Sortoe tamara de gi ibri wan groepoe?

16, 17. Sortoe tamara den skapoe sa abi?

¹⁶ Jesus ben taki sortoe kroetoe a ben gi den skapoe: „Oen kon, oenoe di mi Tata blesi, teki a kownoekondre di sreka gi oenoe foe sensi di grontapoe seti.” Dati na troetroe wan switi kari — „Kon”! Foe kisi san? Foe kisi têgo libi, soleki fa a ben taki en sjatoe: „Den regtfardikiwan [sa go] na ini a têgo libi.” — Mateus 25:34, 46.

¹⁷ Na ini na agersitori foe den talenti, Jesus ben sori san den e aksi foe den sma di sa tiri makandra nanga en na hemel, ma na ini na agersitori disi a e sori san den e froewakti foe den borgoe foe a Kownoekondre (Mateus 25:14-23). Foe taki en leti, dan a de foe di den ben horibaka nanga den heri ati gi den brada foe Jesus, meki den skapoe e kisi wan presi na grontapoe di en Kownoekondre sa tiri. Den sa njan boen foe a libi na ini wan paradijs na grontapoe — wan howpoe di Gado ben sreka gi den „sensi di grontapoe seti”, a grontapoe foe libisma di ben man kisi froeloesoe. — Lukas 11:50, 51.

18, 19. (a) Sortoe kroetoestrafoe Jesus sa leisi gi den bokoboko? (b) Fa wi kan de seiker taki den bokoboko no sa kisi têgo pina?

¹⁸ Den bokoboko e kisi wan heri tra kroetoestrafoe! „Dan a sa taki, foe en sei, na den wan di de na en kroektoe-anoe: ’Komoto na mi tapoe, oenoe di froefroektoe, na ini a têgo faja di sreka gi Didibri nanga den engel foe en. Bika angri ben kiri mi, ma oenoe no ben gi mi noti foe njan, èn watra ben kiri mi, ma oenoe no ben gi mi noti foe dringi. Mi ben de wan freimdesma, ma oenoe no ben teki mi na ini oen oso na wan switifasi; nanga soso skin ma oenoe no ben weri krosi gi mi; siki nanga na doengroe-oso, ma oenoe no ben sorgoe mi.’ Dan den sa piki toe nanga den wortoe: ’Masra, o ten wi ben si joe nanga angri noso taki watra ben kiri joe noso leki freimdesma noso nanga soso skin noso siki noso na doengroe-oso èn wi no ben dini joe?’ Dan a sa piki den nanga den wortoe: ’Foe troe mi e taigi oenoe: Foe so fara oenoe no ben doe disi gi wán foe den moro mendriwan disi, oenoe no ben doe disi gi mi.’” — Mateus 25:41-45.

¹⁹ Bijbel studenti sabi taki disi no kan wani taki, dati den sili di no man dede foe den sma di gersi skapoe sa pina na ini têgo faja. Nôno, bika libisma na sili; den no abi sili di no man dede (Genesis 2:7; Preikiman 9:5, 10; Esekièl 18:4). A gi di a Kroetoeman gi den bokoboko a strafoe foe „têgo faja” wani taki wan pori pe den no abi no wan howpoe gi a tamara, san sa de a têgo kaba toe gi Didibri nanga den ogri jeje foe en (Openbaring 20:10, 14). Foe dati ede, a Kroetoeman foe Jehovah e gi toe sortoe kroetoe di de kontrari makandra. A e taigi den skapoe: „Kon”; den bokoboko a e taigi: „Komoto na mi tapoe.” Den skapoe sa kisi „têgo libi”. Den bokoboko sa kisi „têgo koti poeroe”. — Mateus 25:46.b

San disi wani taki gi wi?

20, 21. (a) Sortoe prenspari wroko kresten abi foe doe? (b) Sortoe pratiwroko e doe now? (c) Fa a situwâsi sa de foe sma te na agersitori foe den skapoe nanga den bokoboko e bigin kon troe?

²⁰ Den fo apostel di ben jere Jesus e gi piki na tapoe na aksi di ben go foe a marki foe en denoja nanga a bosroiti foe a seti, ben abi foeroe foe go prakseri. Den ben moesoe tan na ai èn hori wakti (Mateus 24:42). Den ben sa moesoe doe a kotoigiwroko toe di den e taki foe dati na Markus 13:10. Jehovah Kotoigi abi wan fajafaja prati na a wroko dati na ini a ten disi.

²¹ Ma san a njoen fasi disi foe froestan na agersitori foe den skapoe nanga den bokoboko wani taki gi wi? We, sma e teki a bosroiti kaba na sortoe sei den wani go. Son sma de na tapoe ’a bradi pasi di e tjari den go na pori’, ala di trawan e proeberi foe tan na tapoe ’a smara pasi di e tjari den go na libi’ (Mateus 7:13, 14). Ma a ten di Jesus sa taki en lasti kroetoe gi den skapoe nanga den bokoboko di den ben prenki na ini na agersitori de wan sani di moesoe pasa ete. Te a Manpikin foe libisma e kon leki Kroetoeman, dan a sa bosroiti taki foeroe troe kresten — foe taki en leti, „wan bigi ipi” skapoe di gi densrefi abra — sa boen nofo foe pasa a lasti pisi foe „a bigi banawtoe” foe go na ini a njoen grontapoe. A froewakti dati moesoe de wan fonten foe prisiri now (Openbaring 7:9, 14). Na a tra sei, bigi groepoe sma di komoto na „ala den nâsi” sa sori taki den de leki trangajesi bokoboko. Den „sa go na ini têgo koti poeroe”. Dati sa de wan froelekti gi grontapoe srefisrefi!

22, 23. Foe san ede a preikiwroko foe wi na ini a ten disi na wan prenspari sani, ala di a kontroe foe na agersitori na wan sani gi a tamara ete?

²² Ala di a kroetoewroko soleki fa den skrifi foe dati na ini na agersitori, de na ini a krosibei tamara, tokoe now srefi wan prenspari sani e pasa. Wi kresten abi prati na wan wroko foe froeloesoe sma èn foe meki wan boskopoe bekènti di e meki wan prati kon na mindri sma (Mateus 10:32-39). Paulus ben skrifi: „Bika ’ibriwan sma di e kari a nen foe Jehovah sa kisi froeloesoe’. Ma fa den sa kari en di den no poti bribi na ini? Fa baka den sa poti bribi na ini en di den no jere foe en? Fa baka den sa jere sondro foe wan sma preiki gi den?” (Romesma 10:13, 14). Nanga a poebliki diniwroko foe wi, wi e doro sma na moro leki 230 kondre nanga a nen foe Gado èn nanga a boskopoe foe en di e gi froeloesoe. Den salfoe brada foe Krestes e teki fesi ete na ini a wroko disi. So wan feifi miljoen tra skapoe moksi densrefi nanga den now. Èn sma na heri grontapoe e doe wan sani na tapoe a boskopoe di den brada foe Jesus e meki bekènti.

²³ Foeroe sma e kisi foe jere a boskopoe foe wi te wi e preiki oso foe oso noso na tra okasi. Trawan e jere kande foe Jehovah Kotoigi èn san wi e doe, na fasi di wi no sabi. Te a ten foe kroetoe doro, dan na sortoe fasi Jesus sa loekoe a de di a libisma libimakandra de frantiwortoe gi san e pasa èn a kisi di wan sma sa kisi froeloesoe foe di a de wan memre foe wan osofamiri di moesoe sorgoe gi en? Wi no kan taki, èn a no de fanowdoe foe go rai fa dati sa de. (Teki gersi 1 Korentesma 7:14.) Foeroe sma no e gi jesi now, den e spotoe, noso densrefi abi wan prati foe froefolgoe a pipel foe Gado. Foe dati ede, disi na wan toemoesi prenspari ten; den sortoe sma dati kan kon tron den sma di Jesus sa kroetoe leki bokoboko. — Mateus 10:22; Johanes 15:20; 16:2, 3; Romesma 2:5, 6. 

24. (a) Foe san ede a de prenspari gi ibriwan sma foe doe wan boen sani na tapoe a preikiwroko foe wi? (b) Sortoe fasi foe loekoe a diniwroko foe joe, a studie disi jepi joesrefi foe abi?

²⁴ Ma kolokoe taki foeroe sma e doe wan boen sani na tapoe a boskopoe, den e studeri a Wortoe foe Gado, èn e tron Kotoigi foe Jehovah. Wan toe sma di now gersi bokoboko kan kenki èn kan tron leki skapoe. San de prenspari na taki den sma di e doe wan boen sani na tapoe èn e horibaka fajafaja gi a fikapisi foe Krestes brada, e gi na a fasi dati a boeweisi di sa gi den wan gron foe kon na a reti anoe foe Jesus te, na ini a ten di e kon, a e go sidon na tapoe en kownoestoeroe foe leisi kroetoestrafoe. Den sma disi e kisi blesi now èn den sa tan kisi blesi. So boen, na agersitori disi moesoe poesoe wi foe wroko nanga moro faja na ini a kresten diniwroko. Fosi a lati toemoesi, wi wani doe ala san wi man foe meki a boen njoensoe foe a Kownoekondre bekènti èn, na a fasi dati, gi trawan na okasi foe doe wan sani na tapoe dati. Dan na Jesus na a sma di abi a frantiwortoe foe leisi kroetoestrafoe, efoe na wan takroe kroetoe noso wan boen kroetoe. — Mateus 25:46.