Jezus libi nanga diniwroko

Wan leri na ini sar’ati

JEZUS kande de ete ini Naïn, pe a no solanga psa kaba a ben wiki na manpikin foe wan weduwe di ben dede, ofoe kande ai go fisiti wan krosbé foto. Wan fariséman, di ben nen Simon, ben wani leri sabi sote a sma di e doe den sortoe aparti wroko disi. Foe dat’ede a e gi Jezus wan kari foe kon njan na en oso.

Foedi Jezus e si na okasi leki wan mogelijkheid foe jepi den sma di o de drape, a e teki na kari disi soleki a ben teki ooktoe na kari foe njan nanga belastingman nanga sondari ma efoe Jezus e go na ini na oso foe Simon dan a no e kisi na switi prakseri di gewoonlijk e gi na fisitiman.

Foetoe di weri delaila leki wan bakapisi foe foe a waka na tapoe den foegoefoegoe pasi foe Galiléa e kon waran èn doti èn a de wan gwenti foe a teki foe wan sma na joe oso foe wasi den foetoe foe den fisitiman nanga kowroe watra. Ma te Jezus e doro, en foetoe no e wasi. Ooktoe den no e gi en wan bosi foe gi en wan switi kon, aladi disi de wan normaal manirifasi. Èn den no e wrifi en wiwiri nanga oli leki wan sori foe lobi foe teki wan sma na joe oso.

Na a ten foe na njanjan, di den fisitiman ben didon a tafra, wan oema di den no ben kari e kon sondro foe wan sma si na inisé na kamra. Sma sabi en na ini a foto leki wan oema di e libi wan jajolibi. A de seker dati a ben jere den leri foe Jezus èn ooktoe na kari foe en gi ’ala sma di abi hebi foe tjari foe kon na èn kisi kowroe ati’. Èn foe di san di a ben si èn jere ben boewégi en dipi, meki a e go loekoe Jezus now.

A oema e go tanapoe na a tafra abaka Jezus èn e kindi na en foetoe. Te den watra-ai foe en e fadon na en foetoe, a e figi den nanga en wiwiri. A e teki ooktoe en switismeri-oli foe wan batra èn aladi ai bosi en foetoe safri, a e trowe na oli a tapoe. Simon e loekoe èn no e feni en boen. „Efoe a man disi ben de wan proféti,” so ai tak-go-tak-kon na ensrefi, „a ben sa sabi soema èn san a frow disi de di e fasi en, dati a de wan sondoe oema.”

Jezus, di sabi san a e denki, e taki: „Simon, mi abi wan sani foe taigi joe.”

„Leriman, taki!” a e piki.

„Toe man ben abi wan paiman na wan seker man di e leni sma moni”, Jezus e bigin. „A wan ben abi 500 dinari paiman, ma a trawan féfiteni. Di den no ben abi noti nanga san den ben kan pai den paiman baka, a ben taigi den ala toe dati den no ben a foe pai moro. Soema foe den sa lobi en foe dat’ede moro?”

„Mi e denki,” Simon e taki, kande tapoe wan mi-no-kefasi foedi a gersi taki na aksi disi no fiti, „a sma di moe pai moro èn di a taki no a foe pai moro”.

„Joe ben kroetoe a sani joisti”, Jezus e taki. Èn te ai drai ensrefi go now na a oema, ai taigi Simon: „Joe e si a oema disi? Mi kon na joe oso, joe no gi mi watra foe mi foetoe. Ma na oema disi ben nati mi foetoe nanga en watra-ai èn ben dré den nanga en wiwiri. Joe no gi mi wan bosi, ma na oema disi foe sensi a joeroe di mi kon na ini no ben tapoe foe bosi mi foetoe. Joe no ben wrifi mi ede nanga oli, ma na oema disi ben wrifi mi foetoe nanga switismeri-oli”.

Na oema na a fasi disi ben sori berow foe en hoeroedoelibi ini a ten di psa. Foe dat’ede meki Jezus ben tapoe: „Tapoe a gron disi so mi e taigi joe, en sondoe kisi pardon aladi den ben de foeroe, bika a ben lobi foeroe sani, ma den sma di den ben gi pardon weniki abi lobi gi weniki sani.”

Jezus na no wan fasi ben pardon ofoe ben loekoe hoeroedoe leki wan pikin sani. Na tori disi ben sori morofoeroe dati a ben abi sari-ati nanga ferstan gi libisma di e meki fowtoe ini a libi ma di tan e sori dati ai spijti den èn foe dat’ede e kon na Kristus foe kisi lekti. Jezus e gi na oema disi troetroe kowroe-ati foedi ai taki: „Joe sondoe kisi pardon . . . Joe bribi ben jepi joe; go ini vrede.” Lukas 7:36-50; Mattéus 11:28-30.

◆ Fa Jezus gastheer Simon e ontvang en?

◆ Soema e kon na Jezus èn foe san-ede?

◆ Sortoe agersitori Jezus e gebroiki, èn fa ai gebroiki disi?