Aksi di opo kon

◼ O langa wi musu studeri nanga wan Bijbelstudenti di e go na fesi?

A bun fu tan studeri nanga wan Bijbelstudenti di e go na fesi teleki a kaba nanga den tu buku disi: San Bijbel e leri wi trutru? nanga Meki Gado tan lobi yu. Disi musu pasa srefi te a studenti teki dopu fosi a kaba nanga den tu buku dati. Baka te a dopu, wi kan tan skrifi den yuru, den gobaka, nanga a studie. Efu wan preikiman e kon nanga wi na a studie èn a e teki prati na a studie, dan a kan teri a yuru tu.—Luku Wi Kownukondre diniwroko fu maart 2009, bladzijde 2.

A prenspari taki nyunwan frustan den tru leri fu Bijbel bun, fosi wi tapu fu studeri nanga den. Den musu „meki rutu” na ini Krestes èn den musu ’meki den bribi kon tranga’ so taki den o man kakafutu gi den problema di den o kisi (Kol. 2:6, 7; 2 Tim. 3:12; 1 Petr. 5:8, 9). Boiti dati, te den wani gi leri na trawan na wan bun fasi, dan den musu „sabi a waarheid soifri” (1 Tim. 2:4). Te wi kaba studeri den tu buku nanga a studenti fu wi, dan na so fasi wi e yepi en fu tan waka na tapu a pasi „di e tyari sma go na libi”.​—Mat. 7:14.

Fosi den owruman e gi primisi taki wan sma kan teki dopu, dan den musu sorgu taki a sma e frustan krin san na den prenspari Bijbel leri èn taki a e libi soleki fa den leri dati e sori. Owruman musu luku bun san den e bosroiti, spesrutu te wan studenti no kaba ete nanga a fosi buku. Efu wan sma no doro den markitiki ete fu teki dopu, dan den owruman o sorgu taki a e kisi a yepi di de fanowdu fu man teki dopu na ini a ten di e kon.​—Luku Wi orga fu du a wani fu Yehovah, bladzijde 216-218.

[Prenspari pisi na tapu bladzijde 2]

A prenspari taki nyunwan frustan den tru leri fu Bijbel bun