Te yu yere den wortu „A kaba de krosibei!”, dan san yu e prakseri? Kande yu e si wan domri di e bari den wortu disi na tapu wan podium, aladi a e meki omeni sani nanga en Bijbel na ini en anu. Noso yu e prakseri wan owru man nanga bigi barba, a weri langa krosi nanga wan titei na en mindri èn a abi wan bord pe skrifi: „A kaba e kon!” Te son sma e si den sortu sani disi dan kande den e broko den ede, trawan no e bribi noso den e spotu srefi.

Ma Bijbel e taki: „A kaba o kon” (Mateyus 24:14). Bijbel e kari a dei dati „a bigi dei fu Gado” noso „Armagedon” (Openbaring 16:14, 16). A tru taki kerki bruya sma nanga den sani di den leri fu a tori disi, èn sma e meki trawan frede fu di den e fruteri ala sortu sani fu a kaba. Ma Bijbel e sori krin san na a kaba trutru. Gado Wortu e yepi wi fu si tu efu a kaba de krosibei. San moro prenspari, na taki a e leri wi san wi musu du fu tan na libi te a kaba kon. Ma meki wi go luku fosi san a kaba no wani taki, èn baka dati wi o luku san na „a kaba”, soleki fa Bijbel e leri.

SAN A KABA NO WANI TAKI

1. A KABA A NO WAN RAMPU DI O BRON ALA SANI NA GRONTAPU.

   Bijbel e taki: „[Gado] seti grontapu na tapu wan steifi fondamenti. Fu ala ten, iya, fu têgo nowan sma o man seki en” (Psalm 104:5). A tekst disi nanga wan tu trawan e sori krin taki noiti Gado o pori grontapu èn a no o gi pasi tu taki grontapu kisi pori.​—Preikiman 1:4; Yesaya 45:18.

2. A KABA NO O DE LEKI WAN RAMPU DI E KON WANTRONSO.

   Bijbel e taki dati Gado poti wan ten te a o tyari a kaba kon. A e taki: „Nowan sma sabi a dei, noso a yuru dati. Iya, srefi den engel fu hemel nanga a Manpikin no sabi, ma soso a Tata sabi. Tan luku, tan na ai, bika unu no sabi o ten den sani disi o pasa” (Markus 13:32, 33). A de krin taki Gado, „a Tata” poti wan „ten” te a o tyari a kaba kon.

3. A KABA A NO WAN RAMPU DI LIBISMA O TYARI KON ÈN A NO BIGI STON O FADON PORI GRONTAPU.

   Fa a kaba o kon? Openbaring 19:11 e taki: „Mi si hemel opo èn mi si wan weti asi. A sma di ben e sidon na tapu na asi, ben nen ’a wan di de fu frutrow’ èn ’a wan di e taki san tru’”. Vers 19 e taki moro fara: „Dan mi si na ogri meti, den kownu fu grontapu, nanga den legre fu den. Den ben kon makandra fu feti nanga a sma di ben e sidon na tapu na asi èn nanga a legre fu en” (Openbaring 19:11-21). Aladi furu fu den sani di skrifi na ini a tekst disi e prenki wan sani, toku wi kan frustan a sani disi: Gado o seni wan legre fu engel fu kiri ala den feanti fu en.

SAN NA A KABA

1. A KABA FU ALA LIBISMA TIRIMAKTI.

   Bijbel e taki: „A Gado fu hemel o seti wan kownukondre [tirimakti] di noiti no o kisi pori. A kownukondre srefi no o gi na nowan tra pipel. A o broko ala den kownukondre disi pisipisi èn a o tyari wan kaba kon na den. A kownukondre srefi o tan fu têgo” (Danièl 2:44). Soleki fa wi ben taki na a di fu 3 penti, dan „den kownu fu grontapu, nanga den legre fu den” o kisi pori te den o „kon makandra fu feti nanga a sma di ben e sidon na tapu na asi èn nanga a legre fu en”.​—Openbaring 19:19.

2. A KABA FU FETI, OGRI, NANGA KRUKTUDU.

   „Na ala sei fu grontapu [Gado] e meki feti kon na wan kaba” (Psalm 46:9). „Den reti-ati sma o libi na grontapu. Na soso den wan di e du bun, o tan abra. Ma Gado o figi den ogri sma puru na grontapu. Den bedrigiman a o rutu puru” (Odo 2:21, 22). „Luku, mi e meki ala sani kon nyun.”​—Openbaring 21:4, 5.

3. A KABA FU KERKI DI NO DU A WANI FU GADO ÈN DI PINA LIBISMA.

   „Den profeiti srefi e taki profeititori di no tru. Den priester e kwinsi sma, fu di den abi a makti fu du dati. . . . Ma san unu o du te fu kaba?” (Yeremia 5:31) „Furu sma o taigi mi na a dei dati: ’Masra, Masra, a no na ini yu nen wi ben taki profeititori? A no na ini yu nen wi ben puru ogri yeye na sma tapu? A no na ini yu nen wi ben du furu bigi wondru?’ Toku mi o taigi den krin: Mi no sabi unu kwetikweti! Komoto na mi tapu, un ogriman.”​—Mateyus 7:21-23.

4. A KABA FU SMA DI E MEKI TAKI A SITUWÂSI NA GRONTAPU TAKRU.

   Yesus Krestes ben taki: „We, na fu a sani disi ede den o kisi krutu. A leti kon na grontapu, ma libisma ben lobi a dungru moro leki den ben lobi a leti, bika den ben du ogri” (Yohanes 3:19). Bijbel e taki dati na ini a ten fu a reti-ati man Noa, grontapu ben kisi pori kaba. „A grontapu fu a ten dati kisi pori di watra sungu en. Ma na a srefi fasi Gado taki tu, taki a libi den hemel nanga a grontapu fu now fu bron den nanga faya. A libi den teleki a dei doro taki a o krutu den ogri sma èn pori den.”​—2 Petrus 3:5-7.

Bijbel e agersi ’a dei di Gado o krutu den ogri sma èn pori den’, nanga a pori di „a grontapu” fu a ten fu Noa ben kisi. Sortu grontapu ben kisi pori? A no a trutru grontapu, ma na „den ogri sma”, den feanti fu Gado, ben kisi „pori”. Te „a dei doro taki [Gado] o krutu” sma, dan den feanti fu en o kisi pori tu. Ma den mati fu Gado o tan na libi, neleki Noa nanga en osofamiri.​—Mateyus 24:37-42.

Prakseri o moi a grontapu o de baka te Gado puru ala ogrisma na grontapu. Sobun, a kaba fu san Bijbel e taki, na bun nyunsu a no wan takru nyunsu. Ma kande yu e aksi yusrefi: ’Bijbel e taigi wi o ten a kaba o kon? A de krosibei? Fa mi kan tan na libi te a kon?’

Yu denki taki Gado o tan gi libisma na okasi fu basi trawan, so taki libisma no abi nowan howpu gi a ten di e kon? Nôno, soleki fa wi si, dan Gado o du wan sani fu tyari wan kaba kon na a pina di libisma e pina trawan. A Gado di meki libisma nanga grontapu wani meki yu sabi taki a ten dati de krosibei. Fa a e sori wi dati?

Luku na eksempre disi: Te yu e go na wan presi nanga yu wagi, dan kande yu e luku tapu Internet fa yu kan rèi go na a presi dati noso kande yu e luku na tapu wan karta. Te yu de na pasi èn yu e si den strati nen di de tapu a karta, dan yu sabi taki yu de na a yoisti pasi èn taki yu e doro a presi pe yu e go. Na a srefi fasi, Gado gi wi en Wortu, di e sori wi sortu bigi kenki ben o de fu si na heri grontapu. Te wi e si taki den sani dati e pasa, dan wi kan de seiker taki a kaba de krosibei.

Bijbel e sori taki te a situwâsi na grontapu e kon ogri moro nanga moro, dan te fu kaba a kaba o kon. Na a ten dati difrenti sani o pasa na heri grontapu, di noiti ete pasa. Luku wan tu fu den sani di Gado Wortu e taki dati o pasa.

1. BIGI PROBLEMA O DE NA HERI GRONTAPU Wan profeititori na Mateyus kapitel 24 e taki fu wan tu sani di ben o pasa èn di ben o de a marki di e sori taki „a kaba fu a grontapu disi de krosibei” (vers 3, 14). Wan tu fu den sani dati, na bigi feti, angriten, nanga gronseki. Moro nanga moro sma ben o du ogri, a lobi fu sma ben o kon kowru, èn kerki fesiman ben o kori furu sma (vers 6-26). A tru taki den sani disi e pasa hondrohondro yari kaba. Ma te a kaba e kon moro krosibei, ala den sani disi ben o pasa na a srefi pisi ten. Boiti dati, den dri sani di e kon now, ben o de fu si tu.

2. LIBISMA O ABI TAKRU MANIRI Bijbel e taki dati na ini „den lasti dei”, fosi a kaba kon, moro nanga moro sma ben o abi takru maniri. A e taki: „Sma o lobi densrefi nomo. Den o lobi moni. Den o lobi dyaf. Den o abi heimemre. Den o taki ogri fu trawan. Den o trangayesi papa nanga mama. Den no o de nanga tangi. Den no o tai hori na trawan. Den no o lobi trawan. Den no o wani meki kruderi. Den o fruteri ogri-ati lei fu trawan. Den no o man dwengi densrefi. Den o du ogri-ati sani. Den no o lobi san bun. Den o tori trawan. Den o du san densrefi wani. Den o abi bigimemre. Den o lobi prisiri na presi taki den lobi Gado” (2 Timoteyus 3:1-4). A tru taki a sori di sma no e sori lespeki gi trawan a no wan nyun sani. Ma a sani disi ben o kon so ogri, taki Bijbel e kari a ten disi wan ’muilek ten di ben o tranga fu pasa’. Yu e si taki furu sma e sori den fasi disi?

3. SMA O PORI GRONTAPU Bijbel e taki dati Gado o „pori den wan di e pori grontapu” (Openbaring 11:18). Na sortu fasi libisma ben o pori grontapu? Bijbel e taki dati wan srefi sani ben pasa na ini a ten fu Noa: ’Grontapu ben pori èn grontapu ben kon lai ogridu. Iya, di Gado luku grontapu, a si taki grontapu ben pori trutru.’ Dati meki Gado ben taki: „Mi o pori den” sma disi (Genesis 6:11-13). Yu e si taki grontapu kon lai ogridu? Libisma kon ogri so kefalek taki den man kiri ala libisma na grontapu. Den abi den fetisani fu du dati. Ma libisma e pori grontapu na wan tra fasi tu. Den e pori den sani di wi abi fanowdu fu tan na libi, den e doti a loktu, den se èn den e du sani di e meki taki meti nanga bon e dede.

Aksi yusrefi: ’Libisma ben abi a makti fu pori grontapu wán hondro yari pasa?’ Now den man du dati fu di den meki kefalek fetisani èn fu di den e du ala sortu sani di e doti a grontapu. Libisma e meki nyun sani, ma a gersi leki den no sabi sortu takru bakapisi den sani disi kan tyari kon gi grontapu. Ma libisma no o man pori grontapu krinkrin. Fosi den pori ala sani na grontapu, Gado o pori den wan di e pori grontapu. Dati na san a pramisi!

4. WAN PREIKIWROKO O DU NA HERI GRONTAPU Wan tra sani di ben o sori taki a kaba de krosibei, na taki wan bigi wroko ben o du na heri grontapu: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). A preikiwroko disi ben o de heri tra fasi leki den preikiwroko di den kerki du na ini den hondrohondro yari di pasa. Na ini den lasti dei, sma ben o preiki ’a bun nyunsu fu a Kownukondre’. Dati ben o de a moro prenspari boskopu. Yu sabi wan kerki di e preiki a boskopu dati? Srefi efu wan kerki e preiki a boskopu disi, den e du en na wán presi nomo? Noso den panya a bun nyunsu disi „gi sma na heri grontapu, so taki sma fu ala kondre kan yere dati”?

A website www.pr418.com/srn e poti prakseri na „a bun nyunsu disi fu a Kownukondre”. A website disi abi buku nanga tra sani di e taki fu a boskopu disi na ini moro leki 700 tongo. Yu sabi wan tra sani di sma du di e poti so furu prakseri na a bun nyunsu fu a Kownukondre? Langa ten fosi Internet ben de, sma ben sabi Yehovah Kotoigi leki sma di e preiki a bun nyunsu fu Gado Kownukondre. Sensi 1939 a sani disi skrifi na tapu a kafti fu A Waktitoren: „A e taki fu Yehovah Kownukondre”. Wan buku di e taki sani fu difrenti kerki e taki dati „noiti ete sma preiki na so furu fasi èn noiti ete den du en na so furu presi” leki den Yehovah Kotoigi. A preikiwroko disi e sori taki heri esi Gado o tyari ’a kaba kon’ nanga yepi fu en Kownukondre.

GRONTAPU DORO WAN PRENSPARI TEN

Yu e si taki ala den fo sani di wi luku na ini na artikel disi e pasa nownow? Moro leki wán hondro yari kaba, a tijdschrift disi e taki fu sani di e yepi sma fu frustan taki den sani di e pasa na grontapu e sori taki a kaba de krosibei. Ma toku son sma no e agri nanga den sani dati. Den feni taki sma e skrifi nomo san densrefi e denki, èn son leisi den no e skrifi sani soleki fa den de trutru. Den feni tu taki fu di a kon moro makriki fu sabi san e pasa na heri grontapu, meki a kan gersi leki grontapu kon moro ogri. Ma awinsi san den sma disi e taki, furu buweisi de di e sori taki grontapu doro wan prenspari pisi ten, èn taki heri esi a kaba o kon.

Son sabiman feni taki wi e doro wan ten te bigi kenki o pasa na grontapu. Fu eksempre na ini 2014, wan tu sabiman ben warskow na organisâsi fu a VN di musu sorgu taki freide de na heri grontapu, taki son kondre abi fetisani di kan kiri ala libisma na grontapu (Science and Security Board of the Bulletin of the Atomic Scientists). Den sabiman dati e taki: „Te wi e luku ala den sani di libisma e meki, dan wi e si taki den man pori heri grontapu.” Furu sma e si krin taki wi doro wan prenspari ten na ini a grontapu disi. Den sma di meki a tijdschrift disi nanga furu sma di e leisi en, no e tweifri taki wi e libi na ini den lasti dei èn taki a kaba de krosibei. Ma yu no abi fu frede gi a ten di e kon. Na presi fu dati yu kan prisiri. Fu san ede? Fu di yu kan tan na libi te a kaba kon!

Bijbel e sori taki na a ten fu a kaba, furu sma o kisi pori: „Wan bigi banawtu o de. Noiti ete so wan ten ben de sensi a bigin fu grontapu teleki now . . . Fu taki en leti, efu Gado no ben o syatu a ten dati, dan nowan sma ben o feni frulusu” (Mateyus 24:21, 22). Ma Gado e pramisi taki furu sma o tan na libi: „Grontapu e pasa gowe . . . , ma a sma di e du a wani fu Gado o tan fu têgo.”​—1 Yohanes 2:17.

Efu yu wani tan na libi te a kaba kon, dan san yu musu du? Yu musu bigin kibri wan lo sani fu sreka yusrefi gi a ten dati? Nôno. Bijbel e gi wi a deki-ati fu du wan tra sani. A e taki: „Fu di ala den sani disi o smèlter gowe na a fasi disi, meki un musu luku sortu sma un musu de. Tyari unsrefi na wan santa fasi èn du sani di e sori taki unu e dini Gado fayafaya. Tan fruwakti a dei fu Yehovah. Tan hori bun na prakseri taki a dei dati e kon” (2 Petrus 3:10-12). A tekst disi e sori taki den sani di o smèlter gowe, na den tirimakti fu na ogri grontapu disi èn den sma di e horibaka gi den tirimakti disi na presi fu horibaka gi a tirimakti fu Gado. Sobun, a de krin taki efu wi ben o kibri wan lo sani, dan dati no ben o man kibri wi gi a pori di o kon.

Dati meki efu wi wani tan na libi te a kaba kon, dan wi musu dini Yehovah Gado fayafaya èn wi musu leri fu libi na wan fasi di a feni bun (Sefanya 2:3). Sobun wi no musu tapu wi ai gi den krin buweisi di e sori taki wi e libi na ini wan prenspari ten, neleki fa furu sma na ini a ten disi e du. Ma wi musu ’tan hori bun na prakseri taki a dei fu Yehovah e kon’. Yehovah Kotoigi kan sori yu na ini Bijbel san yu musu du fu kan tan na libi te a kaba kon.