Oiti yu aksi yusrefi den sani disi? Efu dati de so, dan yu a no a wan-enkri sma di du dati. Sma na heri grontapu wani kon sabi a piki tapu den moro prenspari aksi fu a libi. Yu man feni den piki tapu den aksi disi?

Milyunmilyun sma ben o piki, „iya”! Fu san ede? Fu di den feni bun piki na ini Bijbel. Yu wani sabi san Bijbel e leri? Efu dati de so, dan Yehovah Kotoigi kan studeri Bijbel nanga yu sondro taki yu abi fu pai.a

A tru taki te son sma musu studeri Bijbel, dan den e taki: „Mi no abi ten.” „A muilek tumusi.” „Mi no o man du a sani dati ala wiki.” Ma son sma e denki tra fasi. Den e feni en wan moi sani fu studeri Bijbel. Meki wi go luku wan tu eksempre:

• „Mi go na Lomsu nanga Anitri kerki. Mi go na a tempel fu den sma fu a Sikh bribi, mi go na wan Buda tempel, èn mi studeri kerkileri na wan heiskoro. Toku mi no feni piki tapu den aksi di mi ben abi fu Gado. Ne wan dei, wan Yehovah Kotoigi kon na mi oso. Fu di mi ben lobi den piki di a sori mi na ini Bijbel, meki mi bigin studeri Bijbel.”​—Gill, Ingrisikondre.

• „Mi ben e aksi misrefi furu sani fu a libi, ma mi no ben lobi den piki di den domri fu mi ben gi mi. Ma wan Yehovah Kotoigi gebroiki soso a Bijbel fu piki den aksi fu mi. Di a aksi mi efu mi ben wani kon sabi moro, dan nanga prisiri mi teki wan Bijbelstudie.”​—Koffi, Benin.

• „Mi ben wani kon sabi san e pasa te wan sma dede. Mi ben e bribi taki den dedewan kan du ogri nanga libisma. Ma mi ben wani sabi san Bijbel e taki. Fu dati ede mi bigin studeri Bijbel nanga wan mati di ben de wan Yehovah Kotoigi.”​—José, Brasyonkondre.

• „Mi ben e pruberi fu leisi Bijbel ma mi no ben man frustan en. Ne Yehovah Kotoigi kon na mi oso èn den yepi mi fu frustan wan tu Bijbel profeititori. Mi ben wani si sortu tra sani mi ben kan leri moro.”​—Dennize, Meksikow.

• „Mi ben e aksi misrefi efu Gado e broko en ede nanga mi. Dati meki mi bigin begi a Gado fu san Bijbel e taki. A tra dei Yehovah Kotoigi naki na mi doro èn mi bigin studeri Bijbel.”​—Anju, Nepal.

Den tori disi e meki wi prakseri den wortu fu Yesus: „Koloku fu den sma di sabi taki den abi Gado fanowdu” (Mateyus 5:3). Iya, libisma abi yepi fu Gado fanowdu. Dati meki Gado e gebroiki en Wortu, Bijbel, fu yepi den.

Sobun fa wi e studeri Bijbel nanga sma? Sortu wini yu kan kisi? Yu o kisi piki tapu den aksi disi na ini a artikel di e kon.

Sma sabi Yehovah Kotoigi leki sma di lobi preiki. Ma yu ben sabi taki wi e hori Bijbelstudie nanga sma na heri grontapu?

Na ini 2014, sowan 8.000.000 Kotoigi na ini 240 kondre, studeri Bijbel nanga sowan 9.500.000 sma ibri mun.a Te yu luku en bun, dan 140 kondre de na grontapu di no abi so furu sma srefi leki a nomru fu sma di e studeri Bijbel.

Ibri yari, Yehovah Kotoigi e meki moro leki wán nanga afu milyard Bijbel, buku, tijdschrift, nanga tra sani na ini sowan 700 tongo, fu studeri nanga sma. A sani disi e meki taki sma kan studeri Bijbel na ini a tongo di densrefi wani.

AKSI DI SMA GWENTI POTI FU DI DEN WANI SABI FA WI E STUDERI BIJBEL NANGA SMA

Fa a Bijbelstudie e hori?

Wi e teki difrenti Bijbel tori èn wi e ondrosuku Bijbeltekst di e taki fu den tori dati. Fu eksempre, Bijbel e piki aksi soleki: Suma na Gado? Fa a de? A abi wan nen? Pe a e libi? Wi man tron mati fu en? Ma a sani di no makriki, na fu kon sabi pe fu Bijbel yu musu suku den piki.

Moro furu wi e gebroiki a buku San Bijbel e leri wi trutru? di abi 224 bladzijde, fu yepi sma feni den piki.b A buku disi meki fu yepi sma fu frustan den moro prenspari leri fu Bijbel. A abi kapitel di e taki fu Gado, fu Yesus Krestes, fu san ede libisma e pina, fu na opobaka, fu begi, èn fu tra sani.

Pe èn o ten wi e studeri nanga sma?

A studie kan hori na wan ten èn na wan presi di bun gi yu.

O langa wi e studeri nanga sma ibri wiki?

Furu sma feni en bun fu studeri wán yuru langa ibri wiki. Ma a de na a sma o langa a wani studeri, èn wi e hori wisrefi na a ten di a sma feni bun. Son sma e studeri 10 noso 15 miniti ibri wiki.

Omeni yu musu pai fu studeri?

Yu no abi fu pai gi a studie nanga den buku, fu di Yesus ben taigi den disipel fu en: „Unu kisi sondro fu pai, sobun un musu gi sma sondro fu meki den pai.”​—Mateyus 10:8.

O langa a heri studie e teki?

A de na yu o langa yu wani studeri. A buku San Bijbel e leri wi trutru? abi 19 kapitel. A de na yu o langa yu wani studeri ala den kapitel disi.

Mi o abi fu tron wan Yehovah Kotoigi?

Nôno. Wi e hori na prakseri taki ibri sma abi a reti fu bribi san a wani. Ma a moro makriki gi wan sma di kon sabi san Bijbel e leri, fu bosroiti san a wani bribi.

Fa mi kan kon sabi moro?

Na a website www.pr418.com/srn yu kan kon sabi moro fu a bribi nanga a wroko di Yehovah Kotoigi e du.

Fa mi kan aksi wan Bijbelstudie?

• 

  Aksi wan Bijbelstudie na a website fu wi www.pr418.com/srn.

• Skrifi go na wan fu den adres na tapu bladzijde tu fu a tijdschrift disi.

• Miti nanga Yehovah Kotoigi na ini a birti fu yu. Yu kan suku ’Jehovah’s getuigen’ na ini wan telefoongids.