Christopher, Hannah, nanga Gina a no den wan-enkri sma di e firi so. Furu sma na heri grontapu e bribi taki Gado e si den leki en mati. Fa a de nanga yu? Yu feni taki yu na wan mati fu Gado? Noso yu ben o wani tron wan mati fu en? Kande yu e aksi yusrefi: ’Wi leki libisma man de mati fu na Almakti Gado? Efu dati kan, dan fa wi kan tron mati fu en?’

YU MAN DE WAN MATI FU GADO

Soleki fa Bijbel e sori, dan wi man de mati fu Gado. Bijbel e taki dati Gado ben kari a Hebrew famiri-edeman Abraham „mi mati” (Yesaya 41:8). Luku sosrefi sortu moi kari wi e kisi na Yakobus 4:8: „Kon krosibei na Gado èn a o kon krosibei na unu.” Sobun, a de krin taki libisma man de mati fu Gado. Ma wi no man si Gado, sobun fa yu kan „kon krosibei” na en èn de wan bun mati fu en?

Fu man piki na aksi dati, dan meki wi luku fa sma e tron mati fu makandra. Te wan sma wani kon sabi wan trawan, dan a fosi sani di a wani sabi na a nen fu a sma. Te den gwenti taki nanga makandra èn e fruteri makandra fa den e denki èn fa den e firi, dan safrisafri den e tron mati. Te den e du sani gi makandra, dan a matifasi fu den e kon moro tranga. Na so a de tu te wi wani tron wan mati fu Gado. Meki wi go luku fa dati e pasa.

Yu abi wan bun mati ma yu no sabi en nen? Seiker dati no de so. Irina, wan uma fu Bulgaria ben abi leti fu taki a sani disi: „Yu no man de wan mati fu Gado efu yu no sabi en nen.” Koloku taki Gado wani taki wi tron mati fu en, soleki fa wi si dati na ini a fosi artikel. Dati meki na ini Bijbel, Gado meki wi kon sabi suma na en. A taki: „Mi na Yehovah. Dati na mi nen.”​—Yesaya 42:8.

Yu denki taki a prenspari gi Yehovah taki wi sabi en nen èn taki wi e gebroiki en? Luku a sani disi: A nen fu Gado, di skrifi nanga fo Hebrew letter èn di sma sabi leki a Tetragrammaton, de fu feni pikinmoro 7000 leisi na ini den fosi Hebrew Buku fu Bijbel. Nowan tra nen skrifi so furu leisi na ini Bijbel. A sani disi e sori krin taki Yehovah wani taki wi sabi en nen èn taki wi e gebroiki en.a

Ma son sma ben kan feni taki Gado santa èn taki en na a Almaktiwan. Fu dati ede den no ben o sori lespeki gi en te den ben o gebroiki en nen. A tru taki a no ben o bun fu gebroiki Gado nen na wan fasi di no fiti, neleki fa yu no ben o du dati nanga a nen fu yu bun mati. Ma Yehovah wani taki den sma di lobi en musu gi en nen grani, èn den musu fruteri trawan a nen fu en (Psalm 69:30, 31; 96:2, 8). No frigiti taki Yesus ben leri den bakaman fu en fu begi: „Wi Tata na hemel, meki yu nen de santa.” Te wi e fruteri sma a nen fu Gado, dan wi e yepi fu santa a nen fu en. Na so wi e tron moro bun mati fu Gado.​—Mateyus 6:9.

Bijbel e sori taki Gado e prakseri den wan „di e hori en nen na prakseri” (Maleaki 3:16). Te wan sma e du dati, dan Yehovah e pramisi en: „Mi o kibri en, fu di a kon sabi mi nen. A o kari mi èn mi o piki en. Mi o de nanga en te a de na nowtu” (Psalm 91:14, 15). A prenspari taki wi sabi Yehovah en nen èn taki wi e gebroiki en efu wi wani de bun mati fu en.

Bun mati e meki muiti fu taki nanga makandra te den man, awansi nanga yepi fu telefon, e-mail, skype, noso brifi. Sobun, efu wi wani de mati fu Gado, dan wi musu abi a gwenti fu taki nanga en. Ma fa wi kan du dati?

Wi kan taki nanga Yehovah te wi e begi. Ma te wi e begi Gado, dan dati a no a srefi leki te wi e taki nanga wan speri fu wi. Wi musu frustan taki te wi e begi, wi e taki nanga wi Mekiman, a Moro Heiwan fu hemel nanga grontapu. Dati meki wi musu sori bigi lespeki te wi e begi. Efu wi wani taki Gado arki den begi fu wi, dan wi musu du wan tu sani. Luku dri fu den sani dati.

A fosi sani, na taki wi musu begi Yehovah Gado wawan. Wi no musu begi Yesus, wan „santawan”, noso wan popki (Eksodes 20:4, 5). Bijbel e taki krin: „Begi Gado ala ten, begi en fayafaya èn taki en tangi tu. Na so a o kon sabi san unu wani aksi en” (Filipisma 4:6). A di fu tu sani, na taki wi musu begi na ini a nen fu a Manpikin fu Gado, Yesus Krestes. Yesus srefi ben taki: „Nowan sma kan kon na a Tata sondro mi” (Yohanes 14:6). A di fu dri sani, na taki den begi fu wi musu kruderi nanga a wani fu Gado. Bijbel e taki: „Awansi san wi e aksi en, a e yere wi, solanga a e kruderi nanga a wani fu en.”a​—1 Yohanes 5:14.

A no de fu taki dati tu sma no o tan bun mati efu na wan fu den nomo e taki nanga a trawan. Neleki fa tu mati lobi taki nanga makandra, na so wi musu gi Gado okasi fu taki nanga wi èn wi musu arki en te a e du dati. Yu sabi fa Gado e taki nanga wi?

Na ini a ten disi, Yehovah Gado e taki nanga wi nanga yepi fu en Wortu, Bijbel (2 Timoteyus 3:16, 17). Fu san ede wi e taki dati? Luku na eksempre disi: Kon meki wi taki dati yu kisi wan brifi fu wan bun mati fu yu. Kande baka te yu leisi en yu breiti èn yu e fruteri tra sma taki yu firi taki yu mati taki nanga yu. Na so a de tu taki te yu e leisi Bijbel, yu e gi Yehovah okasi fu taki nanga yu. Dati meki Gina di ben kari na ini a fosi artikel, e taki: „Mi denki taki efu mi wani taki Gado si mi leki en mati, dan mi musu ondrosuku Bijbel, a brifi di a gi wi.” A e taki moro fara: „Fu di mi e leisi Bijbel ibri dei, meki mi tron wan moro bun mati fu Gado.” Yu e gi Yehovah okasi fu taki nanga yu ibri dei? Yu e leisi en Wortu, Bijbel, ibri dei? Te yu e du dati, dan yu o firi taki yu na wan mati fu Gado.

„Awinsi san yu wani, taigi mi, mi o du en gi yu.” Kande yu no ben o taigi wan sma di yu no sabi so bun a sani dati. Ma a no ben o de wan problema gi yu fu taigi wan bun mati fu yu a sani dati. Bun mati gwenti du sani gi makandra.

Bijbel e sori taki Yehovah gwenti du bun sani gi den anbegiman fu en. Fu eksempre, Kownu David, di ben de wan bun mati fu Gado ben taki: „Yehovah mi Gado, yu du furu sani. Iya, yu du kefalek moi sani gi wi èn ala ten baka yu e prakseri wi. . . . Den furu so te, taki mi no man teri den” (Psalm 40:5). Boiti dati, Yehovah e du bun sani srefi gi sma di no sabi en ete, iya, a e ’meki taki den abi bun furu nyanyan èn taki den e firi prisiri’.​—Tori fu den apostel 14:17.

Fu di Yehovah lobi du bun gi trawan, meki wi kan frustan taki den sma di wani de mati fu Gado wani du sani di e meki en „ati prisiri” (Odo 27:11). Ma sortu sani yu kan du fu meki Gado prisiri? Bijbel e taki: „Un no musu frigiti fu du bun èn fu prati san unu abi nanga trawan, bika Gado e prisiri nanga den sortu ofrandi dati” (Hebrewsma 13:16). A sani disi wani taki dati te yu e du bun gi trawan èn te yu prati sani nanga den, dan dati bun kaba gi Yehovah?

„Sondro bribi wan sma no kan prisiri Gado”, na so Bijbel e taki (Hebrewsma 11:6). A moi fu sabi taki na baka di „Abraham ben poti bribi na ini Yehovah”, dan fosi Yehovah kari en ’en mati’ (Yakobus 2:23).Yesus Krestes ben sori tu taki a prenspari fu „bribi na ini Gado”, efu wi wani taki a blesi wi (Yohanes 14:1). Sobun, fa yu kan kon abi a bribi di Gado wani taki den mati fu en musu abi? Wan sani di yu kan du, na fu studeri Gado Wortu, Bijbel doronomo. Te yu e du dati, dan yu o „kon sabi finifini san na a wani fu en” èn yu o man „prisiri en dorodoro”. O moro yu e kon sabi Yehovah èn o moro yu e du den bun sani di a e aksi fu yu, o moro a bribi fu yu o kon tranga èn yu o tron wan moro bun mati fu en.​—Kolosesma 1:9, 10.

San yu kan du fu de wan mati fu Gado? Wi ben luku wan tu sani di yu kan du fu tron wan bun mati fu en:

1. Kon sabi Gado nen, Yehovah, èn gebroiki en.

2. Begi èn studeri en Wortu, Bijbel, fu man taki nanga en doronomo.

3. Tan du san Yehovah wani.

Te yu e luku den sani disi, dan yu ben o taki dati yu e du san de fanowdu fu de wan mati fu Gado? Wan tu sani de di yu feni taki yu kan du moro bun? A tru taki yu o abi fu meki muiti, ma yu o kisi wini te yu e du dati.

„A e tyari wini kon te wi e meki muiti fu tron mati fu Gado”, na so Jennifer di e libi na Amerkankondre, e taki. „Te wi na mati fu Gado, dan wi e kisi furu blesi: wi e frutrow moro tapu Gado, wi e kon frustan den fasi fu en moro bun, ma san moro prenspari, na taki wi o abi moro lobi gi Yehovah. Wan moro bun fasi fu libi no de kwetikweti!”

Efu yu wani de wan bun mati fu Gado, dan Yehovah Kotoigi o breiti fu yepi yu. Den kan seti sani fu studeri Bijbel nanga yu, sondro taki yu abi fu pai gi dati. Yu e kisi a kari tu fu go na den konmakandra fu den di e hori na ini wan Kownukondre zaal na ini a birti fu yu, èn pe sma e kisi leri fu Bijbel. Drape yu o miti sma di breiti taki den na mati fu Gado.a Te yu du dati, dan yu o firi neleki a psalm skrifiman di ben taki: „A bun gi mi fu kon krosibei na Gado.”​—Psalm 73:28.