Yeyses libi nanga diniwroko

Go na ini Yudeya nanga wan wroko fu sari-atifasi

WANTU wiki a fesi, na a ten fu na inwijdingfesa na ini Yerusalem, den dyu ben pruberi fu kiri Yeyses. Fu dati-ede a ben hari go na noordsey èn a de krin taki a ben go na wan kontren no fara fu na se fu Galileya.

No so langa psa kba a ben hari go agen na zuidsey, na a sey fu Yerusalem, aladi a ben preyki na pasi na ini den dorpu fu Pereya, wan distrikt oostsey fu na Yordaan. Èn dyonsrode a ben fruteri na agersitori fu na gudu man nanga Lasarus. Now a e leri en disipel moro fara den sani di a ben leri den kba di a ben de na ini Galileya.

A e taki fu eksenpre taki a ben sa de moro bun gi wan sma „taki den ben anga wan miriston na en neki èn ben trowe en go na ini se” leki taki fu en libifasi ede wan fu den „pikinwan” fu Gado naki futu fadon. A e poti krakti a tapu tu so srefi o fanowdu a de fu gi pardon fu di a e tyari kon a krin: „Srefi efu [Wan brada] e sondu seybi tron ini wan dey na yu èn seybi tron e kon baka na yu èn e taki: ’Mi abi berow’, yu mu gi en pardon.”

Te den disipel e aksi: „Gi unu moro bribi”, Yeyses e piki: „Efu yu ben abi na bribi di bigi leki wan mosterd siri, dan yu ben sa taygi na moerbijbon taki: ’Rutu yusrefi puru èn prani go na ini se!’, èn a ben sa yere yu.” Sobun srefi nanga wan pikin bribi bigi sani kan du kon.

Moro fara Yeyses e fruteri fu wan trutru situwâsi di e sori san musu de na yoysti fasi fu wan dienstknegti fu na Almakti Gado. „Suma fu unu di abi wan srafu di e plugu ofu e luku na ipi meti,” Yeyses e taki, „te a komoto fu na firi kon a oso sa taygi en: ’Kon dya wantewante ddon na tafra?’ A no sa taygi en: ’Meki wan sani klari gi mi fu mi neti nyanyan, En weri wan fesikoki èn dini mi te leki mi klari fu nyan èn dringi, èn baka dati yu kan nyan èn dringi’? A no sa de a srafu tangi fu di a ben du den sani di a ben kisi fu du? Na so srefi tu te unu ben du ala sani san unu ben kisi fu du, musu taki: ’Wi de soso srafu. Wi ben du san wi ben musu du.’” Den dienstknegti fu Gado so bun noyti musu abi na firi taki den e buweysi Gado wan bun te den e dini en. Ala ten den musu hori na prakseri fa a de wan grani te den abi fu dini en leki frutrow memre fu en osofamiri.

A kan de syatu baka di a ben taki na agersitori disi, taki wan boskopuman e doro. Maria nanga Martha den sisa fu Lasarus, di e libi na ini Bethanië, na ini Yudeya seni en. „Masra, luku! A sma di yu e firi lobi gi en e siki”, na boskopuman e fruteri.

Yeyses e piki: „A siki disi no abi dede leki marki, ma a de fu gi Gado grani so bun taki na Manpikin fu Gado e kisi grani nanga dati”. Baka di a ben tan tu dey pe a de, dan Yeyses e taygi en disipel: „Meki wi go na Yudeya.” Ma den e taygi en na a fasi fu memre en: „Rabbi no langa psa kba den Yuda sma ben suku fu ston yu en yu e go now drape baka?”

„A no twarfu yuru fu deyleti de” Yeyses e aksi. „Efu wan sma e waka na ini na deyleti, a no e naki en futu na no wan pe, fu di a e si na leti fu na grontapu disi. Ma efu wan sma e waka na neti, a e stotu en futu na wan pe, fu di a leti no de na ini en.”

A de krin taki Yeyses e bedoel taki den ’yuru fu deyleti’ ofu a ten di Gado ben gi pasi fu du en grontapu diniwroko no psa ete èn fosi a de so fara, no wan sma kan du en ogri. A musu gebroyki dorodoro a syatu ten fu „deyleti”, di tan abra gi en, bika baka dati ’na neti’ e kon, pe en feyanti sa kiri en.

Yeyses e taki tapu disi: „Lasarus, wi mati, go rostu, ma mi e go drape fu wiki en komoto fu en sribi.”

Fu di a de krin taki en disipel e meyne taki Lasarus e rostu ini sribi èn taki disi de wan positief marki taki a o kon betre, meki den e piki: „Masra, efu a go rostu, a sa kon betre.”

Dan Yeyses e taygi den krin: „Lasarus dede, èn fu unu ede mi e prisiri taki mi no ben de drape, so taki unu mag bribi. Ma meki wi go na en.”

Thomas e frustan taki sma ben sa kiri Yeyses na ini Yudeya, ma fu di toku a ben de a winsi fu en fu hori baka gi en, meki a e gi en konpe disipel tranga: „Meki wi go tu fu dede nanga en.” So bun nanga kefar gi den libi, den disipel fu Yeyses e go nanga en na Yudeya tapu a waka disi fu sari-atifasi. Lukas 13:22; 17:1-10; Yohannes 10:22, 31, 40-42; 11:1-16.

◆ Pe Yeyses ben preyki no so langa psa kba?

◆ Sortu leri Yeyses e taki ete wan tron èn sortu trutru situwâsi a e fruteri fu sortu punt?

◆ Sortu nyunsu Yeyses e kisi, èn san a e meyne nanga na „deyleti” èn nanga na „neti”?

◆ San Thomas e bedoel te ay taki: ’Meki wi go fu dede nanga en’?