Luku bun nanga den trapu fu Didibri!

„Komopo na ini a trapu fu Didibri.”​—2 TIM. 2:26.

SAN YU BEN O PIKI?

San yu musu du efu yu kon abi a gwenti fu taki ogri fu trawan?

Fa den eksempre fu Pilatus nanga Petrus kan yepi yu fu no frede libisma èn fu no meki trawan dwengi yu fu du san den wani?

San yu kan du fu no meki yu konsensi trobi yu doronomo?

1, 2. Sortu trapu fu Satan wi o luku na ini na artikel disi?

DIDIBRI de na den futuboi fu Yehovah baka nomonomo. Ma a no fu di a wani kiri den neleki fa wan ontiman e go onti fu kiri wan meti. San a wani du trutru, na fu kisi den, so taki den kan du san en wani den fu du.​—Leisi 2 Timoteyus 2:24-26.

² Wan ontiman kan seti wan trapu fu kisi wan meti. Son leisi a kan poti nyanyan noso wan tra sani fu hari a meti, so taki a kan kisi en makriki. A kan pruberi fu kisi en tu nanga wan nèt. Noso a kan seti wan krafana na so wan fasi taki a meti no man si en. Didibri e gebroiki difrenti trapu tu fu kisi den futuboi fu Gado. Efu wi no wani a kisi wi, dan wi musu de na ai èn wi musu poti prakseri na sani di kan warskow wi taki wan trapu fu Satan de na ini a birti. Na ini na artikel disi wi o luku fa wi kan wai pasi gi dri sortu trapu di Satan gebroiki fu kisi son sma di e dini Gado. Den trapu disi na (1) te wi e takitaki sani sondro fu denki, (2) frede gi libisma èn te sma e dwengi wi fu du san den wani, èn (3) te wi konsensi e fon wi doronomo. Na ini na artikel baka a wan disi wi o taki fu tu tra trapu fu Satan.

LUKU BUN NANGA A FAYA​—TAKITAKI SANI SONDRO FU DENKI

3, 4. San kan pasa efu wi no man dwengi wisrefi fu takitaki sani sondro fu denki? Gi wan eksempre.

³ Son leisi wan ontiman kan sutu faya gi wan pisi busi, so taki a kan kisi den meti di e lon gi a faya. Na agersi fasi Didibri wani sutu faya gi a Kresten gemeente tu, so taki sma gowe libi a gemeente. Ma efu dati pasa, dan Satan de leti drape fu kisi den. Son leisi a moro makriki gi en fu kisi wi, fu di wi e yepi en sondro taki wi sabi dati srefi. Fa so?

⁴ A disipel Yakobus ben agersi a tongo nanga wan faya. (Leisi Yakobus 3:6-8.) Efu wi no man dwengi wisrefi fu takitaki sani sondro fu denki, dan a kan de neleki wi e sutu faya gi a gemeente. Fa disi kan pasa? Luku wan eksempre: Na wan gemeente konmakandra den brada meki bekènti taki wan sisa tron gewoon pionier. Baka a konmakandra tu sisa e taki fu a sani disi. Wan fu den e taki fa a breiti taki a sisa tron gewoon pionier èn taki a e howpu taki a o du en bun. Ma a tra sisa taki dati a e aksi ensrefi efu trutru a sisa disi wani pionier noso efu na biginen a e suku na ini a gemeente. Sortuwan fu den tu sisa disi yu ben o wani abi leki mati? A de krin fu si sortuwan fu den ben o man sutu faya gi a gemeente nanga den sani di a e taki.

5. San wi musu du fu no takitaki sani sondro fu denki?

⁵ San wi kan du fu no takitaki sani sondro fu denki? Yesus taki: „San furu na ati, na dati mofo e taki” (Mat. 12:34). Sobun, a fosi sani di wi musu du, na fu ondrosuku wi ati. Wi musu luku bun taki wi no abi son denki di kan meki taki wi ben o taki ogri fu trawan. Fu eksempre, te wi yere taki wan brada e du muiti fu kisi wan grani na ini a gemeente, a de so taki wi e denki wantewante taki a e du disi fu di a wani meki Yehovah prisiri? Noso wi e denki taki a du disi soso fu di a wani kisi biginen? Efu wi abi a gwenti fu denki takru fu trawan, a bun fu hori na prakseri taki Didibri du a srefi sani disi. A ben taki dati Yob ben e dini Gado soso fu di a ben e kisi wini fu dati (Yob 1:9-11). Na presi fu denki takru fu wan brada noso sisa, a bun fu luku fu san ede wi e denki takru fu en. A de so taki wi abi leti fu denki so fu en? Noso a de so taki wi kisi a denki fu a grontapu disi? Bijbel ben taki dati furu sma na ini den lasti dei disi no ben o lobi trawan.​—2 Tim. 3:1-4.

6, 7. (a) San kan meki taki wi bigin taki takru fu trawan? (b) San wi musu du te wan sma e taki ogri fu wi?

⁶ Luku wan tu tra sani di kan meki taki wi e denki takru fu trawan. A kan taki wi wani sma fu poti moro prakseri na san wi e du, leki na san trawan e du. A kan taki wi e taki takru fu wan sma, fu di wi wani trawan fu denki taki wi bun moro en. Kande wi e taki takru fu trawan, fu di den du wan sani di wi ben musu du, ma wi no du en. Sobun, kande wi e taki takru fu trawan fu di wi abi heimemre, fu di wi e dyarusu na den tapu, noso fu di wi no de seiker fu wisrefi. Ma wan sani de seiker: Te wi e taki takru fu trawan, dan dati e tyari takru bakapisi kon ala ten.

⁷ Kande wi e denki taki wi abi leti fu taki takru fu wan sma, fu di a e takitaki wan lo ogri fu wi tu. Toku a no bun fu du a srefi sani nanga en. Efu wi e taki takru fu en tu, dan a o de neleki wi e poti udu gi a faya meki a kon moro bigi. Na so wan fasi wi no e du san Gado wani, ma san Didibri wani (2 Tim. 2:26). Te wi de na ini so wan situwâsi, a bun fu du san Yesus du. Te sma ben e taki takru fu en „a no ben e kosi den baka”. Na presi fu dati, a „tan saka ensrefi na ondro a sma di e krutu sani na wan reti fasi” (1 Petr. 2:21-23). Yesus ben abi a frutrow taki Yehovah ben o seti sani kon bun baka na a fasi fa en wani èn na a ten di en wani. Wi musu abi a srefi frutrow na ini Gado tu. Te wi e taki bun sani fu trawan èn sani di e gi den deki-ati, dan wi o libi bun nanga makandra èn wánfasi o de na ini a gemeente.​—Leisi Efeisesma 4:1-3.

LUKU BUN NANGA A NÈT​—FREDE GI LIBISMA ÈN TE SMA E DWENGI WI FU DU SAN DEN WANI

8, 9. San meki taki Pilatus gi Yesus dedestrafu?

⁸ Wan meti di fasi na ini wan nèt no man du moro san a wani. Na so a de tu taki te wan sma abi frede gi libisma, dan a no o de fri moro fu du san ensrefi wani, ma a o du san den wani. (Leisi Odo 29:25.) Meki wi luku den eksempre fu tu man di ben frede libisma èn di meki trawan dwengi den fu du san den wani. Baka dati wi o si san wi kan leri fu dati.

⁹ Granman Pontius Pilatus fu Rome no ben wani strafu Yesus fu di a ben sabi taki Yesus no ben du nowan ogri. Fu taki en leti, Pilatus srefi taki dati Yesus „no du nowan enkri ogri di meki taki a musu dede”. Ma toku Pilatus gi en dedestrafu. Fu san ede? Fu di a ben meki sma dwengi en fu du san den wani (Luk. 23:15, 21-25). Fu tapu skreki gi en, den sma taigi en: „Efu yu lusu a man disi, yu a no wan mati fu Grankownu” (Yoh. 19:12). Kande Pilatus ben frede taki den ben o puru en leki granman noso taki den ben o kiri en srefi efu a ben o fri Krestes. Na so frede gi libisma meki te fu kaba taki a du san Didibri wani.

10. San meki taki Petrus taki dati a no ben sabi Krestes?

¹⁰ Na apostel Petrus ben de wan fu den moro bun mati fu Yesus. A no ben frede fu taigi sma taki Yesus na a Mesias (Mat. 16:16). Son disipel gowe libi Yesus fu di den no ben frustan wan sani di Yesus taki, ma Petrus tan nanga Yesus (Yoh. 6:66-69). Di den sma kon fu grabu Yesus, Petrus ben hari wan feti-owru fu feti gi en Masra (Yoh. 18:10, 11). Ma bakaten Petrus taki dati a no sabi Yesus Krestes fu di a ben frede den sma. Frede gi libisma de leki wan trapu èn na apostel Petrus ben fadon na ini a trapu disi fu wan syatu pisi ten. A no ben abi deki-ati moro fu du san reti èn fu tan horibaka gi Yesus.​—Mat. 26:74, 75.

11. Gi sortu sani di sma wani dwengi wi fu du, wi musu kakafutu?

¹¹ Leki Kresten wi musu kakafutu gi iniwan sma di wani dwengi wi fu du sani di Gado no lobi. Kande wan wrokobasi noso tra sma na wrokope wani dwengi wi fu bedrigi sma noso fu abi seks nanga en. Kande den pikin na skoro wani dwengi yongu Kresten fu spiek na wan eksamen. Den kan dwengi den tu fu luku seks fowtow noso seksfelem, fu smoko tabaka, fu gebroiki drugs, noso fu dringi sopi. A kan tu taki den wani dwengi den fu abi seks nanga den. Efu wi e frede libisma èn efu wi e gi pasi taki sma dwengi wi fu du sani di Yehovah no feni bun, dan Satan kan kisi wi nanga wan fu den trapu fu en. Sobun, san kan yepi wi fu wai pasi gi a trapu disi?

12. San meki taki Petrus nanga Pilatus no ben man kakafutu gi sma?

¹² Meki wi luku san wi kan leri fu a fasi fa Petrus nanga Pilatus tyari densrefi. Pilatus no ben sabi furu fu Krestes. Ma a ben sabi taki Yesus no ben du nowan ogri èn taki a ben de wan spesrutu sortu man. Ma Pilatus no ben abi sakafasi èn a no ben lobi a tru Gado. Didibri kisi en makriki. Petrus ben lobi Gado èn a ben sabi heri bun suma na Gado èn suma na Krestes Yesus. Ma son leisi a ben e frutrow tumusi furu tapu ensrefi. A ben kon frede èn a meki libisma abi krakti na en tapu. Fosi sma kon grabu Yesus, Petrus taki srefi: „Awansi ala den trawan o fadon, toku mi no sa fadon” (Mark. 14:29). Efu Petrus ben frutrow tapu Gado leki a psalm skrifiman, a ben o sabi san fu du te tesi ben o miti en. A psalm skrifiman ben singi: „Yehovah de na mi sei. Mi no sa frede. San libisma kan du mi?” (Ps. 118:6) Na a lasti neti di Yesus ben de na grontapu, a tyari Petrus nanga tu tra apostel go na ini a dyari fu Getseimanei. Ma na presi fu tan na ai, Petrus nanga den tra apostel fadon na sribi. Yesus wiki den èn a taigi den: „Un tan na ai èn begi, so taki unu no sondu te unu kisi tesi” (Mark. 14:38). Ma toku Petrus fadon na sribi baka èn bakaten a no ben man kakafutu gi den sma.

13. San wi musu du fu man kakafutu gi sma di wani dwengi wi fu du sani di no bun?

¹³ Wi kan leri wan prenspari sani fu den eksempre fu Petrus nanga Pilatus. Efu wi no wani abi frede gi libisma, wi musu abi sabi nanga sakafasi, wi no musu frutrow tumusi furu tapu wisrefi, wi musu lobi Gado èn wi musu abi bigi lespeki gi en. Efu wi abi soifri sabi, wi o abi wan tranga bribi èn disi o meki taki wi no o frede fu taki san wi e bribi. Na so wi no o frede libisma èn wi no o meki den dwengi wi fu du san den wani. A no de fu taki dati wi no musu denki taki wi kan du sani nanga wi eigi krakti. Na presi fu dati wi musu abi a sakafasi fu si taki wi abi krakti fu Gado fanowdu fu man kakafutu gi sma di wani dwengi wi fu du san den wani. Wi musu begi Yehovah fu gi wi en yeye. A lobi di wi abi gi en musu meki taki wi tan du en wani èn wai pasi gi iniwan sani di ben o gi en porinen. Boiti dati, wi musu sreka wisrefi gi tesi, fosi tesi miti wi. Fu eksempre, te wi e sori wi pikin fa fu kakafutu gi den tesi di den kan kisi na skoro èn te wi e begi nanga den, dan den o sabi san fu du te den pikin na skoro wani dwengi den fu du sani di no bun.​—2 Kor. 13:7.a

LUKU BUN NANGA A TRAPU DI E MASI​—TE WI KONSENSI E FON WI DORONOMO

14. San Didibri wani wi fu denki fu wan sondu di wi ben du wan leisi?

¹⁴ Son leisi wan ontiman e tai wan bigi udu noso wan bigi ston nanga wan titei na tapusei fu wan pasi pe meti gwenti waka. Te wan meti e tuka nanga a titei, dan a ston noso a bigi udu e fadon na en tapu èn a e masi en. Te wan sma abi konsensi fonfon doronomo, dan dati kan de leki wan hebi ston noso udu di e masi en. Efu wi ben meki wan fowtu wan leisi, dan wi konsensi kan trobi wi so te, taki wi e „firi brokosaka srefisrefi”. (Leisi Psalm 38:3-5, 8.) Satan wani wi fu denki taki a sondu di wi du ogri so te, taki Yehovah no kan sori sari-ati gi wi èn taki noiti wi o man du ala den sani di Yehovah e aksi fu wi.

15, 16. San yu kan du fu no meki konsensi fonfon tron wan trapu gi yu?

¹⁵ San yu kan du fu no meki konsensi fonfon tron wan trapu gi yu? Efu yu du wan seryusu sondu, du wan sani nownow fu man tron wan mati fu Yehovah baka. Taki nanga den owruman èn aksi den fu yepi yu (Yak. 5:14-16). Du ala san yu man fu seti sani kon bun baka (2 Kor. 7:11). Efu den brada piri-ai gi yu, no lasi-ati. Disi e sori taki Yehovah lobi yu trutru (Hebr. 12:6). Teki a bosroiti fu no du den sani di kan meki yu du a srefi sondu baka èn du ala san yu man fu hori yusrefi na a bosroiti dati. Efu yu abi berow èn yu kenki yu libi, sobun yu e du baka san e plisi Gado, dan yu musu abi a bribi taki Gado kan gi yu pardon nanga yepi fu a frulusu-ofrandi fu Yesus Krestes.​—1 Yoh. 4:9, 14.

¹⁶ Son leisi wan sma di du wan sondu kan kisi konsensi fonfon doronomo, aladi a kisi pardon fu a sondu kaba. Efu disi e pasa nanga yu, dan memre taki Yehovah gi Petrus nanga den tra apostel pardon di den gowe libi en lobi Manpikin Yesus na wan ten di a ben abi den fanowdu trutru. Na ini a gemeente fu Korente, wan man ben e du hurudu nanga en papa wefi èn fu dati ede den ben puru en fu a gemeente. Ma bakaten di a sori berow Yehovah gi en pardon aladi a ben du so wan bigi sondu (1 Kor. 5:1-5; 2 Kor. 2:6-8). Gado Wortu e taki fu sma di ben du ala sortu bigi sondu. Ma di den ben abi berow, Gado gi den pardon.​—2 Kron. 33:2, 10-13; 1 Kor. 6:9-11.

17. Fa a frulusu-ofrandi kan yepi wi?

¹⁷ Efu yu sori berow èn yu e bribi taki Yehovah o sori sari-ati gi yu, dan a o gi yu pardon èn a no o prakseri den sondu fu yu moro. No denki noiti taki a frulusu-ofrandi fu Yesus no kan tapu den sondu fu yu. Efu yu ben o denki dati, dan Satan kisi yu nanga wan fu den trapu fu en. Didibri wani yu fu denki taki a frulusu-ofrandi no sari fu tapu ala den sondu fu yu. Ma efu wan sma du sondu, a man kisi pardon fu ala den sondu fu en efu a abi berow (Odo 24:16). Te wi e bribi na ini a frulusu-ofrandi, dan a o de leki wan hebi komoto na wi tapu. Wi konsensi no o trobi wi moro èn wi o abi a krakti fu dini Gado nanga wi heri ati, wi heri libi, èn nanga wi heri frustan.​—Mat. 22:37.

WI SABI SAN SATAN WANI DU

18. Fa wi kan wai pasi gi den trapu fu Didibri?

¹⁸ Satan no e span na ini sortu trapu wi fadon. San prenspari gi en, na taki a musu kisi wi. Fu di wi sabi san Satan abi na prakseri, meki a no abi fu wini wi (2 Kor. 2:10, 11). A no o man kisi wi nanga wan fu den trapu fu en efu wi e begi Gado fu gi wi koni, so taki wi kan sabi san fu du te tesi miti wi. Yakobus skrifi: „Efu wan fu unu e mankeri koni, dan meki a tan aksi Gado fu dati, bika te Gado e gi sma sani, a e du dati nanga en heri ati èn sondro fu suku fowtu na den. Sobun, Gado o gi a sma a koni dati” (Yak. 1:5). Efu wi wani taki Yehovah gi wi koni fu horidoro te tesi miti wi, dan wi musu studeri Bijbel doronomo èn wi musu libi soleki fa Bijbel e taki. A koni srafu di de fu frutrow e gi wi furu buku di e sori wi san na den trapu fu Didibri èn fa wi kan wai pasi gi den.

19, 20. Fu san ede wi musu tegu gi san ogri?

¹⁹ Te wi e begi èn te wi e studeri Bijbel, dan dati kan yepi wi fu lobi san bun. Ma a prenspari tu fu leri fu tegu gi san ogri (Ps. 97:10). Te wi e hori na prakseri san kan pasa te wi e du sani soso fu kisi wini gi wisrefi nomo, dan dati kan yepi wi fu no du den sani dati (Yak. 1:14, 15). Te wi leri fu tegu gi ogri èn fu lobi trutru san bun, dan den beti di Satan e poti na ini den trapu fu en, no o hari wi srefisrefi.

²⁰ Wi de nanga tangi trutru taki Gado e yepi wi so taki Satan no wini wi! Yehovah e frulusu wi „fu na ogriwan” nanga yepi fu en yeye, en Wortu nanga en organisâsi (Mat. 6:13). Na ini a tra artikel wi o luku fa wi kan wai pasi gi tu tra trapu di Didibri e gebroiki fu kisi den futuboi fu Gado.

Tanapu kánkan èn wai pasi gi den trapu fu Didibri!

„Tanapu kánkan te Didibri e kon nanga den triki fu en.”​—EF. 6:11.

SAN YU BEN O PIKI?

Fa wan futuboi fu Yehovah kan sorgu taki lobi gi moni no tron wan trapu gi en?

San kan yepi wan Kresten di trow fu no fadon na ini a trapu fu sutadu?

Fu san ede yu e bribi taki yu o kisi wini te yu sorgu taki lobi gi moni noso hurudu no tron wan trapu gi yu?

1, 2. (a) Fu san ede Satan no lobi den salfuwan nanga den „tra skapu”? (b) Fu sortu trapu fu Satan wi o taki na ini na artikel disi?

SATAN DIDIBRI no lobi libisma kwetikweti, spesrutu den wan di e dini Yehovah. Fu taki en leti, Satan e feti nanga den salfuwan di de na grontapu ete (Openb. 12:17). Den deki-ati Kresten dati e teki fesi na ini a preikiwroko èn den e sori sma krin taki Satan na a tiriman fu a grontapu disi. Boiti dati, Didibri no lobi den „tra skapu” di e horibaka gi den salfuwan èn di abi a howpu fu libi fu têgo na grontapu (Yoh. 10:16). Satan no abi na okasi moro fu libi fu têgo èn dati meki a de nanga bigi atibron. Satan no wani taki sani waka bun gi wi, awinsi wi abi a howpu fu libi na hemel noso na grontapu. A wani du ogri nanga wi nomonomo.​—1 Petr. 5:8.

² Satan seti difrenti trapu fu kisi wi. Fu di a „breni a frustan” fu sma di no e bribi, meki den no e gi yesi na a bun nyunsu èn den no man si den trapu fu en. Ma Didibri kisi son sma tu di gi yesi na a Kownukondre boskopu (2 Kor. 4:3, 4). Na artikel fosi a wan disi sori fa wi kan wai pasi gi dri fu den trapu fu Satan. Den trapu dati na (1) te wi e takitaki sani sondro fu denki, (2) frede gi libisma èn te sma e dwengi wi fu du san den wani, èn (3) te wi konsensi e fon wi doronomo. Meki wi luku now fa wi kan wai pasi gi ete tu trapu fu Satan. Dati na lobi gi moni èn situwâsi di kan meki taki wi du sutadu.

LUKU BUN NANGA A TRAPU DI E TYOKRO​—LOBI GI MONI

3, 4. Fa den broko-ede fu a grontapu disi kan meki taki wan sma bigin lobi moni?

³ Na ini wan fu den agersitori fu Yesus, a ben taki fu siri di sai na mindri makabon. A taki dati wan sma kan arki a Kownukondre boskopu, „ma den broko-ede fu a grontapu disi nanga a bedrigifasi fu gudu e kiri a wortu èn a no e meki froktu” (Mat. 13:22). Iya, lobi gi moni na wan trapu di wi feanti Satan kan gebroiki fu kisi wi.

⁴ Tu sani de di kan „kiri a wortu”. Wan fu den na „den broko-ede fu a grontapu disi”. Na ini den ’muilek ten disi di tranga fu pasa’, furu sani de di kan gi wi broko-ede (2 Tim. 3:1). Kande a muilek gi yu fu bai den sani di yu abi fanowdu, fu di sani kon diri srefisrefi noso fu di yu no abi wan wroko. A kan taki yu e broko yu ede tu nanga a ten di e kon. Kande yu e aksi yusrefi: ’Mi o abi nofo moni te mi kon owru èn te mi no man wroko moro?’ Son sma pruberi fu kon gudu fu di den denki taki sani o go bun nanga den solanga den abi furu moni.

5. Fa gudu kan de wan trapu gi wi?

⁵ Yesus ben taki tu fu „a bedrigifasi fu gudu”. A sani disi, makandra nanga den broko-ede fu a libi, kan kiri a wortu. Bijbel e taki dati „moni e kibri sma” (Preik. 7:12). Disi wani taki dati moni kan yepi wi fu kisi den sani di wi abi fanowdu. Ma a no de wan koni sani te wan sma e feti baka gudu. Furu sma kon si taki o moro den e feti baka gudu, o moro gudu e tron wan trapu gi den. Son sma tron srafu fu gudu srefi.​—Mat. 6:24.

6, 7. (a) Sortu situwâsi na yu wrokope kan meki taki yu bigin lobi moni? (b) Sortu sani wan Kresten musu prakseri te en basi e aksi en fu wroko moro langa?

⁶ A kan taki yu kon lobi gudu sondro taki yu sabi dati srefi. Fu eksempre, prakseri a situwâsi disi. A basi fu yu e kon na yu èn a e taigi yu: „Mi abi bun nyunsu gi yu! A wrokopresi kisi wan bigi wroko fu du. Sobun, yu o abi fu wroko moro langa na ini den mun di e kon. Ma mi kan taigi yu taki yu o kisi furu moni.” San yu ben o du efu yu basi taigi yu so wan sani? A no de fu taki dati a prenspari srefisrefi fu sorgu gi yu osofamiri. Ma dati a no a wan-enkri frantwortu di yu abi (1 Tim. 5:8). Tra prenspari sani de di yu musu prakseri tu. Fu eksempre, o langa yu o abi fu wroko ibri dei? A wroko fu yu o meki en muilek gi yu fu dini Gado? A o tapu yu fu go na den konmakandra èn fu hori na Osofamiri Anbegi?

⁷ Fosi yu bosroiti san yu o du, dan prakseri disi: San moro prenspari gi yu? Na a moni di yu o meki, noso a matifasi fu yu nanga Yehovah? Yu o tapu fu poti Kownukondre afersi na a fosi presi na ini yu libi, soso fu di yu wani meki moro moni? Yu e si san kan pasa te yu e feti baka moni? A kan meki taki yu nanga yu osofamiri no e dini Yehovah so fayafaya moro. Efu yu si taki disi e pasa nanga yu, dan san yu kan du so taki lobi gi moni no tron wan trapu gi yu?​—Leisi 1 Timoteyus 6:9, 10.

8. Sortu eksempre fu Bijbel kan yepi wi fu si na sortu fasi wi e libi?

⁸ Efu wi no wani taki lobi gi moni tron wan trapu gi wi, dan ten na ten wi musu luku a fasi fa wi e libi. Noiti wi musu de leki Esau di no ben warderi santa sani (Gen. 25:34; Hebr. 12:16). Boiti dati, wi no musu de leki a gudu man di Yesus ben aksi fu seri ala san a abi, fu gi a moni na den pôtisma, èn fu tron wan bakaman fu en. Na presi fu du san Yesus aksi en, a man „gowe nanga bigi sari, bika a ben abi furu gudu” (Mat. 19:21, 22). Lobi gi gudu meki taki a man disi lasi a bigi grani fu tron wan bakaman fu Yesus, a moro bigi man di ben libi na grontapu. Luku bun taki yu no lasi a grani fu de wan disipel fu Yesus Krestes.

9, 10. Te wi e luku san Bijbel e taki, dan fa wi musu si gudu?

⁹ Efu wi no wani taki gudu tron wan trapu gi wi, dan wi musu poti prakseri na a rai di Yesus gi: „Noiti un musu broko un ede nanga sani èn un no musu taki: ’San wi o nyan?’ noso ’San wi o dringi?’ noso ’San wi o weri?’ Ala den sani disi na san den grontapusma e feti fu kisi. Ma un Tata na hemel sabi taki unu abi ala den sani disi fanowdu.”​—Mat. 6:31, 32; Luk. 21:34, 35.

¹⁰ Efu wi no wani taki gudu tron wan trapu gi wi, dan wi musu abi a srefi denki fu a Bijbel skrifiman Agur, di taki: „No meki mi kon pôti èn no meki mi kon gudu tu. Meki mi nyan a nyanyan di mi abi fanowdu” (Odo 30:8). Agur ben frustan taki moni kan de wan yepi, ma a kan de wan trapu tu. Wi musu frustan taki den broko-ede fu a libi èn lobi gi gudu kan meki taki wi no de wan mati fu Yehovah moro. Efu wi e broko wi ede tumusi nanga gudu, dan a kan taki wi no o abi a ten, a krakti noso a wani fu poti Kownukondre afersi na a fosi presi na ini wi libi. Fu dati ede, du ala san yu man fu no meki lobi gi moni tron wan trapu di Satan kan gebroiki fu kisi yu!​—Leisi Hebrewsma 13:5.

LUKU BUN NANGA NA OLO DI NO DE FU SI MAKRIKI​—SUTADU

11, 12. Fa a kan pasa taki wan Kresten fadon na ini a trapu fu sutadu na wrokope?

¹¹ Son leisi, ontiman di wani kisi wan tranga meti e diki wan olo na a pasi pe a meti gwenti waka. Nofo tron den e tapu so wan olo nanga bon-wiwiri èn nanga taki. Wan fu den trapu di Satan e gebroiki fu kisi furu sma, de leki so wan olo. A trapu dati na hurudu (Odo 22:14; 23:27). Son Kresten fadon na ini a trapu dati fu di den meki densrefi kon na ini situwâsi pe a ben makriki fu du hurudu. Son Kresten di trow du sutadu di den bigin hori nanga wan tra sma di no de a trowpatna fu den.

¹² Wan sma di trow kan bigin hori nanga wan tra sma na wrokope. Moro leki afu fu den umasma di du sutadu èn furu fu den mansma di du sutadu, du dati nanga wan sma fu wrokope. Yu de na wan wrokope pe mansma nanga umasma musu wroko nanga makandra? Efu dati de so, fa yu de nanga den? Efu yu ben o bumui tumusi furu nanga den, dan a kan taki yu bigin kisi lobifiri gi wan fu den. Kon meki wi luku wan eksempre. Wan sisa e taki furu nanga wan man na wrokope. Bakaten den tron bun mati fu makandra èn a sisa e fruteri a man fu den problema na ini en trowlibi srefi. Noso kande wan brada e tron mati fu wan uma na wrokope. Kande a brada e prakseri: „A lobi fa mi e denki èn a e arki te mi e taki nanga en. A abi lespeki gi mi tu. Mi winsi taki mi wefi ben libi so nanga mi!” Yu kan si o makriki wan Kresten kan fadon na ini a trapu fu sutadu?

13. Fa a kan pasa na ini a gemeente taki wan sma di trow bigin hori nanga wan tra sma?

¹³ Srefi na ini a gemeente a kan pasa taki wan sma di trow bigin hori nanga wan trawan. Luku san pasa nanga wan Kresten trowpaar. Daniel nanga en wefi Saraa ben de gewoon pionier. Daniel taki dati a ben de wan owruman di ben e du iniwan sani di a gemeente ben aksi fu en. A ben studeri Bijbel nanga feifi man, èn dri fu den dopu bakaten. Den dri dopu brada disi ben abi furu yepi fanowdu. Fu di Daniel ben du so furu na ini a gemeente, meki nofo tron Sara ben musu yepi den. Ma Sara srefi ben abi wan sma fanowdu tu fu poti prakseri na en, èn den Bijbelstudie fu Daniel ben poti moro prakseri na en leki Daniel. Na so a trapu fu sutadu ben seti. Daniel taki: ’Ibri mun mi wefi ben e gebroiki ala en krakti fu yepi trawan. En bribi ben e kon swaki èn a ben abi mi fanowdu. Ma na a pisi ten dati, mi no ben poti prakseri na en. Ala den sani disi meki taki te fu kaba mi wefi du sutadu nanga wan fu den man di ben de wan Bijbelstudie fu mi fosi. Mi ben du so furu, taki mi no ben si taki en bribi ben e kon swaki.’ San yu kan du so taki disi no e pasa nanga yu?

14, 15. San kan yepi Kresten di trow fu no fadon na ini a trapu fu sutadu?

¹⁴ Efu yu no wani fadon na ini a trapu fu sutadu, dan yu musu prakseri bun san a wani taki fu tai hori na yu trowpatna. Yesus taki: „San Gado tyari kon na wán nowan sma musu prati” (Mat. 19:6). No denki noiti taki a wroko di yu e du na ini a gemeente prenspari moro yu trowpatna. Hori na prakseri taki a trowlibi fu yu kan kon swaki efu nofo tron yu no de nanga yu trowpatna aladi dati no de fanowdu. A sani disi kan meki taki yu du sutadu.

¹⁵ Efu yu na wan owruman, dan a no de fu taki dati yu musu sorgu gi a gemeente. Na apostel Petrus taki: „Luku den skapu fu Gado di a gi unu fu sorgu. No du dati neleki na dwengi sma dwengi unu, ma du en nanga prisiri. No du en tu fu di unu lobi fu kisi wini na wan fasi di no fiti, ma du en fu di unu e angri fu dini trawan” (1 Petr. 5:2). Sobun, yu musu poti prakseri na den brada nanga sisa na ini a gemeente. Ma yu no musu du so furu muiti fu de wan bun owruman, taki yu no man de wan bun masra. A no musu de so taki yu e yepi den brada nanga sisa na ini a gemeente, dan yu no e poti prakseri na yu wefi. Efu yu du disi, yu kan kisi problema na ini yu trowlibi. Daniel, di wi ben taki fu en didyonsro, taki: ’Noiti a musu de so taki yu e du so furu na ini a gemeente, taki yu no e poti prakseri na yu eigi osofamiri.’

16, 17. (a) San Kresten di trow kan du na wrokope fu sori sma krin taki den no sa abi lobifiri gi nowan tra sma boiti den trowpatna? (b) Gi eksempre fu artikel na ini den buku fu wi di kan yepi Kresten fu no du sutadu.

¹⁶ Na ini den Waktitoren nanga Ontwaakt! furu bun rai skrifi di kan yepi Kresten di trow, so taki den no fadon na ini a trapu fu sutadu. Fu eksempre, na ini A Waktitoren fu 15 september 2006 skrifi: „Te yu de na wrokope èn na tra presi, dan yu musu luku bun taki yu no e kon de na ini situwâsi di kan meki taki yu kisi wan tranga banti nanga wan tra sma. Fu eksempre, te sma komoto fu wroko èn yu leki umasma e tan wroko go doro skinskin nanga wan mansma, noso yu leki wan mansma e du dati nanga wan umasma, dan a sani dati kan kon tron wan tesi. Efu yu na wan man noso wan uma di trow, dan den sani di yu e taki èn a fasi fa yu e tyari yusrefi, musu sori tra sma krin taki yu no sa abi lobi firi gi nowan enkri tra sma boiti yu trowpatna. Fu di yu na wan sma di e anbegi Gado, meki a no de fu taki dati yu no sa prei nanga tra sma firi èn yu no sa weri krosi èn moi yusrefi na wan fasi di no fiti, fu di den sani dati kan meki trawan poti tumusi furu prakseri na yu . . . Te yu abi fowtow fu yu trowpatna èn fu yu pikin na ini yu kantoro, dan dati sa yepi yu nanga trawan fu hori na prakseri taki yu osofamiri de tumusi prenspari gi yu. Abi a fasti bosroiti fu no du sani di kan meki taki sma e suku fu hori nanga yu, èn awansi wan sma e du dati, dan yu musu sori en krin taki yu no wani.”

¹⁷ Na ini a Gado lobi-buku kapitel 11 paragraaf 17 skrifi: „Den sma di abi seks nanga wan tra sma di no de a trowpatna fu den, e sori taki den no abi nowan enkri lespeki gi den markitiki fu Gado. A tru taki na ini a ten disi, furu sma feni taki a no de wan ogri fu du sutadu. Ma awansi fa tra libisma e si sutadu, Kresten musu denki tra fasi. Den sabi taki te fu kaba, a no libisma sa ’krutu huruman nanga sutaman’, ma na Gado o du dati (Hebrewsma 10:31; 12:29).” Efu yu trow, a bun taki ten na ten yu nanga yu trowpatna e luku baka san den buku fu wi e taki fu a tori disi. A trowlibi na wan sani di Yehovah seti èn a de wan santa sani. Sorgu taki yu nanga yu trowpatna e teki ten fu taki fu a trowlibi fu unu. Disi o sori taki den sani di santa gi Gado prenspari gi yu tu.​—Gen. 2:21-24.

18, 19. (a) Sortu takru bakapisi sutadu kan tyari kon? (b) Sortu wini yu o kisi te yu e tai hori na yu trowpatna?

¹⁸ Efu yu e kisi a firi fu hori nanga wan sma di no de yu trowpatna, dan prakseri sortu takru bakapisi hurudu nanga sutadu e tyari kon (Odo 7:22, 23; Gal. 6:7). Den sma di e du sutadu no e plisi Yehovah, den e du wan hati sani nanga a trowpatna fu den èn den srefi o kisi takru bakapisi tu. (Leisi Maleaki 2:13, 14.) Ma a moro bun fu prakseri den wini di yu o kisi te yu e tyari yusrefi na wan fasi di krin. Yu o man kisi têgo libi, yu o abi wan bun libi now, èn yu o abi wan krin konsensi.​—Leisi Odo 3:1, 2.

¹⁹ A psalm skrifiman singi: „Den wan di lobi [Gado] wèt o abi freide pasa marki. Noti o meki den naki futu” (Ps. 119:165). Sobun, yu musu lobi den tru leri fu Gado èn yu musu ’luku bun taki yu no waka leki wan don sma, ma leki wan koni sma. Yu musu gebroiki a ten fu yu na wan koni fasi, bika wi e libi na ini ogri ten’ (Ef. 5:15, 16). Na ini a ten disi, Satan e gebroiki furu trapu fu kisi den anbegiman fu Gado. Ma Yehovah gi wi ala san wi abi fanowdu fu „tanapu kánkan” èn fu sorgu taki Satan no kisi wi noiti nanga den trapu fu en.​—Ef. 6:11, 16.