Meki joe vrede kon moro foeroe nanga jepi foe soifri sabi

„Meki no-ferdini-boenfasi èn vrede kon moro foeroe gi joe nanga jepi foe wan soifri sabi foe Gado èn foe Jezus, wi Masra”. — 2 PETRUS 1:2.

1, 2. (a) Foe san-ede wi kan teki wan vrede matifasi nanga Gado gersi nanga wan trow? (b) Fa wi kan meki na vrede foe wi nanga Gado kon moro tranga?

NA MATIFASI foe vrede nanga Jehovah Gado di ben doe kon na a ten foe joe dopoe, de ini wantoe fasi leki wan trow. O switi èn moi na trow de de ooktoe, disi de soso na bigin foe wan diri matifasi. Te moeiti nanga ten e poti go na ini wan trowlibi, èn te safrisafri den patna e gro na ini ondrofeni, dan na matifasi disi sa gro kon tron wan sani di e de moro nanga moro wan diri sani èn e tron wan boen haven ini moeilek ten. Na so na vrede foe joe nanga Gado kan gro nanga jepi foe faja èn nanga a jepi foe Gado.

² Na apostel Petrus ben tjari kon a krin fa den sma di ben kisi wan bribi ben kan meki na vrede foe den nanga Gado kon tranga. A ben skrifi: „Meki no-ferdini-boenfasi èn vrede kon moro foeroe gi joe nanga jepi foe a soifri sabi foe Gado èn foe Jezus, wi Masra.” — 2 Petrus 1:1, 2.

„Soifri sabi foe Gado”

3. San a wani taki foe abi soifri sabi foe Jehovah nanga Jezus?

³ Na Griki wortoe di gebroiki ini na context disi gi „soifri sabi” (e.pi.gno’sis) wani taki wan moro dipi, èn moro krosbé sabi. Na vorm foe na werkwortoe kan sori tapoe sabi di wan sma kisi nanga persoonlek ondrofeni èn Lukas 1:4 e gi en baka nanga „sabi dorodoro”. A sabiman foe Griki Culverwel e taki a abi gi en na prakseri foe „kon de bekenti moro boen nanga wan sani foe san a fesi mi no ben sabi; a loekoe moro soifri foe wan sani di a fesi ben de farawe”. Foe kisi sowan „soifri sabi”, wani taki foe leri sabi Jehovah èn Jezus Kristus tapoe wan moro krosbé gron leki persoon, foe kon sabi moro boen den égifasi foe den.

4. Fa wi kan meki na sabi foe wi foe Gado kon moro foeroe èn foe san-ede disi e meki a vrede foe wi nanga en go na fesi?

⁴ Toe fasi foe kisi na sabi disi de nanga jepi foe boen persoonlek studi-gwenti èn a fisiti geregeld foe den komakandra foe a pipel foe Gado. Tapoe den fasi disi wi sa kon sabi moro krin sortoe lin Gado e waka èn fa a e denki. Joe sa kan man kisi moro boen prenki foe en persoonlekheid. Ma foe kon sabi Gado foe moro krosbé, wani taki foe waka na en baka èn foe sori na prenki disi. Jehovah e ferteri foe eksempre foe wan sma di e sori no-gridifasi foe Gado èn ben taki na a ten dati: „A no ben de wan geval foe a sabi foe mi?” (Jeremia 22:15, 16; Efese 5:1) Foe waka moro soifri baka Gado, e meki na vrede foe joe nanga en gro foedi joe e go na fesi ini a leri foe a njoen sma di joe moe de, „di nanga jepi foe soifri sabi e kon njoen akroederi na prenki foe na sma di ben meki en”. Joe e de wan moro switi sani ini na ai foe Gado. — Kolosse 3:10.

5. (a) Fa soifri sabi ben jepi wan kristen oema? (b) Na sortoe fasi wi kan waka moro soifri na baka foe Jehovah?

⁵ Wan kristen oema di ben nen Lynn ben abi wan trobi nanga wan kompe kristen èn a ben feni en wan moeilek sani foe gi pardon. Ma na soifri persoonlek studi di Lynn ben meki, ben tjari en go so fara foe go ondrosoekoe na fasi foe en. „Mi ben go prakseri pikinso sortoe Gado Jehovah de, dati a no e hori sma na ati”, a ben erken. „Mi ben prakseri na ala den pikin sani di wi e doe Jehovah ibri dé, èn tokoe a no e teri den gi wi. Efoe joe teki disi gersi nanga dati dan na afersi disi nanga mi kristen sisa ben de so pikin. Alaten baka te mi ben si en, mi ben taki foe dat’ede na misrefi: ’Jehovah lobi en net so meni leki a lobi mi.’ Disi ben jepi mi foe wini a problema.” Joe e si kontren tapoe fa joe kan waka moro soifri baka Jehovah ooktoe? — Psalm 18:35; 103:8, 9; Lukas 6:36; Tori foe den Apostel 10:34, 35; 1 Petrus 1:15, 16.

Soifri sabi foe Kristus

6. Fa Jezus Kristus ben sori dati a ben si na prékiwroko leki a moro prenspari sani?

⁶ Foe kisi soifri sabi foe Jezus, dan wan sma moe abi na „denki foe Kristus” èn waka na en baka (1 Korinte 2:16). Jezus ben de wan faja prékiman foe a waarheid (Johannes 18:37). En toemsi krakti evangeliumgeest no ben tapoe nanga den denki nanga kroetoe di sma ben kroetoe sani a fesi ini a presi pe a ben de. Aladi tra djoe no ben wani si Samaritaansma na ai, tokoe a ben gi kotoigi na wan Samaria oema na wan peti, ija, soso wawan a sabi foe wan langa takmakandra a publiki nanga sortoe oema ooktoe, sma ben kan si na wan takroe fasi! Ma Jezus no ben gi pasi dati den firi di ben de ini a gemeenschap ben tapoe en foe gi kotoigi. A wroko foe Gado ben gi kowroe ati. A ben taki: „Mi njanjan de dati mi doe a wani foe en di ben seni mi kon èn foe klari en wroko.” Foe si na prisiri dati sma soleki na Samaria oema èn foeroe foe den fotoman foe en ben teki a tori boen, ben de gi iezus wan sani di ben gi en wan tranga leki njanjan. — Johannes 4:4-42; 8:48.

7. (a) Sabi foe Jezus moe poesoe oensrefi foe doe san? (b) Gado e ferwakti dati ala en dienstknegti préki ooktoe?

⁷ Joe e prakseri net so foe disi leki Jezus? Wi e agri dati foe bigin wan takmakandra di e go foe a bijbel nanga wan freemde sma de wan moeilek sani gi foeroe sma èn nofotron tra sma na ini a gemeenschap kan loekoe a wan takroefasi!a Ma efoe wi wani abi na srefi jeje-fasi foe Jezus dan wi no kan lon komoto gi san e kon now: Wi moesoe gi kotoigi. A no de foe taki dati wi alamala no kan préki asrefi foeroe. Disi e kenki foe den bekwaamheden èn omstandigheden foe wi. Soboen, no denki dati Gado noiti de tevrede nanga joe santa dienst. A sabi di wi abi foe Jezus, moesoe gi wi dek’ati foe doe wi moeiti. Jezus ben prijse dienst di ben doe nanga wan sma heri ati. — Mattéus 13:18-23; 22:37.

Na fanowdoe foe no wani si goddelowsoefasi na ai

8, 9. San de wantoe sani di Gado no wani si na ai, èn fa wi kan sori na srefi fasi disi foe no wani si ogri na ai?

⁸ Soifri sabi e jepi wi ooktoe foe froestan sortoe sani Jezus nanga Jehovah no man si na ai (Hebrewsma 1:9; Jesaja 61:8). „Siksi sani de di Jehovah troetroe no wani si na ai; ija, sébi de gi en sili leki wan tegoe sani: bigi memre ai, wan lé tongo, wan anoe di e trowe broedoe foe sma di no doe noti, wan ati di e meki ogri plan, foetoe di e hasti ensrefi go na san ogri; wan falsi kotoigi di ferteri lé èn ibriwan sma di e meki trobi kon a mindri brada” (Odo 6:16-19). Den fasi nanga libi disi de „wan tegoe sani gi en sili”. Na Hebrew wortoe di vertaal dja nanga „tegoe sani” e kon foe wan wortoe di wani taki „no wani si na ai, e foega foe wan sani”, „no kan ferdrage wan sani, ini a tori foe a sani san ala zintuig no man teki; no wani si na ai nanga atibron”. Soboen foe de ini vrede nanga Gado, wi moe kweki so wan tegoe foe den sani di a no wani si na ai.

⁹ No wani si foe eksempre „hémemre ai” èn ibri fasi foe hémemre. Son sma e feni dati baka a dopoe foe den den kan doe en densrefi moro fara sondro na geregelde jepi foe den sma di ben gi den leri. Na njoen kristen moe teki jepi nanga sakafasi tapoe a pasi di e go na stabiliteit foe a waarheid. Tan farawe ooktoe foe taki ogri, so dati makriki ’trobi kan kon a mindri brada’. Nanga takmakandra di no de wan switi wan, feni fowtoe di no de nanga leti ofoe foe panja lé, dan kande wi no e „trowe broedoe foe sma di no doe noti”, ma seker wi kan roewineer a boen nen foe wan sma. Wi no kan. de ini vrede nanga Gado efoe wi no de ini vrede nanga wi brada (Odo 17:9; Mattéus 5:23, 24). Gado e taki ooktoe ini en Wortoe dati ’a no wani si brokotrow na ai’ (Maleachi 2:14, 16). Joe e wroko na en, efoe joe ben trow, foe meki na trowbanti foe joe kon moro tranga? Joe e tegoe foe en foe fronsoe èn foe gi joesrefi fri di no fiti nanga na patna foe wan tra sma? Joe no wani si seks hoeroedoe na ai netleki Jehovah? (Deuteronomium 23:17, 18) A no wan makriki sani foe no wani si den sortoe doe disi na ai foedi kande den de wan sani di e hari wi sondoe meti èn a grontapoe e si den leki wan boen sani nanga wan lafoe fesi.

10. Fa wi kan kweki na ogri-ati foe no wani si ogri na ai?

¹⁰ Leki wan jepi foe kweki na si di wi no moe si goddelowsoefasi na ai meki wi moe tan farawe foe soekoe prisiri ini film, tv-programma ofoe boekoe di abi na ini den ogri-jeje tori ofoe na ini san hoeroedoe ofoe tranga e kon na fesi (Deuteronomium 18:10-12; Psalm 11:5). Foe meki a gersi leki ogridoe ’no de so kefarlek takroe’, ofoe srefi wan lafoe sani, dan sowan sortoe prisiri e njan moeiti na ondro foe kweki wan ogri-ati gi a doe foe ogri. Faja begi na a tra sé sa jepi bika Jezus ben taki: „Begi doronomo, so dati joe no kon ini tesi. Na jeje a no de foe taki wani, ma na meti swaki” (Mattéus 26:41). Foe kon tanapoe fesi nanga fesi nanga wan krakti lostoe foe na skin wan kristen ben taki: „Mi e dwengi misrefi foe begi. Sontron mi e firi misrefi leki mi no do warti foe go na Jehovah, ma foedi mi e dwengi misrefi, èn e seni tranga begi go na en, meki mi e kisi na krakti di mi abi fanowdoe.” Joe sa froestan moro betre foe san-ede Jehovah e tegoe foe ogridoe efoe joe ini joe jeje meki den takroe bakapisi foe en psa na joe fesi. — 2 Petrus 2:12, 13.

11. Sortoe sani ten na ten kan meki joe broeja?

¹¹ Aladi joe de ini vrede nanga Gado, tokoe ten na ten joe sa abi en moeilek nanga den aladé spanning nanga tesi, èn srefi nanga joe égi swakifasi. Hori na ini prakseri dati joe ben meki joesrefi de wan spesroetoe marki foe Didibri. A e feti nanga densma di e hori den komando foe Gado èn di de Jehovah Kotoigi! (Openbaring 12:17) Fa joe kan kibri foe dat’ede joe inisé vrede?

Kakafoetoe gi rampoe di e trobi vrede

12. (a) San de na achtergrond foe Psalm 34? (b) Fa na bijbel e skrifi foe den firi foe David ini na pistori disi?

¹² „Foeroe den rampoe de foe na regtvaardikiwan”, David ben skrifi na ini Psalm 34:19. Akroederi na tapsé skrifi foe na Psalm disi dan David ben lon komoto foe dede. Tapoe a lon foe en gi kownoe Saul David ben soekoe kibri na Achis, na a Filistijn kownoe foe Gath. Den dinari foe na kownoe dati ben herken David èn foe di den ben e memre en fosten dek’ati doe leki sroedati gi Israël, meki den ben gi kragi foe en na Achis. Di David ben kisi na takmakandra disi foe jere, a „ben teki den wortoe disi na ati, èn a ben kon frede foe Achis ede, na kownoe foe Gath” (1 Samuël 21:10-12). Disi ben de, a no so, na gebortoe presi foe Goliath, èn David ben kiri na dek’ati man foe den — a ben tjari srefi na fet’owroe foe na bigi langa man! Den ben sa gebroiki now na bigi fet’owroe foe koti en ede poeroe nanga dati? San David ben kan doe? — 1 Samuël 17:4; 21:9.

13. San David ben doe ini a ten foe na rampoe disi, èn fa wi kan waka na baka en eksempre?

¹³ David ben go nanga faja tranga jepi-babari e begi Gado. „Na mofinawan disi ben bari, èn Jehovah srefi ben jere. Èn foe ala en benawtoe A ben ferloesoe en”, David ben taki. A ben taki ooktoe: „A ben ferloesoe mi foe ala mi skreki” (Psalm 34:4, 6, 15, 17). Joe ben leri ooktoe foe go na Jehovah nanga tranga begi èn foe trowe joe ati na fesi en na ini ten foe skreki nanga brok’ede? (Efese 6:18; Psalm 62:8). Aladi den benawtoe omstandigheid na ini san joe de no de so dramatisch leki na ondrofeni foe David, tokoe joe sa si dati Jehovah sa kon jepi tapoe a joisti ten (Hebrewsma 4:16). Ma David ben doe more leki begi.

14. Fa David ben gebroiki en „denki-krakti” èn ini san Jehovah ben sorgoe foe jepi wi foe doe asrefi?

¹⁴ David ben go „sori en gosontoe froestan trafasi na ini den ai èn ben go tjari ensrefi leki wan lawman.  . . . Te foe kaba Achis ben taigi en dinari: ’Drape joe e si wan man di e tjari ensrefi leki wan lawman. Foe san-ede joe e tjari en kon na mi?’” (1 Samuël 21:13-15) David ben go prakseri wan triki di ben meki a lon komoto. Jehovah ben blesi den moeiti foe en. Na so Jehovah e ferwakti ooktoe foe wi te wi kon tanapoe a fesi foe moeilek problema dati wi gebroiki wi froestan èn no ferwakti eenvoudig dati Gado sa loesoe den gi wi. A gi wi en Wortoe di skrifi nanga santa jeje, di sa gi „sma di de sondro ondrofeni koni . . . sabi nanga denki-krakti” (Odo 1:4; 2 Timotéus 3:16, 17). Gado sorgoe ooktoe foe gemeente owroeman, di kan jepi wi foe kon sabi fa wi kan hori na den markitiki foe Gado (1 Thessalonika 4:1, 2). Den man disi kan gi joe nofotron jepi ini a doe foe ondrosoekoe wroko ini den boekoe foe na Wachttorengenootschap foe jepi joe foe teki wan joisti bosroiti ofoe foe kakafoetoe gi wan problema.

15. Foe san-ede Psalm 34:18 e gi trowstoe?

¹⁵ Srefi te wi ati sari foe wi égi swakifasi ofoe fowtoe ede, wi kan kibri wi vrede nanga Gado, efoe wi abi na joisti jejefasi. David ben skrifi na ini Psalm 34:18: „Jehovah de krosbé den wan di ati broko; èn a e ferloesoe den di jeje masi.” Efoe wi aksi pardon èn doe den fanowdoe stap foe poti afersi reti (spesroetoe te ai go foe wan serjoesoe fowtoe), Jehovah sa tan de krosbé foe wi èn jepi wi na emotioneel fasi. — Odo 23:13; Jesaja 55:7; 2 Korinte 7:9-11.

Persoonlek ondrofeni e gi vrede

16. (a) San de ete wan fasi tapoe san wi kan kisi soifri sabi foe Gado? (b) Ferklari den wortoe foe David „Tesi èn si dati Jehovah de boen”?

¹⁶ Boiti a teki na ini wi foe jeje bodoi, dan ete wan fasi de tapoe fa wi kan kisi soifri sabi foe Gado, dati wani taki foe ondrofeni persoonlek en lobi jepi (Psalm 41:10, 11). Foe kon fri foe wan benawtoe omstandigheid no wani taki alaten a kabo wantewante ofoe krinkrin foe wan problema; a kan de dati joe moe man ferdrage en (1 Korinte 10:13). Aladi David libi ben kibri na ini Gath, tokoe difrenti jari a ben de wan loweman èn a ben moe si ondro ai na wan kefar baka a trawan. Psa ala den problema disi David ben firi fa Jehovah ben broko ede nanga en èn ben jepi en. A ben feti na baka vrede nanga Gado èn a ben feni dati, èn a ben leri dati den sma di e doe disi „no sa mankeri no wan boen sani”. Foedi David ben ondrofeni persoonlek fa Jehovah ben hori baka gi en ini ten foe rampoe, meki a ben kan taki: „Tesi èn si dati Jehovah de boen; kolokoe na tranga man na skinfasi de di e teki en leki en kibri-presi.” — Psalm 34:8-10, 14, 15.

17. Sortoe krakti a ben abi tapoe wan bepaalde oso-famiri di den ben teki Jehovah leki den kibri-presi na ini a ten foe wan rampoe?

¹⁷ Foe teki Jehovah leki joe kibripresi te joe e psa moeilek ten, sa jepi joe ooktoe foe ’tesi èn si dati Jehovah de boen’. Nanga wan ongolokoe wan kristen ben lasi na ini na midden-westen foe den Verenigde Staten na boen wroko di ben e pai foeroe moni di a ben abi tina-fo jari psa kaba. Foedi a no ben abi wan wroko foe feni moni, meki en nanga en oso-famiri begi tranga na Gado foe jepi. Ma na a tra sé den ben koti ooktoe den onkostoe foe den, den go piki alési na gron di ben de krosbé èn ben go fisi foe feni njanjan. Nanga a jepi foe wan-toe sma ini a gemeente èn nanga a teki foe wroko foe wan pisten efoe dati ben de, a oso-famiri disi di ben de foe fo sma ben man foe psa a libi. Te a mamam e denki go baka, a ben taki wan jari baka a rampoe: „Wi kan meki wisrefi bribi taki wi fertrow tapoo Jehovah aladi te joe loekoe en boen wi e fertrow tapoe wi égi bekwaamheden, wi trowpatna nanga wi wroko. Ma wi e leri foe poti fertrow troetroe tapoe En. Den tra sani disi kan teki poeroe, ma Jehovah noiti ben libi oenoe — no wan momenti ete. Aladi wi abi soso na moro fanowdoe sani di wi abi fanowdoe, tokoe a matifasi di wi leki oso-famiri abi nanga Jehovah ben kon moro krosbé.”

18. San sa jepi joe foe ferdrage srefi tranga ede problema?

¹⁸ Ija, a kan de dati joe abi foe doe nanga tranga-ede moni problema. Ofoe wan sma kande e kisi kwinsi foe wan siki na skinfasi di no e kabal, wan trobi nanga wan tra sma foe di den persoonlekheid no e fiti, wan emotioneel problema soleki depressiviteit, ofoe wan foe den boen foeroe tra problema di kan sori densrefi. Tokoe joe sa abi a bribi dati a e ondersteun joe, te joe sabi Gado troetroe (Jesaja 43:10). Na fertrow disi di no de foe broko sa jepi joe foe horidoro èn foe abi „na vrede foe Gado, di e psa ala prakseri”. — Filippi 4:7.

19. Fa wi sabi dati Jehovah no e teki a pina foe wi lekti?

¹⁹ Te wi e psa wan moeilek ondrofeni, no frigiti dan noiti dati Jehovah sabi sortoe pina joe e ondrofeni. Na ini wan Psalm di David ooktoe ben meki di a ben prakseri san a ben ondrofeni ini Gath a ben begi Jehovah tranga: „Poti den watra-ai foe mi tog na ini wan saka foe leer. Den no de ini joe booekoe?” (Psalm 56:3) Gado ben arki seker na a begi foe David. Fa a de wan trowstoe foe sabi dati Gado e kisi iniwan saka foe leer den watra-ai disi di doe kon foe sari nanga benawtoe ede, net soleki wan sma ben sa kanti diri win ofoe diri watra foe dringi go ini sowan saka di e hori sani! Den sortoe watra-ai ben sa kibri alaten na ini a memre, ija, skrifi na ini a boekoe foe Gado. O safoe den sorgoe foe Jehovah de!

20. Fa wi kan meki na vrede foe wi nanga Gado kon moro foeroe?

²⁰ A dopoe foe joe soboen de soso a bigin foe wan vrede matifasi nanga Gado. Joe kan meki a vrede foe joe nanga Gado kon moro foeroe te joe leri sabi den persoonlek jejefasi foe Gado nanga Jezus moro boen èn te joe ondrofeni foe égi ondrofeni fa Jehovah ben hori-baka gi joe ini tesi. No wawan joe sa abi wan krosbé matifasi nanga Jehovah di sa de wan boen haven gi joe ini disi ten, ma joe sa abi ooktoe na diri howpoe foe libi foe tego ini na Paradijs, pe joe „sa feni switi prisiri ini na vrede psamarki.” — Psalm 37:1,11, 29.

[Foetoewortoe]

Joe a memre disi ete?

◻ Tapoe sortoe fasi wi kan kisi soifri sabi foe Gado nanga Jezus?

◻ Wi sa kisi tranga foe doe san te wi waka baka Gado nanga Jezus?

◻ Fa wi e waka baka Gado ini a no wani si foe ogri na ai?

◻ Fa wi kan hori vrede aladi moeilekheid sa de?