Yesus libi nanga diniwroko

A kon betre fu wan man di ben gebore breni

TE den dyu e pruberi fu ston Yesus kiri aladi a de na ini na tempel, a e kibri ensrefi èn a e lon gwe. Ma a no e gwe libi Yerusalem, Bakaten, tapu na sabbat, en nanga den disipel e waka na ini na foto èn e si wan man di fu sensi en mama meki en de breni. „Rabbi, suma ben sondu,” den disipel e aksi Yesus, „a man disi ofu en mama nanga papa, dati a ben gebore breni?”

Kande den disipel netleki son rabbi e bribi dati wan sma na ini na bere fu en mama kan sondu. Ma Yesus e piki: „No a man disi, no en papa nanga mama ben sondu, ma a ben psa sodati den wroko fu Gado na en geval ben sa kon bekenti na publiki.” Na breni fu na man no de na bakapisi fu wan sondu di a man srefi ben du ofu spesrutu fowtu ofu sondu di en papa ofu mamn ben du. Na sondu fu na fosi libisma Adam ben meki dati ala sma ben kon gebore onvolmaakti èn na sofasi de ondro mankeri soleki breni fu sensi wan sma gebore. Na mankeri disi fu na man e gi Yesus now na okasi fu meki den wroko fu Gado kon bekenti na publiki.

Yesus e poti krakti fu o tranga fanowdu a de fu du den wroko disi, „Wi mu du den wroko fu en di ben seni mi kon solanga a de deiten”, a e taki. „Na neti e kon, pe nowan sma kan wroko. Solanga mi de na ini grontapu, mi de na leti fu a grontapu.” Dyonsro na dede fu Yesus sa meki en kon na ini dungru na ini na grebi, pe a no kan du wan sani moro. Disten en de wan fonten fu leti gi na grontapu.

Bakaten Yesus e taki den sani disi, a e spiti tapu na gron èn a e meki nanga na spiti wan tokotoko. A e wrifi en tapu den ai fu na man èn a e taki: „Go wasi na ini na watra fu Siloam.” A man e du san Yesus e taki. Èn te a e du disi a kan si! Fa a e breiti te a e drai kon baka, bika fu a fositron ini en libi a kan si!

Birti sma nanga tra sma di sabi en e fruwondru. „A no disi na a man di alaten ben sidon e begi sani?” den e aksi. „Na en”, son sma e piki. Ma trawan no kan bribi: „Kwetkweti, a gersi en nomo.” Ma na man e taki: „Na mi.”

„Fa yu ai kon opo dan?” den sma wani sabi.

„Na sma di nen Yesus, meki tokotoko èn wrifi disi tapu mi ai èn a ben taki: ’Go na Siloam èn wasi.’ Mi go sobun èn wasi èn mi kan si”.

„Pe a man dati de?” den e aksi.

„Mi no sabi”, a e piki.

Den sma e tyari na man di ben breni go now na den kerki fesiman, den Fariseiman. Den man disi e bigin aksi en ooktu fa a du kon dati a ben kan si. „A ben poti tokotoko tapu mi ai, èn mi wasi èn mi kan si now” a man e tyari kon a krin.

Den Fariseiman seiker ben mu prisiri nanga a kon betre fu na breni man! Ma na presi fu dati den e kragi Yesus na publiki. „Na sma disi no de fu Gado”, den e taki. Fu san-ede den e taki disi? „Bika a no e hori na sabbat.” Èn toku tra Fariseiman e aksi densrefi: „Fa wan sma di de wan sondari, kan du den sortu marki disi?” Pratifasi de a mindri den sobun.

Fu dat’ede den e aksi na man: „San yu e taki fu en, fudi a ben opo yu ai?”

„En na wan profeit”, a e piki.

Den Fariseiman e weigri fu bribi disi, Den abi na overtoigi dati Yesus èn na man disi ben sroto wan sortu kibri kruderi fu bidrigi den sma. Fu lusu na afersi, den e kari fu dat’ede na papa nanga mama fu na begi-man fu aksi den sani. Yohannes 8:59; 9:1-18.

◆ Fu san na breni fu na man ben kon èn fu san a no ben kon?

◆ San na a neti pe nowan sma kan wroko?

◆ Fa den sma e du di sabi a man te a kon betre?

◆ Fa den Fariseiman a mindri makandra ben kon de prati fu na kon betre fu na man?