Yesus libi nanga diniwroko

Na tranga-edefasi fu den Fariseisma fu no bribi

NA papa nanga mama fu na fosten breni begiman e frede te den mu kon fesi den Fariseiman. Den sabi taki na bosroiti ben teki fu trowe ibri wan sma komoto fu na dyu kerki di e sori bribi na ini Yesus. Sowan koti puru fu demakandra nanga tra sma na ini na gemeenschap kan tyari bun bigi problema kon, spesrutu gi wan pôti osofamiri. Fu dat’ede meki den papa nanga mama de voorzichtig.

„Na disi na un manpikin, di leki fa unu en taki ben gebore breni?” Den Fariseiman e aksi. „Fa a du kon dan dati a e si na a momenti disi?”

„Wi sabi dati disi na wi manpikin èn dati a ben gebore breni”, na papa nanga mama e taki. „Ma fa a du kon dati a e si now, wi no sabi, ofu suma ben opo en ai, wi no sabi.” A manpikin fu den seiker ben ferteri den ala sani san ben psa, ma a papa nanga mama ben taki tactvol: „Aksi ensrefi. A de wan bigisma. A mu taki gi ensrefi.”

Fu dat’ede den Fariseiman e kari a man kon agen. A tron disi den e pruberi fu tapu skreki gi en fudi den e ferteri dati den tyari materiaal kon makandra teige Yesus di no e taki bun fu en. „Gi grani na Gado”, den e taki. „Wi sabi dati a sma disi na wan sondari.” Na fosten breni man no e taki dati a kragi fu den no de so, ma a e taki: „Ofu a de wan sondari mi no sabi.” Ma a e taki morofara: „Wan sani mi sabi wel, dati mi, aladi mi ben breni, na a momenti e si.”

Ini wan muiti fu feni wan fowtu na ini en kotoigi, dan den Friseiman e aksi agen: „San a du nanga yu? Fa a opo yu ai?”

„Mi taigi un kaba,” a man e geme, „èn ete un no ben arki. Fu san-ede yu wani yere en agen?” Nanga spotu a e aksi: „Unu wani tron ooktu en disipel?”

Na piki disi e meki den Fariseiman atibron srefsrefi. „Yu de wn disipel fu a man dati,” den e taki tapu wan kragi fasi, „ma wi na disipel fu Mozes. Wi sabi dati Gado ben taki nanga Mozes; ma fu a sei fu a man disi, wi no sabi pe a komoto.

Nanga fruwondru na sakafasi begiman e taki: „Disi seiker na wan wrondru, dati un no sabi fu pe a komoto èn toku a opo mi ai.” Sortu leri mu puru na inu disi? Na begiman e sori tapu na sani di ala sma e teki: „Wi sabi dati Gado no e arki na sondari, ma efu wan sma e frede Gado èn e du en wani, dan a e arki na so wan sma. Fu granwe kaba sma noiti ben yere dati wan sma ben opo na ai fu wan sma di ben gebore breni.” Fu dat’ede na leri de krin: „Efu a man disi no de fu Gado, dan a no ben kan du kwetkweti noti.”

Den Fariseiman no abi wan piki na tapu sowan rechtstreeks èn krin fasi fu tak-go-tak-kon. Den no man si na waarheid ondro ai èn fu dat’ede den e bari taki: „Yu gebore krinkrin na ini sondu èn yu e leri unu ete?” Tapu disi den e trowe a man a doro, aladi a de krin dati den e trowe en komoto fu na dyu kerki.

Te Yesus kon sabi san den ben du a e miti a man èn a o taigi en: „Yu e bribi na ini a manpikin fu libisma?”

„Suma na en meneer,” na fosten breni man e taki „sodati mi kan poti bribi na ini en?”

„En na a sma di e taki nanga yu”, Yesus e piki.

Wantronwantron na man e boigi na fesi Yesus èn e taki: „Mi e poti bribi na ini en, meneer.”

Yesus e tyari morofara kon a krin: „Na fu a krutu dati mi ben kon na a grontapu disi, dati den sma di no ben e si ben sa si ma den sma di e si ben sa kon breni.”

Tapu disi den Fariseiman e aksi di e arki: „Wi de ooktu breni sonte?” Efu den ben sa erken dati den ben breni na yeyefasi, dan no wan pardon ben sa de gi na gens fu den teige Yesus.

Yesus e taigi den: „Efu un ben breni dan un no ben sa abi sondu.” Toku ini na tranga-edefasi fu den ati den e hori dati den no breni èn no abi yeye leri fanowdu. Fu dat’ede meki Yesus e taki: „Now unu e taki: ’Wi e si’. Unu sondu e tan.” Yohannes 9:19-41.

◆ Fu san-ede na papa nanga mama fu na fosten breni man frede te den mu kon na fesi den Fariseiman, èn sortu voorzichtig piki den e gi fu dat’ede?

◆ Fa den Fariseiman e tapu skreki gi na fosten breni man?

◆ Sortu logis argument fu na man e meki den Fariseiman atibron?

◆ Fu san-ede den man no kan kisi pardon fu na gens fu den teige Yesus?