San yu e denki? Gado feni feti bun? Efu disi de so, dan sortu sei a e teki te sma e feti? Te yu kisi piki tapu den aksi disi, dan kande dati o kenki a fasi fa yu e denki fu feti. Fa so? Efu yu ben sabi taki Gado feni feti bun èn taki a e horibaka gi a srefi sei pe yu de, dan yu ben o breiti fu di yu sabi taki na a sei dati o wini a feti. Ma fa yu ben o firi efu yu ben sabi taki Gado e horibaka gi den sma di e feti teige yu? A no de fu taki dati yu ben o wani abra go na a sei dati, a no so?

Wan moro prenspari sani de fu san ede a bun fu sabi fa Gado e denki fu feti. Te yu kon sabi fa Gado e denki fu feti, dan kande yu o denki tra fasi fu Gado. Kande yu na wan fu den milyunmilyun sma di e pina fu di feti de na ini a kondre fu yu. A no de fu taki dati yu musu kisi piki tapu den aksi disi: A de so taki na lobi Gado lobi feti, meki a e gi pasi taki feti de? A de so taki a e gi sma deki-ati srefi fu feti, fu di a wani si fa trawan e pina? A kan taki a no e du noti fu di a no e broko en ede srefisrefi nanga den sma di trawan e pina?

Kande yu o fruwondru te yu kon sabi taki a piki di Bijbel e gi no e horibaka srefisrefi gi den denki disi. Boiti dati, a fasi fa Gado e denki fu feti no kenki noiti. Meki wi luku san Bijbel e taki fu a fasi fa Gado ben e denki fu feti na ini a ten fu den Israelsma fu owruten. Wi o luku tu fa a ben e denki fu feti na ini a ten di Yesus ben de na grontapu èn na ini a ten fu den fosi Kresten. Disi o yepi wi fu kon sabi fa Gado e denki fu feti na ini a ten disi. Wi o kon sabi tu efu feti o de fu ala ten.

Fu di Gado srefi feti nanga den Egeptesma, meki a de krin taki a no ala ten a de teige feti. Son leisi a ben taigi en pipel Israel tu fu go feti nanga tra pipel. Fu eksempre, a ben taigi den fu feti nanga den Kanansma di ben ogri srefisrefi (Deuteronomium 9:5; 20:17, 18). A ben taigi Kownu David fu Israel tu fu feti nanga den Filisteasma di ben e pina den. Gado ben sori David srefi fa fu feti nanga den Filisteasma, so taki a ben kan wini den.​—2 Samuel 5:17-25.

Den sortu Bijbel tori disi e sori taki te wan pipel ben kan pori a denki fu den Israelsma, noso te den ben e pina den, dan Gado ben taigi den Israelsma fu feti nanga den. Na so a ben e kibri en pipel èn a tru anbegi. Meki wi go luku dri prenspari sani di wi kan leri fu den feti fu Gado.

1. NA GADO WAWAN BEN E TAKI SUMA BEN O TEKI PRATI NA A FETI. Wan leisi Gado taigi den Israelsma: „Unu no abi fu feti.” Fu san ede? Gado srefi ben o feti gi den (2 Kroniki 20:17; 32:7, 8). A du disi furu tron soleki fa wi si na a bigin fu na artikel disi. Ma son leisi Gado ben taigi den Israelsma fu owruten taki den ben musu go feti. Fu eksempre, den ben musu feti fu teki a Pramisi Kondre abra èn bakaten den ben musu feti tu nanga den tra pipel di ben wani teki a kondre disi abra.​—Deuteronomium 7:1, 2; Yosua 10:40.

2. NA GADO WAWAN BEN E TAKI O TEN WAN FETI BEN O FETI. Den futuboi fu Gado ben musu wakti nanga pasensi teleki Gado ben taigi den o ten den ben musu feti nanga den pipel di ben e pina den èn di ben e du wan lo ogri na den lontu. Solanga Gado no ben taigi den fu go feti, den no ben musu du dati. Ma efu toku den ben go feti, dan Gado no ben e horibaka gi den. Bijbel e sori taki te den Israelsma ben go feti sondro taki Gado taigi den fu du dati, dan nofo tron sani no ben waka bun nanga den srefisrefi.a

3. GADO NO E PRISIRI TE WAN SMA DEDE, AWINSI NA WAN OGRI SMA. Yehovah Gado na a sma di e gi libi èn en na a Mekiman fu libisma (Psalm 36:9). Fu dati ede a no lobi te sma e dede. Ma a de wan sari sani taki son ogri-ati sma e suku ala sortu fasi fu pina trawan noso fu kiri den srefi (Psalm 37:12, 14). Fu tyari wan kaba kon na den sortu ogri sani disi, dan son leisi Gado ben meki en pipel feti nanga den ogri sma disi. Ma na ini ala den yari di a meki den Israelsma feti nanga den sortu pipel disi, a ben sori „sari-ati” èn ’en ati no ben e bron esi’ nanga den sma di ben pina den Israelsma (Psalm 86:15). Fu eksempre, Gado ben taigi den Israelsma: „Te unu o go feti nanga den sma na ini wan foto, dan un musu aksi den fosi efu den wani gi densrefi abra” (Deuteronomium 20:10-13). Na so den sma fu a foto ben kisi na okasi fu kenki den libi èn den no ben o abi fu feti moro. Na a fasi disi Gado sori krin taki ’a no e prisiri te wan ogri sma e dede, ma a e prisiri te wan ogri sma e drai en libi èn e tan na libi’.​—Esekièl 33:11, 14-16.b

Soleki fa wi si, dan na ini owruten Gado ben si feti leki wan fasi fu tyari wan kaba na ogridu èn na a pina di sma e pina trawan. Ma na Gado ben taki o ten wan feti ben o feti èn suma ben o teki prati na a feti. Na en abi a reti fu du disi, a no libisma. Ma a de so taki a ben feni den feti disi bun fu di a lobi kiri sma? Kwetikweti. Fu taki en leti, Gado no lobi ogridu srefisrefi (Psalm 11:5). Ma a de so taki Gado ben e denki tra fasi fu feti di en Manpikin Yesus Krestes ben de na grontapu?

Ma fa dati kan? Fu san ede Gado no feti gi den Dyu neleki fa a ben e feti gi den afo fu den na ini owruten? Fu san ede a no ben taigi den fu go feti nanga den Romesma, so taki den ben kan kon fri? A de so taki Gado ben e denki tra fasi fu feti now? Nôno. Ma a fasi fa a ben denki fu den Dyu ben kenki. Den Dyu no ben wani bribi na ini Yesus di ben de a Mesias èn a Manpikin fu Gado (Tori fu den apostel 2:36). Dati meki Gado no ben si den moro leki en pipel.​—Mateyus 23:37, 38.

Gado no ben kibri den Dyu èn a Pramisi Kondre moro. Boiti dati, den Dyu no ben kan taki moro dati Gado ben e horibaka gi den te den ben e go feti nanga tra pipel. Soleki fa Yesus ben taki na fesi, dan Gado ben teki tra sma leki en pipel now. Bakaten Bijbel kari a pipel disi „na Israel fu Gado” (Galasiasma 6:16; Mateyus 21:43). Na a pipel disi Gado ben feni bun èn na den a ben e blesi. „Na Israel fu Gado” na a gemeente fu Kresten di salfu nanga santa yeye. Fu dati ede Petrus ben taigi den krin: „Now unu na en pipel.”​—1 Petrus 2:9, 10.

Ma a de so taki Gado ben o feti gi den Kresten fu di a ben teki den leki en pipel? A de so taki a ben o frulusu den fu den Romesma? A ben taigi den fu go feti nanga den sma disi di ben e pina den? Nôno, a no du dati. Fu san ede? Efu Gado e horibaka gi wan feti, dan na en wawan e bosroiti o ten a feti o feti, soleki fa wi si kaba na ini na artikel fosi a wan disi. Gado no ben e feti gi den fosi Kresten èn a no ben taigi den tu fu go feti. Sobun, a de krin taki a ten fu Gado no ben doro fu feti nanga den sma di e du ogri èn di e pina trawan.

Fu dati ede, neleki den futuboi fu Gado na ini owruten, den fosi Kresten ben musu wakti teleki Gado bosroiti fu puru den sma na pasi di e du ogri èn di e pina trawan. Solanga a ten dati no ben doro, Gado no ben gi den Kresten a reti fu go feti nanga den feanti fu den. Yesus ben sori dati krin na ini den leri fu en. Fu eksempre, a no ben taigi den bakaman fu en fu feti. Ma a taigi den: „Tan lobi un feanti èn tan begi gi den sma di e frufolgu unu” (Mateyus 5:44). Di Yesus ben fruteri den disipel taki den Romesma ben o kon feti nanga Yerusalem, a ben taigi den taki den no ben musu tan na ini Yerusalem fu feti. Den ben musu lowe èn na dati den du tu.​—Lukas 21:20, 21.

Gado ben meki na apostel Paulus skrifi tu: „No pai wan sma gi na ogri di a du nanga yu, . . . bika Gado Buku taki: ’Na mi o puru atibron na den tapu. Mi o pai den baka gi den ogri di den du, na so Yehovah taki’” (Romesma 12:19). A sani di Paulus taki dyaso na wan sani di Gado ben taki kaba hondrohondro yari pasa, soleki fa wi kan leisi na ini Lefitikus 19:18 nanga Deuteronomium 32:35. Soleki fa wi si na ini na artikel fosi a wan disi, dan son leisi Gado ben yepi en pipel na ini owruten fu feti nanga den feanti fu den. Sobun, a sani di Paulus taki e sori taki a fasi fa Gado ben e denki fu feti no ben kenki. Na ini a ten fu den fosi Kresten sosrefi, Gado ben e si feti leki wan fasi fu frulusu den futuboi fu en èn fu puru den sma na pasi di e du ogri èn di e pina trawan. Ma neleki fa a ben de na ini owruten, dan na Gado wawan ben e taki o ten a feti ben o feti èn suma ben o teki prati na a feti.

A de krin taki Gado no ben taigi den fosi Kresten fu go feti. Ma fa a de na ini a ten disi? Gado e horibaka gi wan grupu sma di e feti now? A de so taki now na a ten taki Gado e feti gi den futuboi fu en? Fa Gado e denki fu feti na ini a ten disi? A tra artikel o gi piki tapu den aksi disi

Fosi wi go luku a piki tapu den aksi disi, meki wi luku wan sani di e gi wi trowstu: Gado e si fa sma e pina na grontapu nownow èn a o tyari wan kaba kon na a sani disi (Psalm 72:13, 14). Na ini en Wortu, Bijbel, Gado pramisi taki den sma di trawan e pina „o kisi yepi fu Gado”. O ten dati o pasa? Disi o pasa „te Masra Yesus o sori ensrefi komoto na hemel makandra nanga den tranga engel fu en . . . . Na a ten dati, a o puru atibron na tapu den sma di no sabi Gado èn na tapu den sma di no e gi yesi na a bun nyunsu di e taki fu wi Masra Yesus” (2 Tesalonikasma 1:7, 8). Na ini a ten di e kon, Yesus o sori ensrefi te a o kon feti a feti di Bijbel e kari Armagedon noso „a feti na a bigi dei fu Gado na Almaktiwan”.​—Openbaring 16:14, 16.

Na ini a feti dati Gado no o gebroiki wan libisma legre fu tyari wan kaba kon na ogridu. A o meki en Manpikin Yesus Krestes nanga tra makti engel feti a feti disi. A legre disi fu hemel o tyari wan kaba kon na a pina di sma e pina trawan.​—Yesaya 11:4; Openbaring 19:11-16.

Te now ete a fasi fa Gado e denki fu feti no kenki. Te nanga now a e si feti leki wan fasi fu tyari wan kaba kon na ogridu èn na a pina di sma e pina trawan. Ma soleki fa a ben de na ini owruten, na Gado wawan abi a reti fu taki o ten wan feti o feti èn suma o teki prati na a feti dati. Soleki fa wi si, dan Gado bosroiti kaba taki a o tyari wan feti kon fu puru ogridu nanga a pina di sma e pina trawan. A bosroiti tu taki na en Manpikin Yesus Krestes o feti a feti dati. Disi e sori taki Gado no e horibaka gi den feti di sma e feti na ini a ten disi, awinsi den e feti fu di den wani yepi trawan.

Meki wi luku wan agersitori fu tyari a tori disi kon na krin. Kon meki wi taki dati tu brada e bigin feti te den papa no de na oso. Baka wan pisi ten den e tapu nanga a feti èn den e bel a papa. A wan brada e taki dati a trawan bigin nanga a feti èn a tra brada e taki dati na a trawan naki en fosi. Na so den ala tu e taki nanga a papa fu di den wani taki a teki a sei fu den. Ma te a papa yere san ala tu taki a e taigi den fu no feti moro èn fu wakti teleki a doro na oso fu krutu a tori. Den tu brada e wakti wan pisi ten. Ma a no e teki langa fosi den bigin feti baka. Te a papa kon na oso en ati e bron nanga ala tu èn a e strafu ala tu fu di den no gi yesi na en.

Na ini a ten disi furu kondre di e feti e begi Gado fu horibaka gi den. Ma Gado no e teki sei na ini den feti di sma e feti na ini a ten disi. En Wortu Bijbel e taki krin: „Te wan sma du unu wan ogri, un no musu du a sma dati ogri baka” èn „no pai wan sma gi na ogri di a du nanga yu” (Romesma 12:17, 19). Gado sori libisma tu taki den musu „wakti” nanga pasensi teleki en srefi tyari frulusu kon (Psalm 37:7). A o du dati na ini Armagedon. Te den kondre e go feti nanga tra kondre fu di den no man wakti teleki Gado du wan sani, dan Gado no feni dati bun srefisrefi fu di den e du wan sani di den no abi a reti fu du. Sobun, na ini Armagedon Gado o puru atibron na den ogrisma tapu èn a o tyari wan kaba kon na den feti fu libisma fu ala ten. ’Na ala sei fu grontapu a o meki feti kon na wan kaba’ (Psalm 46:9; Yesaya 34:2). Iya, Armagedon o de a feti di o tyari wan kaba kon na ala feti.

Wan fu den furu blesi di Gado Kownukondre o tyari kon, na taki feti no o de moro. Na fu a Kownukondre disi Yesus ben taki na ini wan begi di furu sma sabi. A taki: „Meki yu Kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Gado Kownukondre no o tyari wan kaba kon na feti nomo, ma a o tyari wan kaba kon tu na a rutu fu feti. Dati na ogridu (Psalm 37:9, 10, 14, 15).a Dati meki den bakaman fu Yesus e wakti fayafaya teleki Gado Kownukondre tyari den blesi disi kon.​—2 Petrus 3:13.

Ma o langa wi musu wakti teleki Gado Kownukondre tyari wan kaba kon na ala pina nanga ogridu? Bijbel profeititori di kon tru e sori taki wi e libi na ini „den lasti dei” fu a grontapu disi (2 Timoteyus 3:1-5).b Heri esi den lasti dei disi o kon na wan kaba te Gado Kownukondre o tyari a feti fu Armagedon kon.

Soleki fa wi si kaba, dan den sma di o dede na ini a lasti feti disi, na sma di no wani „gi yesi na a bun nyunsu di e taki fu wi Masra Yesus” (2 Tesalonikasma 1:8). Ma memre taki Gado no e prisiri te wan sma dede, awinsi na wan ogri sma (Esekièl 33:11). Fu di Gado „no wani taki wan sma lasi libi” na ini a lasti feti disi, meki now a e sorgu taki a bun nyunsu fu wi Masra Yesus e „preiki gi sma na heri grontapu, so taki sma fu ala kondre kan yere dati”. Baka dati a o tyari a kaba kon (2 Petrus 3:8, 9; Mateyus 24:14; 1 Timoteyus 2:3, 4). Iya, a preikiwroko di Yehovah Kotoigi e du na heri grontapu e meki taki sma na ini a ten disi abi na okasi fu kon sabi Gado. Den abi na okasi tu fu gi yesi na a bun nyunsu fu Yesus èn fu libi na ini wan ten pe feti no de moro.