Yeyses libi nanga diniwroko

Tin gwasiman e kon betre na a kriboy waka fu Yeyses go na Yerusalen

YEYSES meki na muyti fu na Sanhedrin no go doro fu kiri en fu di a e gwe libi Yerusalen èn e waka go na Efraim, wan foto di kande ben ddon soso sowan 24 kilomeytri nort owstu fu Yerusalen. Drape, farawe fu feyanti, a e tan nanga en disipel.

Ma na ten fu na Paska ini 33 G.T. e kon krosibey èn Yeyses heri esi de baka na pasi. A e waka psa Samariya go na Galileya, Disi na a kriboy tron bifo a dede taki a e go na a kontren disi. Te en nanga en disipel de na ini Galileya, dan seyker a de so taki den e go waka makandra nanga trawan di e go na Yerusalen fu hori na Paska. Den e teki a pasi di e psa na distrikt Pereya, owstusey fu na Yordan.

Na a bigin fu na waka, te Yeyses e go na ini wan dorpu na ini Samariya ofu na ini Galileya, dan tin man e waka kon miti en di abi gwasi. Na ogri siki disi safrisafri e nyan den pisi fu wan sma skin — en finga, en futufinga, en yesi, en noso èn en mofobuba. Fu kibri tra sma meki den no kisi a siki disi, meki a Weti fu Gado e taki fu gwasisma: „A musu tapu en snòr èn bari: ’Mi no krin, mi no krin!’ Ala den dey di na plaag de tapu en, a no sa de krin. . . A musu libi aparti fu tra sma.”

Den tin gwasiman e hori den srefi na den skotu di na Weti e poti gi gwasiman èn e tan farawe fu Yeyses. Ma toku den e bari nanga tranga sten: „Yeyses, leriman, abi sari-ati nanga wi!”

Te Yeyses e si den tanapu farawe, a e bari taygi den: „Go na den pristri fu den si unu.” Yeyses e taki disi fu di Gado weti gi den pristri na makti fu fruklari gwasiman di kon betre fu na siki fu den, taki den betre. Na so fasi den sortu sma disi e kisi pasi fu kon de baka na ini na konpani fu gosontu sma.

Den tin gwasiman e poti frutrow na ini na makti fu Yeyses fu du wondru. Fu dati ede den e waka esi-esi go na den pristri, awinsi den no betre ete. Na pasi na bribi fu den e kisi pay. Den e bigin si èn firi taki a gosontu fu den e kon bun.

Neygi fu den gwasiman di kon krin e waka den pasi gwe ma na tra gwasiman, wan Samariyaman, e go baka fu suku Yeyses. Fu san-ede? Fu di a de tangi srefi fu san psa nanga en. A e preyse Gado nanga wan tranga sten èn te a e feni Yeyses a e fadon na en futu èn e taki en tangi.

Yeyses tapu disi e taki: „A no tin sma ben kon krin? Pe den tra neygi de? No wan sma ben de di ben dray baka fu gi Gado grani leki na man disi fu wan tra nâsi?”

Dan a e taygi na Samariyaman: „Opo tanapu èn go; yu bribi ben meki yu kon betre.”

Te wi e leysi taki Yeyses ben meki den tin gwasiman kon betre, dan wi musu teki na leri na ati di de na ini a aksi fu en: „Pe den tra neygi de dan?” Na tangi di den neygi no ben sori de wan seryusu misi. Wi sa sori tangi neleki na Samariyaman gi den sani di wi e kisi fu Gado, èn so srefi tu fu na seyker pramisi fu têgo libi na ini na nyun grontapu? Yohanes 11:54, 55; Lukas 17:11-19; Leviticus 13:16, 17, 45, 46; Openbaring 21:3, 4.

◆ Fa Yeyses e meki den muyti fu kiri en no go doro?

◆ Sortu kontren Yeyses e waka psa moro fara èn pe a abi na prakseri fu go?

◆ Fu san-ede na gwasiman e tan tanapu farawe, èn fu san-ede Yeyses e bari taygi den fu go na den pristri?

◆ Sortu leri wi kan teki fu na ondrofeni disi?

[Prenki di e tapu heri bladzijde 13, 14]