’Wi preiki nanga moro faya nanga moro lobi leki iniwan ten na fesi’

WAN freida mamanten na ini september 1922, sowan 8000 sma ben de na ini wan bigi zaal èn a presi ben e kon waran kaba. A fesiman fu a programa meki bekènti taki na a prenspari pisi disi, sma ben kan gowe libi a zaal efu den ben wani, ma den no ben o kisi okasi fu kon baka na ini inisei.

A programa ben bigin nanga wan tu prèisesingi èn baka dati Joseph F. Rutherford go na tapu a podium. Furu sma na ini a zaal ben e sidon e wakti san ben o pasa. Wan tu sma ben e wakawaka lontu fu di a ben faya. A takiman begi den fu go sidon arki. Wan bigi duku di ben lolo tapu, ben anga na tapusei fu a podium. Kande sma no ben si en srefi.

Brada Rutherford ben hori a lezing di nen „A Kownukondre fu hemel de krosibei”. A fruteri fa den profeiti fu owruten ben e meki sma kon sabi sondro frede taki a Kownukondre ben de fu kon. Pikinmoro wán nanga afu yuru langa a krakti sten fu en ben de fu yere na ini a heri zaal. Di a doro a prenspari pisi fu a lezing, dan a aksi den arkiman: „Yu e bribi taki a Kownu di kisi glori e tiri kaba?” Den arkiman bari: „Iya!”

Ne Brada Rutherford taki nanga wan krakti sten: „Dan go doro nanga a wroko, un manpikin fu a moro hei Gado! Luku, a Kownu e tiri! Unu na den sma di e fruteri fu en. Fu dati ede, preiki, preiki, preiki.”

Na a momenti dati, a duku di ben anga na tapusei fu a podium lolo opo èn na en tapu den wortu disi ben skrifi: „Preiki fu a Kownu nanga en Kownukondre.”

„Den sma na ini a zaal ben breiti srefisrefi”, na so Ray Bopp taki. Anna Gardner fruteri fa „a heri presi ben e seki di sma ben e naki anu”. Fred Twarosh taki: „Ala den sma drape opo tanapu leki wán man.” Evangelos Scouffas taki: „A ben de leki wan bigi krakti opo wi fu wi sturu èn di wi opo tanapu wi ai ben furu nanga watra.”

Furu sma di ben de na a kongres dati ben e preiki a bun nyunsu fu a Kownukondre kaba. Ma now a ben gersi leki den ben kisi nyun krakti fu preiki a bun nyunsu. Ethel Bennecoff fruteri taki den Bijbel Ondrosukuman preiki „nanga moro faya nanga moro lobi leki iniwan ten na fesi”. Na a ten dati Odessa Tuck ben abi 18 yari. A gowe libi a kongres nanga na overtoigi taki a ben o gi piki tapu a kari disi: „Suma o go?” Odessa taki: „Mi no ben sabi pe mi ben o go preiki, fa mi ben o go, noso san mi ben o preiki. San mi ben sabi, na taki mi ben wani de leki Yesaya di ben taki: ’Dya mi de! Seni mi’” (Yes. 6:8). Ralph Leffler e taki: „Fu taki en leti, a prenspari dei dati ben de a bigin fu a preikiwroko di e du now na heri grontapu.”

Dati meki a no e fruwondru wi taki a kongres disi di hori na ini 1922 na Cedar Point, Ohio, na wan fu den prenspari sani di pasa na ini na organisâsi fu wi. George Gangas ben taki: „A kongres dati meki mi teki a bosroiti fu no misi wan bigi konmakandra noiti.” Èn a no man memre taki a misi wan oiti tu. Julia Wilcox ben skrifi: „Mi no man taigi yu fa mi e firi bun ibri leisi te mi e leisi wan sani fu a Cedar Point kongres fu 1922 na ini den buku fu wi. Ala ten mi wani taki: ’Mi e taigi yu tangi Yehovah, fu di yu gi mi na okasi fu de drape.’”

A kan taki furu fu wi na ini a ten disi man memre moi sani fu wan kongres di naki wi ati èn di meki taki wi kisi moro lobi gi wi makti Gado nanga en Kownu. Te wi e prakseri den sani dati, dan dati e gi wi deki-ati tu fu taki: „Mi e taigi yu tangi Yehovah, fu di yu gi mi na okasi fu de drape.”