Na ini den mun baka dati, Hitoshi lasi-ati fu di a ben frede taki a no ben o feni wan tra wroko. Wan leisi di a go suku wan wroko, a taigi den sma na fesi taki a no ben o du kruka sani gi den. A sma di ben taki nanga en piki en: „Yu wawan e denki so!” Hitoshi en famiri nanga en mati gi en deki-ati fu no meki sma kenki en denki. Ma toku a bigin tweifri pikinso. A taki: „Mi ben e aksi misrefi efu a ben bun fu taigi den sma krin taki mi no o du kruka sani.”

A no de fu taki dati a sani di Hitoshi ondrofeni na wan sari tori di e sori taki a no ala sma e si en leki wan prenspari sani fu de eerlijk. Fu taki en leti, son sma feni taki a de fanowdu son leisi fu lei, spesrutu te yu e du bisnis. Wan uma na ini Zuid-Afrika taki: „Mi e wroko nanga sma di no de eerlijk èn son leisi a no makriki fu du sani nanga wan krin ati.”

Wan sani di furu sma na ini a ten disi e du, na lei. Wan tu yari pasa, Robert S. Feldman, wan sabiman na a Universiteit fu Massachusetts Amherst, du wan ondrosuku. A kon si taki 60 procent fu den bigisma e lei wán noso moro leisi te den e taki sowan tin miniti. Feldman taki: „Wi skreki srefisrefi. Wi no ben fruwakti taki so furu sma e lei ala dei.” Aladi furu sma gwenti lei, toku den no lobi te trawan e lei gi den.

Fu san ede so furu sma e lei, e furufuru, èn e du tra kruka sani na ini a ten disi? San e pasa nanga a libimakandra te so furu sma e du den sortu sani disi? Wan moro prenspari aksi na disi: Fa wi kan sorgu taki wi no e du den sortu sani disi?

Yu e agri nanga den wortu dati? Neleki Samantha, wi alamala ben de na ini wan muilek situwâsi wan leisi. Efu wi de na ini wan situwâsi pe wi e kisi a firi fu du wan sani di no eerlijk, dan a sani di wi o du kan sori sortu sma wi de trutru. Fu eksempre, son sma no abi bisi fu lei te den meki wan fowtu, soso fu di den no wani kisi syen. Ma te sma kon sabi taki na lei den lei, dan dati kan tyari takru bakapisi kon. Meki wi luku wan tu sani di kan pasa te sma no de eerlijk.

SMA NO O FRUTROW WI MORO

Mati e frutrow makandra. Te wan sma e frutrow wan trawan, dan a no e frede taki a trawan o du wan hati sani nanga en. Ma sma no e frutrow makandra wantewante, a e teki ten. Sma e leri fu frutrow makandra te den e du sani makandra, te den e taki krin nanga makandra, èn te den e yepi makandra sondro fu suku den eigi bun. Ma wán lei nomo kan meki taki wan sma no e frutrow wan trawan moro. Te dati pasa, dan a kan muilek srefisrefi fu frutrow a trawan baka.

Oiti wan sma di yu ben si leki wan bun mati kori yu? Efu dati pasa, dan fa yu ben e firi? A no de fu taki dati a sani dati hati yu. Wi kan frustan dati. Te sma no de eerlijk nanga makandra, dan nofo tron dati e pori a matifasi fu den.

WI SREFI KAN TRON SMA DI NO DE EERLIJK

Di Professor Robert Innes fu na Universiteit fu Kalifornia du wan ondrosuku, a kon si taki „sma di no de eerlijk kan meki taki trawan kon abi a fasi dati tu”. Sobun, a fasi disi de leki wan siki di kan panya makriki. Te yu e bumui nanga wan sma di lobi kori trawan, dan te fu kaba yu srefi kan kisi a fasi dati tu.

San yu kan du fu no tron wan sma di no de eerlijk? Bijbel kan yepi yu. Meki wi luku wan tu rai fu Bijbel di kan yepi wi.

Na ini Bijbel, a Griki wortu di vertaal nanga „krin ati” wani taki „eerlijk”. A wortu disi abi fu du nanga wan sani di bun dorodoro.

Gado ben meki na apostel Paulus skrifi: „Wi wani du ala sani nanga wan krin ati.” Kresten e si a rai disi leki wan seryusu sani. San a tekst disi wani taki?

WI MUSU FETI NANGA DEN SONDU FIRI FU WI

Furu sma e luku densrefi na ini wan spikri ibri mamanten fosi den e go na strati. Fu san ede? Fu di den wani de moi. Ma wan moro prenspari sani de leki moi wiwiri nanga moi krosi. Dati na a sma di wi de na inisei. Na dati e meki taki wan sma moi trutru.

Gado Wortu e sori krin taki nofo tron wi e prakseri fu du san ogri. „Sensi en yongu yari na soso ogri prakseri de na ini libisma ati”, na so Genesis 8:21 e taki. Sobun, wi musu feti nanga den sondu firi fu wi efu wi wani de eerlijk. Na apostel Paulus ben taki krin fa en srefi ben e feti nanga den sondu firi fu en. A taki: „Na ini mi ati mi e prisiri trutru nanga a wèt fu Gado, ma mi e si taki wan tra wèt de na ini mi skin, èn a e feti nanga a wèt fu mi frustan. A wèt dati na a sondu di de na ini mi skin, èn a e basi mi.”​—Romesma 7:22, 23.

Fu eksempre, son leisi wi ati e taigi wi fu du wan sani di no bun noso wi e kisi a firi fu du wan sani di no eerlijk. Ma wi no abi fu du nomonomo san wi ati e taigi wi. Wi srefi kan bosroiti san wi o du. Te wi e kisi wan ogri prakseri, dan wi kan bosroiti fu no du san wi e prakseri. Na so wi o tan eerlijk, awansi tra sma na wi lontu no de so.

WI KAN WINI A STREI

Fu man de eerlijk, wi musu de sma di wani tyari densrefi na wan bun fasi ala ten. Ma a sari fu taki dati furu sma e gebroiki moro ten fu luku san den o weri, na presi fu luku fa den e tyari densrefi. Fu dati ede, na te den de na ini son situwâsi, dan fosi den o luku efu den o de eerlijk. Wan buku di e taki fu a tori disi e taki en so: „Wi no abi bisi fu lei solanga wi no e kisi a firi taki wi na leiman” (The (Honest) Truth About Dishonesty). Ma wan sani de di kan yepi wi fu sabi efu a prenspari trutru fu de eerlijk? Iya, wan sani de.

Milyunmilyun sma na heri grontapu feni yepi na ini Bijbel. Bijbel e sori san na a moro bun fasi fa wan sma musu tyari ensrefi (Psalm 19:7). A e gi wi bun rai di abi fu du nanga na osofamiri-libi, nanga wroko, èn nanga a fasi fa wi musu anbegi Gado. Te now ete wi kan gebroiki den rai disi. Den wet nanga den leri na ini Bijbel bun gi ala kondre, ala ras, ala lo, nanga ala pipel. Te wi e studeri Bijbel, te wi e teki ten fu prakseri fu san wi leisi, èn te wi e du san Bijbel e taki, dan wi kan leri fu de eerlijk èn fu du sani nanga wan krin ati.

Ma sabi fu Bijbel a no a wan-enkri sani di o yepi wi fu de eerlijk. Wi e libi na ini wan grontapu pe sma no tyari densrefi bun srefisrefi èn den e dwengi wi fu de leki den. Dati meki wi musu begi Gado tu fu yepi wi (Filipisma 4:6, 7, 13). Te wi e du dati, dan wi o kisi deki-ati fu tan du san bun èn fu du ala sani nanga wan krin ati.

DEN WINI DI WI O KISI TE WI DE EERLIJK

Hitoshi, di wi ben kari na ini a fosi artikel, abi wan bun nen fu di a de wan eerlijk wrokoman. Now a e wroko gi wan basi di breiti taki a abi a fasi disi. Hitoshi e taki: „Mi breiti taki mi ben man feni wan wroko di mi man du nanga wan krin konsensi.”

Tra sma ondrofeni a srefi sani dati. Meki wi luku sortu wini den kisi fu a rai di Bijbel gi fu „du ala sani nanga wan krin ati”.

• Den abi wan krin konsensi

  

  „Di mi ben abi 13 yari, mi gowe libi skoro fu go wroko nanga fufuruman. Dati meki 95 procent fu a moni di mi ben meki ben de fufuru moni. Bakaten di mi trow, mi nanga mi masra bigin studeri Bijbel nanga Yehovah Kotoigi. Wi leri taki Yehovaha Gado no lobi kruktudu kwetikweti. Sobun, wi bosroiti fu kenki wi libi. Na ini 1990 wi gi wi libi abra na Yehovah èn wi teki dopu leki Yehovah Kotoigi.​—Odo 6:16-19.

  „Fosi, mi oso ben lai nanga fufuru sani, ma mi no abi nowan fu den sani dati moro na ini mi oso. Now mi abi wan krin konsensi. Te mi e prakseri den yari di mi ben e du wan lo kruktudu, dan mi de nanga tangi taki Yehovah sori so furu sari-ati gi mi. Mi e sribi switi na neti fu di mi sabi taki Yehovah feni mi bun.”​—Cheryl, Ierland.

  

  „Wan leisi, mi weigri fu teki tyuku fu wan sma di ben wani du bisnis nanga a bedrijf.” Di a basi fu mi kon sabi dati, a taigi mi: ’A Gado fu yu meki taki yu na wan eerlijk sma! Mi breiti taki yu e wroko gi wi.’ Fu di mi de eerlijk ala ten, meki mi abi wan krin konsensi na fesi Yehovah Gado. Boiti dati, mi man yepi mi famiri nanga trawan fu du a srefi.”​—Sonny, Hong Kong.

• Den abi wan korostu firi

  

  „Mi ben e wroko na wan bigi bangi di e du bisnis na ini furu kondre. Na ini a bisnis disi, furu sma feni en moro prenspari fu kon gudu leki fu de eerlijk. Nofo tron den abi a denki disi: ’A no fowtu fu du wan pikin kruka sani efu a e meki yu kon gudu èn efu a e meki na ekonomia drai moro bun.’ Ma fu di mi de eerlijk, meki mi abi wan korostu firi. Mi o tan eerlijk awansi san o pasa. Den basi fu mi sabi taki mi no o bedrigi den èn mi no o du kruka sani gi den.”​—Tom, Amerkankondre.

• Den abi lespeki gi densrefi

  

  „Sma ben fufuru wan tu sani na wrokope, ma a voorman ben wani taki mi ben musu lei taki mi no sabi noti fu a tori. Ma mi weigri fu du dati. Di sma kon sabi suma na den fufuruman, dan mi basi taigi mi tangi taki mi ben de eerlijk. Wi musu abi deki-ati fu de eerlijk na ini a kruka grontapu disi. Ma te wi de eerlijk, dan sma o frutrow wi èn den o lespeki wi.”​—Kaori, Yapan.

Soleki fa wi si, dan wi o abi wan krin konsensi, wi o firi moro bun, èn wi o abi lespeki gi wisrefi te wi de eerlijk. Yu no feni taki a bun fu abi a fasi disi?