Yeyses libi nanga diniwroko
Te Lasarus e kisi opobaka
YEYSES e doro now na a memregrebi fu Lasarus makandra nanga den sma di e go nanga en. A de te yu luku en bun wan bergi-olo di wan ston e tapu a mofo. „Puru a ston,” Yeyses e taki.
Marta e meki sani fu tapu en, fu di a no e frustan ete san Yeyses o du. „Masra,” a e taki, „a musu e smeri kba, bika a dede fo dey psa kba.”
Ma Yeyses e aksi: „Mi no ben taygi yu taki yu ben sa si na glori fu Gado efu yu ben sa bribi?”
So bun den e puru na ston. Dan Yeyses e luku go na tapu èn e begi: „Tta mi e gi yu tangi taki yu ben yere mi. Mi ben sabi taki yu e yere mi ala ten; ma fu na ipi sma di tanapu lontu dya, mi ben taki so taki den ben sa bribi taki yu ben seni mi kon.” Yeyses e begi na publiki so taki den sma sa sabi taki san a ben o go du, komoto fu na krakti fu Gado. Dan a e bari taki nanga wan tranga sten: „Lasarus, kon na doro!”
Now Lasarus e kon na dorosey. En futu nanga anu tay ete nanga grebiduku èn wan duku domru en fesi. „Lusu en, èn meki a go”, Yeyses e taki.
Furu fu den dyu di ben kon fu trowstu Mariya e poti bribi na ini Yeyses te den si a wondru. Ma trawan e gwe fu fruteri den Fariseysma san psa. Den disi èn den granpristri e seti sani wantewante fu wan komakandra fu na dyu heykrutu, na Sanhedrin.
Na Sanhedrin abi Farisey- nanga Saduseysma, pe yu ben abi granpristri na ini, na granpristri di ben de e dini namku Kayafas, nanga den owru-granpristri. Den e taki: „San de gi wi fu du, bika a sma disi e du furu marki? Efu wi gi en pasi fu go so doro, dan den alamala o go bribi na ini en, èn den Romensma sa kon èn sa teki na presi fu wi nanga wi nâsi, puru gwe.”
Aladi den kerki tiriman e piki taki Yeyses ’e du furu marki’ toku den e broko den ede soso fu den eygi posisi nanga makti. Na opobaka fu Lasarus e kon spesrutu na den Saduseyma hebi, fu di den no e bribi ini na opobaka.
Kayafas di kande de wan Saduseysma e teki na wortu now èn e taki: „Unu no sabi kwetikweti noti èn unu no e prakseri taki a de fu a bun fu unu taki wan sma dede fu na bun fu na pipli èn no taki na heri nâsi kisi porib”.
Gado ben gi Kayafas disi na ini prakseri fu taki, bika na apostel Yohanes ben skrifi bakaten: „[Kayafas] ben taki disi ma no fu ensrefi.” Te yu luku en bun dan Kayafas ben meyne taki Yeyses ben musu dede fu tapu taki en (Yeyses) no ben sa broko saka na makti nanga krakti posisi fu den go moro fara. Ma so leki Yohanes ben taki dan ’Kayafas ben profeteri taki Yeyses no wwan ben musu fu dede gi na nâsi, ma so taki den pikin fu Gado ben sa tyati kon makandra’. Èn a de trutru na prakseri fu Gado taki en Manpikin dede leki wan lusuprèys gi ala sma.
Kayafas e man now fu abi so wan krakti na tapu na Sanhedrin taki den e meki plan fu kiri Yeyses. Ma Yeyses, di kande ben sabi den plan disi fu na mofo fu Nikodeymes, wan memre fu na Sanhedrin di ben firi lobi gi en, e gwe fu drape. Yohanes 11:38-54.
◆ Fu san-ede Yeyses e begi na publiki bifo a opo Lasarus baka?
◆ Fa den sma di ben de kotoygi fu na opobaka disi ben du tapu a wondru disi?
◆ San e sori na ogri fasi fu den memre fu na Sanhedrin?
◆ San ben de na prakseri fu Kayafas, ma fu taki sortu profeytitori Gado ben kobroyki en?