Yeises libi nanga diniwroko

Banawtu ini na dyari

TE Yeises kba begi, dan en nanga den 11 kotrow apostru fu en e singi prèisesingi gi Yehovah. Baka dati den e saka komoto fu na tapusodro, e go na ini na kowru dungru fu na neti, èn e koti na Lagipresi fu Kidron abra fu go na Betania. Ma te den de a pasi, den e stòp na wan fu den presi di den lobi, na dyari fu Gethsemane. Na presi disi de na tapu noso na ini na birti fu na Olijfbergi. Furutron Yeises ben miti dyaso nanga den apostru fu den a mindri den olijfbon.

A e libi aiti fu den apostru na baka — kande krosibei fu na presi fu go na ini na dyari — èn e taigi den: „Go sidon dya, aladi mi e go yana fu begi.” Dan a e teki den dri trawan nanga en — Petrus, Yakobus nanga Yohanes èn e waka go moro fara na ini na dyari. Yeises e sari èn a e firi tumusi bruya. „Mi sili de nanga dipi sari, iya, te fu dede,” a e taigi den. „Tan dyaso èn tan na ai nanga mi.”

Te Yeises e waka pikinso moro fara, a e trowe en srefi na gron èn nanga en fesi na gron a e bigin begi fayafaya: „Mi Tata, efu a kan, meki a beker disi wai komoto fu mi. Ma, no so leki mi wani, ma so leki yu wani.” San a wani taki? Fu san-ede a de „nanga dipi sari, te fu dede”? A e hari en srefi puru fu na bosroiti fu en fu dede èn fu sorgu gi na frulusupaiman?

Kwetikweti! Yeises no e aksi fu dede no kiri en. Srefi na prakseri fu wai pasi gi wan ofrandi dede, so leki Petrus ben aksi en wan leisi fu du, na wan tegu sani gi en. Na presi fu dati, a de ini banawtu fu di a frede taki na fasi fa a o dede heri esi — leki wan wisiwasi ogriman —  sa tyari syen kon tapu na nen fu en Tata. A sabi now taki ini wantu yuru den sa spikri en na wan postu leki na moro ogri sma di de — wan sma di lei gi Gado! Disi e bruya en tumusi.

Baka di a begi bun langa dan Yeises e drai kon baka, èn e feni den dri apostru e sribi. A e luku Petrus èn e taki: „Unu, no ben kan tan wán yuru nanga mi na ai? Tan na ai èn begi doronomo, fu unu no kon na ini tesi.” Ma fu di a sabi taki den ben de ondro druk èn taki a lati, meki a e taki: „A no de fu taki, taki na yeye wani, ma na skin swaki.”

Dan Yeises e waka gwe fu wan di fu tu leisi èn e begi tranga efu Gado wani teki „na beker disi” puru fu en, dati wani taki na porsi noso na wani di Gado gi en fu du. Te a e drai kon baka, dan agen a e feni den dri e sribi aladi den ben musu begi fu no kon na ini tesi. Te Yeises e taki nanga den, den no sabi san fu piki.

Te fu kba, Yeises e waka fu wan di fu dri leisi so fara leki te yu iti wan ston gwe, èn nanga kindi na gron èn nanga tranga babari èn watra-ai, a e begi: „Tata, efu yu wani, teki na beker disi puru fu mi.” Yeises e firi bun furu pen fu di na dede fu en leki wan ogriman sa tyari syen kon na tapu na nen fu en Tata. Iya, fu sma kragi yu leki wan leiman — wan sma di fluku Gado — na wan sani di pikinmoro de tumusi furu fu tyari!

Toku Yeises e go doro fu begi: „No san mi wani, ma san yu wani.” Nanga sakafasi Yeises e poti en srefi na ondro Gado wani. Na a pisiten disi, wan engel fu hemel e sori en srefi èn e gi en tranga nanga wantu wortu di e gi deki-ati. Kande na engel e taigi Yeises taki na Tata fu en ben feni en bun.

Ma toku ete, fa a de wan bigi hebi di de na tapu den skowru fu Yeises! En eigi têgo libi èn di fu na heri libismafamiri de ini kofar. Na emotionele druk de kofarlek bigi. Fu dati-ede Yeises e go doro fu begi nanga moro faya, èn a sweti fu en e tron leki dropu brudu di e fadon na gron. „Aladi disi de wan tumusi ongewoon sani di e sori en srefi,” The Journal of the American Medical Association e taki, „toku sweti nanga brudu . . . kan sori en srefi te sma de ini hebi emotioneel situwâsi.”

Baka dati, Yeises e drai kon baka na den apostru fu en fu na di fu dri leisi, èn e feni den ete wanten e sribi. Den weri potopoto fu dipi sari ede. „Na wan ten leki disi yu e sribi èn yu e rostu!” a e taki. „A nofo! Na yuru doro! Luku! Den sa tori na Manpikin fu libisma èn gi en abra na ini na anu fu sondari. Opo, meki wi gwe. Luku! Na toriman fu mi kon krosibei.”

Aladi a e taki ete, dan Yudas Iskariòt e kon krosibei, nanga wan bigi ipi sma di e tyari flambo nanga lanpu nanga fetisani. Mateyus 26:30, 36-47; 16:21-23; Markus 14:26, 32-43; Lukas 22:39-47; Yohanes 18:1-3; Hebrew sma 5:7.

◆ Pe Yeises e tyari den apostru go, baka te den gwe libi na tapusodro, èn san a e du drape?

◆ San den apostru e du aladi Yeises e begi?

◆ Fu san-ede Yeises de na ini bigi banawtu èn sortu sani a e begi Gado?

◆ San a e sori, taki na sweti fu Yeises e tron leki dropu brudu?