’Si san wi de’ na a Memrefesa

„Efu wi ben sa si san wi srefi de, dan wi no ben sa kon na fesi krutu . . . so taki strafu no leysi gi wi.” — 1 KORENTESMA 11:31, 32.

1. San tru kresten sma sa wani tan farawe fu en èn fu san-ede?

NA LASTI sani san wan kresten no wani na fu Yehovah krutu en ogri. Fu no meki na „Krutuman fu na heri grontapu” firi prisiri ben sa kan meki taki „den leysi strafu [gi wi] makandra nanga na grontapu” èn so taki wi e lasi wi frulusu. Disi de so efu wi e howpu now tapu libi na ini heymel nanga Yeyses ofu tapu têgo libi na ini wan grontapu paradèysi. — Genesis 18:25; 1 Korente sma 11:32.

2, 3. Na ini sortu afersi wi ben sa kan kisi wan krutu di no bun, èn san Paulus ben taki fu dati?

² Na ini 1 Korente sma kapitri 11 na apostru Paulus e taki fu wan afersi pe wi ben sa kan kon na fesi krutu. Ala di a e taki nanga salfu kresten, toku en ray de prenspari gi wi alamala, spesrutu na ini na ten disi. Fu si san wi srefi de kan yepi wi fu kisi na bun-ati fu Gado èn no kon na fesi krutu. Na ini wan takimakandra fu na ala yari fesa fu na Avondmaal fu Masra Paulus ben skrifi:

³ „Masra Yeyses na ini na neti di den ben sa gi en abra, [ben teki] wan brede . . . èn baka di a ben taki tangi . . . [a ben] broko en èn ben taki: ’Disi wani taki mi skin, di de fu a bun fu unu. Tan du disi fu memre mi.’ So srefi a ben du tu nanga na kan, baka di a ben kobroyki na avondmaal èn a ben taki: ’Na kan disi wani taki na nyun frubontu tapu na gron fu mi brudu. Tan du disi, so furutron leki unu e dringi en, fu memre mi.’ Bika so furutron leki unu e nyan a brede disi èn e dringi fu na kan disi, unu e tan meki na dede fu Masra bekenti te leki a kon.” — 1 Korente sma 11:23-26.

4. San sa feni presi na a neti fu 10 april 1990?

⁴ Baka te son dongo tapu 10 april 1990, Yehovah Kotoygi sa hori na fesa fu memre na dede fu Krestes. Leki fa a gwenti de, dan na grupu di e miti nanga makandra, de wán gemeente; na a fasi dati presi sa de gi sma di no de ete Kotoygi. Sortu konmakandra a sa de? Wan beybri lezing sa hori. Dan, baka wan begi, na brede sa langa go gi sma. Na di fu tu begi de a bigin fu a langa go fu a kan gi sma. Na presi fu ala disi feni presi akruderi wan formeel gwenti ofu wan fasti lin, dan na nomru fu brede ofu kan èn a fasi fa den sa langa go gi sma e seti ini akruderi nanga na situwâsi fu na presi. A moro prenspari sani de, taki na brede nanga win musu de so taki, ala sma di de drape kisi den, awinsi moro furu fu den sa langa en go doro sondro fu kobroyki den. Ma sortu sani e langa gi sma èn san den wani taki? Boyti fu dati, san wi musu go prakseri a fesi fu kan si san wi srefi de?

„Disi wani taki mi skin”

5, 6. (a) San Yeyses ben du nanga wan brede? (b) Sortu brede a ben kobroyki?

⁵ Wi leysi san Paulus „ben kisi fu Masra” ini na tori fu na Memrefesa. Skrifitori de fu dri evangeliumskrifiman, di wan fu den ben de drape di Yeyses ben poti na fesa (1 Korente sma 11:23; Mateyus 26:26-29; Markus 14:22-25; Lukas 22:19, 20). Den skrifitori disi e taki taki Yeyses ben teki fosi wan brede, ben begi, èn dan ben broko èn prati en. San ben de a brede dati? Èn ini akruderi nanga dati, san sma e kobroyki na a ten disi? San a wani taki ofu san a e prenki?

⁶ San ben de drape ben de den sani fu na dyu paskafesa, so leki brede sondro srudeki, di Moses ben kari „brede sondro swa, a brede fu nowtu” (Deuteronomium 16:3; Exodus 12:8). Na brede disi ben meki fu tarweblon sondro fu kobroyki srudeki, sowtu ofu spesrey. Fu di a no ben abi srudeki (Hebrew tongo: mats.tsah’), meki a ben plata èn bròs; yu ben musu broko en na ini pisi fu kan nyan en. — Markus 6:14; 8:6; Tori fu den Apostru 27:35.

7. Sortu brede Yehovah Kotoygi e kobroyki na a ten fu na Memrefesa?

⁷ Yeyses ben kobroyki brede sondro srudeki gi na Avondmaal fu Masra, èn fu dati-ede Yehovah Kotoygi e du dati tu na ini na ten disi. Gewoon dyu maso bun gi na okasi disi, efu den no meki nanga tra sani so leki mout, ayun ofu eksi. (Maso di abi den sani dati te yu e luku en bun, no ben sa fiti den wortu „brede fu nowtu.” Noso den owruman fu na gemeente kan meki wan sma meki brede sondro srudeki fu degi fu tarweblon nanga watra. Efu tarweblon no de, dan brede sondro swa kan meki nanga blon fu gerst, aleysi, karu ofu wan tra graan. Na degi e lolo kon plata èn e baka na tapu wan pan di kisi oli.

8. Fu san-ede brede sondro srudeki de wan agersisani di fiti, èn san a wani taki te wan sma e kobroyki en? (Hebrew sma 10:5-7; 1 Petrus 4:1)

⁸ A sortu brede disi fiti fu di a no abi srudeki (gesi), di a beybri e kobroyki fu prenki porifasi ofu sondu. Paulus ben gi ray na wan huruman na ini wan gemeente: „’Wan pikinso srudeki e meki na heri degi kon swa. Puru na owru srudeki, so taki unu de sondro swa. Krestes, wi Paska, srakti. Meki wi hori na fesa no nanga srudeki fu takrudu ofu ogridu, ma nanga brede sondro swa fu opregtifasi nanga waarheid’ (1 Korente sma 5:6-8; teki gersi Mateyus 13:33; 16:6, 12). Brede sondro swa na wan agersifasi di fiti gi Yeyses libisma skin, bika a ben de „loyaal, sondro fowtu, sondro flaka, aparti fu den sondari” (Hebrew sma 7:26). Yeyses ben de drape na ini en volmaakti libisma skin di a ben taygi den apostru: „Teki èn nyan na [brede] disi, a wani taki mi skin” (Mateyus 26:26, A New Translation of the Bible, fu na anu fu James Moffatt). Te wan sma teki fu a brede, dan a wani taki taki a e poti bribi na ini den winimarki fu Yeyses ofrandi fu na bun fu en, èn a e teki dati. Ma moro de ini a tori.

Win di wani taki wan sani

9. Sortu tra agersisani leki fa Yeyses ben taki musu kobroyki?

⁹ Yeyses ben kobroyki ete wan agersifasi: „A teki so srefi wan kan, èn baka di a taki Gado tangi a ben gi dati na den nanga den wortu: ’Dringi fu disi, unu alamala; disi wani taki mi brudu; na brudu fu na nyun frubontu, di lon gi furu sma, fu kisi na pardon fu den sondu fu den’” (Mateyus 26:27, 28, Moffatt). San ben de na ini na gemeenschappelijk kan di a ben langa gi den èn san a wani taki gi wi ala di wi e du muyti fu si san wi srefi de?

10. Fa a kon taki win ben kisi wan presi na ini na dyu Paska?

¹⁰ Di Moses biginbigin ben fruteri fu na paskafesa, a no ben taki fu dringi. Furu koniman e bribi taki win bun langa a baka, kande na ini na di fu tu yarihondro bifo G.T., ben tyari kon na ini na Paska.a Awinsi fa no fa, na kobroyki fu win na a nnyan disi ben de algemeen na a fosi yarihondro, èn Yeyses no ben kakafutu gi disi. A ben kobroyki na paskawin di a ben poti na Memrefesa.

11. Sortu win fiti fu kobroyki gi na Avondmaal fu Masra?

¹¹ Fu di na dyu Paska ben feni presi langa baka na koti fu droyfi, dan Yeyses no ben kobroyki sap di no ben tron sopi, ma redi win di makriki ben kan prenki en brudu (Teki gersi Openbaring 14:20). Na brudu fu Krestes no ben abi fu kisi sani na ini, so taki wan gewoon win ben fiti, èn no win di ben meki kon tranga nanga sopi (so leki port, sherry ofu muskatel) ofu spesrey ofu tra sani di den poti na ini (vermouth, Dubonnet ofu furu aperitief). Ma wi no abi fu broko wi ede fu fa wan win ben meki, ofu na ini na ten di a ben e tron win pikinso sukru ben poti na ini fu meki a tron fu gemiddelde tesi ofu gemiddelde sopi di a musu abi, noso efu pikinso swarfu ben kobroyki fu meki a no pori.b Furu gemeente e kobroyki redi win di de fu kisi na wenkri (so leki chianti, bourgogne, beaujolais ofu bordeaux) ofu wan eenvoudig redi win di yu srefi meki. Na win nanga na brede de soso agersifasi; san no kobroyki, kan teki go na oso so bun èn bakaten kan kobroyki eenvoudig leki tra nyansani ofu dringi.

12. Leki fa Yeyses tyari kon na krin dan san a win e prenki?

¹² Taki Yeyses ben taki na a neti fu na Paska fu en brudu, ben kan tyari na brudu fu na pikin skapu na ini Egipti kon na ini prakseri. Ma luku pikinso fa Yeyses te yu luku en bun e teki wan tra sani gersi nanga na kan, fu di a e taki: „Na kan disi wani taki na nyun frubontu ini na krakti fu mi brudu, di fu na bun fu unu sa lon” (Lukas 22:20). Yehovah ben sroto wan frubontu a fesi nanga na nâsi fu na Isràel na skinfasi, èn a ben kisi krakti nanga yepi fu a brudu fu meti. Wan kruderi ben de a mindri a brudu fu den srakti-ofrandi dati nanga Yeyses brudu. Ala tu ben abi fu du nanga a meki di Gado ben meki wan frubontu nanga wan nâsi fu en pipri kisi krakti (Exodus 24:3-8; Hebrew sma 9:17-20). Wan marki fu na Wètifrubontu ben de taki na Israèl na skinfasi ben abi na fruwakti fu tron wan nâsi fu kownu-pristri (Exodus 19:5, 6). Baka di Israèl ben misi a marki fu hori Yehovah frubontu, a ben taki, taki a ben sa poti wan nyun frubontu na ini na presi fu ”na fosi frubontu” (Hebrew sma 9:1, 15; Yeremiya 31:31-34). Na kan fu win di Yeyses ben meki waka lontu na den kotrow apostru, ben prenki na nyun frubontu disi.

13, 14. (a) San a wani taki fu de ini na nyun frubontu? (b) San a e sori te wan sma kobroyki den agersisani?

¹³ Kresten sma di teki poti na ini na nyun frubontu disi e kon de wan yeye nâsi fu kownu-pristri (Galasiya sma 6:16). Na apostru Petrus ben skrifi: „Unu de ’wan geslakti di den teki puru, wan kownu-pristri wroko, wan santa nâsi, wan pipri fu wan spesrutu gudu, so taki unu ben sa meki na ala sey den tumusi moy sani bekenti’ fu na sma di ben kari unu puru fu dungru kon na ini en wondru leti” (1 Petrus 2:9). A de krin sortu frulusu den e kisi — libi na ini heymel leki konpe tiriman nanga Yeyses. Openbaring 20:6 e sori taki disi de so: „Koloku èn santa ibriwan sma de di abi prati na a fosi opobaka; . . . den sa de pristri fu Gado èn fu Krestes èn sa tiri nanga en leki kownu fu dusun yari.”

¹⁴ Te yu luku en bun dan baka di Yeyses ben meki den apostru kobroyki na brede nanga win leki agersisani den ’ben sa nyan èn dringi na ini en kownukondre na en tafra, èn ben sa sdon na tapu kownusturu fu krutu den twarfu lo fu Israèl’ (Lukas 22:28-30). Fu dati-ede meki na kobroyki fu den memrefesa agersisani e wani taki moro leki fu poti bribi nomo na ini Yeyses srakti-ofrandi. Ibri kresten musu teki na frulusu ofrandi èn sori bribi efu a wani kisi têgo libi (Mateyus 20:28; Yohanes 6:51). Ma fu kobroyki den agersisani e wani taki, taki wan sma de na ini na nyun frubontu, taki den piki en puru fu de nanga Yeyses na ini en kownukondre.

Na fanowdu fu si san wan sma de na a Memrefesa ten

15. Fa Yeyses ben tyari wan nyun howpu kon gi Gado dienstknekti?

¹⁵ So leki na artikel na fesi ben tyari kon na krin, dan loyaal dienstknekti fu Gado bifo a ten fu Yeyses no ben abi na howpu fu go na heymel. Den ben luku go na fesi fu kisi têgo libi na grontapu, na fosi tanpe fu a libismafamiri. Yeyses Krestes ben tron na fosiwan di ben kisi opobaka leki wan yeye, èn a ben de na fosiwan fu na libismafamiri di teki poti na ini heymel (Efeysiya sma 1:20-22; 1 Petrus 3:18, 22). Paulus ben sori taki disi de so, di a ben skrifi: ’Wi abi fri fu taki ini na tori fu na pasi di e go na a santa presi, di a ben opo gi wi leki wan nyun èn libi pasi’ (Hebrew sma 10:19, 20). Suma ben sa kon, baka di Yeyses ben opo na pasi?

16. San a ten di e kon abi gi den sma di e kobroyki na brede nanga a win?

¹⁶ Na neti di Yeyses ben poti na Avondmaal fu Masra, a ben fruteri en loyaal apostru taki a ben e sreka wan presi gi den na ini heymel (Yohanes 14:2, 3). Ma tyari kon na ini yu prakseri, taki Yeyses ben taki tu taki den sma di ben kobroyki na brede nanga na kan ben sa de na ini en kownukondre èn ben sa sdon na tapu kownusturu fu krutu sma. Dati ben sa de den apostru wwan? Nôno, bika bakaten na apostru Yohanes ben kon sabi taki tra kresten tu ben sa wini èn ’ben sa teki presi nanga Yeyses na tapu en kownusturu’, èn makandra den ben sa tron ’wan kownukondre èn pristri fu tiri abra na grontapu’ (Openbaring 3:21; 5:10). Yohanes ben kon sabi so srefi na nomru fu ala kresten di „bay puru fu grontapu” — 144.000 (Openbaring 14:1-3). Fu di disi de wan pikin grupu, wan „pikin ipi” te yu sa teki den gersi nanga ala sma di anbegi Yehovah ini den hondrohondro yari di psa, dan a de fanowdu fu abi wan spesrutu koni fu si sani. — Lukas 12:32.

17, 18. (a) Na ini sortu gwenti son kresten sma na ini Korente ben fadon go? (b) Fu san-ede a ben de so seryusu fu gi yu srefi abra na tumusi furu nyan èn dringi? (Hebrew 10:28-31)

¹⁷ Paulus ben tyari disi kon na fesi na ini en brifi gi den Korente sma ini wan ten di son apostru ben de ete na libi èn di Gado ben e kari kresten „fu de santawan”. Paulus ben taki taki wan takru gwenti ben gro kon a mindri den di ben fruplekti fu nyan den agersisani. Sonwan ben nyan nnyan a fesi pe den ben dringi èn nyan tumusi furu, so taki den ben de nanga sribi èn den frustan ben kon dungru. A bakapisi ben de taki den no ben man ’fu si na skin’, Yeyses trutru skin, di a brede e agersi. Dati ben de so wan seryusu sani? Iya! Fu di den ben teki prati na wan fasi di no warti, meki den ben „sondu na a skin èn na a brudu fu Masra”. Efu den ben de na ay nanga den frustan èn na yeyefasi, ’dan den ben kan si san den ben de èn den no ben sa kon na fesi krutu’. — 1 Korente sma 1:2; 11:20-22, 27-31.

¹⁸ San den kresten dati ben musu si èn fa? Na ini na fosi presi den ben musu warderi na ini den ati nanga frustan na kari di den ben kari den fu de na mindri den 144.000 erfgenaam fu heymel libi. Fa den e kon si disi, èn fa furu sma ini na ten disi ben sa musu bribi taki den de wan pisi fu na pikin grupu disi di Gado teki puru fu sensi den dey fu den apostru?

19. Sortu situwâsi di wani taki furu ben sori en srefi na a Memrefesa fu 1989?

¹⁹ Te yu luku en bun, dan soso wan tumusi pikin grupu di no de furu fu tru kresten ini na ten disi e si disi fu den srefi. Na a fesa fu na Avondmaal fu Masra na ini 1989 moro leki 9.479.000 sma ben kon makandra na ini gemeente fu Yehovah Kotoygi na a heri grontapu. So wan 8700 ben fruteri taki den abi na howpu ’fu kisi frulusu go na a heymel kownukondre’ (2 Timoteyus 4:18). Na moro bigi pisi fu libisma — iya, milyunmilyun tra loyaal, èn koloku kresten di ben kon makandra — ben si taki na howpu di den kan abi, ben de fu libi fu têgo na grontapu.

20. Fa den sma di de fu den 144.000 e kisi fu frustan taki den kari den? (1 Yohanes 2:27)

²⁰ Nanga Penkstri 33 G.T. Gado ben bigin fu piki den 144.000 puru gi heymel libi. Fu di na howpu disi ben de nyun, wan howpu di Gado dienstknekti bifo Krestes no ben abi, meki wan sma kan aksi en srefi taki fa den di den e teki puru ben sa sabi disi ofu ben sa de seyker fu na howpu disi? Den e si disi fu di den kisi na kotoygi fu en nanga yepi fu Gado santa yeye. Disi no wani taki taki den e si na yeye trutru (a no de wan sma) ofu tapu a wan ofu tra fasi e kisi wan prenki ini den frustan taki na yeye e taki makandra nanga den, èn so tu den no e yere no wan sten fu na yeye kondre. Paulus e tyari kon na fesi: „Na yeye srefi e gi kotoygi nanga wi yeye taki wi de pikin fu Gado . . . So srefi erfgenaam, iya erfgenaam fu Gado, ma konpe erfgenaam nanga Krestes, efu wi e nyan pina makandra nanga en, so taki makandra wi sa kisi so srefi glori.” — Rome sma 8:16, 17.

21. (a) Fa den salfuwan sabi taki den abi na heymel howpu? (1 Korente sma 10:15-17) (b) Sortu sma den salfuwan de èn fa na ini bescheidenfasi den e sori a howpu fu den?

²¹ Na kotoygi disi, ofu a frustan di den kon frustan a sani disi, e seti a denki nanga na howpu fu den nyun baka. Den de te now ete libisma, di e nyanbun fu den bun sani fu Yehovah kriyaturu na grontapu, ma a libi nanga den afersi fu den moro furu de fu de konpe erfgenaam nanga Krestes. A no a firi fu den tyari den kon so fara fu si na tori so. Den de normaal libisma, di de ini balansi ini a fasi fa den e luku sani èn ini den waka nanga libi. Ma fu di Gado yeye ben santa den, meki den abi a overtoygi fu na kari fu den èn den no e degedege fu dati kwetikweti. Den e frustan taki na frulusu fu den, efu den sori taki den de kotrow, sa de fu kisi heymel libi (2 Tesalonika sma 2:13; 2 Timoteyus 2:10-12). Fu di den e frustan san Yeyses srakti-ofrandi e wani taki gi den èn e si taki den de kresten di kisi salfu nanga a yeye, meki den e kobroyki na ini ala bescheidenfasi den agersisani fu na Memrefesa.

22. San moro furu sma di sa de na a Avondmaal fu Masra sa sori taki den de?

²² A moro bigi pisi fu den di e gi yesi fu konmakandra tapu 10 april no abi na howpu dati, bika Gado no salfu den nanga yeye èn nanga dati no kari den fu kisi libi na ini heymel. So leki wi si, dan Gado ben bigin piki den 144.000 puru na ini den dey fu den apostru. Ma fu di na kari disi e kon na wan kba, meki a de wan sani di de fu fruwakti taki trawan di e kon anbegi en, sa abi na howpu di Moses, David, Johanes na Dopuman èn tra kotrow sma ben abi di ben dede bifo Yeyses ben opo na pasi fu kisi libi na ini heymel. A so a e kon taki milyunmilyun loyaal kresten di abi faya ini na ten disi no e kobroyki den agersisani fu na Memrefesa. Den sortu kresten disi e si san den de na fesi Gado, na a fasi taki den e si san de na howpu di Gado gi den. Den e nyanbun fu Yeyses brudu nanga skin fu di den e kisi pardon fu den sondu èn dan e kisi têgo libi na grontapu. — 1 Petrus 1:19; 2:24; Openbaring 7:9, 15.

23. Fu san-ede na Memrefesa sa de wan prisiri sani? (Teki gersi 2 Kronieken 30:21.)

²³ Meki wi luku go dan na a koloku fesa tapu 10 april. A sa de wan ten fu kobroyki na koni fu si sani ma so srefi wan ten fu prisiri. Prisiri gi na pikin nomru di abi wan heymel howpu èn di nanga leti èn fu di den e gi yesi sa kobroyki na brede nanga na kan (Openbaring 19:7). Prisiri so srefi gi den milyunmilyun koloku kresten di na a neti dati sa de drape leki sma di e luku èn leri èn di e howpu fu memre fu têgo na grontapu na fesa disi di wani taki furu. — Yohanes 3:29.

[Foetoewortoe]

San na a piki fu yu?

◻ Fu san-ede brede sondro srudeki e langa gi sma na a ten fu na Memrefesa èn san disi e prenki?

◻ San na a kan di e waka lontu na a yuruten fu na Avondmaal fu Masra, èn san disi e prenki?

◻ Fu san-ede na koni fu man si sani gaw de fanowdu ini na tori fu na Memrefesa?

◻ Fu san-ede yu e luku go a fesi na a Memrefesa di e kon?