Yeyses libi nanga diniwroko

Na guduman nanga Lasarus e kisi wan kenki

YEYSES e fruteri wan agersi tori fu wan guduman èn wan pôti begiman, Lasarus. Na guduman e prenki den kerki tiriman di ben kisi yeye grani nanga okasi, ala di Lasarus de wan prenki fu na gewoon pipli, den sma di e angri fu kisi yeye nnyan. Yeyses e go moro fara nanga na tori fu en fu di a e fruteri fu wan bigi kenki di e kon na ini a fasi fa sani de gi den man.

„Baka wan pisi ten now”, so Yeyses e taki, „na begiman ben dede èn den engel ben tyari en go na a borsuposisi fu Abraham. Na guduman ben dede so srefi tu èn den ben beri en. Èn na ini Hades a opo en ay, ala di a ben de na ini pen, èn a ben si Abraham farawe èn Lasarus na ini na borsu posisi fu Abraham.”

Fu di na guduman nanga Lasarus no de trutru sma ma e prenki agersi grupu fu sma, meki a de wan logika sani taki a dede fu den de so srefi tu na wan agersi fasi. San a dede fu den e agersi ofu e prenki?

Yeyses dyonsrode ben poti prakseri tapu wan kenki na ini na fasi fa sani de fu di a ben taki taki ’na Wèt èn den profeyti ben de te nanga Yohannes na Dopuman, ma taki fu a ten dati a kownukondre fu Gado e meki bekènti’. Fu dati-ede meki na guduman èn Lasarus nanga yepi fu na preyki fu Yohannes èn Yeyses Krestes e dede ini na tori fu den fositen fasi fa den ben de.

Den memre fu na sakafasi Lasarus-grupu di ben abi berow e dede te yu luku na fositen yeye fasi fu den pe den ben poti den a baka èn e kon na ini wan posisi fu a bun-ati fu Gado. Ala di fositen den ben musu luku go na den kerki leriman fu na pikinso nnyan di ben fadon fu na yeye tafra, dan den waarheid fu beybri di Yeyses e gi e sorgu now ini san den abi fanowdu. Na so fasi den e tyari den go na ini a borsu posisi ofu na bun-ati posisi fu na moro bigi Abraham, Yehovah Gado.

Na a tra sey den sma di de na guduman-grupu e tyari na atibron fu Gado kon na den tapu fu di nanga tranga-ede den weygri fu teki na kownukondreboskopu di Yeyses ben leri. Den e dede fu dati-ede fu a sey fu den fositen posisi fu bun-ati di gersi taki den ben abi. Den e taki srefi fu den na agersi fasi taki den e kisi pen. Arki san na guduman e taki:

„Tata Abraham, sori mi sari-ati èn seni Lasarus kon, so taki a kan dopu na penti fu en finga na ini watra èn kowru mi tongo, bika mi e nyan hebi pen na ini na hati faya disi.” Den faya krutu boskopu fu Gado so leki den disipel fu Yeyses ben meki dati bekènti, e pina den memre fu na guduman-grupu. Den wani taki den disipel no musu handri so tranga nanga den te den e meki den boskopu disi bekènti èn na a fasi disi e gi den wan seyker marki fu frulekti fu den pi na fu den.

„Ma Abraham e taki: ’Pikin, prakseri taki yu ben kisi yu bun sani na ini na ten fu yu libi dorodoro, ma Lasarus na a srefi fasi den takru sani. Now a e kisi dya trowstu ma yu e nyan hebi pen. Boyti ala den sani disi wan bigi olo de a mindri unu nanga yu, so taki den di wani go abra na yu, no kan èn sma so srefi tu fu drape no kan koti abra kon na wi.’”

Fa a de wan sani di fair èn di fiti taki so wan bigi kenki e kon gi na Lasarus-grupu nanga na guduman-grupu! Na kenki na ini na fasi fa sani de e kon wan tu mun a baka èn dati de nanga Pinkster na ini na yari 33 G.T., te na owru Wètfrubontu e komoto a pasi gi na nyun frubontu. A e kon sondro degedege na krin taki den disipel èn no den Fariseyman nanga tra kerki tiriman abi a bun-ati fu Gado. Na „bigi olo”, di tyari prati kon a mindri na agersi guduman nanga Yeyses disipel, e prenki fu dati-ede na regtvaardiki krutu fu Gado di kan kenki.

Na guduman e begi „Tata Abraham” moro fara fu seni Lasarus „go na a oso fu mi ppa, bika mi abi feyfi brada”. Na so fasi na guduman e fruteri taki a abi wan moro krosibey matifasi nanga wan tra ppa, di te yu luku en bun de Satan Ddibri. Na guduman e aksi efu Lasarus wani swaki den krutuboskopu fu Gado, so taki en „feyfi brada”, en kerki patna, no sa kon na ini „a presi disi fu pina”.

„Ma Abraham ben taki: ’Den abi Moses nanga den profeyti; meki den arki den.’” Iya, fu lon komoto gi pina, dan den „feyfi brada” abi fu poti soso prakseri tapu den buku fu Moses nanga den profeyti, pe sma e kon sabi Yeyses leki na Messias èn moro fara e tron en disipel. Ma na guduman e taki baka: „’Nono, Tata Abraham, ma efu wan sma opo baka fu dede go na den, dan den sa abi berow.’ Ma a e taygi den: ’Efu den no e arki Moses èn na den profeyti, dan den no sa meki den overtoygi den so srefi tu efu wan tra sma opo fu dede kon.’” Gado no sa gi spesrutu marki ofu du wondru fu overtoygi den sortu sma disi. Den sma musu leysi den Buku èn poti den na ini den libi efu den wani kisi en bun-ati. Lukas 16:16, 22-31; Yohannes 8:44.

◆ Fu san-ede na dede fu na guduman èn fu Lasarus de wan agersi sani, èn san a dede fu den e prenki?

◆ San den pina e wani taki di na guduman e ondrofeni, èn sortu sani a e aksi fu kisi lekti fu pen?

◆ San na „bigi olo” e prenki?

◆ Suma de na trutru ppa fu na guduman, èn suma de den feyfi brada fu en?