Kapitel 92
Tin gwasiman e kon betre na a lasti waka di Jesus e teki foe go na Jerusalem
JESUS man meki taki a Sanhedrin no abi boen bakapisi, te den e proeberi foe kiri en, foe di a gowe libi Jerusalem èn e teki waka go na Efra-im, wan foto di de kande soso wan sani foe 24 kilometer noord-owstoesei foe Jerusalem. Drape, farawe foe den feanti foe en, a e tan nanga den disipel foe en.
Ma a ten foe a Paska foe 33 G.T. e kon krosibei, èn a no e teki langa fosi Jesus de na pasi baka. A e teki waka pasa na ini Samaria, e go na Galilea. Disi na a lasti leisi bifo a dede foe en, taki a e kon na a kontren disi. Ala di a de na Galilea, dan kande en nanga den disipel foe en, e waka makandra nanga trawan di e go na Jerusalem foe hori a Paska. Den e teki a pasi di e pasa na ini a distrikt Perea, owstoesei foe Jordan liba.
Na a bigin foe a waka, te Jesus e kon na ini wan dorpoe na Samaria noso na Galilea, dan tin man di abi gwasi, e waka kon miti en. Na ogri siki disi safrisafri e njan den pisi foe wan sma skin poeroe — en finga, en foetoefinga, en jesi, en noso nanga en mofoboeba. Foe no meki tra sma kisi a siki disi, meki a Wet foe Gado e taki foe wan gwasiman: „A moesoe tapoe en snor èn bari taki: ’Mi no krin, mi no krin!’ Ala den dei di a plaag de na en tapoe, a no sa de krin. . . . A moesoe libi aparti foe tra sma.”
Den tin gwasiman e hori densrefi na den skotoe di a Wet e poti gi gwasiman èn den e tan farawe foe Jesus. Ma tokoe den e bari nanga tranga sten: „Jesus, Leriman, sari foe wi!”
Te Jesus e si den e tanapoe farawe, a e komanderi den: „Go èn sori oensrefi na den priester.” Jesus e taki disi, foe di a Wet foe Gado e gi den priester primisi foe froeklari foe gwasiman di kon betre foe a siki foe den, taki den betre. Na so fasi den sortoe sma disi e kisi pasi foe go libi baka na den gosontoe sma.
Den tin gwasiman abi a froetrow na ini a makti foe Jesus foe doe wondroe. Foe dati ede den e lon go na den priester, ala di den no betre ete. Na pasi, a bribi foe den na ini Jesus e kisi pai. Den e bigin si èn firi taki den kon gosontoe baka!
Neigi foe den gwasiman di kon krin, e waka den pasi foe den, ma a tra gwasiman, wan Samariaman, e drai go baka foe soekoe Jesus. Foe san ede? Foe di a de nanga tangi srefisrefi foe san pasa nanga en. A e prèise Gado nanga wan tranga sten, èn te a e feni Jesus, a e fadon na en foetoe, e taki en tangi.
Ne Jesus e taki: „A no tin gwasiman ben kon krin? Pe den neigi trawan de dan? No wan foe den ben drai kon baka foe gi Gado glori, leki a man disi wawan, di de foe wan tra nâsi?”
Dan a e taigi a Samariaman: „Opo tanapoe èn waka joe pasi; joe bribi meki joe kon betre.”
Te wi e leisi taki Jesus ben meki den tin gwasiman kon betre, dan wi moesoe poti prakseri na tapoe a leri di wi kan teki foe na aksi foe en: „Pe den neigi trawan de dan?” A ben de wan serjoesoe fowtoe di den neigi man ben meki foe no sori tangi. Wi sa sori taki wi de nanga tangi neleki a Samariaman, foe den sani di wi e kisi foe Gado, pe joe abi na ini toe a pramisi di wi kan de seiker foe dati, taki wi kan kisi têgo libi na ini Gado njoen grontapoe? Johanes 11:54, 55; Lukas 17:11-19; Lefitikus 13:16, 17, 45, 46; Openbaring 21:3, 4.
▪ Fa Jesus e meki taki den no abi boen bakapisi te den e proeberi foe kiri en?
▪ Pe Jesus e teki waka go baka dati, èn pe a abi na prakseri foe go?
▪ Foe san ede den gwasiman e tanapoe farawe, èn foe san ede Jesus e taigi den foe go na den priester?
▪ Sortoe sani wi kan leri foe na ondrofenitori disi?