Jezus libi nanga diniwroko

Jezus — Na sani foe trobi

SJATOE baka di Jezus ben de ini a oso foe Simon leki wan fisitiman, a e bigin en di foe toe prèkiwroko-waka psa Galiléa. Tapoe en fosi waka psa na gebied en fosi discipel, Petrus, Andréas, Jakobus nanga Johannes ben go nanga en. Ma now den twarfoe apostel e go nanga en, èn ooktoe wantoe oemasma. Na mindri den joe ben abi Maria Magdalena, Suzanna nanga Johanna, foe soema a man foe en ben abi wan hé positsi ini a oso foe kownoe Herodes.

Omoro Jezus diniwroko ben e wini krakti omoro na trobi ooktoe ini a tori foe en activiteit ben kon mori bigi. Wan man di ogri-jeje ben de na en tapoe, di ben breni ooktoe èn di no ben man taki sma e tjari kon na Jezus. Te Jezus e dresi en, sodati ogri-jeje no de moro tapoe en èn ensrefi now kan taki èn si, dan den ipi sma no de foe hori den. Den e bigin foe taki: „Disi no de kande a Manpikin foe David.”

Den ipi sma ben konmakandra na ini sowan nomroe lontoe na oso pe Jezus ben e tan, dati en nanga en discipel srefi no ben kan gebroiki wan njanjan. Boiti den sma di ben aksi densrefi efoe en ben de na pramisi „Manpikin foe David”, joe ben abi a mindri den ipi sma den méster foe wet nana Fariséman di ben komoto foe Jeruzalem foe gi en wan takroe nen. Te den famiri foe Jezus e jere foe a djoegoedjoegoe di e doe kon lontoe a sma foe Jezus den e kon foe graboe en. Foe san-ede?

We Jezus égi brada no e bribi ete dati a de a Manpikin foe Gado. Ooktoe na djoegoedjoegoe èn na publiki njoengoenjoengoe di a ben meki kon, no de wan sani di e fiti na Jezus di den ben sabi di a ben e gro na Nazareth. Foe dat’ede den e bribi dati wan serjoesoe sani no e waka boen nanga Jezus froestan. „A lasi en froestan”, den e taki, èn ben wani graboe en èn tjari en gwe.

Tokoe sondro foe kan poeroe en poti na wan tra presi a de wan sani di de faste dati Jezus ben dresi a man di ben abi ogri-jeje na en tapoe. Den méster foe wet nanga Fariséman sabi dati den no kan taki dati disi ben psa troetroe, èn ooktoe leki fa den no kan taki dati den tra wondroe foe Jezus ben psa. Foe gi Jezus wan takroe nen, den ben taigi den sma: „A sma disi e poeroe den ogri-jeje soso nanga jepi foe Beëlzebub, na tiriman foe den ogri jeje.”

Foedi Jezus sabi san den méster foe wet nanga den Fariséman e denki, a e kari den kon na en èn a e taki: „Ibri kownoekondre di prati kontrari ensrefi e kon pori, èn ibri foto ofoe ibri oso di prati kontrari ensrefi no sa horidoro. Te Satan soboen e trowe Satan a doro, a prati kantrari ensrefi; fa en kownoekondre sa tan horidoro dan?”

Fa na logica disi e broko ala san den ben taki! Foedi den Fariséman e taki dati sma a mindri den groepoe ben trowe ogri-jeje a doro, meki Jezus e aksi ooktoe: „Efoe mi nanga jepi foe Beëlzebub e trowe den ogri jeje na doro, nanga jepi foe soema joe égi manpikin e trowe den dan a doro.” Nanga tra wortoe, asrefi san di den e feni fowtoe na Jezus Kristus de ooktoe wan sani di de tapoe den. Jezus e warkow ooktoe moro fara: „Ma efoe nanga jepi foe Gado jeje mi e trowe den ogri-jeje na doro, dan na Kownoekondre foe Gado foetroe kon na oen tapoe sondro foe oen ferwakti en.”

Foe gi wan eksempre dati foe trowe ogri-jeje a doro de wan bewijsi foe en makti tapoe Satan, Jezus e taki: „Fa wan sma kan go ini na oso foe wan trangaman èn foefoeroe en ososani efoe a no ben tai na trangawan fosi? Èn dan a kan foefoeroe den sani foe en oso poeroe. A sma di no tanapoe na mi sé, de kontrari mi, èn a sma di no e tjari sani konmakandra nanga mi e panja sani.” Den Fariséman a de krin de kontrari Jezus èn den e sori nanga dati dati den de wrokosani foe Satan. Den e panja den Israëlsma, fara foe Jezus.

Foe dat’ede Jezus e warskow den gensman disi foe Satan dati ’na lé foe pori sma nen di de tege na jeje no sa kisi pardon’. A e tjari kon a krin: „Efoe wan sma foe eksempre e taki wan wortoe tege na Manpikin foe libisma, a kan kisi pardon; ma efoe wan sma e taki wan wortoe tege na santa jeje, a no sa kisi pardon, nono, no ini na seti disi foe sani no ini a wan di e kon.” Den méster foe wet nanga Fariséan dati ben doe na sondoe disi di no kan kisi pardon foedi a sani di ben de krin wan wondroe-wroko foe Gado santa jeje na tapoe wan ogri-ati fasi den ben taki na Satan ben doe en. Mattéus 12:22-32; Markus 3:19-30; Johannes 7:5.

◆ Fa na di foe toe waka foe Jezus psa Galiléa kenki foe a fosiwan?

◆ Foe san-ede den famirman foe Jezus e proeberi foe graboe en?

◆ Fa den Fariséman e proeberi foe gi den wondroe foe Jezus wan takroe nen, èn fa Jezus e sori taki dati no de so?

◆ Den Fariséman e meki a fowtoe foe san, èn foe san-ede?