Yesus libi nanga diniwroko

De leki fisitiman na wan prenspari Fariseiman

YESUS de leki fisitiman na ini na oso fu wan prenspari Fariseiman, pe dyonsrode a ben dresi wan man di ben abi waterzucht. Te Yesus e si taki tra fisitiman e teki prenspari presi na a nyanyantafra, dan a e gi wan les na ini sakafasi.

„Te wan sma kari yu kon na wan trowoso”, na so Yesus e gi rai, „no go didon dan na a moro prenspari presi. Kande na asrefi ten den kari wan sma di de moro prenspari leki yu, dan a sma di ben kari yu èn na sma, sa kon èn taigi yu: ’Gi a man disi na presi.’ Èn dan nanga furu syen yu mu go sidon na a moro mendri presi.”

Fu dat’ede Yesus e gi na rai, „Go didon tapu na moro mendri presi te den kari yu, sodati te a sma di ben kari yu, e kon, a sa taigi yu taki: ’Mati, go moro hei.’ Dan grani sa kon gi yu na fesi fu ala den tra fisitlman fu yu.” Yesus e meki a les kon moro krin a fesi te a e bosroiti fu taki: „Bika ibriwan sma di e hei ensrefi, den sa lagi en, èn a sma di e lagi ensrefi, den sa hei en.”

Dan Yesus taki nanga na Fariseiman di ben kari en èn e ferteri fa wan sma kan sreka wan bakadina nyanyan di trutru abi verdienste na Gado. „Te yu sreka wan bakadina ofu neti nyanyan, no kari dan yu mati ofu yu brada ofu yu famiri èn ooktu no wan gudu birtisma kon. Leki wan sani fu pai yu baka na wan of tra ten den ben sa kari yu kon ooktu èn dan yu sa kisi a paiman fu en baka. Ma te yu e sreka wan fesa nyanyan kari dan pôtisma, malengriman, lanman nanga breniman; èn yu sa de koloku, fudi den no abi noti nanga san den kan pai yu baka.”

Fu sreka wan nyanyan gi den sma di no abi en, sa gi koloku na a giman fudi, soleki Yesus e tyari kon na krin gi a sma di a de na fisiti na en, ’yu sa kisi pai fu en na ini na opobaka fu den regtvaardikiwan’. Na pori disi fu Yesus fu na nyanyan disi di abi waarde na Gado e meki wan tra fisitiman denki na wan tra nyanyan: „Koloku a sma de di e nyan brede na ini na Kownukondre fu Gado”, na fisitiman disi e taki. Ma a no alasma e feni na koloku fruwakti disi wan warti sani, soleki Yesus morofara e sori nanga yepi fu wan agersitori.

Wan seiker sma ben seti wan bigi neti nyanyan èn a ben kari furu sma kon. Èn. . . a ben seni en srafu go fu taigi den sma di ben kisi na kari taki: ’Un kon bika ala sani de now klarklari.’ Ma den alamala ben bigin fu pardon den srefi. Na fosiwan ben taigi en: ’Mi bai wan gron èn a de fanowdu fu mi go luku èn mi e aksi yu pardon.’ Èn wan trawan ben taki: ’Mi ben bai feifi paar kaw èn mi mu go keur den; mi e aksi pardon.’ Wan trawan baka ben taki: ’Mi trow pas wan uma èn datmeki mi no kan kon.’

Fa disi bon de wan slap aksi fu pardon! Wan gron ofu meti gewoonlek ben e keur bifo wan sma bai en èn a no de trutru wan tranga fanowdu sani fu go luku en baka dati. Èn ooktu wan sma trow no mu tapu en fu no teki sowan prenspari kari. Efu na meester sobun kon sabi fu den pardon disi, dan a e kisi atibron èn a e gi en srafu na komando:

„’Go es’esi na den bradi strati nanga pikinpasi fu na foto, èn tyari den pôtisma, malengrisma èn breni sma èn lansma kon na inisei.’ Baka wan pisten na srafu ben taki: ’Meester, san yu ben komanderi ben feni presi, èn ete presi de ete.’ Èn na meester ben taigi en srafu: ’Go na den pasi èn den skotu presi, èn dwengi den fu kon na inisei sodati mi oso kon furu. . . . Nowan sma fu den man di ben kisi kari na tesi fu mi neti nyanyan.’”

Sortu situwâsi ben kon na fesi dya na ini na agersitori? We, „na meester” di e sreka na nyanyan de wan prenki fu Yehovah Gado, „na srafu” di e gi na kari, e agersi Yesus Kristus èn na bigi neti nyanyan e sori tapu den okasi fu den feni yu bun fu kon ini na Kownukondre fu hemel.

Den sma di ben kisi na kari fosi fu den feni den bun fu kon ini na Kownukondre, ben de morofuru den dyu kerki tiriman na ini Yesus ten. Ma denben poti na kari na wan sei. Èn sobun spesrutu fu sensi Pinksteren na ini na yari 33 G.T, wan di fu tu kari ben go na feragti èn mendriwan fu na dyu nâsi. Ma na nomru fu sma di ben teki na kari dati na wan bun fasi no ben nofo fu sari den 144.000 presi ini na hemel kownukondre fu Gado. Fu dat’ede na ini na yari 36 G.T. dri nanga hafu yari baka, na di fu dri èn laatste kari ben go na den no-dyusma di no ben besnij èn na tyari konmakandra fu den sortu sma disi go doro te na ini na di fu twenti yarhondro. Lukas 14:1-24.

◆ Sortu leri na ini sakafasi Yesus e gi?

◆ Fa wan sma di e kari fisitiman kon kan sreka wan nyanyan di abi waarde na Gado èn fu san-ede disi sa gi en koloku?

◆ Fu san-ede den pardon di den sma di ben kisi kari de slap?

◆ San na agersitori fu Yesus fu na „bigi neti nyanyan” e agersi?