Yeyses libi nanga diniwroko

Na agersitori fu na trow-oso

YEYSES ben puru a bere fu den sabiman fu Buku nanga den granpristri kon na doro nanga yepi fu tu agersitori èn den wani kiri en. Ma Yeyses no kba ete srefisrefi nanga den. A e fruteri den morofara ete wan agersitori èn e taki:

„Na kownukondre fu heymel tron leki wan sma, wan kownu, di ben sreka wan trow-oso gi en manpikin. Èn a ben seni en srafu go fu kari den sma di ben kisi kari fu kon na a trow-oso, ma den no ben wani kon.”

Yehovah Gado na a Kownu di e seti sani gi wan trow-oso fu en Manpikin, Yeyses Krestes. Te fu kba dan en bruid fu 144.000 salfu bakaman sa kon de nanga en na ini heymel. Den onderdaan fu na kownu na den Israèl sma, di ini 1513 bifo G.T., di den ben tyari den go na ondro na Wètfrubontu, ben kisi na okasi „fu tron wan kownukondre fu pristri”. Na so fasi den ben tron biginbigin na a ten dati sma di ben kisi kari fu kon na a trow-oso.

Ma na fosi kari na den sma di ben kisi kari fu kon ben feni presi na ini na mofoyari fu 29 G.T., di Yeyses nanga en disipri (den srafu fu na kownu) ben bigin nanga a Kownukondre preykiwroko fu den. Ma den Israèl sma na skinfasi, di ben kisi na kari ini na ten fu 29 G.T. te 33 G.T. nanga mofo fu den srafu, no ben wani kon. Fu dati-ede Gado ben gi na nâsi fu sma di ben kisi kari fu kon ete wan okasi, so leki Yeyses e tyari kon na krin:

„Agen a ben seni tra srafu go èn a ben taki: ’Taygi den sma di ben kisi kari fu kon: „Luku! Mi sreka mi brekten nnyan, den srakti den burukaw èn fatu meti fu mi èn ala sani klari. Kon na a trow-oso.”’” Na di fu tu nanga lasti kari disi na den sma di ben kisi kari fu kon ben bigin nanga Penk-stri fu 33 G.T. di santa yeye ben kanti kon tapu Yeyses bakaman. Na kari disi fu kon ben tan go na den te 36 G.T.

Ma a moro bigi pisi fu den Israèl sma dati ben poti a kari dati a wan sey. „Sondro fu broko den ede den ben hari gwe,” Yeyses e tyari kon na krin, „na wan go na en eygi gron, na trawan na en handeltori; ma den trawan ben grabu en srafu, ben handri den sondro fu syen èn ben kiri den.” „Ma,” na so Yeyses e go doro, „na kownu ati ben kon bron èn a ben seni en legre èn ben kiri den kiriman dati èn ben sutu faya gi na foto fu den.” Disi ben psa na ini 70 G.T. di den Rome sma ben bron Yerusalen plata èn ben kiri den kiriman dati.

Yeyses e tyari kon na krin san ben psa disiten: „Ne [na kownu] ben taygi en srafu: ’Na trow-oso sreka kba, ma den sma di ben kisi kari fu kon no ben warti fu en. Go fu dati-ede na den pasi di e waka go dorosey fu na foto èn kari suma yu feni tu fu kon na a trow-oso.’” Den srafu ben du disi èn „na zaal fu na trow ceremonie ben furu nanga den di ben ddon na tafra”.

Na tyari kon makandra fu fisitiman di den ben miti na den pasi dorosey fu na foto pe den sma di ben kisi kari fu kon ben libi, ben bigin na ini 36 G.T. Na legre edeman Cornelius fu Rome nanga en famiriman ben de den fosi no-dyu sma di no ben besnij èn di ben tyari kon makandra. Na kari fu den no-dyu disi, alamala sma di ben teki na presi fu den sma di biginbigin ben weygri fu gi yesi na a kari, go doro te na ini a di fu twenti yarihondro disi.

Èn na ini wi di fu twenti yarihondro na zaal fu na trow ceremonie e kon furu. Yeyses e fruteri san e psa dan, te a e taki: „Di na kownu ben kon na inisey fu luku den fisitiman, a ben si drape wan sma di no ben weri wan trow-oso krosi. Fu dati-ede a ben taygi en: ’Mati, fa yu kon dya na inisey sondro fu weri wan trow-oso krosi?’ A no ben sabi fu taki noti. Dan na kownu taygi en dinari: ’Tay en anu nanga futu en trowe en go na ini na dungru na dorosey. Drape a sa krey èn kaw tifi.’”

A man di no ben weri trow-oso krosi, e prenki den falsi kresten fu na krestenhèyt. Gado noyti ben erken den leki sma di abi na yoysti marki fu kon sabi den leki den yeye Israèl sma. Gado noyti salfu den leki Kownukondre erfgenaam nanga santa yeye. Fu dati-ede den e trowe den go na ini dungru na dorosey, pe pori e wakti den.

Yeyses e tapu en agersitori nanga den wortu: „Bika furu sma kisi kari fu kon, ma pikinso sma den teki.” Iya, furu sma fu na nâsi Israèl ben kisi kari fu tron memre fu Krestes bruid, ma soso wantu Israèl sma na skinfasi den teki. Na moro bigi pisi fu den 144.000 fisitiman di kisi na heymel payman sori taki den de no-Israèl sma. Mateyus 22:1–14; Exodus 19:1-6; Openbaring 14:1-3

◆ Suma den ben kari biginbigin gi na trow-oso, èn oten den ben kisi na kari?

◆ Oten den sma di ben kisi kari ben kisi fu na fositron wan kari, èn suma ben de den srafu di den ben kobroyki fu kari den?

◆ Oten na di fu tu kari ben du èn suma den ben kari bakaten?

◆ Suma na man di no abi trow-oso krosi e prenki?

◆ Suma na den furu sma di ben kisi kari èn den pikinso sma di den ben teki?