Yu e memre ete fa a ben de di yu fadon wan leisi di yu ben pikin? Kande yu ben koti yu anu noso yu ben skafu yu kindi. Yu sabi ete fa yu mama trowstu yu? Kande a ben krin a soro, dan a poti wan pleister na en tapu. Yu ben krei, ma den switi wortu fu en èn a waran brasa fu en meki yu firi bun esi-esi. Di yu ben pikin, ala ten wan sma ben de fu trowstu yu.

Ma sani e kon moro muilek te yu e kon moro bigi. Den problema e kon moro bigi èn a no ala ten wan sma de fu trowstu yu. A sari fu taki dati te wi leki bigisma abi problema, dan wan pleister nanga wan brasa fu wi mama no e lusu a problema. Luku wan tu eksempre.

• Yu lasi yu wroko wan leisi? Julian e taki dati di a lasi en wroko, dan a no ben sabi san fu du. A ben aksi ensrefi: ’Fa mi o sorgu mi osofamiri? Someni yari langa mi wroko so tranga. Fu san ede den sma fu a bedrijf feni taki den no kan gebroiki mi moro?’

• Kande yu e sari srefisrefi fu di a trow fu yu broko. Raquel e taki: „Di mi masra gowe libi mi 18 mun pasa, dan mi sari srefisrefi. A ben gersi leki mi ati priti. Mi ben e firi siki èn mi ben lasi-ati. Mi ben kon frede.”

• Kande yu abi wan seryusu siki èn a no sori leki yu o kon betre. Kande yu e firi son leisi leki a famiri-edeman Yob di ben bari: „Mi e tegu gi a libi disi. Mi no wani libi fu ala ten” (Yob 7:16). Kande yu e firi neleki Luis, wan man di pasa 80 yari. A e taki: „Son leisi mi e firi leki na wakti mi e wakti fu dede.”

• Kande yu e suku trowstu fu di wan lobiwan fu yu dede. Robert taki: „Mi no ben man bribi di a boi fu mi dede na ini wan opolani di fadon. Ne mi firi wan hebi pen neleki wan langa feti-owru boro mi, soleki fa Bijbel e taki en.”​—Lukas 2:35.

Robert, Luis, Raquel, nanga Julian ben kisi trowstu, srefi di den ben de na ini den muilek situwâsi disi. Den kisi trowstu fu a moro bun sma di kan gi den dati. A sma dati na a Almakti Gado. Fa a e trowstu sma? A o trowstu yu tu te yu abi dati fanowdu.

Na apostel Paulus e taki dati Yehovaha na „a Gado fu ala trowstu di e trowstu wi te wi de na ini ala sortu banawtu” (2 Korentesma 1:3, 4). Sobun, Bijbel e gi wi a dyaranti taki Gado man yepi ala sma. Boiti dati, nowan ogri di miti wi bigi so te, taki wi hemel Tata no man trowstu wi.

A no de fu taki dati wi musu du wan sani efu wi wani taki Gado trowstu wi. Efu yu wani taki datra yepi yu, dan yu musu go na en, a no so? Dati meki Bijbel e gi wi a deki-ati disi: „Kon krosibei na Gado èn a o kon krosibei na unu.”​—Yakobus 4:8.

Fu san ede wi kan de seiker taki Gado o kon krosibei na wi? Wan sani, na fu di a e taigi wi doronomo taki a wani yepi wi. (Luku a faki „Fa wi sabi taki Gado wani trowstu wi”.) Wan tra sani, na den ondrofenitori fu sma di ben kisi trowstu fu Gado. Disi na sma fu owruten èn fu a ten disi.

Neleki furu sma na ini a ten disi, Kownu David ben kisi furu problema. Wan leisi a begi Yehovah: „Arki mi te mi e bari kari yu, iya, te mi begi yu fu yepi mi.” Gado ben piki a begi fu en? Iya. David ben taki tu: „Mi ati e firi prisiri, fu di a yepi mi.”​—Psalm 28:2, 7.

YESUS E TROWSTU ALA SMA DI E SARI

Gado gi Yesus a prenspari frantwortu fu trowstu sma. Wan fu den sani di Gado seni en fu du na grontapu, ben de fu „tai den soro fu den wan di e firi brokosaka” èn fu „trowstu ala den sma di e sari” (Yesaya 61:1, 2). Soleki fa Bijbel ben taki na fesi, Yesus ben o poti prakseri spesrutu na sma „di musu wroko hebi èn di musu tyari hebi lai”.​—Mateyus 11:28-30.

Yesus ben e trowstu sma na difrenti fasi. A ben e gi den koni rai, a ben sori switifasi gi den èn son leisi a ben e dresi den sma tu. Wan dei wan gwasiman begi Yesus: „Efu yu wani nomo, yu kan meki mi kon krin.” Fu di Yesus ben e firi sari gi en, meki a langa en anu fasi a man èn a taigi en: „Mi wani. Kon krin” (Markus 1:40, 41). Na so a gwasiman kon betre baka.

Tide na a dei, a Manpikin fu Gado no de na grontapu fu trowstu ibriwan fu wi. Ma en Tata Yehovah, „a Gado fu ala trowstu”, tan yepi den sma di de na nowtu (2 Korentesma 1:3). Luku fo prenspari sani di Gado e gebroiki fu trowstu sma.

• Bijbel. „Ala sani di sma skrifi fositen, ben skrifi fu leri wi wan sani. Disi e yepi wi fu horidoro èn fu kisi trowstu fu Gado Buku, so taki wi kan abi howpu.”​—Romesma 15:4.

• Gado en santa yeye. Baka di Yesus dede, den Kresten ben abi trowstu tranga fanowdu. Bijbel e taki dati Gado trowstu den nanga yepi fu en santa yeye (Tori fu den apostel 9:31). A santa yeye, sobun a krakti fu Gado, man du bigi sani. Gado kan gebroiki a krakti disi fu trowstu iniwan sma na ini iniwan situwâsi.

• Begi. Bijbel e gi wi a rai disi: „No broko un ede nanga nowan sani, ma begi Gado ala ten.” A e taki tu: „Na so [Gado] o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan.”​—Filipisma 4:6, 7.

• Wi Kresten brada nanga sisa kan de trutru mati di o trowstu wi te wi abi dati fanowdu. Na apostel Paulus ben taki dati den mati fu en ben de ’wan trowstu gi en na ini ala en nowtu nanga en banawtu’.​—Kolosesma 4:11; 1 Tesalonikasma 3:7.

Ma kande yu e aksi yusrefi fa den sani disi e yepi wi. Meki wi go luku wan tu ondrofenitori fu sma di miti den sortu problema di wi kari na a bigin. Neleki den sma dati yu o kon si taki Gado e du ete san a pramisi: „Mi o trowstu unu ibri tron baka neleki fa wan mama e trowstu en manpikin ibri tron baka.”​—Yesaya 66:13.

TE YU NO ABI WROKO

„Mi nanga mi wefi lasi a wroko fu wi na a srefi ten”, na so Setha e taki. ”Tu yari langa wi ben e libi fu a moni di wi ben e kisi fu famiriman. Wi ben e du ala sortu pikinpikin wroko tu. A sani disi meki taki mi wefi, Priscilla, lasi-ati èn mi ben e firi leki mi no warti noti.

San yepi wi? Priscilla ben tan prakseri a sani di Yesus taki na Mateyus 6:34. Yesus ben taki dati wi no musu broko wi ede nanga tamara, fu di ibri dei abi en eigi broko-ede. Fu di Priscilla ben e begi Gado nanga en heri ati, meki a kisi krakti fu go doro. Psalm 55:22 ben e gi mi trowstu. Neleki a psalm skrifiman, mi trowe mi hebi na tapu Yehovah èn mi si fa a horibaka gi mi. Aladi mi abi wan wroko now, toku wi e gi yesi na a rai di Yesus e gi na Mateyus 6:20-22 fu no feti baka gudu. Boiti dati, wi tron moro bun mati fu Gado èn fu makandra.”

Jonathan e taki: „Mi ben frede san ben o pasa nanga mi osofamiri di wi lasi a bisnis fu wi. Wi wroko tranga 20 yari langa, ma fu di na ekonomia fu a kondre no ben e drai bun, meki wi lasi a heri bisnis. Mi nanga mi wefi bigin meki trobi fu moni ede. Wi no ben man bai sani srefi nanga a credit karta fu wi, fu di wi ben frede taki moni no ben de na en tapu.

Ma Gado Wortu nanga a yeye fu en yepi wi fu teki bun bosroiti. Mi leri fu du iniwan wroko èn wi tapu fu bai sani di wi no abi fanowdu. Wi kisi yepi tu fu tra Yehovah Kotoigi. Den no gi wi a firi leki wi no warti noti èn den yepi wi di wi ben abi en muilek.”

TE TROWPATNA E BROKO TROW

Raquel e taki: „Di mi masra gowe libi mi, a ben hati mi èn mi ati ben e bron. Mi ben e sari so te, taki mi no ben sabi san fu du. Ma mi tron wan moro bun mati fu Gado èn a trowstu mi. Fu di mi ben e begi Gado ibri dei, meki a freide fu Gado kibri mi ati. Mi firi taki a puru sari na ini mi ati.

Tangi fu en Wortu, Bijbel, meki mi no abi bita-ati moro. Mi teki a rai fu na apostel Paulus na Romesma 12:21: ’No meki ogri wini yu, ma tan du bun fu kan wini na ogri.’

Wan bun mati fu mi yepi mi fu frustan taki mi no ben musu tan prakseri a sani di miti mi. A sori mi Preikiman 3:6 èn a taigi mi na wan switifasi taki wan ten de ’fu si wan sani leki lasi sani’. A ben muilek gi mi fu teki a rai dati, ma na dati mi ben abi fanowdu. Now mi e du sani di e meki mi firi koloku.”

„Te yu nanga yu patna broko trow, dan yu abi wan sma fanowdu fu trowstu yu”, na so Elizabeth e taki. „Mi ben abi wan bun mati di horibaka gi mi ibri dei. A ben krei nanga mi, a trowstu mi èn a no gi mi a firi taki mi no warti noti. Ma a sori mi taki sma de ete di lobi mi. Mi de seiker taki Yehovah gebroiki en fu trowstu mi.”

TE YU SIKI NOSO TE YU KON OWRU

Luis, di ben kari na ini a fosi artikel, siki na en ati èn tu leisi a misi fu dede. Now a abi wan zuurstof masyin fanowdu 16 yuru wán dei. A e taki: „Mi e begi Yehovah doronomo. Baka te mi kaba begi Gado, mi e firi fa a yeye fu en e gi mi krakti baka. Begi e gi mi a krakti fu go doro fu di mi e frutrow na tapu Gado èn mi sabi taki a e broko en ede nanga mi.”

„Mi wani du someni sani, ma mi no man”, na so Petra di pasa 80 yari, e taki. „A muilek gi mi fu si fa mi e kon swaki. Mi skin weri èn mi musu dringi wan lo dresi. Nofo tron mi e prakseri fa Yesus ben aksi en Papa fu puru wan hebi tesi na en tapu efu a kan. Ma Yehovah gi Yesus krakti èn a e gi mi krakti tu. Begi de leki wan dresi gi mi ibri dei. Mi e firi moro bun te mi taki nanga Gado.”​—Mateyus 26:39.

Na so Julian e firi tu. Dritenti yari kaba a e feti nanga a siki multiple sclerosis di e meki wan sma kon lan te fu kaba. A e taki: „Mi ben e sidon na ini wan driktoro sturu fosi, ma now mi e sidon na ini wan rolsturu. Toku mi abi wan koloku libi fu di mi e yepi trawan. Te wi lobi fu gi sma sani, dan wi no e denki a pina di wi e pina. Èn soleki fa Yehovah pramisi, a e gi wi krakti te wi abi dati fanowdu. Neleki na apostel Paulus mi kan taki tu: ’Mi man du ala sani nanga yepi fu a sma di e gi mi krakti.’”​—Filipisma 4:13.

TE WAN LOBIWAN FU WI DEDE

„Mi no ben man bribi di mi yere taki oto naki mi papa kiri”, na so Antonio e taki. „Mi ben feni taki a no eerlijk. Na waka mi papa ben e waka na strati nomo. Ma mi no ben man du noti. A ben de na ini wan coma feifi dei langa fosi a dede. Mi ben man hori misrefi fu no krei na fesi mi mama, ma mi bari krei di mi ben de mi wawan. Mi tan aksi misrefi: ’Fu san ede? Fu san ede disi pasa?’

Na ini den muilek dei dati, mi ben aksi Yehovah doronomo fu yepi mi fu hori misrefi èn fu no bruya. Safrisafri mi bigin firi korostu. Mi ben memre taki Bijbel e taki dati ’sani di wi no e fruwakti’ kan pasa nanga wi alamala. Fu di Gado no man lei, meki mi de seiker taki mi o si mi papa baka te a kisi wan opobaka.”​—Preikiman 9:11; Yohanes 11:25; Titus 1:2.

Robert di kari na ini a fosi artikel e denki so tu. A e taki: „Mi nanga mi wefi ben abi wan korostu firi soleki fa Filipisma 4:6, 7 e taki. Wi ben abi a firi disi fu di wi ben e begi Yehovah. Dati meki wi ben man fruteri nyunsuman fu a howpu di wi abi taki den dedewan o kisi wan opobaka. Wi e sari taki a boi fu wi dede, ma wi e prakseri den moi sani di wi ben e du nanga makandra. Wi e pruberi fu prakseri soso den moi momenti dati.

Den Kotoigi brada nanga sisa fu wi taigi wi taki den si fa wi ben de so korostu di wi ben e taki fu a bribi fu wi tapu telefisi. Wi taigi den taki na den begi fu den yepi wi. Mi e bribi trutru taki Yehovah ben e trowstu wi nanga yepi fu den someni boskopu di den brada nanga sisa seni gi wi.”

Soleki fa den eksempre disi e sori, dan Gado kan trowstu sma awansi sortu problema noso tesi e miti den. Fa a de nanga yu? Awansi sortu problema yu abi na ini yu libi, yu kan kisi trowstu na ini den muilek ten dati.b Dati meki a bun fu suku yepi na Yehovah. En na „a Gado fu ala trowstu”.​—2 Korentesma 1:3.