Bebe ben lobi en papa trutru. Wan mati fu a famiri taigi en a sani disi fu di a ben wani trowstu en. Ma a sani di a taki hati Bebe srefisrefi. Ala yuru a ben e taigi ensrefi: „A dede fu en no tyari nowan bun.” Di Bebe fruteri a sani disi na ini wan buku furu yari baka dati, a ben de krin taki a ben e sari ete fu a dede fu en papa.

Soleki fa Bebe srefi ondrofeni, dede kan meki wan sma sari wan heri pisi ten, spesrutu efu a dede sma ben de wan lobiwan fu en. Wi kan frustan fu san ede Bijbel e taki dati dede na „a lasti feanti” (1 Korentesma 15:26). Wi no man tapu dede. Te a kon, a e bruya wi heri libi. Nofo tron a e kon sondro taki wi fruwakti en èn a e puru den lobiwan fu wi na wi sei. Nowan fu wi man wai pasi gi dede nanga den bakapisi fu en. Sobun, wi kan frustan taki a kan hebi srefisrefi gi wan sma te wan lobiwan fu en dede.

Kande yu aksi yusrefi: ’O langa a e teki fosi wan sma kaba sari? San wan sma kan du te a e sari? Fa mi kan trowstu sma te wan lobiwan fu den dede? Howpu de gi den lobiwan fu wi di dede?’

Yu ben siki wan leisi? Kande yu kon betre so esi, taki yu no man memre srefi taki yu ben siki. Ma a sari di wan sma e firi te wan lobiwan fu en dede no de wan sani di e gowe esi-esi. Datra Alan Wolfelt ben skrifi na ini wan buku fu en: „Noiti wan sma e kaba sari.” A taki tu: „Ma baka wan pisi ten yu no o sari so furu moro. Boiti dati, den mati fu yu kan de wan bigi yepi gi yu.”​—Healing a Spouse’s Grieving Heart.

Luku fu eksempre san a famiri-edeman Abraham du di en frow dede. Bijbel e taki dati „Abraham bigin row èn krei fu Sara ede”. A wortu „bigin” e sori taki a ben sari fu wan heri pisi ten.a Wan tra eksempre na a di fu Yakob. Sma ben lei gi en taki wan ogri meti kiri en manpikin Yosef. „Wan heri pisi ten” a ben e sari èn nowan sma na ini en osofamiri ben man trowstu en. Baka wan tu yari a ben e sari ete taki Yosef dede.​—Genesis 23:2; 37:34, 35; 42:36; 45:28.

Na so a de tu nanga furu sma na ini a ten disi di lasi wan lobiwan. Meki wi luku wan tu eksempre.

• „Mi masra Robert dede tapu 9 yuli 2008. A mamanten di a dede ben de leki iniwan tra mamanten. Baka di wi nyan makandra soleki fa wi ben gwenti du, wi bosi èn wi brasa makandra, dan wi taigi makandra: ’Mi lobi yu.’ Siksi yari pasa, ma te now ete mi e sari. Mi no denki taki wan dei mi o kaba sari taki mi lasi Rob.”​—Gail di abi 60 yari.

• „Mi lobi wefi dede moro leki 18 yari kaba, ma toku mi e misi en ete èn mi e sari. Ibri leisi te mi si wan moi sani na dorosei, mi e prakseri en. Mi e prakseri fa a ben o lobi fu si den sani di mi e si.”​—Etienne di abi 84 yari.

A de krin taki iniwan sma e firi sari te wan lobiwan fu en dede èn a de wan firi di e tan fu wan heri pisi ten. Ibri sma e sari na en fasi. Dati meki a no bun fu krutu den sani di wan sma e du te a e sari fu di wan sma fu en dede. Te wi lasi wan lobiwan, dan wi no musu krutu wisrefi tu taki wi e sari tumusi. San wi kan du te wi e sari fu di wan lobiwan fu wi lasi libi?

Sma e gi ala sortu rai san fu du. Ma a no ala sani e yepi. Kande son sma o taigi yu taki yu no musu krei noso taki yu no musu sori taki yu e sari. Trawan e denki heri tra fasi fu a tori disi. Kande den o taigi yu taki yu musu sori ala sma fa yu e firi. Bijbel abi wan moro bun fasi fu si a tori disi èn sabiman e agri nanga dati.

Na ini son kondre sma feni taki wan man no mag krei. Ma yu denki taki wan man musu syen te a e krei? Yu denki taki na wan syen te trawan e si taki a e krei? Datra di e ondrosuku fa libisma frustan e wroko taki dati a no fowtu fu krei te yu e sari. Te yu e krei, dan kande yu no o sari so furu moro bakaten èn yu o man go doro nanga yu libi awansi a e hati yu ete taki wan sma fu yu dede. Ma te yu no wani krei, dan dati kan abi takru bakapisi. Bijbel no e horibaka gi a denki taki wan sma no mag krei te a e sari èn a no e taki dati mansma no mag krei. Prakseri na eksempre fu Yesus. A ben abi a makti fu gi dedesma libi baka, ma toku a krei na fesi ala sma di en mati Lasarus dede!​—Yohanes 11:33-35.

Te sma e sari, dan ten na ten den ati kan bron wantronso. Nofo tron disi e pasa te wan lobiwan fu den dede sondro taki den fruwakti dati. Furu sani kan meki taki so wan sma ati bron. Kande wan sma di den e lespeki e taki sani sondro fu denki noso kande den e taki sani di no tru. Mike fu Zuid-Afrika taki: „Mi ben abi 14 yari nomo di mi papa dede. Na a beri, a fesiman fu na Anglikan Kerki taki dati Gado e teki son sma frukufruku fu di a abi bun sma fanowdu.a A sani disi meki mi ati bron srefisrefi fu di wi ben abi wi papa fanowdu trutru. Now, baka 63 yari, a sani disi e hati mi ete.”

Son leisi wan sma kan kisi konsensi fonfon te wan lobiwan fu en dede, spesrutu te a sma dede sondro taki a fruwakti dati. Kande a e prakseri ibri tron baka: ’Efu mi ben du disi noso dati, dan kande a no ben o dede.’ A kan tu taki a sma ben meki trobi nanga a trawan fosi a dede. A sani disi kan meki a kisi moro konsensi fonfon. San yu kan du te yu konsensi e fon yu?

Efu yu konsensi e fon yu noso efu yu ati e bron, dan a prenspari fu fruteri wan sma fa yu e firi. Taki nanga wan mati di o wani arki yu èn di o sori yu taki furu sma di e sari e firi so. Memre san Bijbel e taki: „Wan trutru mati e sori lobi ala ten. En na wan brada di gebore fu te nowtu de.”​—Odo 17:17.

A moro bun Mati di wan sma kan abi na wi Mekiman, Yehovah Gado. Fruteri en san de na tapu yu ati, bika „a e broko en ede nanga unu” (1 Petrus 5:7). Boiti dati, a e pramisi ala sma di e du dati taki a o meki den firi korostu, fu di a o gi den „a freide fu Gado di bigi moro iniwan sani di libisma man frustan” (Filipisma 4:6, 7). Meki Gado trowstu yu nanga en Wortu, Bijbel. Skrifi na tapu papira wan tu Bijbeltekst di e gi yu trowstu. (Luku a faki na ini na artikel disi.) Yu kan pruberi fu hori wan tu fu den na ede srefi. A bun fu prakseri fu den tekst disi, spesrutu te neti te yu de yu wawan èn te yu no man sribi.​—Yesaya 57:15.

No so langa pasa wan man fu 40 yari di wi sa kari Jack, lasi en lobi wefi di ben abi kanker. Jack taki dati son leisi a hebi gi en fu di a e misi en wefi srefisrefi. Ma begi yepi en. A e taki: „Te mi e begi Yehovah, dan noiti mi e firi leki mi de mi wawan. Furu tron mi e wiki te neti èn mi no man sribi moro. Baka te mi leisi wan tu tekst di e trowstu mi èn mi e prakseri fu den, dan mi e fruteri Yehovah ala san de na tapu mi ati. Safrisafri mi e bigin firi korostu, mi no e broko mi ede tumusi èn mi e firi moro bun. Disi e meki taki mi man sribi baka.”

A mama fu wan yongu uma Vanessa, dede fu di a ben siki. En srefi ondrofeni fa begi e yepi en. A e taki: „Te a ben muilek srefisrefi gi mi, mi ben e kari Gado nen, dan mi ben e krei. Yehovah arki den begi fu mi èn ala ten a gi mi a krakti di mi ben abi fanowdu.”

Son datra di e gi sma rai san den kan du te wan lobiwan fu den dede, e taki dati a bun fu yepi trawan noso fu meki ten fu du bun gi sma na ini a birti. Disi kan meki wan sma prisiri baka èn a kan yepi en fu no sari so furu moro (Tori fu den apostel 20:35). Furu Kresten di lasi wan lobiwan na ini dede kon si taki te den e yepi trawan, dan dati e trowstu den trutru.​—2 Korentesma 1:3, 4.

A pasa wan leisi taki yu no ben sabi san fu taigi wan mati fu yu di lasi wan lobiwan na ini dede? Son leisi wi no sabi san fu taki noso san fu du. Dati meki wi no e taki noti èn wi no e du noti. Ma sani de di wi kan du fu yepi so wan sma.

Nofo tron a de wan bigi yepi kaba te yu de nanga a sma èn te yu e taigi en fa yu e sari taki so wan sani miti en. Na ini furu kondre sma e brasa wan sma noso den e hori en anu fu sori taki den e firi gi en. Efu a sma di e sari wani taki fa a e firi, dan arki en nanga pasensi. San moro bun, na fu du wan sani gi a famiri di lasi wan lobiwan. Kande yu kan yepi den nanga wan wroko di den srefi no man du. Yu kan bori gi den, yu kan luku den pikin, noso yu kan yepi den fu seti sani gi a beri efu den wani dati. Kande den o warderi den sani disi moro leki iniwan moi sani di yu ben o taigi den.

Baka wan pisi ten, a kan taki yu e firi fu taki fu a dedewan. Kande yu kan taki fu den bun fasi fu en noso fu den prisiri sani di yu ondrofeni nanga en. Den sortu takimakandra disi kan meki a sma di e sari lafu baka. Fu eksempre, Pam, di lasi en masra Ian siksi yari pasa, taki: „Son leisi sma e fruteri mi fu den bun sani di Ian du, ma di mi no ben sabi. Den sani dati e gi mi prisiri.”

Ondrosukuman kon si taki furu sma di lasi wan lobiwan e kisi furu yepi na a bigin. Ma syatu baka dati, mati e frigiti den fu di den e go doro nanga den eigi libi. A sani disi na wan sari sani. Dati meki baka a beri, a bun fu tan meki muiti fu go luku a famiri fu a sma di dede noso fu bel den.a Furu sma breiti te trawan e du disi gi den, fu di dati e gi den na okasi fu taki fa den e firi.

Luku na eksempre fu Kaori, wan yongu uma fu Yapan. A ben sari srefisrefi di en mama dede èn di en bigi sisa dede 15 mun baka dati. Koloku taki a tan kisi yepi fu bun mati. Wan fu den mati disi na Ritsuko, wan uma di owru omeni yari moro Kaori. A ben du muiti fu tron wan bun mati fu en. Kaori taki: „Fu taki en krin, mi no ben breiti nanga dati. Mi no ben wani taki nowan sma teki a presi fu mi mama èn mi no ben denki taki wan sma ben o man du dati. Ma a fasi fa Mama Ritsuko libi nanga mi, meki mi kon lobi en srefisrefi. Ibri wiki wi ben e go makandra na ini a preikiwroko èn na den Kresten konmakandra. A ben e kari mi fu kon dringi pikinso te na en oso, a ben e tyari nyanyan gi mi, èn a ben gwenti skrifi brifi nanga karta gi mi. A switifasi di Mama Ritsuko sori gi mi yepi mi furu.”

Twarfu yari pasa sensi a mama fu Kaori dede. Now en nanga en masra na furuten preikiman. Kaori taki: „Te nanga now Mama Ritsuko e poti prakseri na mi. Ibri leisi te mi e drai go pe mi ben e tan fosi, mi e go luku en. Mi lobi de nanga en fu di a e gi mi furu deki-ati.”

Wan tra sma di ben kisi furu yepi na Poli, wan Yehovah Kotoigi na ini Siprus. Poli en masra Sozos ben abi switifasi èn a ben de wan bun owruman na ini a Kresten gemeente. A ben gwenti kari sma kon na en oso fu nyan èn fu abi wan prisiri ten. A ben lobi kari pikin di no abi papa nanga mama moro èn sisa di masra dede kaba (Yakobus 1:27). A sari taki Sozos dede di a ben abi 53 yari. A ben abi kanker na en edetonton. Poli taki: „Mi lasi mi lobi masra di ben mi ben trow 33 yari nanga en.”

Baka a beri Poli froisi go na Kanada. A go nanga Daniel, a moro yongu manpikin fu en di ben abi 15 yari. Drape den bigin go na wan gemeente fu Yehovah Kotoigi. Poli taki: „Den sma na ini mi gemeente no ben sabi srefisrefi san ben pasa nanga wi èn sortu problema wi ben abi. Toku den kon na wi, den yepi wi èn den taki sani di trowstu wi. A yepi disi kon na a yoisti ten fu di mi boi ben misi en papa srefisrefi. Den brada di e teki fesi na ini a gemeente ben poti furu prakseri na Daniel. Ala ten wan fu den ben e kari Daniel fu go du wan prisiri sani nanga mati noso fu prei bal.” Now sani e go bun nanga Poli èn nanga a boi fu en.

Furu fasi de fa wi kan yepi noso trowstu den sma di e sari fu di wan lobiwan fu den dede. Bijbel e taki fu wan moi howpu di e trowstu sma tu.

Prakseri Gail di wi ben kari na ini a di fu tu artikel fu a tijdschrift disi. A ben e tweifri efu oiti a ben o kaba sari fu di en masra dede. Ma a abi a howpu taki a o si Rob baka na ini a nyun grontapu di Gado pramisi. A e taki: „A tekst di mi lobi na Openbaring 21:3, 4.” Drape skrifi: „Gado srefi o de nanga den. A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”

Gail e taki: „A pramisi disi e sori sortu moi howpu wi abi. Mi e firi trutru gi sma di lasi wan lobiwan, ma di no sabi taki den lobiwan fu den kan libi baka.” Fu di Gail e bribi a sani disi, meki a e preiki a bun nyunsu sowan 70 yuru ibri mun. A e fruteri tra sma taki Gado pramisi taki „dede no o de moro” na ini a ten di e kon.

Kande yu e taki: ’A sani disi no kan!’ Ma luku na eksempre fu wan man di ben nen Yob. A ben abi wan takru siki (Yob 2:7). Aladi Yob ben winsi taki a dede, toku a ben e bribi ete taki Gado ben o man gi en libi baka na grontapu. Nanga overtoigi a taki: „Ai, mi winsi taki yu ben o kibri mi na ini Grebi. . . . Yu o kari mi èn mi o piki yu. Yu o angri fu si mi, a sani di yu meki nanga yu eigi anu” (Yob 14:13, 15). Yob ben de seiker taki a Gado fu en ben o misi en èn taki a ben o angri fu gi en libi baka.

Na dati Gado o du heri esi te a grontapu disi kenki kon tron wan paradijs. A o gi Yob nanga furu tra sma libi baka (Lukas 23:42, 43). Na Tori fu den apostel 24:15 Bijbel e taki dati Gado o gi sma wan opobaka. Yesus pramisi wi tu: „No fruwondru fu disi, bika a yuru o kon te ala den sma di de na ini den grebi o yere en sten èn den o komopo drape” (Yohanes 5:28, 29). Yob o si fa a pramisi dati o kon tru. Na a ten dati a o „abi krakti baka neleki di a ben yongu” èn fu ala ten en skin o de „moro moi leki di a ben yongu” (Yob 33:24, 25). A srefi sani o pasa nanga ala sma di abi warderi gi den sani di wi sari-ati Gado seti fu gi sma libi baka na grontapu.

Efu wan lobiwan fu yu dede, dan kande den sani di wi taki fu den no o puru a sari fu yu krinkrin. Ma te yu e denki fu den pramisi fu Gado di skrifi na ini Bijbel, dan dati kan gi yu trutru howpu nanga krakti fu go doro nanga a libi.​—1 Tesalonikasma 4:13.

Kande yu wani sabi sortu tra sani kan yepi yu fu no sari so furu moro. Noso kande yu abi tra aksi soleki: ’Fu san ede Gado e gi pasi taki ogri nanga pina de?’ Grantangi, go na a website fu wi, jw.org/srn fu luku sortu piki Bijbel e gi tapu den aksi fu yu. Den piki disi kan trowstu yu.