Yesus libi nanga diniwroko

Rai na Maria èn leri fa fu begi

NA INI NA TEN fu na diniwroko fu Yesus a ini Yudeia a e go na ini na pikin dorpu Bethanië. Dyaso Martha, Maria, den brada Lazarus e libi. Kande Yesus ben miti den dri disi a fesi kaba na ini na ten fu en diniwroko èn a de kaba wan bun mati fu den. Awansi fa a no fa Yesus e go now na oso fu Martha èn a e bari Yesus wan switikon.

Martha wani gi Yesus den moro bun sani di a abi. A de fu tru wan bigi grani fu abi na pramisi Messias na yu oso! Martha abi en druk nanga na meki klari fu wan bun nyanyan èn na sorgu fu furu finifini pisi, di abi leki marki fu meki a de fu Yesus drape de wan switiwan nanga ala makriki sani.

Martha sisa Maria na a tra sei e sidon na Yesus futu sei èn e arki na en. Baka wan pisten, dan Martha e kon tu èn e taigi Yesus: „Masra, a no e trobi yu taki mi sisa meki mi e sorgu fu ala sani? Taigi en fu dat’ede fu kon yepi mi.”

Ma Yesus no e taigi Maria noti. Na presi fu dati a e gi Martha rai fu no broko ede tumsi fu sani na skin fasi: „Martha, Martha”, a e piri ai gi en na wan switi fasi, „yu e broko ede èn e meki yusrefi sorgu fu furu sani. Toku pikinso sani de fanowdu, ofu soso wan.” Yesus e taki taki a no da fanowdu fu gi furu ten na a meki klari fu furu sortu nyanyan gi wan tafra. Wantu nyanyan soso de nofo, ofu srefi fu meki wán sortu nyanyan klari.

Den prakseri fu Martha bun; a wani de wan uma di lobi fu sorgu gi fisitiman. Ma fudi a e poti tumsi prakseri na den sani na skin sei, meki a e misi na okasi fu kisi leri fu Gado eigi Manpikin srefi! Fu dat’ede meki Yesus e taki te fu kaba: „Fu na sei fu Maria, a ben teki na bun pisi èn den no sa teki dati puru fu en.”

Bakaten, na wan tra okasi, wan disipel e aksi Yesus: „Masra, leri unu fu begi, soleki Yohannes ben leri dati ooktu na en disipel.” Kande na disipel disi no ben de drape di so wan sani fu wán nanga afu yari a fesi Yesus ben gi na ini en Bergitaki na Modelbegi. Fu dat’ede Yesus e taki en instructie ete wantron, ma moro fara e gi wan eksempre fu meki kon bun na fesi o fanowdu a de fu horidoro na ini begi.

„Suma fu unu sa abi wan mati”, na so Yesus e bigin, „èn sa go na mindri fu na neti na en èn taigi en: ’Mati, leni mi dri brede, bika dyonsrode wan mati fu mi komoto na wan reis kon na mi, èn mi no abi noti fu gi en’? Èn na dati e gi fu inisei na piki: ’No ferferi mi moro langa. Na doro sroto kaba èn mi yongu pikin nanga mi de na bedi kaba; mi no kan opo fu gi yu wan sani.’ Mi e taigi yu: Awinsi a no sa opo èn gi en wan sani fudi a de en mati, dan seiker fu en asranti fasi fu tan aksi a sa opo èn gi ala san a abi fanowdu.”

Nanga na teki sani gersi nanga makandra Yesus no wani sori taki Yehovah no sa de klari fu yeri tranga begi, soleki na mati na ini na tori. Nono, ma a e sori taki efu wan mati di no de klari fu yepi toku sa du wan sani fu di na trawan e tan aksi, dan lobi Tata ini hemel seiker sa du disi. Du dat’ede Yesus e taki moro fara: „Fu dat’ede mi e taigi unu: Tan aksi, èn unu sa kisi; tan suku, èn unu sa feni; tan naki doro, èn den sa opo gi unu.”

Yesus e tyari dan onvolmaakti, sondu libisma tata kon ini na tori èn e taki: „Wan tata de ooktu na un mindri di, efu en manpikin aksi en wan fisi, sa gi en sonte wan sneki na presi fu wan fisi? Ofu efu a aksi wan eksi sa gi en wan skorpiun? Efu sobun, aladi unu takru, sabi fu gi bun sani na unu pikin, omeni moro dan na Tata ini hemel sa gi santa yeye na a sma di e aksi fu dati!” Iya, fa Yesus e gi wan dek’ati di e buweigi na ati fu horidoro na ini begi. Lukas 10:38–11:13.

◆ Fu san-ede meki Martha e du someni furu sani ini na tori fu na fisiti fu Yesus?

◆ San Maria e du, èn fu san-ede Yesus e prijse en na presi fu Martha?

◆ San e meki Yesus go taki ete wantron en instructie fu a tori fu begi?

◆ Fa Yesus sori nanga wan eksempre taki a de fanowdu fu horidoro na ini begi?