Den sani di Samuel, Teresa nanga Magdalene taki e sori taki sma e begi fu ala sortu sani. Son sma e begi gi bun sani, trawan e begi gi sani di no bun so. Son sma e begi nanga den heri ati, ma trawan e begi sondro firi. Son sma e begi fu pasa wan eksame na skoro, son sma e begi fu di den wani taki a sport team di den lobi musu wini, èn trawan e begi Gado fu yepi den nanga na osofamiri-libi. Sobun, bun furu sani de fu san ede sma e begi. Disi e sori taki milyunmilyun sma abi a firi taki den musu fu begi. Fu taki en leti, son ondrosuku sori taki srefi sma di no e go na kerki abi a gwenti fu begi.

Yu e begi? Efu yu e begi, dan gi san yu e begi? Awinsi yu abi a gwenti fu begi, noso awinsi yu no e begi, kande yu e aksi yusrefi: ’Sortu bun mi o feni te mi e begi? Wan sma e arki trutru?’ Wan man di e skrifi buku ben taki dati begi „na wan fasi fu puru stress”. Son datra e denki a srefi sani. Den e taki dati begi de leki wan sortu dresi. Ma a de so taki begi na soso wan gwenti di no e tyari wini gi sma? A de wan sani di sma e du soso fu puru stress?

Bijbel e taki wan heri tra sani. A no e taki dati begi na soso wan fasi fa sma kan puru stress. A e taki dati te wi e begi, wan sma de di e arki trutru, solanga wi e begi na a yoisti fasi èn gi den yoisti sani. A sani disi tru? Meki wi luku efu a tru.

Son sma feni taki begi na lasi ten, fu di nowan sma e arki. Tra sma pruberi fu begi, ma den feni taki den no kisi piki tapu a begi fu den. Wan sma di no e bribi na ini Gado ben wani luku efu wan gado de di ben o arki a begi fu en. Na ini en prakseri, a meki en eigi gado, dan a begi: „Taki wan sani safri na ini mi yesi.” Ma baka di a begi, a taki dati Gado no piki en noti.

Ma toku Bijbel e gi wi a dyaranti taki wan Gado de èn taki a e arki trutru te sma e begi. Na ini Bijbel wi kan leisi sortu moi pramisi wan pipel na ini owruten ben kisi. Drape skrifi: „Te [Gado] yere wan fu unu e bari kari en, a o du bun gi en nomonomo. Fa a o yere a babari fu en, a o piki en” (Yesaya 30:19). Wan tra tekst na ini Bijbel e taki: „Den begi fu den krin-ati sma e gi en prisiri.”​—Odo 15:8.

Bijbel e fruteri tu fu sma di kisi piki tapu den begi fu den. Wan tekst e taki dati wan leisi Yesus „ben e begi fayafaya èn nanga en heri ati a ben e suku yepi na a sma di ben man puru en na dede”. San ben de a bakapisi? „Gado arki den begi fu en” (Hebrewsma 5:7). Wi kan leisi tra eksempre na Danièl 9:20, 21 nanga 2 Kroniki 7:1.

Ma fu san ede son sma feni taki den no e kisi piki tapu den begi fu den? Efu wi wani kisi piki tapu den begi fu wi, dan wi musu begi soso a Gado di Bijbel e taki fu en. En nen na Yehovah.a Wi no musu begi wan tra gado noso wi afo di dede kaba. Gado wani tu taki den sani di wi e aksi en musu „kruderi nanga a wani fu en”. Den musu de sani di en feni bun. Te wi e begi na a fasi disi, dan Gado srefi e taki dati „a e yere wi” (1 Yohanes 5:14). Sobun, efu wi wani kisi piki tapu den begi fu wi, dan wi musu leri sabi a Gado fu Bijbel èn wi musu kon sabi san na a wani fu en.

Furu sma e bribi taki begi a no wan gwenti nomo. Den e bribi taki Gado e arki den trutru èn taki a e piki den begi fu den. Isaac fu Kenia taki: „Mi begi Gado fu yepi mi fu frustan Bijbel. A no langa baka dati wan sma kon na mi, dan a taigi mi taki a wani yepi mi nanga a sani disi.” Hilda di e libi na Filippijnen ben wani tapu fu smoko tabaka. A pruberi omeni leisi, ma a no ben man tapu nanga a gwenti disi. Te fu kaba en masra taigi en: „Kande yu musu aksi Gado fu yepi yu.” Hilda du san en masra taki. Bakaten a taki: „Mi ben fruwondru di mi si fa [Gado] yepi mi. A ben de neleki mi lasi a firi fu smoko. Te fu kaba mi ben man tapu fu smoko.”

Yu abi broko-ede tu? Yu denki taki Gado o wani yepi yu efu dati no de teige a wani fu en?

Gado wani taki wi musu de en mati.

Te mati e taki nanga makandra, dan den e tron moro bun mati fu makandra. Na so a de tu taki Gado e gi wi a kari fu taki nanga en. A wani taki wi musu de en mati. Gado taki: „Un musu kari mi, un musu kon na mi, èn un musu begi mi, dan mi o arki unu” (Yeremia 29:12). Te yu e taki nanga Gado, yu o ’kon krosibei na en èn a o kon krosibei na yu’ (Yakobus 4:8). Bijbel e taigi wi: „Yehovah de krosibei fu ala den wan di e kari en” (Psalm 145:18). O moro wi e begi en, o moro bun mati wi o tron fu en.

Gado wani yepi yu.

Yesus ben taki: „Suma fu unu o gi en pikin wan ston, te a e aksi en brede? Noso kande te a e aksi en wan fisi, a no o gi en wan sneki, a no so? Fu dati ede, efu unu . . . sabi fa fu gi un pikin bun sani, unu kan de seiker taki un Tata di de na hemel o gi sma bun sani te den e aksi en!” (Mateyus 7:9-11) Iya, Gado wani taki yu e begi en fu di ’a e broko en ede nanga yu’ èn a wani yepi yu (1 Petrus 5:7). A wani taki yu fruteri en san na den problema fu yu. Bijbel e taigi wi: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en.”​—Filipisma 4:6.

Libisma abi Gado fanowdu.

Koniman di ondrosuku a fasi fa libisma de, kon si taki milyunmilyun sma abi a firi fu begi. Srefi sma di no e bribi na ini Gado èn sma di e tweifri efu Gado de trutru abi a firi disi.a Disi e buweisi taki libisma meki nanga a firi fu anbegi Gado. Yesus taki: „Koloku fu den sma di sabi taki den abi Gado fanowdu” (Mateyus 5:3). Sobun, wan fu den prenspari sani di wi musu du efu wi sabi taki wi abi Gado fanowdu, na fu taki nanga en doronomo.

Gado wani taki wi musu begi en, ma sortu bun wi o kisi te wi e du dati?

Nofo tron fosi yu bigin du wan sani, yu e aksi yusrefi: ’Sortu bun mi o feni?’ Yu denki taki a fowtu te wan sma e aksi ensrefi sortu wini begi o tyari kon gi en? A de so taki so wan sma e denki ensrefi nomo te a e aksi ensrefi a sani disi? Nôno, a no abi fu de so. Furu sma wani sabi efu begi e yepi trutru. Srefi a bun man Yob ben aksi wan leisi: „[Gado] ben o piki mi efu mi ben o kari en?”​—Yob 9:16.

Na ini den artikel fosi a wan disi wi si kaba taki begi a no wan gwenti nomo di kerkisma abi èn a no de soso wan sani di sma e du fu puru stress. A tru Gado e arki begi trutru. Efu wi e begi na a yoisti fasi èn efu wi e begi fu sani di Gado feni bun, dan a o arki den begi fu wi. Fu taki en leti, en srefi e gi wi a deki-ati fu kon krosibei na en, noso fu tron wan mati fu en (Yakobus 4:8). Sobun, san wi kan fruwakti efu wi bigin begi ala dei? Meki wi luku sortu bun a kan tyari kon gi wi te wi abi a gwenti fu begi.

Yu o firi korostu.

Te yu e kisi problema, a de so taki yu e bruya fu di yu no sabi san fu du? Na ini den sortu situwâsi disi Bijbel e gi wi a deki-ati fu „begi doronomo” èn fu „begi Gado ala ten”, so taki a kan ’sabi san wi wani aksi en’ (1 Tesalonikasma 5:17; Filipisma 4:6). Bijbel e gi wi a dyaranti taki efu wi e begi Gado, dan „a freide fu Gado di bigi moro iniwan sani di libisma man frustan, o kibri [wi] ati nanga [wi] frustan” (Filipisma 4:7). Te wi e fruteri wi hemel Papa sortu broko-ede wi abi, dan dati kan meki wi firi korostu. Fu taki en leti, en srefi wani taki wi du dati. Psalm 55:22 e taki: „Trowe yu hebi na tapu Yehovah, dan en srefi o horibaka gi yu.”

Bun furu sma na heri grontapu si taki begi e yepi den fu firi korostu. Hee Ran fu Zuid-Korea taki: „Mi abi bigi problema, ma te mi taki fu den na ini begi, mi e firi leki wan hebi komoto na mi tapu èn mi e kisi krakti baka fu horidoro.” Cecilia fu Filippijnen, fruteri: „Leki mama, mi e broko mi ede furu nanga den umapikin fu mi èn nanga mi mama di no sabi srefi moro suma na mi. Ma fu di mi e begi, mi man du den aladei sani fu mi sondro fu broko mi ede tumusi. Mi sabi taki Yehovah o yepi mi fu sorgu den.”

Yu o kisi trowstu nanga krakti fu horidoro.

Kande yu abi bigi broko-ede fu di wan sari sani pasa nanga yu, noso fu di yu de na ini wan situwâsi pe yu kan lasi yu libi. Te yu e begi „a Gado fu ala trowstu”, dan a kan meki yu firi korostu trutru. Bijbel e taki dati Gado e „trowstu wi te wi de na ini ala sortu banawtu” (2 Korentesma 1:3, 4). Fu eksempre, wan leisi di Yesus ben de na ini wan situwâsi di ben hebi gi en srefisrefi, „a saka kindi, dan a bigin begi”. San ben de a bakapisi? „Wan engel fu hemel kon na en èn a gi en krakti” (Lukas 22:41, 43). Nehemia, wan man di ben e dini Gado fayafaya, ben de na ini wan muilek situwâsi tu. Ogri-ati sma ben wani kiri en fu di den ben wani tapu en fu du a wroko fu Gado. Nehemia begi: „Gi mi deki-ati.” Den sani di pasa baka dati e sori taki Gado yepi en trutru fu no frede moro èn fu klari a wroko (Nehemia 6:9-16). Reginald fu Gana fruteri fa begi yepi en. A taki: „Te mi e begi, spesrutu te mi de na muilek situwâsi, mi e firi taki mi fruteri mi problema na wan sma di man yepi mi èn di e gi mi a dyaranti taki mi no abi fu frede.” Iya, Gado kan trowstu wi te wi e begi en.

Yu o kisi koni fu Gado.

Son bosroiti di wi e teki kan abi krakti tapu wi èn tapu den lobiwan fu wi fu ala ten. Fa wi kan teki koni bosroiti? Bijbel e taki: „Efu wan fu unu e mankeri koni [spesrutu te a e kisi tesi], dan meki a tan aksi Gado fu dati, bika te Gado e gi sma sani, a e du dati nanga en heri ati èn sondro fu suku fowtu na den. Sobun, Gado o gi a sma a koni dati” (Yakobus 1:5). Efu wi e aksi Gado fu gi wi koni, a kan gebroiki en santa yeye fu yepi wi fu teki bun bosroiti. Fu taki en krin, wi kan aksi Gado fu gi wi santa yeye, fu di Yesus taki dati „a Tata di de na hemel sa gi santa yeye na den sma di e aksi en!”​—Lukas 11:13.

Yesus srefi ben feni en fanowdu fu aksi en Papa fu yepi en teki prenspari bosroiti. Bijbel e taki dati di a ben musu teki 12 man fu tron en apostel, dan „heri neti a begi Gado”.​—Lukas 6:12.

Neleki Yesus, furu sma na ini a ten disi si fa Gado yepi den ibri tron baka di den aksi en fu yepi den teki koni bosroiti. Disi tranga a bribi fu den moro. Regina di e tan na Filippijnen taki dati a ben abi difrenti sortu problema. A ben musu sorgu ensrefi nanga en osofamiri baka di en masra dede, a lasi en wroko èn a ben muilek gi en fu kweki den pikin. San yepi en fu teki koni bosroiti? A taki: „Mi e frutrow taki Yehovah o yepi mi te mi e begi en.” Kwabena di e libi na Gana taki fu san ede a ben aksi Gado fu yepi en. A taki: „A bow-wroko di mi ben e du ben e pai bun. Ma bakaten mi lasi mi wroko.” Di a ben e luku sortu tra wroko a ben kan du, a taki: „Doronomo mi ben e aksi Yehovah fu yepi mi teki a yoisti bosroiti.” Kwabena taki tu: „Mi e bribi trutru taki Yehovah yepi mi fu feni wan wroko di e meki taki mi man tan dini en èn taki mi man sorgu misrefi.” Gado kan yepi yu tu te yu e begi en fu yepi yu teki bun bosroiti di o meki taki yu tan wan mati fu en.

Wi taki fu wan tu wini nomo di yu kan kisi te yu e begi. (Wan tu tra fasi fa begi kan yepi yu, skrifi na ini a faki „Fa begi kan yepi yu”.) Ma efu yu wani kisi wini fu begi trutru, dan yu musu kon sabi Gado èn yu musu sabi san na a wani fu en. Efu na disi yu wani, dan wi e gi yu deki-ati fu aksi Yehovah Kotoigi fu yepi yu studeri Bijbel.a Disi na a fosi sani di kan yepi yu fu tron wan mati fu „a sma di e arki begi”.​—Psalm 65:2.