Yesus libi nanga diniwroko
Wan kiri ini a ten fu friyar-oso
BAKA di Yesus ben gi en apostel instructie, dan a ben seni den tu na tu go ini na gebied. Kan de seiker den brada Petrus nanga Andréas ben go makandra, net soleki Yakobus èn Yohannes, Fililpus nanga Bartholoméus, Thomas nanga Mattéus, Yakobus nanga Thaddéus, nanga Simon èn Yudas Iskáriot. Alape pe den siksi paar evangelium preikiman e kon, den e ferteri a bun nyunsu fu na Kownukondre èn e du wondru fu dresi sma.
Ini ala a ten dati Yohannes a Dopuman de ete ini straf’oso. A de drape now kaba pikinmoro tu jari.Yu e memre kande ete dati Yohannes na publiki ben ferklari dati a de wan fowtu sani gi Herodes Antipas fu teki Herodias na uma fu en brada Filipus gi ensrefi. Fudi Herodes Antipas ben taki dati a ben hori a wet fu Mozes, dan Yohannes nanga reti ben tyari na matifasi disi kon a doro leki sutadu. Dati ben de a rede fu san-ede Herodes ben trowe Yohannes go na ini straf’oso, kande moro furu fudi Herodias ben de na en baka.
Herodes Antipas e ferstan dati Yohannes de wan regtvaardikiman èn a e arki srefi nanga prisiri na en. Fu dat’ede a no sabi krinkrin san fu du nanga en. Herodias na a tra sei no wani si Yohannes na ai srefsrefi èn e tan suku wan fasi fu meki den kisi en. Te fu kaba na okasi ben kon tapu san a ben wakti.
Syatu baka na Pascha fu 32 G.T. Herodes e orga wan bigi fesa fu en friyaridei. Ala den hei lantiman fu Herodes nanga legre ofisiri e de na a fesa èn ooktu den prenspari borgru fu Galiléa de drape. Bakaten na a neti Salóme, na umapikin fu Herodias fu en fosten trow nanga Filipus, e tyari kon na inisei fu dansi gi den fisitiman. Den mansma di de leki sma di e luku e prisiri srefsrefi fu a dansi fu en, di sondro degedege ben moi fu tru.
Herodes e prisiri srefsrefi nanga Salóme. „Aksi ooktu san yu wani èn mi sa gi yu en” a e ferklari. A sweri srefi: „San yu e aksi ooktu mi sa gi yu en, awinsi a de afu fu mi kownukondre.”
Bifo Salóme e piki en a e go na dorosei fu tak-go-tak-kon nanga en mama. „San mi sa aksi?” a e taki.
Now na okasi de! „Na ede fu Yohannes, na Dopuman”, Herodias e piki sondro draidrai.
Esesi Salóme e go baka na Herodes èn e aksi san e kon now: „Mi wani dati yu mu gi mi nownow tapu wan plata preti na ede fu Yohannes na Dopuman.”
Herodes e sari srefsrefi. Ma fudi en fisitiman ben yere a sweri fu en, meki a no e pruberi fu weigri, awinsi dati wani taki dati den sa kiri wan sma di no du noti. Wantewante den e seni wan sma go na a straf’oso nanga a takru komando fu kiri Yohannes. Heri esi a e kon baka nanga a ede fu Yohannes tapu wan plata preti èn a e gi en na Salóme. A e gi en baka na en mama. Te Yohannes disipel e yere san ben psa, den e kon teki en skin èn beri en èn dan den e ferteri ala sani na Yesus.
Bakaten, efu Herodes e yere dati Yesus e dresi sma èn e puru ogri yeye tapu sma, a e frede, bika a e frede dati Yesus futru de a Yohannes di opo komoto fu dede. Fu a ten dati a ben wani fu miti Yesus sote, no fu yere en preiki, ma fu kisi seikerfasi ofu a frede fu en abi wan bun gron ofu no. Mattéus 10:1-5; 11:1; 14:1-12; Markus 6:14-20; Lukas 9:7-9.
◆ Fu san-ede Yohannes de ini straf’oso, èn fu san-ede Herodes wani kiri en?
◆ Fa Herodias e si te fu kabi kans fu meki den kiri Yohannes?
◆ Fu san-ede Herodes wani miti Yesus baka a dede fu Yohannes?