Kande yu si Yehovah Kotoigi e preiki oso fu oso èn na presi pe furu sma de. Kande yu si taki den e prati buku di e taki fu Bijbel èn taki den e aksi sma efu den wani studeri Bijbel. A kan taki wan fu den gi yu a tijdschrift disi. Ma kande yu e aksi yusrefi suma na Yehovah Kotoigi trutru. Kande yu abi a srefi denki fu wan fu den sma di kari didyonsro.

Efu yu abi den sortu aksi disi, dan pe yu kan feni den piki? Fa yu kan kon sabi san Yehovah Kotoigi e bribi trutru? Fa den e pai gi den kostu fu a preikiwroko fu den èn gi den konmakandra presi fu den? Fu san ede den e suku fu taki nanga yu na oso noso na tra presi tu?

Cecilie, di wi kari didyonsro, taki: „Mi leisi furu fu Yehovah Kotoigi tapu Internet. Mi yere son sma e taki sani fu den èn mi ben bribi furu fu den ogri sani di den taki. Dati meki mi no ben e denki bun fu Yehovah Kotoigi srefisrefi.” Ma bakaten Cecilie taki nanga den Yehovah Kotoigi srefi èn a kisi bun piki tapu den aksi fu en.

Yu wani kon sabi trutru suma na Yehovah Kotoigi? Wi e gi yu deki-ati fu taki nanga den Yehovah Kotoigi srefi, sobun den sma di meki a tijdschrift disi. Den wawan kan gi yu den yoisti piki (Odo 14:15). Wi howpu taki den artikel di e kon now o yepi yu fu si suma na wi èn san wi e bribi. Den artikel disi kan yepi yu tu fu frustan a wroko fu wi moro bun.

Wi na memre fu wan organisâsi di de na heri grontapu. Wi no de memre fu nowan tra kerki. Na edekantoro fu wi de na ini Amerkankondre, ma a moro bigi grupu fu Yehovah Kotoigi e libi na ini tra kondre. Fu taki en leti, sowan aiti milyun Kotoigi e leri sma sani fu Bijbel na ini moro leki 230 kondre. Wi e du a wroko disi fu di wi wani gi yesi na a sani disi di Yesus taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati.”​—Mateyus 24:14.

Awinsi pe wi e libi, wi e du ala san wi man fu gi yesi na den wet fu lanti, solanga a no de wan sani di de teige a konsensi fu wi. Ma wi no e bumui nanga politiek fu di Yesus gi ala Kresten a rai fu „no de wan pisi fu grontapu”. Dati meki wi no e bumui nanga politiek èn wi no e teki prati na nowan feti (Yohanes 15:19; 17:16). Fu eksempre, na a pisi ten fu a Di Fu Tu Grontapufeti, sma poti Yehovah Kotoigi na strafu-oso, den pina den èn den kiri den srefi, fu di den no ben wani teki prati na a feti. Wan man di ben de wan kerki fesiman na ini Doisrikondre fosi, taki fu Yehovah Kotoigi: „Nanga leti den kan taki dati den na a wan-enkri bigi grupu na ini Doisrikondre di no teki prati na a feti fu di a konsensi fu den no gi den pasi fu du dati.”

Aladi wi no de wan pisi fu grontapu, toku wi no e go libi aparti fu tra sma. Wan leisi di Yesus ben begi Gado, a taki fu den bakaman fu en: „Mi no e aksi yu fu puru den na grontapu” (Yohanes 17:15). Fu dati ede yu e si kande taki wi e go na wroko, wi e go na wenkri èn wi e go na skoro neleki ala tra sma.

Yehovah Kotoigi e bribi taki „na Gado srefi ben meki sma skrifi ala den sani di de na ini Gado Buku” èn den e bribi tu taki den sani disi e tyari wini kon gi sma (2 Timoteyus 3:16). Wi e gebroiki Bijbel fu kon leri sabi a Mekiman èn fu abi wan moro bun libi.

Bijbel e taki: „Na so sma o sabi taki yu di nen Yehovah, yu wawan na a Moro Heiwan fu heri grontapu” (Psalm 83:18). Fu dati ede wi e anbegi Yehovah Gado wawan. Fu di wi na Kotoigi fu en, meki wi e du muiti fu meki sma kon sabi a nen fu en.​—Yesaya 43:10-12.

Fu di wi na Kresten, meki wi e bribi taki Yesus, „a Manpikin fu Gado”,a kon na grontapu, dan a tron a Mesias (Yohanes 1:34, 41; 4:25, 26). Baka di Yesus dede, a kisi wan opobaka, dan a go na hemel (1 Korentesma 15:3, 4). Bakaten a tron Kownu fu Gado Kownukondre (Openbaring 11:15). A Kownukondre dati na wan trutru tirimakti di o meki grontapu tron wan paradijs (Danièl 2:44). Bijbel e taki: „Den safri-ati sma o kisi grontapu èn den o prisiri srefisrefi, fu di freide o de pasa marki.”​—Psalm 37:11, 29.

Yehovah Kotoigi e bribi taki den sani di skrifi na ini Bijbel kan tyari wini kon gi sma na ini a ten disi srefi (Yesaya 48:17, 18). Fu dati ede wi e du ala muiti fu gi yesi na san Bijbel e taki. Fu eksempre, fu di Bijbel e warskow wi fu no du sani di kan pori wi frustan nanga wi skin, meki wi no e smoko èn wi no e gebroiki drugs (2 Korentesma 7:1). Sosrefi, wi no e du nowan fu den sani di Bijbel e krutu, sani soleki dringi sopi te fu drungu, hurudu nanga fufuru.​—1 Korentesma 6:9-11.

Ibri yari wi e meki hondrohondro milyun Bijbel nanga tra buku di e taki fu Bijbel èn wi e prati den gi sma. Wi e bow bijkantoro nanga drukkerij na heri grontapu èn Yehovah Kotoigi e wroko drape. Dusundusun gemeente e kon makandra na presi pe wi e anbegi Gado. Wi e kari den presi disi Kownukondre zaal. Den presi disi moi, ma den no abi furu pranpran. Suma e pai gi ala den sani disi?

Wi e du ala den sani disi nanga a moni di wi e kisi fu sma di wani horibaka gi a wroko di wi e du (2 Korentesma 9:7). Na ini 1879 a di fu tu Waktitoren di kon na doro ben taki: „Wi e bribi taki YEHOVAH e horibaka gi A Waktitoren [na a ten dati a tijdschrift disi ben nen Zion’s Watch Tower], èn noiti wi sa begi noso aksi libisma fu horibaka gi a wroko disi.” Te now ete wi e hori wisrefi na a sani disi.

Sma e seni moni langalanga go na wan fu den kantoro fu wi, noso den e poti en na ini den bijdrage boksu di de na ini ala den Kownukondre zaal fu wi. Ma noiti wi e meki sma gi tiende èn wi no e teki kollekte. Wi no e meki sma pai tu gi a wroko di wi e du èn gi den buku di wi e prati. Wi no e kisi pai fu du a preikiwroko, fu gi leri na ini den gemeente noso fu yepi bow den konmakandra presi fu wi. Yesus ben taki: „Unu kisi sondro fu pai, sobun un musu gi sma sondro fu meki den pai” (Mateyus 10:8). Ala den sma di e wroko na den bijkantoro èn na a edekantoro fu wi, sosrefi den brada di e tiri a wroko fu Yehovah Kotoigi, no e kisi pai fu a wroko di den e du.

Wi e gebroiki a moni di wi e kisi fu yepi sma tu te rampu miti den. Den Kresten na ini a ten fu den apostel ben lobi fu prati san den abi nanga sma di ben de na nowtu (Romesma 15:26). Na so a de tu taki wi e yepi sma di kisi fu du nanga rampu. Wi e yepi den bow den oso nanga den konmakandra presi baka, wi e gi den nyanyan nanga krosi èn wi e gi den datrayepi.

A wán sani di furu sma sabi fu Yehovah Kotoigi, na taki den e preiki na ala sei. Wi e go na sma oso fu preiki gi den, wi e preiki na presi pe furu sma de èn na iniwan tra presi pe wi kan miti sma. Fu san ede wi e du dati?

Yehovah Kotoigi e preiki fu gi Gado glori èn fu meki sma kon sabi en nen (Hebrewsma 13:15). Wi e preiki tu fu di wi wani gi yesi na Krestes Yesus di ben taki: „Go na sma fu ala kondre èn meki den tron disipel. . . . Leri den fu du ala san mi taigi unu fu du.”​—Mateyus 28:19, 20.

Wi e preiki tu fu di wi lobi tra sma (Mateyus 22:39). Wi sabi taki furu sma abi den eigi bribi èn taki a no ala sma wani sabi moro fu a boskopu di wi e tyari. Ma wi e bribi taki den leri fu Bijbel kan kibri sma libi. Fu dati ede, neleki den Kresten na ini a ten fu den apostel, wi ’e gi sma leri doronomo èn wi e tan fruteri sma a bun nyunsu fu Krestes’.​—Tori fu den apostel 5:41, 42.

Furu sma di e leisi den buku fu wi no de Yehovah Kotoigi. Milyunmilyun sma di e studeri Bijbel nanga wi na sma fu tra kerki. Toku den breiti taki Yehovah Kotoigi e kon na den.

Efu yu wani sabi tra sani fu Yehovah Kotoigi, dan yu kan du disi:

• Aksi wan Yehovah Kotoigi.

• Go na a website fu wi, www.pr418.com.

• Go na wan konmakandra fu wi. Ala sma kan go èn yu no abi fu pai.