Jesus libi nanga diniwroko

Na ini a Inisei djari a e strei taki a no sabi en

BAKA DI Petrus nanga Johanes gowe libi Jesus ini a djari foe Getsemane èn lon gowe nanga den tra apostel foe di den frede, den stòp foe lon gowe èn e waka go na Jesus baka. Kande den kon miti Jesus di den e tjari en go na a oso foe Anas. Te Anas e seni en go doro na a Hei Priester Kajafas, Petrus nanga Johanes e waka boen fara na den baka, so leki fa a e sori, nanga toe ati, foe di den frede gi den eigi libi èn foe na dipi broko-ede foe den gi san o pasa nanga a Masra foe den.

Di den doro na a bigi oso foe priester Kajafas, Johanes man pasa go na ini a inisei djari, foe di a de wan sma di a hei priester sabi. Ma Petrus moesoe tan tanapoe na a doro na dorosei. Ma heri esi Johanes drai kon baka èn e taki nanga na waktiman, wan oema foetoeboi, èn Petrus e kisi primisi foe go na inisei.

A kon kowroe now, èn den dinari nanga den ofsiri foe na hei priester meki wan faja foe krofaja. Petrus e go sidon na den, foe tan waran ala di a e wakti na bakapisi foe na kroetoe di den e kroetoe Jesus. Drape, ini na leti foe na krin faja, na waktiman di ben meki Petrus kon na inisei, e si en moro betre. „Joe ben de toe nanga Jesus, na Galilea sma!” na oemapikin e bari taki.

Foe di a skreki taki den kon sabi en, meki Petrus e taki a fesi ala den sma, taki a no sabi Jesus noiti. „Mi no sabi en èn mi no e froestan san oenoe e taki”, a e taki.

Baka dati Petrus e go na dorosei krosibei foe na prasi doro. Drape, wan tra oemapikin e si en èn so srefi disi e taigi den sma di e tanapoe krosibei: „Na man disi ben de nanga Jesus, na Nasaret sma.” Agen, Petrus e taki, taki a no de so, èn e sweri: „Mi no sabi na man!”

Petrus e tan na ini a inisei djari, ala di a e proeberi someni leki a kan foe den no si en. Kande tapoe a momenti disi a e skreki foe na bari di wan kakafowroe e bari ini a froekoe mamanten doengroe. Disiten, na kroetoe di den e hori foe firi Jesus mofo e go doro srefisrefi, èn so leki fa a sori, den e hori en na ini wan pisi foe na oso na tapoesei foe na inisei djari. Kande Petrus nanga den trawan e wakti na gron foe si na go-kon foe den difrenti kotoigi di den e tjari go na inisei foe gi wan froeklari.

Wan sani foe wan joeroe pasa, sensi den ben kon sabi Petrus foe na di foe lasti tron leki wan kompe foe Jesus. Now wantoe foe den sma di e tanapoe lontoe en, e kon na en èn e taki: „Seiker joe na wan foe den toe, foe di, te joe loekoe en boen, na tongo di joe e taki, e tori joe.” Wan sma ini na groepoe, na wan famiri foe Malkus, di Petrus ben koti a jesi foe en poeroe. „Na joe mi ben si nanga en na ini a djari, a no so?” a e taki.

„Mi no sabi na man!”, Petrus e froeklari fajafaja. Foe taki en leti, foe di a e floekoe èn e sweri foe na afersi ede, san wani taki, taki a e kari ogri kon na ensrefi tapoe, efoe a no e taki san troe, a e proeberi foe overtoigi den taki den alamala de fowtoe.

Leti fa Petrus taki foe na di foe dri tron taki a no sabi Jesus, wan kakafowroe e bari. Èn na a momenti dati, Jesus, di so leki fa a e sori ben kon na dorosei na tapoe wan balkon na tapoesei foe na inisei djari, e drai èn e loekoe en. Wantronso, Petrus e prakseri san Jesus ben taki soso wan toe joeroe a fesi na ini a kamra na a tapoesodro: „Bifosi wan kakafowroe bari toe leisi, dan joisti joe sa taki dri tron taki joe no sabi mi.” Foe di a hebi foe na sondoe foe en e moro en srefisrefi, meki Petrus e go na dorosei èn e krei nanga bigi sari.

Fa disi ben kan pasa? Fa Petrus ben kan taki dri tron so sjatoe baka makandra taki a no sabi en Masra, baka di a ben de so seiker foe na tranga foe en na jeje fasi? A no abi misi taki na situwâsi kon onfroewakti na Petrus tapoe. Den e drai na waarheid èn den e prenki Jesus leki wan wisiwasi ogriman. San de reti den e meki a sori leki a kroektoe, na wan di no abi fowtoe den e meki a sori leki a abi fowtoe. So boen kande foe na hebi druk foe den omstandigheid disi, meki Petrus komoto na balansi. Wantronso na joisti firi foe en foe loyaliteit kon broeja. Leki wan sari bakapisi gi en a frede foe en gi libisma, e lan en. Meki a de so taki disi noiti no pasa nanga oenoe! Mateus 26:57, 58, 69-75; Markus 14:30, 53, 54, 66-72; Lukas 22:54-62; Johanes 18:15-18, 25-27.

▪ Fa Petrus nanga Johanes man pasa go na ini a inisei djari foe na hei priester?

▪ San e pasa na ini a oso ala di Petrus nanga Johanes de na ini a inisei djari?

▪ Omeni tron wan kakafowroe e bari, èn omeni tron Petrus e taki a no sabi Krestes?

▪ San a wani taki, taki Petrus e floekoe èn e sweri?

▪ San e meki Petrus e taki, taki a no sabi Jesus?