makandra fu di baka na preikiwroko den abi bun ontspanning tapu den schema. Disi e meki taki den abi a ten fu kenki prakseri na ini wan switi sfeer, èn disi e tyari papa, mama nanga pikin kon moro krosibei fu makandra.

⁷ Abi a fasti bosroiti fu kweki den koni fu komunikâsi di de fanowdu fu kan kibri wan tranga banti nanga yu pikin. No meki noti tapu yu fu teki a ten di de fanowdu fu tranga yu osofamiri na yeyefasi. Begi gi den pikin fu yu èn makandra nanga den, ala di yu sabi taki Yehovah kan blesi den muiti di yu e meki fu bow wan tranga osofamiri banti nanga bun bakapisi. — Ps. 127:1; Odo 24:3.

Yepi den inaktief brada nanga sisa fu wi

¹ Sa yu e si te yu e leisi den agersitori fu Yeises na ini Lukas 15:3-10? Taki a man di ’e go suku a lasi skapu’ èn a uma di nanga a faya fu wan lampu ’e figi en oso èn e suku finifini’ na wan moni di lasi, e span den srefi, te leki den feni en’, èn so srefi taki baka dati den e prisiri makandra nanga den mati èn birti sma fu den.

² A leri disi abi fu du nanga sma di de na ini wan matifasi nanga Gado fu di den gi den srefi abra na En, ma di drifi gwe ofu lasi. Di den feni den sma disi baka, dan Yehovah, Yeises nanga den engel ben abi bigi prisiri (Luk. 15:7, 10). Wi e sori a srefi sortu belangstelling disi gi den inaktief brada nanga sisa fu wi?

³ San meki furu sma kon de inaktief? Furutron a de eenvoudig fu di na lai fu den sorgu fu a libi e kon moro furu (Luk. 21:34). Wanwan leisi a krakti fu takru konpe ben prei wan rol tu (1 Kor. 15:33; Gal. 5:7). Na sonwan a ben psa baka di wan afersi fu wan beibri leri ben muilek den (Yoh. 6:60-66). Furu fu den, efu den ben krin na frustan ofu no, ben feni na kontren na ini a yeye osofamiri fu Yehovah wan sani di e skotu den tumusi.

⁴ Neleki na lasi manpikin den ben hari go na wan „farawe kondre”, na owru seti fu sani, ma drape den ben ondrofeni soso problema nanga sari. Dan furu fu den „e kisi den srefi”, ma e misi na yeye krakti fu drai kon baka na Yehovah (Luk. 15:13, 17). Dyaso na frantiwortu di wi alamala abi makandra e kon na fesi.

⁵ Fu bigin fu 1 september dan na a nyun waka di a kringopziener e waka lontu a bigin fu taki nanga den owruman fu yepi di musu gi na den inaktief brada nanga sisa fu wi. Owruman sa fisiti den nanga switifasi, èn baka dati den sa seni so srefi trawan na ini a gemeente, dinari na ini a diniwroko, pionier, èn tra bekwaam, lepi brada nanga sisa, fu yepi den moro fara. Na a tra waka di a kringopziener o waka lontu, a sa luku san du èn sortu tra rai ofu deki-ati de fanowdu.

⁶ Yu sa gi wan anu te na dienstopziener e aksi yu fu studeri nanga inaktief sma? San den abi fanowdu na tranga na yeyefasi, a begi nanga makandra, matifasi, prisiri demakandra na ini a gemeente èn baka dati tiri na ini a preikiwroko (Hebr. 5:11, 12). Wi alamala kan gi den wan switi kon na ini a Kownukondrezaal, èn hori takimakandra nanga den di e bow den, ala di wi e sori na srefi yeye fu wi Hemel Tata, di e taki: „Mi wani yepi yu trutru.” — Yes. 41:10.

⁷ Meki a de so taki Yehovah blesi den muiti di wi e meki makandra na ini a dienstyari fu 1991 srefisrefi, fu yepi den inaktief brada nanga sisa fu wi fu tron prisiri nanga fayafaya prèiseman baka. Meki a de so taki den wortu fu 1 Petrus 2:25 abi fu du nanga furu dusundusun sma na ini wi kondre: „Bika unu ben lasi pasi leki skapu, ma now unu drai kon baka na a herder nanga opziener fu unu sili.”

Pristeri na bun nyunsu — Fu di yu e hori takimakandra nanga sma

¹ Akruderi wan wortu buku dan wan takimakandra na wan „kenki nanga a mofo fu firi, fasi fu si sani, fasi fu denki, ofu idea”. Ma fa yu kan bigin wan takimakandra di abi en gron na ini a beibri te den sma di yu e miti e gens yu kande na relisi sei ofu de druk bezig nanga den eigi afersi? Yeises ben poti aksi fu hari en arkiman kon ini wan takimakandra. — Yoh. 4:9-15, 41, 42.

² Wi musu begi Gado fayafaya fu yepi unu fu feni reti-ati sma èn fu opo na pasi so taki wi kan taki nanga den. A gi fu kotoigi e kon moro makriki efu wi e si ibri ososma leki wan sma di kan tron wan diniman fu Yehovah. A fasi disi fu denki sa yepi wi fu tyari na waarheid go abra na wan lobi, opregti fasi di sa hari den sma di abi belangstelling.

KOBROIKI SAN DE FU KISI

³ A Taki-go-taki-kon-buku (Bakratongo) e gi a tapu blz. 9-15 furu tumusi moi biginwortu. A moro bigi pisi fu den e meki wan tumusi bun kobroiki fu aksi. Arki nanga bun maniri te a ososma e gi piki tapu wan aksi èn gi piki morofara na wan fasi di e meki a ososma si krin taki wi hori den wortu fu en na prakseri. — Ko. 4:6.

⁴ Efu yu e poti wan aksi, dan a no de fu taki taki yu no sabi fa na ososma sa piki. De srekasreka a tapu fu fiti yu takimakandra na san a sma o piki. Pruberi fu meki a takimakandra go doro fu di yu e gi en nanga yepi fu na beibri moro bodoi ete fu na sani di a abi belangstelling gi èn fu di yu e poti moro aksi di e poti en fu prakseri pikinso.

SREKA YU SREFI

⁵ Yu sabi kande kba fa na moro bigi pisi fu den sma na ini yu gebied e denki. Efu dati de so, teki dan biginwortu fu na Taki-go-taki-kon-buku (Bakratongo) di sa abi den moro bun bakapisi na ini yu eigi gebied. Fu di yu sa fiti wan fu den biginwortu disi na a Tori fu takimakandra di wi e kobroiki now, meki kande yu e kisi soifri san yu abi fanowdu. Bigin yu takimakandra nanga den sani di yu prakseri taki a ososma abi belangstelling gi, sori en na problema syatu, èn tyari a tori go morofara na a lusu di a beibri e gi. Efu a e taki wan sani, piki dan positief, no na wan krakeri fasi, a tapu san a e taki. Taki yu e sori belangstelling gi en prakseri nanga en fasi fu denki, musu gi en deki-ati fu taki go doro nanga yu. Pruberi fu feni penti di unu ala tu e agri nanga en èn taki wan sani fu dati. Hori na takimakandra positief fu di yu e poti krakti tapu den Kownukondre blesi leki a lusu di a beibri e gi fu den problema fu libisma.

⁶ Yu musu si fasi fu denki di no abi noti fu du nanga takimakandra leki broki fu hori a takimakandra go doro. Efu a ososma e agri fu taki-go-taki-kon, yu ben sa kan aksi: „Oiti wan ten yu ben luku en fu na sei disi?” Sori dan san a Wortu fu Gado e taki fu a tori. Efu yu e kon si taki a sma no de redelijk, no dwengi en dan fu teki san yu e taki. A moro bun fu yu stóp na takimakandra fu di yu e taki wan sani na wan switi fasi, so taki a pasi e tan opo fu kan pristeri en na bun nyunsu na wan tra okasi na ini a ten di e kon. — Odo 12:8, 18.

⁷ Son sma morofara lobi fu hori wan takimakandra efu na okasi yu e waka go miti den. No draidrai fu bigin takimakandra nanga sma di yu e miti na strati ofu di e sidon ofu e wroko switi na ini a bromki dyari fu den. Kande den e warderi na opregti belangstelling di yu e sori gi san den e du, èn yu kan tyari na takimakandra go na a sei fu na beibri pramisi taki heri-esi grontapu sa tron wan paradèisi. Efu yu e bigin wan takimakandra, pruberi dan fu meki en leki wan prisiri ondrofeni gi na ososma. Fu so fara a e anga fu yu, libi te yu e gwe na sma a baka na ini wan moro bun fasi ini a tori fu Gado, en Wortu nanga den futuboi fu en. Na a fasi disi, awansi efu na a bigin yu no man doro na ati fu en, kande toku a sa teki sani moro esi te wan kotoigi fisiti en wan tra leisi.

Teyokrasia nyunsu

◆ Barbados ben abi wan nyun heimarki fu 1783 preikiman na ini mei, a di fu dri heimarki fu den na ini a dienstyari di psa.

◆ Haiti ben abi wan gro fu 14 procent na ini mei, nanga wan nyun heimarki fu 6427 preikiman di ben gi raport. Den ben abi so srefi nyun heimarki na ini yuru nanga gobaka.

◆ Lesotho ben abi wan nyun heimarki fu 1270 preikiman na ini mei, wan gro fu 18 procent, te yu teki en gersi nanga a gemiddelde fu na yari di psa. Den ben abi wan nyun heimarki fu 2223 beibristudi. Den ben abi 4979 sma na a Memre fesa.

◆ Mexico ben psa na marki fu 300.000 preikiman na in mei: 300.316 ben gi raport. Disi na wan gro fu 14,5 procent te yu teki en gersi nanga a gemiddelde fu a yari di psa. Den ben doro so srefi wan nyun heimarki fu 464.378 osobeibristudi.