Na Gado foe lobi no kan si brokotrow na ai
„Oen moe kibri oensrefi foe na sé foe oen froestan, èn nanga na oema foe oen jongoe jari nowan sma moe handri feradelek. Bikasi en (Jehovah) no kan si brokotrow na ai.” — Mal. 2:15, 16.
1, 2. (a) Sortoe sjen libi, no langa pasa kaba, wan sma di ben de wan owroeman ben teki? (b) Foe kakafoetoe gi sortoe fasi, meki wi o taki san e kon now?
WAN man di ben dini leki wan owroeman foeroe jari baka makandra ini wan kristen gemeente, ben bigin foe kisi problema ini en trowlibi. A ben doe soetadoe nanga wan grontapoe oema, nanga ini prakseri dati en oema ben sa prati foe en èn a ben sa de fri foe trow nanga wan kompe-bribiman. Leki wan froewondroe sani a ben de gi en dati en oema ben de klari foe gi en pardon èn verzoen ensrefi nanga en. Ma nanga na faste besroiti foe kon fri, a broko a trow na lanti èn a ben trow, baka di a brokotrow ben tron wan troetroe sani, nanga wan tra oema. Leki wan bakapisi foe na doe disi a ben sluit uit foe na kristen gemeenschap.
2 Fa a ben sa de wan moi sani foe ferteri dati so wan sekseki libi ben kon wawan tron na mindri den sma di e taki dati den gi densrefi abra na Jehovah! Ma na wan sari sani dati disi no de so. A gersi a de kon foeroetron moro nanga moro dati son sma e feni en moro boen foe gi densrefi abra na lostoe ofoe moro makriki fasi foe komoto foe wan ongolokoe trowsituwasi, na presi foe den hori densrefi na bijbel gronprakseri èn loekoe na Jehovah Gado ini begi, loekoe en Wortoe, èn soekoe na jepi foe opziener ini a gemeente. Wi de howpoe dati san wi sa tjari kon na krin djaso, sa jepi ala kristen di gi densrefi abra foe tranga den geest ini disi, sodati den sma di abi ini prakseri foe waka so wan gridi fasi foe libi, sa wani loekoe a situwasi foe den njoen baka.
3. San de na fasi foe na grontapoe ini algemeen foe na sé foe brokotrow?
3 Fa wi kan firi sari foe na sani disi, tokoe a no abi foe froewondroe wi troetroe, te wi loekoe san e pasa ini na grontapoe now. A no de foe taki dati moro nanga moro man nanga oema e brokotrow. Ini kondre leki Amerkankondre nanga Rosjakondre dan wán foe den dri trow e kon na wan kaba nanga brokotrow èn ini son kondre a de pikinmoro wán foe den toe trow. Son Amerkan district, e gi pasi foe brokotrow sondro dati fowtoe de na wan foe den patna, èn disi a no de foe taki e meki moro foeroe brokotrow kon. Ja, na nomroe brokotrow ben sa de moro bigi efoe moro nanga moro man nanga oema no ben go libi nanga makandra sondro foe trow. Foe eksempre, tori e sori dati soso ini Brasjonkondre wawan moro leki 4 miljoen man nanga oema e libi na so fasi.
FA JEHOVAH E SI BROKOTROW
4, 5. (a) Fa Jehovah Gado e si feradelek brokotrow? (b) Fa Jezus ben taki foe a tori foe brokotrow?
4 Fa Jehovah e si brokotrow? A de loekoe psa brokotrow, soleki someni foe den kerki fesiman foe na kristenheid e doe disi? Fara foe disi! Wi e lési ini Maleachi 2:15, 16: „’Oen moe kibri oensrefi foe na sé foe oen froestan, èn nanga na oema foe oen jongoe jari nowan sma moe handri feradelek. Bikasi en no kan si brokotrow na ai’ so Jehovah, na Gado foe Israël, ben taki; . . . ’Èn oenoe moe kibri oensrefi foe na sé foe oen froestan, èn oen no moe handri feradelek.’” Jezus ben tjari so wan srefi prakseri kon na fesi. Di den kerki fesiman foe en ten ben aksi en efoe a de joisti foe brokotrow, Jezus ben piki: „Oen no ben lési dati en di ben meki den foe sensi a bigin, ben meki den leki man nanga oema èn ben taki: ’Datede meki wan man sa libi en papa nanga mama, tai hori na en oema, èn den toe sa de wán skin’? Sodati den no de moro langa toe, ma wán skin. San Gado ben tjari foe datede kon ondro wan tjatjari, nowan sma moe prati.” — Matt. 19:4-6.
5 Di den Fariséman ben kisi a piki disi, den ben aksi: „Foe san-ede Mozes ben taki dan taki wan pratibrifi moe gi èn kon fri foe en (na oema) nanga jepi foe brokotrow?” Jezus ben piki: „Foe oen tranga ati ede, meki Mozes ben gi oen pasi foe kon fri foe oen oema èn broko a trow, ma disi no ben de so foe sensi na bigin. Mi e taigi oen dati ibri sma di prati nanga en oema, boiti tapoe a gron foe hoeroedoe, èn e trow wan trawan, e doe soetadoe” (Matt. 19:7-9). San den tekst disi e leri wi? Dati no Jehovah Gado, no Jezus Kristus en Manpikin, e si na pasa foe Gado wèt tapoe a tori foe brokotrow leki wan soso sani. Brokotrow e priti poeroe foe makandra san Jehovah Gado ben tjari konmakandra. A de si na trowlibi leki wan banti foe a libi.
6. San na wèt foe Mozes ben abi foe taki foe brokotrow?
6 Foe dati meki ben taki ini na di foe 7 foe den Tin Komando: „Joe no moe doe soetadoe” (Ex. 20:14). Èn boiti dati, na wèt foe Mozes ben taki dati den Israelsma moe fringi ston te a dede tapoe ibri man di e doe soetadoe nanga wan oema foe wan tra sma, sosrefi toe na oema di doe na soetadoe (Lev. 20:10). Nanga reti na apostel Paulus e meki wi jere toe na warskow ini Hebreeër 13:4 dati Jehovah Gado sa kroetoe soetaman nanga hoeroeman.
7. Foe san-ede meki soetadoe de moro ogri leki hoeroedoe?
7 Te joe loekoe en boen dan soetadoe de moro ogri leki hoeroedoe, di wortoeboekoe e skrifi foe en leki seks libi mindri sma di no trow. Ma ini soetadoe a sani e kon toe ete foe a pasa ofoe broko foe na trowbanti. Wan Bakratongo wortoe foe soetadoe de echtbreuk, san wani taki a broko foe na trowbanti.
FOE SAN-EDE JEHOVAH NO KAN SI BROKOTROW NA AI?
8, 9. (a) San de wán rede foe san-ede Gado no wani foe si feradelek brokotrow na ai? (b) San de ete wan rede foe na si di a no kan si na sani disi na ai?
8 Jehovah Gado no kan si brokotrow di no abi en gron tapoe a bijbel, foedi nanga disi ini na fosi presi wan sma e sondoe na en. Sensi owroe ten a abi wan bigi belangstelling gi na trowlibi, sodati sma di e handri ini disi kontra en wani, e sondoe foe troe na Gado. Dati soetadoe de wan sondoe na Gado, e kon na krin ini san Jozef ben taki gi na oema foe Potifar, di a ben proberi foe kori Jozef foe doe soetadoe nanga en: „Fa mi ben sa kan doe na bigi ogri disi èn foe troe sondoe na Gado?” (Gen. 39:9). Èn san kownoe David ben taigi Jehovah di a ben ferteri Jehovah en sondoe foe soetadoe nanga na oema foe Uria? „Na joe, joe wawan, mi ben sondoe, èn san ben de ogri ini joe ai mi ben doe.” — Ps. 51:4.
9 Ete wan réde foe san-ede Jehovah no wani si brokotrow na ai, de dati a abi belangstelling gi geregtigheid, gi fair play. Ini Jakobus 5:1-6 foe eksempre en Wortoe e kroetoe den goedoeman, di e kwinsi den wrokoman foe den, tapoe wan krakti fasi. Brokotrow (di no abi en gron tapoe na bijbel) pikinmoro wani taki alaten dati wan sma e handri feradelek nanga en trowpatna, soleki Gado ben verklari nanga en proféti Maleachi. Na patna di no abi fowtoe, a de wroko kroektoe gi en. Soleki Jehovah Gado e verklari ini na wèt foe Mozes foeroetron, dati a ben gi jepi na a afersi foe pikin sondro papa èn weduwe di e kisi kwinsi, èn ben sa strafoe den sma di wani kisi wini foe den, a so Jehovah sa tjari wan takroe kroetoe kon tapoe den sma di e gebroiki olo ini na wèt foe kon fri foe den trowpatna foe den, sodati den kan trow nanga wan trawan. — Deut. 10:17, 18; 27:19.
10. Foe san-ede joe ben sa kan kari wan soetaman wan hedonist?
10 Nanga reti joe ben sa kan taki foe na soetaman dati a de tron wan hedonist. Wan hedonist? Ja, wan hedonist de wan sma di e libi moro foeroe foe prisiri nanga gridifasi. Wan sma di e smoko tabaka, aladi a sabi o takroe disi de, joe ben sa kan kari wan hedonist (Luk. 8:14; Tit. 3:3, Kingdom Interlinear Translation). Soboen, wi kan kari den sma, di e poti den prisiri foe brokotrow nanga a trow baka nanga wan tra sma moro hé leki den verprekti foe den foe prisiri Jehovah Gado, hedonist. Den de troetroe lobiman foe prisiri moro leki lobiman foe Gado. — 2 Tim. 3:1, 2, 4.
11. Na soema na soetaman di brokotrow nanga en patna e sondoe moro, boiti na Gado nanga en trowpatna?
11 Boiti dati na soetaman di brokotrow nanga en patna e sondoe na Jehovah Gado nanga en trowpatna, a de sondoe toe na a gemeente, di a de makandra nanga en, bikasi nanga na doe foe en na boen foe na gemeente e kisi sjen. Nanga na takroe eksempre foe en, a de sondoe toe na den aparti sma ini na gemeente. Di foe eksempre ini na foto New York wan prenspari oema ini wan gemeente ben waka baka na fowtoe pasi disi, dan sjatoe na baka, disi ben gi toe tra jongoe oema na dekati foe waka baka na eksempre foe en. Nanga reti na apostel Paulus ben gi na warskow foe no meki trawan naki foetoe. — Fil. 1:9, 10.
12. Sortoe aksi di e meki wi go denki, ibri trow kristen moe aksi ensrefi foe ondrosoekoe ensrefi?
12 Na bijbel e sori krin fa Jehovah Gado nanga Jezus Kristus e prakseri foe brokotrow! Den no kan si brokotrow na ai! Ma fa joe e prakseri foe dati? Fa joe e si na santa fasi foe na trowlibi? Joe e si brokotrow leki fa Gado e si en ofoe joe meki na ogridoe poriman foe trowlibi Satan Didibri abi krakti tapoe joe, neleki tapoe a grontapoe ini algemeen? Joe wani alaten foe taki boen foe den sma di e psa Gado wèt foe na trowlibi, soetadoe nanga brokotrow? Joe de wan foe den sma di e pré nanga hoeroedoe foedi joe e fréri nanga sma foe na tra geslacht? (Matt. 5:26; 15:10). Joe e kibri joe ati ini den afersi disi, ofoe joe e lostoe foe gi joe srefi abra na prisiri dren di no mag? — Odo 4:25.
13. San e sori dati bidrigi fasi nanga brokotrow pikinmoro alaten e go anoe ini anoe?
13 Brokotrow nanga soetadoe pikinmoro alaten e go nanga makandra. Spesroetoe te wan brokotrow ben kisi foe lanti sondro dati wan foe den patna ben doe soetadoe, dan na patna di no abi fowtoe e „poti gi soetadoe” (Matt. 5:32). Èn a no de wan sani foe degedege dati soetadoe di wan foe den patna doe, no e gi na sma dati wan soifri konsensi na fesi foe Jehovah Gado. Fa disi ben kan de so dan, foedi na soetadoe ben gebore ini bidrigi fasi, soleki wi e lési: „Foe taki foe na ai foe na soetaman, a ben wakti di a doengroe foe neti kon, èn ai taki: ’No wan ai sa si mi!’ Èn tapoe en fesi a de poti wan sani tapoe en” (Job 24:15). Fa soetadoe kan meki wan sma de wan bidrigiman, e kon na krin ini na ondrofenitori di de na a bigin foe na artikel disi.
14. Fa den wortoe ini Psalm 36:1-4 e fiti boen tapoe na soetaman ofoe soeta-oema di brokotrow nanga en patna?
14 Wi e kisi jepi foe si na brokotrow foe wan soetadoe patna ini na joisti fasi nanga jepi foe den wortoe foe David ini Psalm 36:1-4: „Den wortoe foe pasa na wèt de gi na ogri sma ini na inisé foe en ati; no wan frede foe Gado de na en fesi. Bikasi a ben handri toemsi grati ini en égi ai foe si en égi sondoe foe no wani si en na ai. Den wortoe foe en mofo de takroedoe nanga bidrigi fasi; a tapoe foe abi froestan foe doe boen. Den sani di de takroe, dati a de tan prakseri tapoe en bedi. A de poti ensrefi tapoe wan pasi di no de boen. San de takroe a no de trowe.” Fa den wortoe dati fiti na soetaman di meki den broko na trow nanga en patna.
15. Sortoe bijbel gronprakseri den sma moe loekoe boen. di baka den soeta, ben meki den broko na trow èn di ben trow agen baka dati?
15 Foeroetron a ben pasa dati sma di ben sluit uit foe a gemeenschap, foedi den ben doe soetadoe, meki den broko na trow nanga den patna èn ben trow baka, ben teki baka soso wan jari baka di den ben sluit uit. Den owroeman di ben behandel den geval disi, sondro degedege ben poti a besroiti foe den tapoe san Gado Wortoe abi foe taki foe na sori foe sari-ati fasi. Jehovah Gado de troetroe wan sari-ati Gado, èn owroeman moe de disi sosrefi toe. Ma gi man nanga oema di nanga triki ben seti sani foe trow nanga makandra, wi kan taki soso, dati awansi den owroeman ben teki den baka, dati no de troetroe na kaba foe na tori. Owroeman kan teki besroiti soso tapoe den dorosé marki foe berow, ma den no man foe lési na ati krinkrin. Foedi den no man kroetoe den bewégi foe ati, meki den sa teki na man nanga oema di trow now. Ma meki na man nanga oema dati noiti frigiti Paulus wortoe, dati „Gado sa kroetoe hoeroeman nanga soetaman” (Hebr. 13:4). Ini ala den afersi disi, na kriboi kroetoe de ini anoe foe Jehovah Gado di sabi ala omstandigheden. En kan lési foe troe ati soleki Jeremia 17:9, 10 e taki. A sabi den bewégi foe ati èn a sabi ibri bidrigi ofoe konkroe foe na sé foe sma di e psa en wèt foe na trowlibi. Ja, „ala sani de natral èn krin na fesi foe na Sma di wi moe gi frantwortoe”. Den sortoe tekst disi moe meki wi go teki prakseri. — Hebr. 4:13.
16. Foe san-ede wan trowpatna di no abi fowtoe san wani foe no brokotrow nanga na patna di doe fowtoe?
16 Ma ini disi wi moe taki, dati Gado wèt no e aksi foe wan patna di no abi fowtoe dati a moesoe foe broko na trow. Den omstandigheden kan de so dati a ben sa de wan toemsi moi sani te na partij di no abi fowtoe ben sa gi pardon na a partij di doe fowtoe, spesroetoe te na sma dati e sori sakafasi èn opregti berow. A de troe dati ontrow foe na sé foe wan sma trowpatna kan de wan toemsi sjen ondrofeni — dati wan sma patna ben proberi foe feni na wan tra presi prisiri nanga satisfaksi. Ma foeroe lobi trow-oema nanga mama foe den pikin foe den ede ben verdrage wan gridifasi ofoe srefi wan ontrow trowman.
RÉDE NANGA DRESI
17. San kan de heri boen wan réde foe san-ede meki son sma teki na asranti foe, baka di den doe soetadoe, broko na trow èn go trow baka?
17 Fa a doe kon dati son sma no e tan horidoro ini na tesi foe tan getrow na a trowverbontoe? A no de foe taki dati foeroe réde de foe disi. Wán réde ben kan de, dati kristen kotoigi foe Jehovah no abi frede gi wan tego pina, foedi den sabi dati so wan presi leki wan faja hel no de? Wan luther kerki fesiman ben taigi wan jongoe kotoigi foe Jehovah, dati efoe a no ben sa bribi ini wan faja hel, a ben sa doe difrenti takroedoe. A no de foe taki dati foeroe sma ini na kristenheid e denki a srefi fasi foe disi. Leki troe kristen wi kon de fri foe na frede foe tego pina, ma wi no „wani gebroiki na fri disi leki wan réde foe na skin”, a no so? — Gal. 5:13.
18. Sortoe toestand e meki a de fanowdoe foe wi loekoe boen alaten tapoe na tori foe wi prakseri nanga doe tapoe a kontren foe seks?
18 A grontapoe ini disi ten kon law tapoe a tori foe seks. Doe hoeroedoe fri mindri man nanga oema de wan sani foe ala dé. Sondro degedege a de so dati moro kroektoedoe e kon (Matt. 24:12). Wan kristen e kon foe tanapoe na fesi foe ala sortoe tesi tapoe a presi pe a de wroko, foedi sma lontoe en di no e tjari densrefi nanga gronprakseri foe na bijbel èn di kan de moi na skinfasi. Soboen, wi moe loekoe boen alaten foe dwengi wisrefi, èn foe hori kontakti tapoe wan zakelek fasi nanga sma foe na tra sekse di no de wi trowpatna. Sosrefi toe wi moe loekoe boen foe koranti, tijdschrift, televisie nanga film ini kino. Meki wi sorgoe dati wi no kari kon ini wi oso nanga jepi foe tv sma di de hoeroeman, soetaman nanga den sortoe sma dati. Sosrefi toe wi no moe lasi na prakseri dati boen foeroe switi njanjan nanga dringi kan meki wan kristen, èn spesroetoe wan brada, moro makriki kon hé na seks sé. Dwengi joesrefi ini ala pisi foe na libi. „No wani foe si ogri na ai”. „Abi wan tegoe gi den sani di de takroe.” — Ps. 97:10; Rom. 12:9.
19. Fa den sma di a trow foe den no de so boen moe loekoe a tori?
19 Sosrefi toe a kan de heri boen, dati son trowpatna no ben handri nanga koni di den ben soekoe makandra. Den kan si dati den no e fiti so boen na makandra soleki den ben wani so te, ofoe den froewakti no kon troe ini den moro krosbé matifasi foe na trowlibi. Ini na geval dati, dan wan sma moe meki na situwasi kon moro boen someni leki a kan, sodati wan sma e gi grani na a seti foe Jehovah èn meki a kon reti. Na bijbel e taki boen foe na sma „di ben sweri aladi a de doe ogri na ensrefi, èn tog a no de kenki dati” (Ps. 15:4). Foe taki en eenvoudig, a de so, dati wan sma e teki ini na trowlibi no wawan na „switi” ma so toe na „bita” pisi. Ini disi wi e prakseri wan owroeman di ala sma ben sabi èn di ben abi foeroe mati na mindri en brada nanga sisa. A ben trow bifo a ben de wan kotoigi, èn en oema di no ben de wan bribiman ben doe ala sani san a ben kan foe meki na libi moeilek gi en. Di den ben aksi en foe a tori disi, a ben piki: „A ben meki mi tron wan man”. Foe tan verdrage en, a ben moe leri foe hori pasensi, èn a ben moe dwengi ensrefi foeroe. Èn a ben abi na satisfaksi foe sabi dati a ben waka baka a rai foe na apostel Paulus. — 1 Kor. 7:12-16.
20. San de wantoe omstandigheden di kan meki wan sma go doe soetadoe èn meki dati baka dati a go brokotrow nanga en patna?
20 Ma a gersi wanwan tron dati wan brokotrow tapoe na gron foe soetadoe no ben abi foe kon so fara efoe na patna di no ben abi fowtoe ben sori moro firi, koni, lobi nanga froestan. Wan trowoema safri safri kan sori moro nanga moro pikinso belangstelling gi en masra na skinfasi, na froestan fasi, na a sé foe firi, prodo nanga jejefasi, sodati a de kon so fara foe go loekoe na wan tra sé foe feni satisfaksi na ini wan ofoe moro foe den kontren disi. Tegoe foe na sé foe en oema foe gi en a trowprekti, meki wan foeroeten-prékiman go so fara, dati a go na en sisa foe kisi satisfaksi. A no de foe taki, wansi fa wan oema tan na baka foe doe den sani disi, wi no kan taki boen kwet-kweti foe soetadoe foe na sé foe wan trowman.
21. (a) Foe san-ede a de wan fowtoe sani te wan sma broko a trow nanga en patna a wan feradelek fasi? (b) Ma san wi kan taki foe Jehovah Kotoigi ini algemeen tapoe a tori foe feradelek broko foe a trow?
21 Na Gado foe lobi abi foe troe boen réde foe no kan si brokotrow na ai. Te wan sma brokotrow nanga en patna tapoe wan feradelek fasi, dan a de sondoe na Gado, na en trowpatna, na a kristen gemeente di a de wan pisi foe en èn na aparti sma di de na ini, foedi na fasi foe libi disi makriki kan meki dati son sma naki foetoe. Ma fa a de wan toemsi moi sani dati Jehovah Kotoigi ini algemeen no de sma di e gi densrefi abra makriki na brokotrow! Ala sma sabi den leki sma di e doe moeiti tranga foe fiti densrefi na Gado rai foe a trowlibi. Disi e meki den de kolokoe sma. Èn foeroetron tra sma e si na boen, kolokoe trowlibi foe den sodati disi e hari son sma kon na a waarheid.
[Prenki na tapoe bladzijde 215]
Brokotrow di no de tapoe na gron foe a bijbel, de wan sondoe na trawan
Jehovah
Patna
Aparti sma
Gemeente