Yu e agri nanga Rogelio? Sortuwan fu den denki disi yu feni taki na a yoistiwan?

• Satan no de trutru. Satan na a ogri na ini sma.

• Satan de trutru, ma a no e suku fu du ogri nanga libisma.

• Satan na wan makti yeye di abi furu krakti tapu libisma.

A kan taki milyunmilyun sma abi wan fu den denki disi. Ma yu denki taki a prenspari fu kon sabi sortuwan fu den denki disi na a yoistiwan? We, efu Satan no de trutru, dan den sma di e bribi taki a de e kori densrefi. Efu Satan de trutru, ma a no e suku fu du ogri nanga libisma, dan na fu soso furu sma e luku bun nanga en noso e frede en. Ma efu Satan e kori sma na wan koni fasi, dan a kan du moro ogri leki san furu sma e denki.

Meki wi go luku now fa den Santa Buku fu Bijbel e piki den aksi disi: Satan na a ogri na ini sma, noso a de wan yeye? Efu Satan na wan yeye, dan a kan du ogri nanga yu? Efu dati de so, dan fa yu kan kibri yusrefi?

A makriki fu taki dati a Satan di Bijbel e taki fu en na a ogri nomo na ini wan sma. Ma na dati Bijbel e leri? Efu dati de so, dan fu san ede Bijbel e sori taki Satan ben e taki nanga Yesus Krestes èn srefi nanga na Almakti Gado? Meki wi go luku tu fu den takimakandra dati.

SATAN E TAKI NANGA YESUS

Di Yesus bigin nanga a wroko fu en na grontapu, dan Didibri pruberi fu kori en dri leisi. A fosi leisi, Satan pruberi fu kori Yesus fu gebroiki a krakti di Gado gi en fu suku en eigi bun, so taki a ben kan tapu na angri fu en. Baka dati, Didibri ben wani kisi Yesus fu du wan don sani, soso fu sori fa a kefalek. Leki lasti, Satan ben wani gi Yesus ala den kownukondre fu grontapu, ma Yesus ben musu anbegi en wán leisi nomo. Nowan fu den dri leisi Satan ben man kori Yesus. Ibri leisi Yesus gebroiki Bijbel fu tapu pasi gi en.​—Mateyus 4:1-11; Lukas 4:1-13.

Nanga suma Yesus ben e taki? Nanga wan ogri di ben de na ini en? Soleki fa Bijbel e sori, dan Yesus „kisi tesi na ala fasi neleki wi”, èn a „no ben abi sondu” (Hebrewsma 4:15). Bijbel e taki tu: „A no du nowan sondu èn a no taki nowan sani fu bedrigi sma” (1 Petrus 2:22). Yesus tan sondro sondu, èn a tan du san reti. Noiti a gi pasi taki ogri teki rutu na ini en ati. A de krin taki Yesus no ben e taki nanga wan ogri di ben de na ini en, ma a ben e taki nanga wan yeye.

A srefi takimakandra disi e sori moro fara taki Satan de trutru.

• Memre taki Didibri ben wani gi Yesus ala den kownukondre fu grontapu, ma Yesus ben musu anbegi en wán leisi nomo (Mateyus 4:8, 9). A sani dati ben o de fu soso efu Satan no ben de trutru. Boiti dati, Yesus no krutu Satan taki a no ben abi so furu makti.

• Baka di Yesus kakafutu gi den triki dati, dan Didibri „gowe libi en fu kon baka na wan moro bun ten” (Lukas 4:13). A sani disi e sori taki Satan a no wan ogri di de na ini sma, ma taki a de wan feanti di de nomonomo fu kori sma.

• Luku taki „engel kon yepi” Yesus (Mateyus 4:11). Den engel dati ben de yeye di ben kon fu gi Yesus deki-ati noso fu yepi en na wan tra fasi? Iya, na so a de. Dan fu san ede wi ben o denki taki Satan no de trutru?

SATAN E TAKI NANGA GADO

Wan tra tori di wi o luku, na a di fu a man Yob, di ben abi bigi lespeki gi Gado. Na ini a tori dati Didibri nanga Gado e taki tu leisi nanga makandra. Ala den tu leisi dati, Gado e prèise Yob fu di a e du san reti. Satan ben feni taki Yob ben e dini Gado soso fu feni en eigi bun. A ben feni taki Gado ben e blesi Yob so taki a ben kan tan gi yesi na en. Te yu luku en bun, dan Didibri ben taki dati a ben sabi Yob moro bun leki fa Gado ben sabi en. Yehovah gi pasi taki Satan meki Yob lasi ala en gudu, en pikin, nanga en gosontu srefi.a Te fu kaba a kon na krin taki den sani di Yehovah ben taki fu Yob ben tru, èn taki Satan ben lei gi Yob. Gado blesi Yob fu di a ben du san reti.​—Yob 1:6-12; 2:1-7.

Di Yehovah ben abi den takimakandra dati, dan yu denki taki a ben e taki nanga wan ogri di ben de na ini en? Bijbel e taki: „A pasi fu a tru Gado bun dorodoro” (2 Samuel 22:31). Gado Wortu e taki tu: „Yehovah Gado de santa, santa, santa. En na a Almaktiwan” (Openbaring 4:8). Wan sma di santa, soifri, èn a no abi nowan sondu. Yehovah no abi sondu èn a no abi nowan enkri fowtu. A no kan abi nowan enkri ogri na ini en.

Ma toku son sma ben kan feni taki Yob srefi no ben de wan trutru sma, sobun, a heri tori na wan anansitori. Ma a sani dati tru? Tra Bijbeltekst e sori taki Yob ben de wan trutru sma. Fu eksempre, Yakobus 5:7-11 e gebroiki Yob leki eksempre fu gi Kresten deki-ati fu horidoro na ini muilek ten èn fu trowstu den taki Yehovah o blesi den gi dati. Efu Yob no ben de wan trutru sma èn efu a no ben de so taki Satan ben pina en, dan yu denki taki sma ben o man kisi wini fu na eksempre fu en? Boiti dati, Esekièl 14:14, 20, e taki fu Yob, Noa, nanga Danièl leki dri reti-ati man. Neleki Noa nanga Danièl, Yob ben de wan trutru sma, èn a ben abi wan tranga bribi. Efu Yob ben de wan trutru sma, dan a sma di ben e pina en ben musu de trutru, a no so?

Bijbel e sori krin taki Satan na wan yeye. Ma kande yu e aksi yusrefi: ’A kan du ogri nanga mi èn nanga mi famiri na ini a ten disi?’

FA A DE NANGA A TEN DISI?

Prakseri taki wan grupu ogriman broko kon na ini a foto fu yu. A no de fu taki dati sma ben o frede èn wan lo ogri ben o pasa na ini a libimakandra. Luku wan srefi sortu situwâsi: Satan nanga den ogri yeye fu en, di neleki en ben opo densrefi teige Gado, fringi kon na grontapu wantronso. San ben o pasa? We, prakseri den sani di yu srefi e si e pasa na ini a kondre fu yu èn na heri grontapu.

• Yu no e si fa moro nanga moro ogri-ati sani e pasa, aladi sma na heri grontapu e meki muiti fu tapu den?

• Yu no e si fa moro nanga moro felem nanga poku abi fu du nanga afkodrei, aladi furu papa nanga mama e broko den ede nanga a sani dati?

• Yu no e si fa sma e tan pori grontapu, aladi trawan e du muiti fu kibri en?

• Yu no feni taki wan sani e pasa nanga a libimakandra? Yu no feni taki a gersi leki wan krakti e pusu libisma go miti rampu?

Luku suma de frantwortu gi den takru sani di e pasa na ini a ten disi. Bijbel e taki: „Den fringi a bigi kaiman go na grontapu. En na a fosi sneki, a wan di den e kari Didibri nanga Satan èn a e kori sma na heri grontapu. Den fringi en go na grontapu èn den fringi den engel fu en go na grontapu makandra nanga en. . . . Helu fu grontapu èn fu a se, bika Didibri saka kon na unu èn a abi bigi atibron fu di a sabi taki en ten syatu” (Openbaring 12:9, 12). Furu sma di e si den sani disi, kon frustan taki Satan na wan ogri yeye di abi krakti tapu heri grontapu.

Kande yu e aksi yusrefi fa yu kan feni kibri. Yu abi leti fu broko yu ede nanga a sani dati. A tra artikel o sori yu fa yu kan du dati.

Neleki fa a de nanga a gas disi, na so wi no man si Satan. A muilek fu sabi o ten a wani du ogri nanga wi, èn a kan kiri wi tu. Ma Gado no libi wi sondro yepi. Wi no abi fu frede Satan efu wi e gebroiki den moi sani disi di Gado gi wi.

Wi kan teki wi eigi bosroiti. Yakobus 4:7 e taki: „Kakafutu gi Didibri èn a o lon gowe fu unu.” Aladi Satan abi furu makti, toku a no man dwengi yu fu du sani di yu no wani du. Na yu srefi musu bosroiti dati. Na ini 1 Petrus 5:9 skrifi: „Kakafutu gi en [Didibri] èn abi wan tranga bribi.” Memre taki Satan gowe libi Yesus baka di Yesus kakafutu gi en ala den dri leisi di a ben suku fu kori en (Mateyus 4:11). Yu kan bosroiti tu fu kakafutu gi Satan te a wani kori yu.

Yu kan de wan mati fu Gado. Yakobus 4:8 e gi wi deki-ati fu „kon krosibei na Gado”. Yehovah srefi e gi yu a kari fu tron wan mati fu en. Fa yu kan du dati? A moro bun fasi fa yu kan du dati, na te yu e kon leri sabi en nanga yepi fu Bijbel (Yohanes 17:3). Den sani di yu e kon sabi fu Yehovah o meki taki yu o kon lobi en, èn dati o meki taki yu o wani gi yesi na en (1 Yohanes 5:3). Te yu e kon moro krosibei na yu hemel Tata, dan san a o du? Yakobus e taki moro fara: ’Gado o kon krosibei na yu’.

A e pramisi taki a o kibri wi. Odo 18:10 e taki: „A nen fu Yehovah na wan bun kibripresi. Den reti-ati sma e lon go na ini èn den e kisi kibri.” Ma disi no wani taki dati wi musu gebroiki a nen fu Gado leki wan sortu tapu. Na presi fu dati, den wan di abi trutru lespeki gi a nen fu Gado, kan begi en ala ten fu kibri den.

Wan bun eksempre. Tori fu den apostel 19:19 e taki wan moi sani fu sma na ini Efeise di ben teki a Kresten bribi: „Bun furu fu den sma di ben e du bonuwroko tyari den buku fu den kon na wán èn den bron den na fesi ala sma. Di den teri ala den sani disi, dan den kon si taki den ben warti feifitenti dusun pisi solfru moni.”a Den Kresten dati pori iniwan sani di ben abi fu du nanga afkodrei, awansi fa den sani dati ben diri. Na eksempre disi kan yepi wi furu na ini a ten disi. A grontapu disi lai nanga bonu nanga afkodrei. Srefi pikinpikin sani di sma e gebroiki fu du afkodrei, noso son gwenti di den abi kan gi ogri yeye okasi fu abi krakti na den tapu. Wi no musu abi noti fu du nanga den sani dati, awansi san pasa.​—Deuteronomium 18:10-12.

Rogelio di kari na ini a fosi artikel no ben e bribi taki Didibri de trutru. Ma baka di a pasa 50 yari a bigin denki tra fasi. Fu san ede? Rogellio e taki: „Fu a fosi leisi na ini mi libi mi kon abi wan Bijbel. Den sani di mi leri fu Bijbel sori mi krin taki Didibri de trutru. Na den sani dati e kibri mi fu no fadon na ini a trapu fu en.”

Yu ben o wani si a dei te Satan no de moro? A sani dati kan. Bijbel e taki dati wan dei, Gado o „fringi en [Didibri di e kori furu sma] go na ini a se di e bron nanga faya di e pori sani krinkrin” (Openbaring 20:10). A no de fu taki dati faya no man du noti nanga wan yeye di wi no man si. Dati meki a musu de so taki a se di e bron nanga faya wani taki dati Didibri o kisi pori fu ala ten. Satan no o de noiti moro. Dati sa de wan moi ten gi den wan di lobi Gado!

Dati meki yu musu tan meki muiti fu kon sabi moro fu Yehovah èn fu a wani fu en.b Prakseri taki yu sa de na libi te ala sma o man taki: „Satan no de moro!”