IBRI wiki, na ini furu gemeente fu Yehovah Kotoigi wan publikitaki e hori fu wan Bijbel tori. Efu yu na wan owruman noso wan dinari ini a diniwroko, dan trawan kan si na yu taki yu na wan bun publiki takiman, wan man di e gi trawan leri? Efu dati de so, dan a kan taki yu e kisi a kari fu hori wan publikitaki. A Theokrasia Diniwroko-skoro yepi dusundusun brada fu kon bun nofo fu teki a grani disi. Te den e aksi yu fu hori wan publikitaki, dan pe yu musu bigin?

Luku a schema

Fosi yu go ondrosuku sani, dan leisi a schema fosi èn prakseri dipi teleki yu frustan san na a tori. Hori a nen fu a lezing bun na prakseri. San na a sani di yu musu leri den arkiman? San yu wani doro nanga a lezing?

Kon sabi san na den moro prenspari penti. Ondrosuku den moro prenspari penti dati. San ibriwan fu den abi fu du nanga a nen fu a lezing? Na ondro ibriwan fu den moro prenspari penti, yu kan feni wan lo tra sani. Tra penti kan de baka na ondro den sani disi di de na ondro den moro prenspari penti. Luku fa ibri pisi fu a schema e go doro nanga a pisi di ben kon na en fesi, fa a e tyari yu go na tapu wan tra pisi, èn fa a e yepi yu fu doro san yu wani doro nanga a lezing. Te yu e frustan a nen fu a lezing, san yu wani doro nanga a lezing, èn fa ibriwan fu den moro prenspari penti e yepi fu doro dati, dan yu de klariklari fu bigin wroko na a lezing fu yu.

Na ini a bigin a kan de wan yepi fu si yu lezing leki wan lezing di prati na ini fo noso feifi syatu lezing. Ibriwan fu den moro prenspari penti na wan fu den syatu lezing disi. Sreka den syatu lezing disi wan-fru-wan.

A schema na fu yepi yu sreka yusrefi. A no meki fu de a pisi papira di yu e gebroiki fu hori yu lezing. A schema de leki den soso bonyo fu wan libisma. Fu taki en so, dan yu sa abi fu gi den soso bonyo dati wan skin, èn yu sa musu gi en wan ati èn yu sa musu bro libi go na ini a lezing.

Fa fu gebroiki bijbeltekst

Yesus Krestes nanga den disipel fu en ben gebroiki den Buku fu Bijbel fu leri trawan (Luk. 4:16-21; 24:27; Tori. 17:2, 3). Yu kan du a srefi sani tu. A lezing fu yu musu komoto fu den Buku fu Bijbel. Na presi fu tyari kon na krin nomo san skrifi na ini a schema èn fu sori fa fu gebroiki dati, dan yu musu gebroiki yu koni fu si krin fa den sani di kari na ini a schema e horibaka gi den Buku fu Bijbel. Baka dati, yu musu gi leri fu Bijbel.

Te yu e sreka yu lezing, luku ibri tekst di kari na ini a schema. Luku san skrifi tu lontu a vers dati. Wan tu tekst kan sori yu nomo fa a situwâsi ben de. Yu no abi fu leisi ala tekst noso taki fu den te yu e hori yu lezing. Teki den tekst di moro bun gi den arkiman fu yu. Efu yu e poti ala yu prakseri na den tekst di skrifi tapu a schema, dan yu no sa abi fu gebroiki tra bijbeltekst boiti den wan fu a schema.

Fu hori wan bun lezing, no e anga fu omeni tekst yu e gebroiki, ma a e anga fu o bun yu e gi leri. Te yu e kari bijbeltekst, dan sori fu san ede yu e kari den tekst dati. Teki ten fu sori fa fu gebroiki den tekst dati. Baka te yu leisi wan tekst, dan no tapu yu Bijbel, ma tan hori en opo te yu e taki moro fara fu a tekst. Dati sa meki taki den arkiman sa du a srefi sani tu èn den no sa tapu den Bijbel tu. Fa yu kan meki den arkiman wani sabi moro èn fa yu kan yepi den feni moro winimarki fu Gado Wortu? (Neh. 8:8, 12) Yu kan du dati fu di yu e tyari sani kon na krin, e gebroiki eksempre, èn e sori fa fu gebroiki a tekst.

Tyari sani kon na krin. Te yu e sreka yusrefi fu tyari wan prenspari tekst kon na krin gi den arkiman, dan aksi yusrefi: ’San disi wani taki? Fu san ede mi e gebroiki a tekst disi na ini mi lezing? San den arkiman kan aksi densrefi fu a vers disi?’ A kan taki yu sa musu ondrosuku den tra wortu di skrifi lontu a vers dati, noso fa a situwâsi ben de di a vers dati ben skrifi, sortu presi den sma ben de di den wortu dati ben taki, sortu krakti den wortu dati ben abi tapu sma, san a skrifiman fu a tekst dati ben abi na prakseri. Dati wani taki dati yu sa musu go ondrosuku sani. Yu sa feni bun furu tori na ini den buku di „a getrow èn koni srafu” tyari kon na doro (Mat. 24:45-47). No pruberi fu fruteri ala sani di yu sabi fu a vers, ma fruteri fu san ede yu meki den arkiman leisi a vers dati, èn san a abi fu du nanga a takimakandra di yu e hori.

Eksempre. A marki fu san ede yu musu gebroiki eksempre na fu yepi yu arkiman frustan sani moro krin, noso fu yepi den memre wan penti noso wan gronprakseri di yu ben taki nanga den leki arkiman. Te yu e gi eksempre, dan dati e yepi trawan fu frustan den sani di yu taki. A e yepi den tu fu si san a sani di yu e taki, abi fu du nanga wan sani di den sabi kaba. Disi na san Yesus ben du di a ben hori en pôpi Bergitaki. Te Yesus ben gi leri dan a ben kari sani leki „fowru fu hemel”, „bromki na ini a sabana”, wan „smara doro”, wan „oso na tapu bigi ston”, èn so moro fara. Ala den sortu sani disi di Yesus ben kari, ben meki taki a leri fu en ben abi krakti, a leri ben krin fu frustan, èn sma no ben kan frigiti san Yesus ben leri den.​—Mat., kap. 5–7.

Fa fu gebroiki den tekst. Te yu e tyari wan tekst kon na krin èn te yu e gi wan eksempre, dan dati e meki sma kon sabi san yu e taki. Ma efu yu sori den fa den kan gebroiki den sani di den leri, dan dati sa meki sani waka bun nanga den. A tru taki na den arkiman sa musu du san a Bijbel boskopu e taki, ma yu kan yepi den si krin san de fanowdu fu du dati. Te yu de seiker taki den arkiman e frustan a vers fu di yu e taki nanga den, èn den e si san a abi fu du nanga a sani di yu e taki, dan teki yu ten fu sori den o furu bun a kan du gi a bribi fu wi èn a fasi fa wi e tyari wisrefi. Poti krakti tapu den winimarki di wan sma e kisi te a e puru fowtu prakseri, noso te a e tyari ensrefi na wan fasi di fiti a waarheid di yu e leri den.

Te yu e prakseri fa fu sori den arkiman fa den kan gebroiki den bijbeltekst, dan memre taki den arkiman fu yu abi difrenti background èn den kisi fu du nanga difrenti problema. A kan taki na mindri den arkiman yu sa feni sma di e kon na den konmakandra no so langa ete, noso yu sa feni yonguwan, owruwan, nanga den wan di e kisi fu du nanga difrenti problema. Pruberi fu meki a lezing fu yu abi sani di sma kan gebroiki èn sani di e sori fa a libi de trutru. No gi rai te yu sabi taki wan tu fu den arkiman fu yu sa denki taki na den yu e gi piri-ai.

San a takiman srefi e bosroiti

Wan tu sani fu yu lezing, na sani di yu no kan kenki. Den moro prenspari penti skrifi krin tapu a schema, èn a ten di yu kan gebroiki fu taki fu den, skrifi krin tapu a schema tu. Den sani dati yu no kan kenki. Tra bosroiti, na bosroiti di yusrefi kan teki. Yu kan teki a bosroiti fu taki pikinso moro langa fu wan tu tra edepenti ondro den moro prenspari penti, noso kande fu no taki so langa fu den. No prakseri taki yu musu gi a srefi ten na ibriwan fu den edepenti disi. Efu yu e du dati, dan a kan, taki yu sa musu taki gawgaw, èn a kan meki taki den arkiman no sa man frustan so furu fu san yu e taki. Fa yu kan kon sabi sortuwan fu den edepenti yu sa musu taki moro langa fu den, noso sortuwan fu den yu kan kari syatu nomo? We, aksi yusrefi: ’Sortuwan fu den edepenti disi sa yepi mi taki moro krin fu a moro prenspari sani fu a lezing disi? Sortuwan fu den edepenti kan de wan bigi yepi gi den arkiman fu mi? A kan pasa taki te mi no kari wan spesrutu tekst, dan dati kan meki den buweisi di mi e tyari kon na fesi, kon moro swaki?’

Luku bun fu no taki sani di yu no abi buweisi gi dati, èn no taki sani di yusrefi e denki. Srefi Gado en eigi Manpikin, Yesus Krestes, no ben taki sani ’fu ensrefi’ (Yoh. 14:10). Yu musu frustan taki sma e kon na den konmakandra fu Yehovah Kotoigi fu di den wani yere san Bijbel e taki. Efu tra sma e kari yu wan takiman di e hori moi lezing, dan kande dati na fu di yu abi a gwenti fu no poti prakseri na yusrefi, ma na san Gado Wortu e taki. Efu na dati yu e du, dan sma sa warderi den lezing di yu e hori.​—Fil. 1:10, 11.

Te yu meki a schema di kari soso wan tu prenspari sani, kon tron wan lezing di e sori krin san Bijbel e taki, dan yu musu pruberi fu hori yu lezing now. A sa gi yu winimarki te yu e du dati nanga wan tranga sten. A prenspari sani na taki yu musu abi ala den penti bun na ini yu ede. Yu musu bribi trutru san yu e taki, yu musu man gi libi na a lezing, èn yu musu de nanga faya te yu e pristeri a waarheid. Fosi yu hori yu lezing, dan aksi yusrefi: ’San mi wani doro nanga a lezing?’ Aksi yusrefi tu: ’Den moro prenspari penti kon na krin? Mi taki trutru fu Bijbel na ini mi lezing? A de so taki ibriwan fu den moro prenspari penti e go moi abra tapu a trawan sondro aka-aka? A de so taki a lezing e meki sma e warderi Yehovah nanga den sani di a gi wi? A de so taki a bosroiti abi langalanga fu du nanga a nen fu a lezing? A bosroiti e sori den arkiman san fu du? A e gi den deki-ati fu du dati tu?’ Efu yu kan piki den aksi disi nanga iya, dan yu na wan sma di e ’du bun nanga sani di trawan musu kon sabi’, èn dati sa meki taki a gemeente kan kisi winimarki èn Yehovah kan kisi prèise tu!​—Odo 15:2.

SAN yu wani doro leki wan leriman? Efu yu tron wan preikiman fu a Kownukondre no so langa ete, dan sondro tweifri yu wani leri trutru fa fu hori wan oso-bijbelstudie, fu di Yesus ben taigi den bakaman fu en taki den ben musu meki disipel (Mat. 28:19, 20). Efu yu sabi hori wan oso-bijbelstudie kaba, dan kande yu wani sabi fa fu doro na ati fu den sma di yu wani yepi. Efu yu na wan papa noso wan mama, dan seiker yu wani de wan leriman di kan gi den pikin fu yu deki-ati so taki den kan gi den libi abra na Gado (3 Yoh. 4). Efu yu na wan owruman noso yu e pruberi fu kisi a grani dati, dan kande yu wani tron wan publiki takiman di kan yepi den arkiman fu kisi moro warderi gi Yehovah nanga den pasi fu en. Fa yu kan doro den marki disi?

Leri wan sani fu a Koni Leriman, Yesus Krestes (Luk. 6:40). Awansi Yesus ben taki nanga wan lo sma na tapu wan bergi, noso awansi a ben taki nanga wan tu sma nomo te den ben de na pasi e waka, toku den sma ben kan memre wan langa ten ete san a ben taki. Yesus ben wroko tapu a frustan fu den sma di ben arki en èn a ben doro na ati fu den. Na wan fasi di den ben man frustan bun, a ben sori den fa den ben kan gebroiki den sani di a ben leri den. Yu denki taki yu kan du den srefi sani disi tu?

Frutrow tapu Yehovah

Yesus ben kan gi leri heri bun fu di a ben de wan bun mati fu en hemel Tata, èn fu di a ben kisi blesi fu Gado en yeye. Yu e begi Yehovah fayafaya so taki yu man hori wan oso-bijbelstudie bun? Efu yu na wan papa noso wan mama, dan yu e begi doronomo fu Gado yepi yu gi leri na den pikin fu yu? Yu e begi nanga yu heri ati te yu e sreka yusrefi fu hori wan lezing noso fu abi wan prati na den konmakandra? Te yu e begi so, èn te yu e frutrow tapu Yehovah, dan dati sa yepi yu fu tron wan moro bun leriman.

Yu kan sori taki yu abi Yehovah fanowdu, fu di yu e frutrow tapu en Wortu, Bijbel. Di Yesus ben begi tapu a lasti neti di a ben de leki wan volmaakti libisma na grontapu, dan a ben taigi en Tata: „Mi gi den a wortu fu yu” (Yoh. 17:14). Aladi Yesus ben abi bun furu ondrofeni, toku noiti a ben taki sani soleki fa ensrefi ben e denki. Ala ten a ben taki san en Tata ben leri en, èn na so a gi wi wan eksempre di wisrefi kan teki tu (Yoh. 12:49, 50). Gado wortu, soleki fa dati de na ini Bijbel, abi krakti tapu libisma. Dati wani taki, Bijbel abi krakti tapu den sani di den e du, san den e prakseri, èn fa den e firi (Hebr. 4:12). Te yu e kon sabi Gado Wortu moro fini èn te yu e leri fa fu gebroiki dati bun na ini a diniwroko fu yu, dan yu sa tron wan bun leriman di e hari sma kon na Gado.​—2 Tim. 3:16, 17.

Gi Yehovah grani

Te yu de wan leriman neleki Krestes, dan dati no wani taki dati yu kan taki moi nomo. A tru taki den sma ben fruwondru fu den „moi wortu” di Yesus ben taki (Luk. 4:22). Ma fu san ede Yesus ben taki so moi? Dati ben de fu di a ben wani gi Yehovah grani, no fu di a ben wani poti prakseri na ensrefi (Yoh. 7:16-18). A ben gi den bakaman fu en a deki-ati: „Meki ala sma si a leti fu unu, dan den kan si den bun di unu e du èn den kan gi un Tata di de na hemel glori” (Mat. 5:16). Wi musu gebroiki a rai dati te wisrefi e gi leri. Wi musu meki muiti fu no du nowan sani di kan meki taki wi no e gi grani na Gado. Sobun, te wi e prakseri san wi o taki noso fa wi o taki wan sani, dan a ben sa bun fu aksi wisrefi: ’A sani disi sa meki sma kisi moro warderi gi Yehovah? Noso a sa meki taki sma sa luku mi nomo fu di mi e taki so moi?’

Fu eksempre, te wan leriman e gebroiki agersitori noso tru ondrofenitori, dan dati kan yepi en fu gi bun leri. Ma te a e fruteri wan kefalek langa agersitori, noso a e fruteri wan ondrofenitori nanga ala sortu inibere tori na ini, dan a kan taki trawan no sa si moro san na a tori di a wani leri den. Na so a de tu te wi e fruteri tori nomo fu meki trawan firi switi. Dati a no a sani di wi wani du nanga wi diniwroko. Fu di efu wi du dati, dan wi leki leriman ben sa poti prakseri na wisrefi nomo, na presi fu gi leri di komoto fu Gado.

„Meki sma si a difrenti”

Efu wan sma musu tron wan disipel trutru, dan a musu frustan krinkrin san a e leri. A sma dati musu yere a waarheid èn a musu si krin fa dati e difrenti fu tra bribi. Efu wi man sori fa a wan sani de tra fasi leki a trawan, dan dati sa yepi wi fu man sori sma a difrenti.

Ibri tron baka, Yehovah ben gi en pipel deki-ati fu den ’si a difrenti’ na mindri san krin èn san no krin (Lef. 10:9-11). Yehovah ben taki dati den wan di sa dini na ini a bigi yeye tempel fu en, ben sa leri trawan „a difrenti na mindri wan santa sani nanga wan sani di no santa” (Esek. 44:23). A buku Odo e sori furu tron fa regtfardikifasi de tra fasi leki ogridu, èn fa koni de tra fasi leki donfasi. Ma srefi sani di gersi a srefi sani, kan difrenti fu makandra. Na apostel Paulus ben sori fa wan regtfardiki man de tra fasi leki wan bun man, soleki fa dati skrifi na ini Romesma 5:7. Na ini a Bijbel buku Hebrewsma, dan Paulus sori fa Krestes en wroko leki granpriester, bigi moro leki a di fu Aron. Fu tru, a de soifri leki fa wan leriman fu a di fu 17 yarihondro ben taki. A leriman disi, John Amos Comenius, ben skrifi: „Te wan sma e gi leri, dan a wan-enkri sani di a sa musu man du, na taki a musu man sori fa a wan sani e difrenti fu a trawan . . . Fu dati ede, a sma di man sori bun fa sani e difrenti fu makandra, na wan sma di e gi bun leri.”

Teki leki eksempre, te yu ben o leri wan sma fu Gado en Kownukondre. Efu a sma no e frustan san na a Kownukondre, dan yu kan sori san Bijbel e taki fu a Kownukondre. Sori en fa dati de tra fasi leki san tra sma e taki fu a Kownukondre; den e taki dati a de a fasi fa wan sma ati tan. Noso yu kan sori a sma fa a Kownukondre e difrenti fu libisma tirimakti. Ma efu sma sabi den sani disi kaba, dan toku yu kan taki moro fini fu a Kownukondre. Yu kan sori den fa a Kownukondre fu a Mesias de tra fasi leki a de di Yehovah de Kownu fu hemel nanga grontapu, soleki fa dati kari na ini Psalm 103:19. Noso yu kan sori fa a Kownukondre fu a Mesias de tra fasi leki ’a kownukondre fu a lobi Manpikin fu Gado’ soleki fa dati skrifi na Kolosesma 1:13, noso fa a de tra fasi fu a ’sistema di seti’ soleki fa dati skrifi na Efeisesma 1:10. Te yu e sori fa a wan sani e difrenti fu a trawan, dan dati kan yepi yu fu meki yu arkiman frustan krin san na a prenspari sani disi di Bijbel e leri wi.

Ibri tron baka Yesus ben gebroiki a fasi disi fu gi leri. A ben sori fa a fasi fa furu sma ben frustan a Wet fu Moses, ben de tra fasi leki san a Wet ben wani taki trutru (Mat. 5:21-48). Yesus ben sori tu fa trutru lespeki gi Gado ben de tra fasi leki den hoigri sani di den Fariseiman ben du (Mat. 6:1-18). A ben sori fa sma di e ’basi’ trawan, de heri tra fasi leki den bakaman fu en di ben musu gi densrefi fu dini trawan (Mat. 20:25-28). Na wan tra okasi, soleki fa dati skrifi na ini Mateyus 21:28-32, dan Yesus ben gi den arkiman fu en a kari fu densrefi si a difrenti na mindri wan sma di feni taki a e du reti, nanga wan sma di trutru abi berow. Dati e tyari wi go na wan tra moi fasi fa wan bun leriman e gi leri.

Gi den arkiman a deki-ati fu denki

Na Mateyus 21:28 wi e leisi taki Yesus ben bigin en agersitori nanga na aksi: „San unu e denki?” Wan bun leriman no e fruteri tru tori nomo, noso a no e gi piki nomo tapu aksi. Nôno, na presi fu dati a e gi den arkiman a deki-ati fu densrefi denki bun fu den sani di a e taki (Odo 3:21; Rom. 12:1). Wan fasi fu meki den arkiman denki, na fu poti aksi gi den. Soleki fa skrifi na ini Mateyus 17:25, dan Yesus ben aksi: „San yu denki, Simon? Fu suma den kownu fu grontapu e kisi edemoni noso lantimoni? Fu den manpikin fu den, noso fu den freimde sma?” Na aksi di Yesus ben poti, meki taki Petrus denki a tori èn a kon teki a yoisti bosroiti ini a tori disi fu pai tempel moni. Na wan srefi sortu sani Yesus du tu di wan man ben aksi en: „Suma na den tra sma di mi musu lobi leki misrefi?” Yesus ben sori fa a sani di wan priester nanga wan Leifisma ben du, ben de heri tra fasi leki san wan Samariaman du. Baka di Yesus fruteri disi, dan a aksi a man: „Suma fu den dri sma disi yu denki, ben lobi a man di fufuruman ben ròs, leki densrefi?” (Luk. 10:29-36) Dyaso baka, na presi fu Yesus taigi en arkiman san a musu denki, dan a ben gi na arkiman a kari fu ensrefi denki fu a tori fu gi piki tapu na aksi di ensrefi ben poti.​—Luk. 7:41-43.

Pruberi fu doro na ati fu sma

Leriman di e frustan san Gado Wortu wani taki, sabi taki tru anbegi a no soso fu memre wan tu spesrutu tru tori èn hori yusrefi na spesrutu wet. Tru anbegi e kon te wan sma abi Yehovah leki wan bun mati èn te a e warderi den fasi fa Yehovah e du sani. Fu anbegi na so wan fasi, dan na ati musu de ini a tori (Deut. 10:12, 13; Luk. 10:25-27). Te a wortu „ati” skrifi na ini Bijbel, dan furu tron a e sori go na a fasi fa wan sma de na inisei, èn disi abi fu du sosrefi nanga den sani di a wani, den sani di a lobi, fa a e firi, èn sani di e pusu en fu du sani.

Yesus ben sabi taki libisma e luku tra libisma fa den tan na dorosei, ma Gado e si san de na ini na ati fu wan sma (1 Sam. 16:7). Na lobi musu pusu wi fu dini Gado, èn a no musu de so taki wi wani prei kefalek gi tra libisma fu sori den taki wi e dini Gado (Mat. 6:5-8). Na a tra sei, den Fariseiman ben du furu sani fu sori trawan fa den bun. Den ben poti furu krakti tapu a hori di wan sma ben musu hori ensrefi na pikinpikin sani fu a Wet fu Moses, èn sosrefi na den wet di densrefi ben meki. Den ben e taki dati den ben anbegi a tru Gado, ma na ini den eigi libi den no ben sori fa wan sma musu de di e anbegi Gado trutru (Mat. 9:13; Luk. 11:42). Yesus ben leri sma taki a de prenspari fu gi yesi na den wet fu Gado. Ma aladi dati de so, toku a gi di wan sma e gi yesi warti gi Gado, soso efu a e komoto fu wan sma ati (Mat. 15:7-9; Mark. 7:20-23; Yoh. 3:36). Wi sa man gi moro bun leri te wi e teki na eksempre fu Yesus. A de prenspari taki wi e yepi sma fu leri den san Gado e aksi fu den. Ma a de prenspari tu fu den sabi Yehovah èn fu den lobi en, so taki a fasi fa den e tyari densrefi sa sori o bun den e feni en fu de wan bun mati fu a tru Gado.

A no de fu taki dati, efu sma wani nyan bun fu den sortu leri disi, dan densrefi musu ondrosuku den eigi ati. Yesus ben gi sma deki-ati fu ondrosuku fu san ede den e du sani èn fu ondrosuku a denki fu den. Te a ben sori den arkiman taki den no e denki bun, dan a ben aksi den fu san ede den e prakseri so, fu san ede den e taki so, noso fu san ede den e du so. Ma fu no libi den nomo nanga na aksi di a ben poti, dan Yesus ben o taki ete wan sani, noso a ben o fruteri den wan agersitori, noso a ben o du wan sani di ben o yepi den fu si sani na wan yoisti fasi (Mark. 2:8; 4:40; 8:17; Luk. 6:41, 46). Na a srefi fasi wi kan yepi den arkiman fu wi, fu di wi kan gi den a rai fu aksi densrefi sani soleki: ’Fu san ede mi lobi fu du sani na a fasi disi? Di a san disi miti mi, dan san mi du èn fu san ede meki mi du so?’ Baka te yu du dati, dan gi den deki-ati fu si sani soleki fa Yehovah e si sani.

Sori sma fa fu gebroiki den sani di den leri

Wan bun leriman sabi taki „koni na a moro prenspari sani” (Odo 4:7). Te wan sma koni, dan a man du san a sabi so taki sani waka bun nanga en. Dan a sa sabi fa fu lusu problema, wai pasi gi ogri, doro den marki di a poti, èn yepi tra sma. Dati na san wan leriman musu leri en studenti, ma a no musu teki bosroiti gi en. Te yu e taki fu difrenti sortu Bijbel gronprakseri, dan yepi a studenti fu denki bun fu san ede wan sani de so. Kande yu wani taki fu wan sani di e pasa ala dei. Baka dati yu e aksi a studenti fa a Bijbel gronprakseri di unu leri dyonsrode, kan yepi en efu ensrefi ben kisi fu du nanga a sani dati.​—Hebr. 5:14.

Den sani di na apostel Petrus ben taki tapu a Pinksterfesa fu 33 G.T., na wan eksempre fu fa a ben taki sani di trawan kan gebroiki èn di ben abi krakti tapu a libi fu den (Tori. 2:14-36). Baka di Petrus ben taki fu dri bijbeltekst di den sma drape ben sabi èn ben bribi, dan a ben gebroiki den tekst disi fu sori den san den tekst abi fu du nanga den sani di ben pasa no so langa ete èn di den alamala ben si. Dati meki, di den ipi sma yere san Petrus ben taki, dan den ben firi taki den ben musu du wan sani. Te yu e gi leri, dan den arkiman fu yu wani du tu san den yere? Yu e go moro fara leki fu fruteri tru sani nomo? Yu e yepi sma frustan fu san ede wan sani de so? Yu e gi den deki-ati fu go prakseri fa den sani di den e leri, musu abi krakti na ini den eigi libi? A kan taki den no e bari aksi yu: „San wi musu du?” soleki fa den ipi-ipi sma ben bari aksi tapu a Pinksterfesa. Ma efu yu sori den fa den kan gebroiki den bijbeltekst bun, dan den arkiman fu yu sa wani go sidon prakseri san na a moro bun sani di densrefi kan du.​—Tori. 2:37.

Te unu leki papa nanga mama e leisi Bijbel nanga den pikin fu unu, dan unu abi wan moi okasi fu leri den pikin prakseri fa den kan gebroiki Bijbel gronprakseri (Ef. 6:4). Fu eksempre, kande yu wani teki wan tu tekst fu a leisipisi fu Bijbel fu a wiki èn taki nanga den pikin fu san den tekst wani taki. Baka dati, aksi den sani soleki: ’Fa disi kan yepi wi fu sori wi san wi musu du? Fa wi kan gebroiki den vers disi na ini a diniwroko? San den tekst e sori fu Yehovah èn a fasi fa en e du sani? Fa dati e meki wi kisi moro warderi gi en?’ Gi na osofamiri fu yu deki-ati fu taki fu den sani disi na a takimakandra fu den edepenti fu Bijbel tapu a Theokrasia Diniwroko-skoro. Den vers fu san den e taki, na den vers di den sa memre tu.

Gi wan bun eksempre

Yu no e gi leri wawan nanga san yu e taki, ma sosrefi nanga san yu e du. Den sani di yu e du, na wan bun eksempre gi trawan fu sori den fa fu gebroiki den sani di yu fruteri den. Na so pikin-nengre e leri. Te den e du neleki den papa nanga den mama, dan den e sori nanga dati taki den wani de neleki den papa nanga mama. Den wani sabi fa a de fu du den srefi sani di a papa nanga a mama fu den e du. Na so a de tu nanga den wan di yu e gi leri. Te den ’e tron sma di e waka baka na eksempre fu yu, neleki fa yu e waka baka na eksempre fu Krestes’, dan den e bigin kisi blesi di e kon fu di den e waka den pasi fu Yehovah (1 Kor. 11:1). Dan densrefi e bigin si fa Gado e yepi sma.

Den sani disi musu memre wi o seryusu a de fu gi wan bun eksempre. Efu ’wi tyari wisrefi na wan santa fasi èn efu wi e dini Gado fayafaya’, dan dati sa yepi furu fu sori den wan di wi e gi leri, fa den musu gebroiki Bijbel gronprakseri (2 Petr. 3:11). Efu yu e gi wan bijbelstudenti deki-ati fu leisi Bijbel doronomo, dan yusrefi musu de fayafaya fu leisi Bijbel. Efu yu wani taki den pikin fu yu musu hori densrefi na Bijbel gronprakseri, dan sorgu taki den e si taki yusrefi e du soifri san Gado wani. Efu yu e leri a gemeente taki den musu de fayafaya na ini a diniwroko, dan sorgu taki yusrefi e du ala san yu man fu abi wan prati na a wroko dati. Te yu e du den sani di yusrefi e leri trawan, dan yu kan yepi den moro bun fu du den sani dati tu.​—Rom. 2:21-23.

Te yu wani tron wan moro bun leriman, dan aksi yusrefi: ’Te mi e gi leri, dan mi e du dati na so wan fasi taki den arkiman fu mi kan kenki a fasi fa den e tyari densrefi, noso a fasi fa den e taki, noso den sani di den e du? Fu taki sani moro krin, dan mi e sori fa a wan denki noso wan fasi fu du sani, de heri tra fasi leki a trawan? San mi e du fu meki mi studenti, mi pikin, noso den sma di e arki mi tapu wan konmakandra, memre den sani di mi e taki? Mi e sori den arkiman fu mi krinkrin fa fu gebroiki den sani di den e leri? Den kan si dati nanga na eksempre di mi e gi? Den e frustan taki a fasi fa den sa du tapu den sani di den yere, sa abi krakti tapu a matifasi fu den nanga Yehovah?’ (Odo 9:10) Go doro fu poti prakseri na den sani disi te yu e suku fu tron wan bun leriman. „Poti prakseri doronomo na yusrefi èn na den sani di yu e leri sma. Hori den sani disi, bika efu yu e du disi, dan yu sa frulusu yusrefi nanga den wan di e arki yu.”​—1 Tim. 4:16.