1. Fa wi kan gebroiki a begi di skrifi na Mateyus 6:9-13 te wi de na ini a preikiwroko?

FURU sma sabi a Wi Tata begi na ede. Te wi e preiki oso fu oso, dan nofo tron wi e gebroiki a begi disi fu yepi na ososma frustan taki Gado Kownukondre na wan trutru tirimakti di o meki grontapu tron wan paradijs. Boiti dati, wi e gebroiki den wortu „meki yu nen de santa” fu sori taki Gado abi wan nen èn taki wi musu si a nen disi leki wan santa sani.​—Mat. 6:9.

2. Fa wi sabi taki Yesus no ben wani taki wi gebroiki den srefi wortu ibri tron baka te wi e begi?

² Yesus ben wani taki wi taki a begi disi ibri tron baka, neleki fa den Kresten kerki e du? Nôno. Leti fosi Yesus gi a begi disi leki wan eksempre, a taki: „Te yu e begi, no taki den srefi sani ibri leisi baka” (Mat. 6:7). Wan tra leisi a taki a begi disi baka, ma a gebroiki tra wortu (Luk. 11:1-4). Na so Yesus gebroiki a begi disi leki wan eksempre fu leri wi fu sortu sani wi kan taki te wi e begi.

3. Fu sortu aksi wi kan denki dipi te wi o luku a Wi Tata begi moro fini?

³ Na ini na artikel disi èn na ini a trawan, wi o taki fu a Wi Tata begi di Yesus leri den bakaman fu en leki wan eksempre. Te wi o luku a begi disi, dan aksi yusrefi: ’Fa a kan yepi mi fu begi moro bun?’ Ma a moro prenspari sani di yu musu aksi yusrefi na: ’Mi e du san a begi e taki?’

„WI TATA NA HEMEL”

4. San den wortu „wi Tata” e sori wi èn na sortu fasi Yehovah na a „Tata” fu den Kresten di abi a howpu fu libi na grontapu?

⁴ Yesus bigin a begi fu en nanga den wortu: „Wi Tata.” Disi e memre wi taki Yehovah na a Tata fu ala wi brada nanga sisa na heri grontapu (1 Petr. 2:17). Disi na wan bigi grani. Salfu Kresten di Gado salfu nanga en santa yeye èn di o libi na hemel, abi a reti fu kari Yehovah den „Tata”, fu di Gado teki den leki en manpikin (Rom. 8:15-17). Srefi den Kresten di abi a howpu fu libi na grontapu fu têgo kan kari Yehovah „Tata”. Na en gi den libi èn na wan lobi-ati fasi a e sorgu gi ala den sma di e anbegi en. Den sma di abi a howpu fu libi na grontapu o tron trutru pikin fu Gado. Disi o pasa baka te den no abi sondu moro èn te den tan gi yesi na Gado na a lasti tesi.​—Rom. 8:21; Openb. 20:7, 8.

5, 6. Sortu moi kado papa nanga mama kan gi den pikin fu den èn san ibri pikin musu du nanga a kado disi? (Luku a prenki na a bigin fu na artikel.)

⁵ Te papa nanga mama e leri den pikin fu den fa fu begi èn den e yepi den fu si Yehovah leki den lobi-ati hemel Tata, dan den e gi den pikin fu den wan moi kado. Wan brada di e dini now leki kring-owruman na Zuid-Afrika e taki: „Sensi a dei di den meisje fu mi gebore, mi begi nanga den ibri neti, boiti te mi no ben de na oso. Nofo tron den meisje fu wi e taki dati den no kan memre moro san mi ben taki na ini den begi dati. Ma den sabi ete fa den ben e firi na den momenti dati te wi ben e taki nanga wi Tata Yehovah na wan lespeki fasi. A ben meki den firi korostu èn den no ben frede. Di den srefi ben kan begi, mi gi den deki-ati fu du dati nanga wan tranga sten so taki mi ben kan yere san den e taigi Yehovah. Na so fasi mi ben kan kon sabi san den ben e denki èn fa den ben e firi. A ben de wan moi okasi fu kon sabi san ben de na ini den ati. Dati ben meki taki mi ben man sori den pikinsopikinso fa fu taki tu fu prenspari pisi fu a Wi Tata begi. Disi ben yepi den fu sabi san den ben kan taki na ini den begi fu den.”

⁶ Dati meki den umapikin fu a brada disi kon krosibei na Yehovah di den ben e gro kon bigi. Now den abi wan koloku trowlibi èn den nanga den masra e dini Yehovah na ini a furuten diniwroko. A moro bigi kado di papa nanga mama kan gi den pikin fu den na fu yepi den kisi wan bun matifasi nanga Yehovah. A no de fu taki dati ibri pikin musu bosroiti gi ensrefi efu a wani tan de wan mati fu Yehovah. Dati meki den musu leri fu lobi Gado nen èn den musu abi bigi lespeki gi a nen disi.​—Ps. 5:11, 12; 91:14.

„MEKI YU NEN DE SANTA”

7. Sortu grani Gado pipel abi, ma san wi musu du?

⁷ A de wan bigi grani fu sabi Gado nen èn fu de ’wan pipel di e tyari en nen’ (Tori 15:14; Yes. 43:10). Wi e begi wi hemel Tata: „Meki yu nen de santa.” Te wi e begi disi, wi no e aksi Yehovah nomo fu en nen kon santa, ma fu yepi wi tu fu no taki noso du wan sani di kan pori a santa nen fu en. Wi no wani de leki son sma na ini a ten fu den apostel. Den sma disi no ben e du san den ben e leri trawan. Dati meki na apostel Paulus skrifi den: „Na fu unu ede Gado e kisi porinen na mindri den trakondre sma.”​—Rom. 2:21-24.

8, 9. Gi wan eksempre di e sori fa Yehovah e blesi den sma di wani meki en nen kon santa.

⁸ Wi wani meki Gado nen kon santa. Baka di a masra fu wan sisa na Noorwegen dede, a ben tan en wawan nanga en boi fu tu yari. A sisa e taki: „A ten dati ben muilek srefisrefi gi mi. Mi ben e begi ala dei. Mi ben e begi ibri yuru srefi fu aksi Yehovah fu yepi mi fu no bruya. Mi ben e begi Yehovah tu fu yepi mi fu no teki don bosroiti noso fu trangayesi en so taki Satan kisi okasi fu spotu en. Mi ben wani meki Yehovah nen kon santa èn mi ben wani taki a boi fu mi si en papa baka na ini Paradijs.”​—Odo 27:11.

⁹ Yehovah piki den begi fu a sisa disi? Iya. Fu di a ben gwenti de nanga den Kresten brada nanga sisa fu en, meki a kisi deki-ati. Feifi yari baka dati, a trow nanga wan owruman. Now a boi fu en abi 20 yari èn a de wan dopu brada. A sisa e taki: „Mi breiti taki mi masra yepi mi fu kweki a boi fu mi.”

10. San de fanowdu fu meki Gado nen kon santa dorodoro?

¹⁰ Yehovah o meki en nen kon santa dorodoro te a o kiri ala sma di no e lespeki en èn di no wani en leki Tiriman. (Leisi Esekièl 38:22, 23.) Safrisafri Gado o meki taki nowan sma abi sondu moro. Iya, wi e angri fu a ten te ala engel nanga libisma o sori taki a nen fu Yehovah santa gi den. Te fu kaba wi lobi-ati hemel Tata o „de ala sani gi ala sma”.​—1 Kor. 15:28.

„MEKI YU KOWNUKONDRE KON”

11, 12. San tru Kresten kon frustan na ini 1876?

¹¹ Fosi Yesus opo go na hemel, den apostel aksi en: „Masra, yu o seti a kownukondre baka gi Israel na ini a ten disi?” A piki fu Yesus e sori taki a ten no ben doro ete gi den fu kon sabi o ten Gado Kownukondre ben o bigin tiri. A taigi den fu poti prakseri na a prenspari preikiwroko di den ben musu du. (Leisi Tori fu den apostel 1:6-8.) Toku Yesus leri den bakaman fu en fu wakti a ten te Gado Kownukondre ben o kon. Sobun, sensi a ten fu den apostel, Kresten begi fu a Kownukondre kon.

¹² Di a ten ben e doro taki Yesus ben o bigin tiri Gado Kownukondre komoto fu hemel, Yehovah yepi en pipel fu kon frustan o ten disi ben o pasa. Na ini 1876 Charles Taze Russell skrifi wan artikel na ini a tijdschrift Bible Examiner. Na artikel dati ben nen „A ten fu den trakondre sma: O ten a o kon na wan kaba?” Na artikel ben e sori taki 1914 ben o de wan prenspari yari. A ben sori taki den „seibi pisi ten” na ini a profeititori fu Danièl ben abi fu du nanga „a reti ten fu den trakondre sma” di Yesus ben taki fu en.a​—Dan. 4:16; Luk. 21:24.

13. San pasa na ini 1914? San den sani di pasa sensi a ten dati e sori?

¹³ Na ini 1914, wan feti bigin na mindri den kondre fu Europa. Syatu baka dati a feti panya na heri grontapu. Na a ten di a feti kaba na ini 1918, wan bigi angriten ben de na grontapu èn wan takru siki opo kon di kiri moro sma leki den sma di dede na ini a feti srefi. Yesus ben taigi den bakaman fu en taki disi ben o de wan tu fu den sani di ben o sori taki a tron Kownu na hemel na ini 1914 (Mat. 24:3-8; Luk. 21:10, 11). Na ini a yari dati, Yesus Krestes bigin „feti nanga a wan [feanti] baka a trawan, teleki a wini den alamala” (Openb. 6:2). Yesus feti nanga Satan èn nanga den ogri yeye fu en. Na so a krin hemel, dan a trowe Satan nanga den ogri yeye kon na ini a birti fu grontapu. Sensi a ten dati, libisma e ondrofeni san den wortu disi fu Bijbel wani taki: „Helu fu grontapu èn fu a se, bika Didibri saka kon na unu èn a abi bigi atibron fu di a sabi taki en ten syatu.”​—Openb. 12:7-12.

14. (a) Fu san ede a prenspari ete fu begi fu Gado Kownukondre kon? (b) Sortu bigi grani wi abi?

¹⁴ A profeititori di skrifi na Openbaring 12:7-12 e sori fa a du kon taki wan lo ogri sani bigin pasa na grontapu di a Kownukondre fu Gado seti. Te now ete den ogri disi e pasa. Yesus, a Kownu fu Gado Kownukondre, bigin tiri na mindri den feanti fu en. Solanga a no wini ala den feanti disi èn a no tyari wan kaba kon na den ogri di e pasa na grontapu, wi o tan begi fu Gado Kownukondre kon. Boiti dati, wi e wroko fayafaya tu fu preiki fu a Kownukondre disi. Yesus ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”​—Mat. 24:14.

„MEKI YU WANI PASA NA GRONTAPU”

15, 16. A nofo fu begi nomo taki Gado wani musu pasa na grontapu? Fruklari disi.

¹⁵ Sowan 6000 yari pasa, sma ben de na grontapu di ben e du a wani fu Gado. Dati meki Yehovah ben kan taki dati ala sani „ben de heri bun” (Gen. 1:31). Ne Satan opo ensrefi teige Gado èn sensi a ten dati yu no abi furu sma di du a wani fu Gado. Ma ini a ten disi yu abi sowan aiti milyun sma di e dini Yehovah. Den no e begi nomo taki Gado wani musu du na grontapu, ma den e meki muiti tu fu du a wani fu Gado. Den e libi na wan fasi di e sori taki den wani plisi Gado èn den e wroko tranga fu leri sma fu a Kownukondre.

¹⁶ Fu eksempre, wan sisa di dopu na ini 1948 èn di dini leki zendeling na Afrika, e taki: „Nofo tron mi e begi taki ala den sma di gersi skapu yere a boskopu èn taki den kisi yepi fu kon sabi Yehovah fosi a lati. Te mi o preiki gi wan sma, dan mi e aksi Gado koni fu kan doro na ati fu a sma. Èn te wi feni den sma kaba di gersi skapu, dan mi e begi Yehovah taki a blesi a muiti di wi e du fu yepi den sma disi.” A no musu fruwondru wi taki a sisa disi di abi 80 yari abi bun bakapisi na ini a preikiwroko. A ben man yepi furu sma fu tron Yehovah Kotoigi. Wi de seiker taki yu sabi tra brada nanga sisa tu di e meki furu muiti fu du a wani fu Gado, aladi den no man du so furu moro fu di den kon owru kaba.​—Leisi Filipisma 2:17.

17. San yu e denki fu den sani di Yehovah o du gi libisma èn gi grontapu na ini a ten di e kon?

¹⁷ Solanga Gado no puru den feanti fu en Kownukondre, wi o tan preiki taki Gado wani musu du na grontapu. Baka dati wi o si fa Gado wani o du na wan moro moi fasi te milyardmilyard sma o kisi wan opobaka na ini a paradijs.Yesus taki: „No fruwondru fu disi, bika a yuru o kon te ala den sma di de na ini den grebi o yere [mi] sten èn den o komopo drape” (Yoh. 5:28, 29). Wi o breiti fu si taki den lobiwan fu wi di ben dede kon na libi baka. Gado „o figi ala watra puru na [wi] ai” (Openb. 21:4). Furu sma di kisi wan opobaka o de „sma di no du san reti” di den ben de na libi. Den sma disi dede sondro taki den kisi na okasi fu leri sabi den tru tori fu Yehovah Gado nanga en Manpikin. A o de wan grani fu leri den san na Gado wani èn san a abi na prakseri gi den sma di kisi wan opobaka. Na so wi o yepi den fu man kisi „têgo libi” tu.​—Tori 24:15; Yoh. 17:3.

18. San na den moro prenspari sani di libisma abi fanowdu?

¹⁸ Te Gado Kownukondre kon, dan a o meki Gado nen kon santa. Ala sma na hemel èn na grontapu o anbegi Yehovah leki wán man. Na so Gado o gi libisma den moro prenspari sani di den abi fanowdu èn a o meki den fosi dri sani di wi e aksi na ini a Wi Tata begi kon tru. Na ini a tra artikel wi o taki fu tra prenspari sani na ini a Wi Tata begi di Yesus leri wi.

1-3. Fu san ede Lana de seiker taki Yehovah sabi san wi abi fanowdu?

LANA na wan gewoon pionier. Noiti a o frigiti san pasa di a go na Doisrikondre na ini 2012. A taki dati tu sani di a ben aksi Yehovah na ini begi ben kon tru. A ben de na ini wan loko fu go na a opolani presi di a aksi Yehovah fu yepi en fu kan preiki gi wan sma. Di a doro na a opolani presi den taigi en taki a opolani fu en no ben o gowe moro a dei dati èn taki a ben o abi fu wakti te tamara. Ne Lana begi Yehovah fu yepi en fu di a ben gebroiki bijna ala en moni kaba èn a no ben abi wan presi fu tan a neti dati.

² Di Lana kaba begi a yere wan sma taki: „Hei Lana, san yu e du dya?” A yonguman di ben e taki nanga en ben de wan owru skoromati fu en. En mama nanga en granmama ben tyari en kon drape fu di a ben o go na Zuid-Afrika. Di den yere san pasa nanga Lana, dan Elke, a mama fu a yonguman, kari Lana fu kon sribi na den oso. Elke nanga en mama ben sori switifasi gi Lana. Den aksi en furu sani fu a bribi fu en èn fu a pionierwroko di a e du.

³ A tra mamanten baka di a nyan wan switi nyanyan, Lana gi piki tapu ete wan tu Bijbel aksi di den ben poti gi en. Baka dati a teki na adres nanga a telefon-nomru fu den fu kan taki go doro nanga den wan tra leisi. Te fu kaba Lana doro oso baka èn a go doro nanga en pionierwroko. A firi leki na a „sma di e arki begi” ben meki taki sani waka so gi en.​—Ps. 65:2.

4. San wi o leri na ini na artikel disi?

⁴ Te wi e kisi problema di wi no ben fruwakti, dan a no muilek gi wi fu begi Yehovah fu yepi wi. Nanga prisiri a e arki den begi fu den sma di e tai hori na en (Ps. 34:15; Odo 15:8). Ma di Yesus leri wi fa fu begi, a sori wi taki moro prenspari sani de di wi musu aksi. Na ini na artikel disi wi o leri fa den fo lasti sani di a taki na ini a begi dati kan yepi wi fu tai hori na Yehovah.​—Leisi Mateyus 6:11-13.

„GI WI A BREDE DI WI ABI FANOWDU GI A DEI DISI”

5, 6. Fu san ede wi musu begi Gado fu gi wi „a brede di wi abi fanowdu” srefi te wi abi nofo nyanyan?

⁵ Yesus leri wi fu aksi fu „a brede di wi” abi fanowdu, a no taki „a brede di mi” abi fanowdu. Victor, wan kring-owruman na ini Afrika e taki: „Furu tron mi e taki Yehovah tangi nanga mi heri ati taki mi nanga mi frow no abi fu broko wi ede tumusi nanga san wi o nyan, noso suma o pai yuru-oso gi wi. Wi brada nanga sisa e sorgu wi ala dei. Ma mi e begi tu taki den wan di e yepi wi sabi san fu du te den abi moni problema.”

⁶ Kande wi abi nofo nyanyan. Ma wi no musu frigiti taki furu fu wi brada nanga sisa pôti noso den e libi na ini kontren pe bigi rampu pasa. Wi no musu begi gi den nomo, ma wi musu du sani fu yepi den tu. Fu eksempre, wi kan prati den sani di wi abi nanga den. Ma wi kan abi a gwenti tu fu gi moni fu horibaka gi a wroko di e du na heri grontapu. Wi sabi taki a moni di wi e gi, kan yepi wi brada nanga sisa di de na nowtu.​—1 Yoh. 3:17.

7. Sortu eksempre Yesus gebroiki fu sori taki „noiti un musu broko un ede nanga tamara”?

⁷ Soleki fa a sori, dan di Yesus taki dati wi musu aksi fu a brede di wi abi fanowdu gi a dei, a ben e prakseri den sani di libisma abi fanowdu ibri dei. Dati meki a fruteri taki Gado e sorgu den bromki di e gro na ini a sabana èn a taki: „Efu dati de so, dan a de seiker taki a o gi unu di no e bribi nofo, sani fu weri, a no so? Fu dati ede, noiti un musu broko un ede nanga sani èn un no musu taki: . . . ’San wi o weri?’” Te fu kaba a taki ete wan leisi: „Noiti un musu broko un ede nanga tamara” (Mat. 6:30-34). Sobun, na presi fu feti na baka gudu, wi musu de tevrede te wi kisi san wi abi fanowdu ibri dei. Wan tu fu den sani disi na wan presi fu tan, wan wroko fu man sorgu wi osofamiri nanga a koni fu teki bun bosroiti te wi siki. Ma wan moro prenspari sani de di wi musu begi fu en tu.

8. San na wan prenspari sani di wi musu prakseri tu te wi e begi Gado fu a gi wi a brede di wi abi fanowdu gi a dei? (Luku a prenki na a bigin fu na artikel.)

⁸ A sani di Yesus taki fu a brede di wi abi fanowdu gi a dei e memre wi na wan tra sani: „Sma no musu libi fu brede wawan, ma fu ibri wortu di Yehovah mofo taki” (Mat. 4:4). Dati meki wi musu tan begi taki Yehovah tan gi wi leri na a reti ten.

„GI WI PARDON FU DEN SONDU FU WI”

9. Fu san ede den sondu fu wi de neleki paiman?

⁹ Yesus ben taki: „Gi wi pardon fu den sondu [noso „paiman”, futuwortu] fu wi” (Mat. 6:12; Luk. 11:4). Den sondu fu wi de neleki paiman. Na ini 1951, A Waktitoren ben fruteri taki te wi e sondu, a de neleki wi e kon abi wan paiman na Yehovah. Wi alamala musu sori lobi gi Yehovah èn wi musu gi yesi na en ala ten fu di a abi reti na tapu. Ma te wi e sondu teige Yehovah, dan wi no e gi en san a abi reti na tapu. Efu Yehovah ben wani, dan a no ben o de wi mati moro na den momenti dati. A Waktitoren e taki moro fara: „Te wi e sondu, dan wi no e sori taki wi lobi Gado.”​—1 Yoh. 5:3.

10. San Yehovah seti fu kan gi wi pardon fu wi sondu èn fa wi musu si a seti dati?

¹⁰ Wi de nanga bigi tangi taki Yehovah gi Yesus leki lusu-paiman gi den sondu fu wi! Ala dei wi musu begi Yehovah fu gi wi pardon fu wi sondu. Pikinmoro 2000 yari pasa Yesus dede fu pai a lusu-paiman gi wi. Toku a musu de gi wi leki wan diri kado di wi kisi tide. „A paiman” di musu pai fu bai wi libi baka „hei so te” taki noti di wan sondu libisma ben o du gi wi, ben o nofo fu man pai en. (Leisi Psalm 49:7-9; 1 Petrus 1:18, 19.) Iya, wi musu tan gi Yehovah tangi fu a bigi kado disi di a gi wi. Boiti dati, wi musu memre taki Yesus ben leri wi fu aksi pardon fu „den sondu fu wi” a no taki „den sondu fu mi”. Disi e sori wi taki ala sma di e dini Gado makandra nanga wi abi a lobi-ati seti disi fanowdu. A sani disi e leri wi taki wi no musu prakseri wi eigi matifasi nanga Gado nomo, ma taki wi musu prakseri a matifasi di trawan abi nanga en tu, iya, srefi den wan di sondu teige wi kande. Furu tron den sondu dati no bigi so. Disi e gi wi na okasi fu sori taki wi lobi wi brada nanga sisa trutru èn taki wi de klariklari fu gi den pardon, soleki fa Yehovah gi wi pardon fu di a abi sari-ati nanga wi.​—Kol. 3:13.

11. Fu san ede a prenspari fu abi a gwenti fu gi trawan pardon?

¹¹ A de wan sari sani taki wi leki sondu libisma e hori makandra na ati son tron (Lef. 19:18). Efu wi e fruteri trawan na ini gemeente san wan sma du nanga wi, dan den kan teki wi sei. A sani disi kan tyari pratifasi kon na ini a gemeente. Efu wi gi pasi taki den sortu sani dati pasa, dan disi ben o sori taki wi no e warderi a sari-ati fu Yehovah nanga a lusu-paiman di a seti gi wi. Wi Tata no o gebroiki a lusu-paiman fu en Manpikin moro fu gi wi pardon fu wi sondu efu wi no abi a gwenti fu gi trawan pardon (Mat. 18:35). Baka di Yesus leri sma fa fu begi a taki wantewante fu a tori disi. (Leisi Mateyus 6:14, 15.) Efu wi wani taki Gado tan gi wi pardon fu wi sondu, dan wi no musu tan du sani di a no lobi kwetikweti.​—1 Yoh. 3:4, 6.

„NO MEKI WI KISI TESI”

12, 13. (a) San pasa nanga Yesus baka di a teki dopu? (b) Fu san ede wi no kan gi trawan a fowtu efu wi fadon na ini tesi? (c) San Yesus sori di a tan dini Gado te na dede?

¹² Te wi e prakseri san pasa nanga Yesus syatu baka di a teki dopu, dan dati kan yepi wi fu frustan fu san ede wi musu aksi Gado: „No meki wi kisi tesi.” A santa yeye fu Gado tyari Yesus go na a sabana. Fu san ede? Fu „Didibri kon tesi en” (Mat. 4:1; 6:13). Fu san ede Yehovah meki a sani disi pasa? Adam nanga Eva no ben wani Yehovah moro leki tiriman. Boiti dati, furu ten ben o de fanowdu fu sori efu den sani di Satan ben taki fu Gado èn fu libisma ben de so trutru. Fu eksempre, a de so taki Gado no ben meki libisma bun? Wan libisma di no ben abi sondu ben o man tan gi yesi na Gado leki a Moro Hei Tiriman, awinsi san „na ogriwan” ben du fu tesi en? A ben o moro bun gi libisma fu libi sondro a tiri fu Gado, soleki fa Satan ben wani sma prakseri? (Gen. 3:4, 5) We, Yesus tai hori na Yehovah. Na a fasi dati a sori taki Didibri na wan leiman. Te fu kaba a ten o kon te Yehovah o feni taki a de krin taki den sani di Didibri ben taki no de tru. Dan ala sma na ini hemel èn na grontapu o sabi taki a fasi fa Yehovah e tiri na a moro bun fasi.

¹³ Yehovah na wan santa Gado èn fu dati ede a no e tesi sma nanga ogri sani. Ma Didibri na „a sma di e tesi libisma” (Mat. 4:3). Didibri e suku fu tesi wi na ala sortu fasi. Ma a no abi fu kisi wi efu wi bosroiti fu kakafutu gi den tesi disi. (Leisi Yakobus 1:13-15.) Ibri leisi te Yesus ben e kisi tesi a ben kari wan pisi fu Gado Wortu di yepi en fu kakafutu gi a tesi dati. Na a fasi dati a sori taki a e si Gado leki a Moro Hei Tiriman. Toku Satan no gi abra. A wakti fu „kon baka na wan moro bun ten” (Luk. 4:13). Yesus tan kakafutu gi den sani di Satan du fu meki a trangayesi Gado. A sori taki Yehovah abi a reti fu de a Moro Hei Tiriman èn taki wan libisma di no abi sondu kan tan dini Gado awinsi a e kisi hebi tesi. Ma Satan e tan pruberi fu kori den bakaman fu Yesus na ini a ten disi èn a wani kori yu tu.

14. San wi musu du efu wi no wani taki Didibri kori wi?

¹⁴ Te na a dei fu tide a de fanowdu fu sori efu den sani di Didibri taki fu a tiri fu Yehovah de so trutru. Dati meki Gado e gi pasi ete fu Didibri tesi wi. Ma a no Yehovah „e meki wi kisi tesi”. A de seiker taki wi man tai hori na en èn a wani yepi wi. Ma a no e dwengi wi fu du san reti. A e lespeki a reti di wi abi fu teki wi eigi bosroiti. Dati meki a e gi wi na okasi fu sori efu wi o tai hori na en, noso efu wi o trangayesi en. Efu wi no wani meki Didibri kori wi, dan wi musu tan krosibei fu Yehovah èn wi musu tan begi en fu yepi wi. Fa Yehovah e piki den begi fu wi?

15, 16. (a) Nanga sortu tesi wi musu luku bun? (b) Suma abi a fowtu efu wi gi pasi taki Satan kori wi?

¹⁵ Yehovah e gi wi a santa yeye fu en di tranga srefisrefi. A santa yeye disi e gi wi krakti èn a e yepi wi fu kakafutu gi tesi. Gado e gebroiki Bijbel nanga a Kresten gemeente tu fu warskow wi. Fu eksempre a e leri wi fu luku bun fa wi e gebroiki wi ten, wi moni nanga wi krakti gi sani di no de so prenspari. Espen nanga Janne na wan trowpaar di e libi na ini wan gudu kondre na Europa. Omeni yari langa den wroko leki gewoon pionier na wan kontren na ini a kondre fu den pe moro preikiman ben de fanowdu. Ma di den kisi a fosi pikin fu den, den no ben man pionier moro èn now den kisi ete wan pikin. Espen e taki: „Ibri tron baka wi e begi Yehovah fu no meki Didibri kori wi fu di wi no man du so furu moro na ini a diniwroko fu Gado. Wi e aksi Yehovah fu yepi wi, so taki wi kan tan abi wan bun matifasi nanga en èn fu tan preiki fayafaya.”

¹⁶ Wan tra sani di kan de wan tesi gi wi na ini a ten disi na fu luku porno. Efu wi go luku porno wi no kan gi Satan a fowtu fu dati. Fu san ede? Fu di Satan nanga a grontapu fu en no man dwengi wi fu du wan sani di Yehovah no feni bun. Son sma gi pasi taki Satan kori den fu di den tan prakseri sani di no bun. Ma wi kan kakafutu gi a tesi dati neleki fa dusundusun brada nanga sisa fu wi du dati kaba.​—1 Kor. 10:12, 13.

„FRULUSU WI FU NA OGRIWAN”

17. (a) Fa wi e sori taki wi wani taki Gado frulusu wi fu na ogriwan? (b) San Gado o du na ini a ten di e kon?

¹⁷ Efu wi wani taki Gado „frulusu wi fu na ogriwan”, dan wi musu meki muiti fu „no de wan pisi fu [Satan] grontapu”. Wi „no [musu] lobi [Satan] grontapu nanga den sani fu grontapu” (Yoh. 15:19; 1 Yoh. 2:15-17). Wi o abi fu tan feti fu no du den sani dati. A o switi srefisrefi te Yehovah puru Satan èn te a pori na ogri grontapu fu en! Wi no musu frigiti taki di den trowe Satan komoto fu hemel a ben sabi taki a abi wan syatu ten nomo. En ati e bron srefisrefi èn dati meki a e du ala san a man fu meki wi trangayesi Gado. Sobun, meki wi tan begi Gado fu a frulusu wi fu Satan.​—Openb. 12:12, 17.

18. San wi musu tan du efu wi wani libi na ini wan grontapu pe Satan no de moro?

¹⁸ Yu wani libi na ini wan grontapu pe Satan no de moro? Efu dati de so, dan yu musu tan begi fu Gado Kownukondre kon, fu meki a nen fu Gado kon santa èn fu meki a wani fu en pasa na grontapu. Tan abi a frutrow taki Yehovah o sorgu gi yu ala ten èn taki a o gi yu ala san yu abi fanowdu fu tai hori na en. Iya, teki a bosroiti fu tan du san a Wi Tata begi e taki.